16/09/2026
🏏💪
- සියල්ලන්ට පිත්තේන් පිළිතුරු සපයන නිශාන් මධුෂ්ක - ❤️🏏🇱🇰
ශ්‍රී ලංකා කණ්ඩායම නියෝජනය කරන නිශාන් මධුෂ්ක මේ වන විට දේශීය ක්‍රිකට් පිටියේ සුපිරි රිද්මයක පසුවෙයි. කොළඹ ක්‍රිකට් සමාජය වෙනුවෙන් -CCC ඔහු අවසන් තරග හතරේදී අර්ධ ශතකයක් සහ පිට පිට ශතක තුනක් රැස් කර තිබේ.
මධුෂ්කගේ මෙම විශිෂ්ට දස්කම් මාලාව ආරම්භ වූයේ සැප්තැම්බර් 5 වැනිදා කුරුණෑගල YCC කණ්ඩායමට එරෙහිව පැවති Major Clubs T20 තරගාවලියේ අවසන් කාණ්ඩ තරගයේදී නොදැවී පන්දු 44කින් ලකුණු 55ක් රැස් කිරීමත් සමඟිනි. එම ඉනිම හේතුවෙන් CCC කාණ්ඩයේ තෙවැනි ස්ථානය ලබා අර්ධ අවසන් පූර්ව වටයට සුදුසුකම් ලැබීය.
ඉන් දින දෙකකට පසුව, සැප්තැම්බර් 7 වැනිදා ශ්‍රී ලංකාවේ ප්‍රමුඛතම පන්දුවාර 50 දේශීය තරගාවලිය වන Major Clubs Limited Over තරගාවලියේ අවසන් පූර්ව තරගයේදී SSC ක්‍රිකට් සමාජයට එරෙහිව පන්දු 132කින් ලකුණු 148ක් රැස් කරමින් මධුෂ්ක සිය පළමු ශතකය වාර්තා කළේය. කෙසේ වෙතත්, ලකුණු 332ක ඉලක්කයක් හඹාගිය CCC කණ්ඩායම DLS ක්‍රමයට එක් ලකුණකින් එම තරගය පරාජයට පත්විය.
අනතුරුව සැප්තැම්බර් 9 වැනිදා Ace CCC කණ්ඩායමට එරෙහි Major Clubs T20 අර්ධ අවසන් පූර්ව තරගයේදී මධුෂ්ක නොදැවී පන්දු 56කින් ලකුණු 114ක් රැස් කළේය. එම වේගවත් ඉනිමට හතරේ පහර 9ක් සහ හයේ පහර 8ක් ඇතුළත් විය. ඔහුගේ ප්‍රහාරාත්මක පිතිහරඹය හේතුවෙන් CCC කණ්ඩායම ලකුණු 218ක් ලබාගත් අතර, පසුව පන්දු යවන්නන්ගේ විශිෂ්ට දස්කම් හේතුවෙන් ලකුණු 64ක ජයක් වාර්තා කරමින් අවසන් පූර්ව වටයට සුදුසුකම් ලැබීය.
මධුෂ්කගේ පිට පිට ශතක තුනේ නවතම ශතකය වාර්තා වූයේ Tamil Union කණ්ඩායමට එරෙහි Major Clubs T20 අවසන් පූර්ව තරගයේදීය. ලකුණු 194ක ඉලක්කයක් හඹායමින් ඔහු නොදැවී පන්දු 65කින් ලකුණු 109ක් රැස් කළේය. එම ඉනිමට හතරේ පහර 7ක් සහ හයේ පහර 6ක් ඇතුළත් විය.
අවසන් පන්දුවාරයේදී ජයග්‍රහණය සඳහා ලකුණු 13ක් අවශ්‍යව තිබියදී මධුෂ්ක ලකුණු 12ක් රැස් කළද, කොළඹ කණ්ඩායමට ජයග්‍රහණය කරා යාමට නොහැකි විය. තරගය ලකුණු සමවීමෙන් අවසන් වූ අතර Super Over අවස්ථාවක් දක්වා තරගය දිග්ගැස්සුණි.
එහිදී Binura Fernando පළමු පන්දුවෙන්ම මධුෂ්ක දවාගත් අතර, ඊළඟ පන්දුවෙන් Dulnith Sigera ද දවාගනිමින් කොළඹ කණ්ඩායම ලකුණු නොලබා Super Over එක අවසන් කළේය. Tamil Union කණ්ඩායම එක් පන්දුවකින්ම එම ඉලක්කය සම්පූර්ණ කරමින් අවසන් මහා තරගයට සුදුසුකම් ලැබීය.
තවත් විශේෂත්වය වන්නේ මධුෂ්කගේ මෙම ශතක තුනම පිළිමළුන් පිටුදැකීමේ තරගවලදී වාර්තා වීමයි.
Major Clubs T20 තරගාවලියේදී Nishan Madushka Fernando ඉනිම් 5කදී ලකුණු 296ක්, සාමාන්‍ය 148.00ක් සහ ප්‍රහාරක වේගය 164.44ක් ලෙස වාර්තා කර තිබේ.
Major Clubs 50-Over තරගාවලියේදී ඔහු තරග 4කදී ලකුණු 206ක් රැස් කර ඇති අතර, ඔහුගේ පිතිකරණ සාමාන්‍යය 51.50කි.
ශ්‍රී ලංකාව වෙනුවෙන් ටෙස්ට් සහ එක්දින තරග රටා දෙකේදීම ආරම්භක පිතිකරුවෙකු ලෙස ජාතික කණ්ඩායම නියෝජනය කර ඇති නිශාන් මධුෂ්ක, අවසන් වරට ඉන්දියාව සමඟ පැවති දෙවැනි ටෙස්ට් තරගයේදී කණ්ඩායමෙන් ඉවත් කෙරුණි.
කෙසේ වෙතත්, ඉන් අනතුරුව සිය සුපුරුදු රිද්මය නැවත සොයාගත් නිශාන් මධුෂ්ක, පිත්තෙන් පිළිතුරු ලබාදෙමින් තමන් තවදුරටත් ජාතික කණ්ඩායම වෙනුවෙන් වගකීම් භාර ගැනීමට සූදානම් බව නැවත නැවතත් පෙන්වා දෙමින් සිටින අතර ❤️👏🏻දේශීය පිටියේ පිට පිට ශතක තුනක් ඇතුළුව අඛණ්ඩව දැක්වූ විශිෂ්ට පිතිහරඹය, ජාතික කණ්ඩායමට නැවත පැමිණීම සඳහා ඔහුගේ සූදානම පැහැදිලිව පෙන්වන සාක්ෂියක් බවට පත්ව තිබේ.
✍🏻 𝗔𝗺𝗶𝗹𝗮 𝗙𝗲𝗿𝗻𝗮𝗻𝗱𝗼
