21/10/2013
و لقد بلغ الســــــــــيل الزبى ...
اعـــــــــــــلان لطلبة كلية التربية جامعة طرابلس عن اعتصام يوم الثلاثاء الموافق 22 -10-2013 ...
نحن طلبة الكلية نعلن اعتصامنا ضد الامن المكلف بالكلية, و ذلك نتيجة لتخاذلهم في اداء واجبهم بعد احداث اليوم...
يعني خلي ندوا بالعامية ...معقولة الامن سايب لهالدرجة ,,يخش واحد رديف للكلية يضرب رصاص و يتلفظ بالفاظ نابية و الامن مايحركش ساكن ...
ان شاء الله حني جايين نقروا و لا ننضربوا و ننهانوا ...
يوم الخميس 10-10 خش طالب بساطور و جماعة الامن مقعمزين .. مر قدامهم .. كل اللي طلع منهم ,,قعد واحد من الامن ينادي فيه "تعال جاااي" ..يا راجل تو هو خلاص بيسمع الكلام طول و بيجيك ,,تشوف فيه خاش والع و ناوي شر ,,تنوض تلحقه و تشده مش تعااال جاي ...
و فوقها واحد تاني من الطلبة يطلع مسدس و يعطيه لصاحبه باش يدسه في السيارة ...
ماشاء الله و الله جايين يتعلموا بمسدساتهم ....ايه التحضر اللي حني عايشين فيه ....
يعني من الاخير ,,السيل مش وصل الزبى و بس ..لا وصل" السمي" ...
فوق من التجاوزات اللي يدير فيها الامن و لا خلينا نقولوا "البعض منهم "
اللي تلقاه واقف مع بنت من صبح ربي و اللي شادها لقني في البركيدجوا و اللي يكحل في عيونه لين عيونه قريب يطلعوا ,,فوقها اللي ضرب رصاص اليوم ماتشدوشي ,,,, تي وين يا !!
فلذلك نبوا حني كطلبة نوقفوا يد وحدة و نديروا الاعتصام ... و باش مايقولوش تضيعوا عالطلبة في محاضرات ..خلوا الاعتصام مع الساعة 11:30 " الحادية عشر و ثلاثون دقيقة " اهو كتبناها حتى الكتيبة :P
يعني معليشي لو الدكاترة ضحوا بنص ساعة من اخر المحاضرة ,,في الاخير هدفنا واحد "امن الكلية" ...
دهشت و اني نكتب ,,لكن و الله من الحرقة متاع اليوم .... تي شن هدا ... اليوم و لله الحمد ماجيت في حد رصاصة ..لكن كان سكتنا مرات غدوا لا سمح الله نبدوا غير في العزوات ....
و اخيرا نقول اللهم احفظ البلاد و العباد ... و ربي يكفينا شر الجهلة و المتخاذلين ....
Esra
