21/08/2020
ඒක දැක දැක නොකියවා යනවා නම්.. ඔබ ඔබටම කරන්නේ ලොකු වැරැද්දක්.
මේ ලිපිය ලංකාවේ සෑම කෙනෙක්ම කියවනවා නම් ඉතාම වටිනවා.. මොකද ඒ තරමට මේක වටිනා ලිපියක්.. අනිවාර්යයෙන්ම කියවන්න.. share කරන්න..
පිළිකා කාරක තොග පිටින් දැන් කඩවල් වලින් අහුවෙන්න පටන් අරන්.. මේකප් සම්බන්ධයෙනුත් නව නීති ගේන්න යනවා කියනවා
රූපලාවණ්ය ආලේපන භාවිත කිරීමේ ප්රධාන අරමුණු ලෙස සම පිරිසිදු කිරීම හා ශරීරයේ හැඩයට හෝ අභ්යන්තර ක්රියාවලින්ට හානියක් නො වන අයුරින් යමකු ගේ පෙනුම සිත්ගන්නාසුලු කිරීම දැක්විය හැකි ය. දැනට ලොව පුරා පවතින රූපලාවණ්ය නිෂ්පාදන ප්රධාන අංශ පහකට (05) වෙන් කර දැක්වෙන අතර, ඒවා නම් චර්ම ආරක්ෂක (Skin care), කේශ ආරක්ෂක (Hair care), අංග රචක (Makeup), පිරිසිදුකාරක (Tolietries) හා සුවඳ විලවුන් (Cosmetics) වේ. පසුගිය වර්ෂ කිහිපය තුළ ලෝක ආර්ථිකයට සැලකිය යුතු දායකත්වයක් රූපලාවණ්ය නිෂ්පාදන තුළින් ලැබී ඇති බව වාර්තා වී ඇත. රූපලාවණ්ය ආශ්රිතව දිනෙන් දින දියුණු වන නව තාක්ෂණික නව්යකරණයන් තුළ සම වියපත් වීමට අදාළ ජාන පෙළගැස්ම පිළිබඳ අත්හදා බැලීම් ද ඇතුළත් වේ.
මේ වන විට යුරෝපීය රටවල් රූපලාවණ්ය නිෂ්පාදන ලෝක ආර්ථිකයේ පළමු තැන ගෙන ඇති අතර, ආසියාතික රටවලට හිමි ව ඇත්තේ එහි දෙවැනි ස්ථානයයි. කෙසේ වුව ද ආසියාතික රටවල තරුණ කාන්තාවන් අතර සම රැකගැනීමේ හා දීප්තිමත් සමක් ලබාගැනීම පිණිස වූ රූපලාවණ්ය සම්බන්ධව පවතිනුයේ දැඩි නැඹුරුවකි.
ලෝකයේ අනෙකුත් රටවල් මෙන්ම ශ්රී ලංකාවේ ද වෙළෙඳපොළ තුළ ස්වාභාවික ශාකවල, එහි ඇති විවිධ කොටස්, පලතුරු, කොළ, මුල්, මල් සහ සමහර අවසථාවල මුළු ශාකය ම ශාක සාර නිෂ්පාදන සඳහා යොදාගනී. මේ නිෂ්පාදනයන්හි ශරීරයේ විවිධ ක්රියාකාරීත්වයන්ට අදාළ වන ලයිකෝපීන්, බීටා කැරොටින් වැනි ස්වාභාවික අමුද්රව්ය ද වේ. උදාහරණයක් ලෙස Arbutin හා විටමින් C සතු ව සම පැහැපත් කිරීමේ හැකියාව ඇති අතර අත්යවශ්ය මේද (Essential oil) හා ටර්පීන (Terpene), කල්තබාගැනීමේ ස්වාභාවික අමුද්රව්ය ලෙස භාවිත කරයි.
වාර්තා වන පරිදි 2006 වර්ෂයේ යුරෝපීය වෙළෙඳපළ තුළ ස්වාභාවික හා කාබනික රූපලාවණ්ය නිෂ්පාදන අලෙවිය යුරෝ බිලියන 1.1ක් වූ අතර වර්තමානය වන විට මේවා ලෝක වෙළෙඳපළ තුළ ඇමෙරිකානු ඩොලර් බිලියන 7කට වැඩි ප්රමාණයක් හිමි කරගැනීමට සමත් ව ඇත. කෘත්රිම නිෂ්පාදන අභිබවා ස්වාභාවික ශාක සාර නිෂ්පාදනවල පවතින සුරක්ෂිතතාව හා හිතකර බව පිළිබඳ වූ දැඩි විශ්වාසය මේ වෙළෙඳපොළ වර්ධනයට බලපා ඇතැයි සමීක්ෂණවලින් අනාවරණය වී ඇත.
ආයුර්වේද හෝ ශාකසාර සම පැහැපත් කිරීමේ ආලේපනවල රසායනික ද්රව්ය අඩංගු නො වන බවට මතයක් වර්තමාන සමාජය තුළ පවතී. එහෙත් සත්ය වශයෙන් ම එම නිෂ්පාදනවල නිසග ගුණාත්මක බව, ස්ථායිතාව, කල්පැවැත්ම වැනි ගුණාංගයන් සාක්ෂාත් කරගැනීමට රසායනික මාධ්ය භාවිත කරනු ලැබේ. මේ රාසායනික මාධ්ය රූපලාවණ්ය නිෂ්පාදන ක්රියාවලියේ දී ඇති වන අතුරුඵල සමග මිශ්ර වී තිබීමට හැකි අතර එමගින් පිළිකාකාරක සහ වෙනත් සෞඛ්ය ගැටලු මතු වීමේ අවදානමක් පවතී. එවැනි උදහරණ කිහිපයක් විමසා බලමු.
1) 1, 4 -dioxane යනු ඛනිජ තෙල් ආශ්රිත ව නිපදවන පිළිකාකාරක රසායනික සංයෝගයක් වන අතර, ශාක ආශ්රිත රසායනිsක අමුද්රව්ය නිෂ්පාදන ක්රියාවලියේ දී ඇති වන අතුරුඵලයක් ලෙස නිෂ්පාදන තුළ අඩංගු විය හැකි ය.
2. N-nitrosoethanolamine (NDELA) මේ රසායනිකය 1979 - 1980 කාලයේ දී රූපලාවණ්ය නිෂ්පාදනවල අඩංගු වූ හානිකර අපවිත්ර කාරකයක් ලෙස හඳුනා ගන්නා ලදී.
3. Ethyl droxide යනු ශාකසාර රූපලාවණ්ය නිෂ්පාදන අමුද්රව්යවල අඩංගු විය හැකි තවත් අපවිත්රකාරකයක් වන අතර එයින් සමට හා ශ්වසන පද්ධතියට අහිතකර බලපෑම් ඇති විය හැකි ය.
4. බැර ලෝහ
- නිෂ්පාදන ක්රියාවලියෙහි දී භාවිත වන බඳුන් හා උපකරණ ආශ්රිත තුළට බැර ලෝහ මිශ්ර විය හැකි ය.
- ජලයෙන් රසානික පොහොර, දිලීර හා කෘමිනාශකවලින් අපවිත්ර වූ පස් හා ජලය ආශ්රිත බැවින් ශාක අමුද්රව්ය සඳහා යොදා ගැනීමේ දී ඒවායේ බැර ලෝහ අන්තර්ගත වීමේ අවදානමක් පවතී.
- නිෂ්පාදනයන්ට යොදාගන්නා ශාක හා වෙනත් අමුද්රව්යවල බැර ලෝහ මිශ්ර වී තිබීමේ හැකියාවක් පවතී. ඉතා වැදගත් ම කරුණ වන්නේ රසදිය වැනි බැර ලෝහ එහි විවිධ ප්රතික්රියාවන් නිෂ්පාදනයට අඩංගු කිරීමේ අදහසින් මිශ්ර කිරීම දැකිය හැකි වීමයි.
සමෙහි වර්ණය නිර්ණය වන්නේ සමෙහි අන්තර්ගත වන මෙලනින් (Melanin) වර්ගය හා ඝනත්වය මත වන අතර, සම පැහැපත් කිරීමේ දී සිදු වන්නේ මෙලනින් ඝනත්වය කෘත්රිමව අඩු කිරීමයි. මෙලනින් වර්ණකයේ ප්රධාන වර්ග 02කි. මෙහි Eumelanin වර්ණකය වඩා සුලබ වන අතර සම දුඹුරු හෝ තද පැහැ වීමට එය හේතු වේ. Pheaeomelanin වර්ණය එතරම් සුලබ නො වන අතර කහ හෝ රතු පැහැයක් සඳහා හේතුකාරක වේ.
මෙලනින් වර්ණකය නිෂ්පාදනය වීම ඉහළ යැම හේතුවෙන් සමේ රෝග විශාල ප්රමාණයක් (Hyperpigmentation) ඇති වීමේ අවදානමක් පවතින බව රස පරීක්ෂණ මගින් අනාවරණය වී ඇත. එබැවින් මුල් අවධියක දී සම පැහැපත් කිරීමේ සංයෝග, Hyperpigmentation වැනි තත්ත්ව සඳහා බහුල ලෙස යොදාගන්නා ලදී. සම වඩා පැහැපත් කරගැනීමට ඇති ආශාව හේතුවෙන් මෙවැනි සංයෝග සුලබව භාවිත කිරීමට මිනිසුන් පෙළඹී ඇති අතර එමගින් සිදු විය හැකි අතුරු ප්රතිඵල පිළිබඳ අවධානය අඩු වී ඇත.
අතීතයේ සිට රසදිය සම පැහැපත් කිරීමේ සංයෝගයක් ලෙසත්, දිලීර නාශක සඳහාත්, දත් බෙහෙත් කුඩුවල සහ කල් තබාගන්නා ද්රව්යයක් ලෙසත් භාවිත කර ඇත. රසදිය ප්රධාන ප්රභේද තුනක් ලෙස සුලබව පවතියි. මෙයින් අකාබනික රසදිය සංයෝග රූපලාවණ්ය නිෂ්පාදන සඳහා බහුලව භාවිත වේ.
සමෙහි මෙලනින් වර්ණකය නිපදවීමේ ක්රියාවලිය සඳහා Tyrosinase නම් එන්සයිමයට Tryrosme නම් සංයෝගය හා ස්වසන ක්රියාකාරීත්වය සඳහා Cu2+ අයන උපකාරී වේ. සිරුරේ රසදිය (Hg) පවතින විට, Cu2+ වලට වඩා රසදිය, එන්සයිමයේ ක්රියාකාරී ස්ථානය සමග ස්වාධීන ලෙස සම්බන්ධ වීම නිසා එන්සයිමයේ ක්රියාකාරීත්වය අඩාළ වීමත් එමගින් සමෙහි මෙලනින් වර්ණකයේ නිෂ්පාදනය අඩාළ වීමත් සම පැහැපත් වීමත් සිදු වේ.
සම පැහැපත් කිරීමේ විවිධ ආලේපනවල අන්තර්ගත රසදිය සම මගින් අවශෝෂණය වීම නිසා මිනිස් සිරුරට ඇතුළු වේ. දැනට කරන ලද පරීක්ෂණවලට අනුව සම මත ගල්වන රසදිය ක්ලෝරයිඩ් (HgCl) ප්රමාණයෙන් 8%ක් පැය 5ක් ඇතුළත සිරුර තුළට අවශෝෂණය වේ. ඒ අනුව රසදිය සිරුර තුළට අවශෝෂණය වීම දිගු කාලීන ක්රියාවලියක් වන අතර, මේ අකාබනික රසදිය සංයෝග අක්මාව හා බඩවැල ආශි්රතව අනතුරුදායක තත්තAව ඇති කිරීමට හේතුකාරක වන බවට තහවුරු වී ඇත.
ස්නායු පද්ධතියට අදාළව රසදිය මිශ්ර වීමෙන් සිරුරේ දැකිය හැකි රෝග ලක්ෂණ ලෙස අධික මහන්සිය, අධික හිස කැක්කුම, මතකය හීන වීම, මුඛය තුළ ලෝහ වැනි රසයක් දැනීම, නොසන්සුන් බවක් ඇති වීම වැනි ලක්ෂණ දක්විය හැකි ය. රසදිය කාරක ආලේපන භාවිතයේ අතුරුඵලයක් ලෙස ආලේපන සාන්ද්රගත ව තැන්පත් වූ ප්රදේශ තද පැහැයක් ගැනීම සිදු වන අතර මේ තත්ත්වය Ochronosis ලෙස හඳුන්වයි.
මෑතක දී කරන ලද පර්යේෂණවල ප්රතිඵලයක් ලෙස රසදිය අඩංගු රූපලාවණ්ය ආලේපන මාස 03ක් හෝ ඊට වැඩි කාලයක් භාවිත කිරීමෙන් සිරුරට රසදිය විෂ වීම පියවි ඇසට දැකගැනීමට තරම් ප්රමාණවත් බව හඳුනාගෙන ඇත. රූපලාවණ්ය නිෂ්පාදන සඳහා භාවිත කළ හැකි උපරිම රසදිය ප්රමාණය නිෂ්පාදන කි. ග්රෑමයකට මිලි ග්රෑම් 1ක් ලෙස ඇමෙරිකානු ආහාර හා ඖෂධ පරිපාලන ආයතනය මගින් දක්වා ඇත. එහෙත් යුරෝපා සංගමය සහ බොහෝ අප්රිකානු රටවල් රසදිය අඩංගු රූපලාවණ්ය නිෂ්පාදන තුළ ඇතුළත් විය හැකි උපරිම රසදිය ප්රමාණය ලෙස 3 ppm (parts per million) දක්වා ඇති අතර ඔවුන් ප්රකාශ කරන පරිදි රූපලාවණ්ය නිෂ්පාදන තුළ බැර ලෝහ යම් ප්රමාණයක් අන්තර්ගත වීම නො වැළැක්විය හැකි අතර අඩංගු විය හැකි බැර ලෝහ ප්රමාණය උපරිම වශයෙන් ඉවත් කිරීමට පියවර ගත යුතු ය.
ශ්රී ලංකාව තුළ ඇති නිෂ්පාදන සඳහා අමුද්රව්ය අනුබද්ධ විශේෂ තොරතුරු ප්රමිති ආයතනයේ SLS 457 : 2 වැනි කොටස යටතේ සඳහන් කර ඇත. වර්ණකාරක හා වර්ණ කිරීම සඳහා වන අනෙකුත් සංයොAගවලට අමතරව භාවිත කෙරෙන වෙනත් අමුද්රව්ය ආරක්ෂාකාරී නො වන බව හඳුනාගෙන ඇත. ඒ අනුව රසදිය හා රසදිය ආශ්රිත වෙනත් සංයෝග ප්රමිති ආයතනයේ “GNRAS" තොරතුරු ලේඛනයෙහි, සාමාන්යයෙන් ආරක්ෂාකාරී ලෙස හඳුනා නො ගත් අමුද්රව්ය ලෙස ඇතුළත් කර ඇත. එම ලේඛනයේ ඇතුළත් වන සංයෝග ඇතැම් විට කිසිසේත් භාවිතයට සුදුසු නො වන හෝ ඇතැම් තත්ත්ව යටතේ භාවිතයට සුදුසු වන, ආදී වශයෙන් වර්ගීකරණය කර ඇත.
කැඩ්මියම් (Cd) හා ආසනික් (As)ල වර්ණකාරක හෝ අනෙකුත් නිෂ්පාදන තුළ අන්තර්ගත විය හැකි අතර එම උපරිම සීමාව 5 ppm ලෙස නිර්දේශ කර ඇත. Cd යනු කහ සිට තැඹිලි වර්ණය දක්වා යොදාගන්නා වර්ණකාරක සංයෝගයක් වන අතර, තෙල් ආලේපන හා පුයර (Face powder) සඳහා බහුලව භාවිත වේ. Cd සිරුරේ කෙරටින් සංයෝග සමග සම්බන්ධ වේ. සම හරහා වන Cd අවශෝෂණය තරමක් අඩු වුව ද සාන්ද්රගත Cd සහිත ආලේපන සම සමග දිගු කාලයක් සම්බන්ධ ව පැවතීම චර්ම රෝග ඇති වීමට හේතුකාරක වීමේ අවදානනමක් පවතී. 'As' සමට, නියට හා හිසකෙස්වලට ඇති ආකර්ෂණය අවම වේ. එම නිසා සම හරහා අවශෝෂණය අවම වීම හේතුවෙන් As මගින් ඇති විය හැකි සෞඛ්යමය ගැටලු අවම වුව ද එහි අනතුරුදායකත්වය As පවතින රසායනික සංයෝගයේ ස්වභාවය මත තීරණය වේ. අකාබනික As සංයෝග කාබනික As සංයෝගවලට වඩා අහිතකර පිළිකාකාරක තත්ත්ව ඇති කිරීමට හේතු වේ.
රූපලාවණ්ය ආලේපන තුළ අන්තර්ගත බැර ලෝහ පිළිබඳ ඇතැම් රටවල් කරන ලද පර්යේෂණවලට අනුව එම ආලේපන භාවිතය සාපේක්ෂව හිතකර නමුත් ඔවුන් ගේ නිගමනවලට අනුව මේ නිෂ්පාදන දීර්ඝ කාලීනව භාවිතය සිරුර තුළ ඇති බැර ලෝහ ප්රමාණය ඉහළ නැංවීම හේතු විය හැකි ය. ශ්රී ලංකාව තුළ කරන ලද පර්යේෂණහි දී වෙළෙඳපොළේ තෝරාගත් සම පැහැපත් කිරීමේ ආලේපන 16ක් ඇත. රසදිය ප්රමාණ විශ්ලේෂණයේ දී (Atomic Absorptron Spectroscopy මගින්) ඉන් එක් නිෂ්පාදනයක අඩංගු රසදිය ප්රමාණය ඉතා ඉහළ වූ අතර තවත් නිෂ්පාදන දෙකක සැලකිය යුතු ඉහළ රසදිය ප්රමාණ අන්තර්ගත වී ඇති බව වාර්තා වී ඇත.
දැනට වාර්තා වී ඇති බොහෝ පර්යේෂණවලට අනුව, ශාක සාර රූපලාවණ්ය ආලේපන (Herbal Fairness cream) තුළ ඇතුළත් වී ඇති බැර ලෝහ ප්රමාණ පාලනය කිරීම පිළිබඳ පර්යේෂණවල ඇති වැදගත් බව තහවුරු වී ඇත. ඒ අනුව නිෂ්පාදන ක්රියාවලි හා විශ්ලේෂණ සම්බන්ධව නිර්මිත නිර්දේශ හා නීති මාලාවන් පැනවීම කළ යුතු ය. කෙසේ වුව ද තමා භාවිත කරන නිෂ්පාදන හා ආලේපන තුළ අන්තර්ගත අමුද්රව්ය පිළිබඳ පැහැදිලි දැනුවත් බවක් පාරිභෝගිකයා සතු ව පැවතිය යුතු අතර එමගින් එම නිෂ්පාදන හා ආලේපන වර්ග භාවිතයෙන් තමාට සිදු විය හැකි හානිය අවම කර ගත හැකි ය.
ආචාර්ය බී. ඒ. පෙරේරා
රසායන විද්යා අංශය
තව කෙනෙක්ගේ ආරක්ෂාව උදෙසා බෙදාහරින්න අමතක කරන්න එපා..🙏❤️☣️
