Geschichtsfrënn vun der Gemeng Miersch

25/11/2025

MERCI ... 💖

Am Numm vun de Geschichtsfrënn vun der Gemeng Miersch an de Guiden a Scouten Miersch- Grupp St Michel an der Gemeng Miersch wollte mer all dene Leit Merci soen, déi eise neie Commemoratiounsfilm „Lager 103 - De Feind am Duerf (Deel 1)“ de leschte Sonndeg an de Mierscher Theater kucke komm sinn. Mir waren iwwerwältegt vun Ärer Präsenz.

An eisem Fotoreportage, zesummegestallt vum Oli Frisch, fannt der ee klenge Réckbleck op all déi Performancen vum leschte Sonndeg.

Opgronnt vun der grousser Nofro wou een de Film demnächst a Kinosambiance ka kucken, deele mer Iech mat dat déi nächst Kinos-Séance de 7. Dezember um 17h00 an um 18h00 vum LAGER 103 zu Koler am Kinoler gewise gëtt.

Merci fir Är Ënnerstëtzung a bis ganz geschwënn.

D'Geschichtsfrënn vun der Gemeng Miersch.

15/11/2025

Rëckbléck op Kommemoratiounsdag 2025

https://www.youtube.com/watch?v=wzVnsyEzG-0

Exzellente Reportage iwwert d'Journée de la Commémoration Nationale zu Miersch op Miersch TV. De Felix Steichen erklärt d'Wichtegkeet vu Kommemoratiounsdag a wéi et duerch ee Schiedspill an der Kierch zum éischte Kommemoratiouns-Film komm ass.

a Scouten Miersch- Grupp St Michel

24/10/2025

Mir erënneren eis, fir datt mer net vegiessen!
Journée de la Commémoration Nationale 2025

Och dëst Joer hu mir eis nees op Commemoratiounsdag virun den Affer vum Nationalsozialismus vernäipt. Um "Monument aux Morts" virun der Mierscher Kierch stinn d'Nimm vun dene Mënschen, déi hiert Liewen duerch een onbaarmhäerzegen Naziregimm verluer hunn.

Vill Leit haten sech och dëst Joer nees wärend der "Journée de la Commémoration Nationale" virum Monument versammelt, fir mat hirer Präsenz déi 48 Affer aus der Gemeng Miersch ze éieren. No engem feierleche Gedenkgottesdéngscht hunn d’Vertrieder vun der Gemeng Miersch, vun den Zwangsrekrutéierten an der LPPD Blummenarrangementer néiergeluecht. Dëst a Begleedung vu jonke Scouten. Et war ee weideren, rouege Moment vu Respekt a Besënnung op dësem Dag.

De Paschtouer Felix Steichen huet d’Zeremonie geleet a mat nohaltege Wierder un d’Liewe vun de Verstuerwenen erënnert. Am Kader vum Gedenkgottesdéngscht konnt hien och de Film „LAGER 103 – De Feind am Duerf“ virstellen, deen d’Schicksal vun der Joffer Catherine Arendt an hirer Famill vu Recken bei Miersch erzielt.

Dëse Film, den all Joer duerch den Asaz vun de Guiden a Scouten Miersch- Grupp St Michel (LGS) an de Geschichtsfrënn vun der Gemeng Miersch realiséiert ka ginn, reit sech mëttlerweil an eng ganz Serie vun de Commemoratiounsfilmer an. Et ass dëst eng flott, intergenerationell Zesummenaarbecht, déi weist, wéi wichteg et ass, Erënnerung weiderzeginn.

D'Geschichtsfrënn vun der Gemeng Miersch.

15/10/2025

https://www.youtube.com/watch?v=WU59uKFynn8

📺 Nei Emissioun op Miersch TV

An der neier Episod vu Miersch TV geet et ëm Mierscher Lieshaus, eng wichteg Institutioun an eiser Gemeng an ëm eise neie Kommemoratiounsfilm LAGER 103. Dëst Joër erënnert de Film un déi däischter Episod vun der Ëmsidlung aus de Joeren 1942 - 1945. Een dramatescht Kapitel aus eiser Geschicht, dat quasi komplett an de Vergiess geroden ass.

Besonnesch am Fokus steet dëst Joer d'Famill Arendt vu Recken, déi als éischt Famill hei zu Lëtzebuerg wärend dem Zweete Weltkrich ëmgesidelt gouf. De Film beliicht dobäi och dat tragëscht Schicksal vun der Joffer Catherine Arendt déi hir Famill an d‘Ëmsidlung begleed huet a weist wéi d'Famill gelidden huet, wéi se hiert Doheem geholl kritt a verdriwwe gëtt. De Paul Kohn erklärt am Reportage vu Miersch TV d'Hannergrënn an d' Biller zum Film, den d'Erënnerung un dës schlëmm Zäit soll lieweg halen.

➡️ Kuckt eran op Miersch TV oder online um Site vun der Gemeng Miersch.

Wann Dir zur Erënnerung vun eiser Geschicht wëllt bäidroen, dann deelt dëse Message wegl. D'Geschichtsfrënn vun der Gemeng Miersch an d'Guiden a Scouten Miersch- Grupp St Michel soen Iech Merci.

An dëser Emissioun vu MIERSCH TV ware mir op Besuch am Mierscher Lieshaus. Hei gouf mat der neier Responsabel, Dana Hempel, iwwer d’Offer an d’Zukunft vun ei...

01/10/2025

🌙 Mersch by night
Een historësche Spazéiergang duerch d'Däischtert.

Rezent hunn d’Geschichtsfrënn vun der Gemeng Miersch nees op hiren traditionelle Spazéiergang duerch d'Däischtert invitéiert.

Während dëser spannender "randonnée nocturne" konnten ca. 30 historësch interesséiert Frënn vun der Mierscher Geschicht aalt Gemaier mat hieren abenteuerlechen Geschichten, Ruinen an hire Legenden entdecken e.a. dat mëttelalterlecht Schlass an de Mechelstuerm, d’Draacheskulptur op der Méchelsplaz an déi geheimnisvoll Réimervilla. Ënnert hinnen och Memberen vun der asbl "Mir wëllen Iech ons Heemecht weisen" déi schonn zënter 2015 besteet an déi, déi kulturell Integratioun vu Flüchtlingen ënnerstëtzt.

Duerch de Parcours huet de Guy Pauly, Präsident vun de Geschichtsfrënn vun der Gemeng Miersch gefouert. Hien gouf dobäi vum Felix Steichen (Kierch) an dem Ern. Kohn (Méchelstuerm an Monument aux Morts) ënnerstëtzt.

📸 Weider Impressiounen fannt Dir hei ... 👇

16/09/2025

Ee flotte Konscht- an Handwierksmaart ...
.. gouf et och dëst Joer nees um Eenelter Maart zu Recken bei Miersch ze entdecken. Mat eisem Stand ware mir do vertrueden a mir soen Iech Merci fir Ären Intressi un der historëscher Geschicht vun der Gemeng Miersch.

D'Geschichtsfrënn vun der Gemeng Miersch.