24/01/2026
පුරාවිද්‍යා පශ්චාත් උපාධි ආයතනයේ (PGIAR) නව අධ්‍යක්ෂ ආචාර්ය අර්ජුන තන්තිලගේ.
කැලණිය විශ්වවිද්‍යාලයට අයත් පුරාවිද්‍යා පශ්චාත් උපාධි ආයතනයේ (Postgraduate Institute of Archaeology - PGIAR) නව අධ්‍යක්ෂ ධුරයට ආචාර්ය අර්ජුන තන්තිලගේ මහතා 2026 ජනවාරි 13 වැනිදා සිට පත්කර තිබේ.
ආචාර්ය තන්තිලගේ මහතා කොළඹ විශ්වවිද්‍යාලයෙන් 1991දී භෞතික විද්‍යාව පිළිබඳ B.Sc. උපාධියත්, 1994දී විශ්ලේෂණ රසායන විද්‍යාව පිළිබඳ M.Sc. උපාධියත් ලබාගෙන ඇත. ඉන්පසු කැලණිය විශ්වවිද්‍යාලයේ පුරාවිද්‍යා පශ්චාත් උපාධි ආයතනයෙන් 1998දී පුරාවිද්‍යාව පිළිබඳ පශ්චාත් උපාධි ඩිප්ලෝමාවත්, 2008දී පුරා-ලෝහ විද්‍යාව (Archaeometallurgy) පිළිබඳ PhD උපාධියත් ලබාගෙන ඇත.
ඔහුගේ ප්‍රධාන පර්යේෂණ ක්ෂේත්‍රයන් වන්නේ පුරාණ ලෝහ කර්මාන්ත, පුරාවිද්‍යාවේ පරිගණක යෙදීම් සහ පුරාණ ද්‍රව්‍ය හා තාක්ෂණය පිළිබඳ අධ්‍යයනයයි.
වෘත්තීය අත්දැකීම් අතරින් වසර 2014 සිට පැවැත්වෙන සංස්කෘතික ද්‍රව්‍ය විශ්ලේෂණ රසායනාගාරයේ සම්බන්ධීකාරක ධුරය, පශ්චාත් උපාධි ඩිප්ලෝමා පාඨමාලාවන්හි සම්බන්ධීකාරක ලෙසත් ( කෞතුකාගාර විද්‍යාව, සංස්කෘතික සංචාරකය), මධ්‍යම සංස්කෘතික අරමුදලේ පුරාවිද්‍යා විශේෂඥ උපදේශක ධුරය, ත්‍රිකුණාමලය ව්‍යාපෘතියේ අධ්‍යක්ෂ ධුරය (2016-2020) ආදිය ඇතුළත් වේ. ඔහු විවිධ විශ්වවිද්‍යාලවලට සම්බන්ධ ව බාහිර ආචාර්යවරයෙකු ලෙසද සේවය කර ඇත.
පුරාවිද්‍යා ක්ෂේත්‍රයේ දීර්ඝකාලීන පළපුරුද්දක් ඇති ඔහු සිගිරිය SARCP ව්‍යාපෘතිය (1989), පොතන ප්‍රාග් ඓතිහාසික ගුහාව (1990), පල්ලෙමලල ප්‍රාග් ඓතිහාසික කැණීම (1995), සේරුවිල පුරාණ තඹ ලෝහ කර්මාන්ත පර්යේෂණ (2013-2018), මහනුවර යුගයේ බිතු සිතුවම් තාක්ෂණය පිළිබඳ අධ්‍යයන (2017), මුහුදු බෞද්ධ උරුමය පිළිබඳ ජාත්‍යන්තර ව්‍යාපෘතිවල 3D ඡායාරූපගත කිරීම් ආදියට සම්බන්ධ වී ඇත. ඔහු මධ්‍යම සංස්කෘතික අරමුදල, ඩර්හම් විශ්වවිද්‍යාලය (එක්සත් රාජධානිය), ඔක්ස්ෆර්ඩ් විශ්වවිද්‍යාලය ආදිය සමඟ සහයෝගී ව්‍යාපෘතිවලද ක්‍රියාකාරීව සම්බන්ධ වී ඇත.
පුරාවිද්‍යා පශ්චාත් උපාධි ආයතනය ආචාර්ය තන්තිලගේ මහතාට සුබ පැතුම් එක්කරමින්, ආයතනය දියණුව කරා මෙහෙයවීමට ඔහුට සියලු ධෛර්යය ලැබේවා යැයි ප්‍රාර්ථනා කරයි. මෙම පත්වීම ශ්‍රී ලංකාවේ පුරාවිද්‍යා අධ්‍යයන ක්ෂේත්‍රයට නව ගතිකත්වයක් එක්කරනු ඇතැයි අපේක්ෂා කෙරේ.
