28/07/2026
අහස ජයගත් අසමසම ගුවන් ප්රාතිහාර්යය - Airbus A350-1000ULR යානය ලෝකය වටා පුරා දවසක් පියාසර කරමින් තැබූ ඓතිහාසික සන්ධිස්ථානය. ✈️
ගුවන්සේවා ඉතිහාසයේ නව පරිච්ඡේදයක් සටහන් කරමින්, Airbus සහ Qantas සමාගම් එකමුතුවෙන් සිදුකළ අතිදීර්ඝ සහ අතිශය අභියෝගාත්මක පරීක්ෂණ පියාසැරිය සාර්ථකව අවසන් කරමින් Airbus A350-1000ULR පරීක්ෂණ යානය ප්රංශයේ Toulouse-Blagnac ගුවන්තොටුපල වෙත ආරක්ෂිතව ගොඩබස්වනු ලැබීය. Qantas සමාගමේ ඉදිරි Project Sunrise ව්යාපෘතිය උදෙසා විශේෂයෙන් නිර්මාණය කරන ලද, නිෂ්පාදන අංක MSN 707 සහ F-WULR ලෙස ලියාපදිංචි කර ඇති මෙම අද්විතීය යානය, AIB35LR යන සංකේත නාමය යටතේ මෙලෙස අහස ජයගත්තේ සමස්ත ගෝලීය ගුවන් සේවා ක්ෂේත්රයේම නෙත් සිත් තමන් වෙත නතු කරගනිමිනි.
මෙම ඓතිහාසික ගුවන් ගමනේ පළමු අදියර ආරම්භ වූයේ ඉකුත් ජූලි 23 වන දින ප්රංශයේ Toulouse සිට ඕස්ට්රේලියාවේ Melbourne දක්වා ආසියානු ගුවන් සීමාව හරහා පියාසර කරමින් පැය 19යි විනාඩි 13ක නොනවතින පියාසැරියක් සටහන් කරමිණි. කෙසේ වෙතත්, නැවත Toulouse වෙත පැමිණීමේදී පැමිණි මාර්ගයෙන්ම ආපසු නොගොස්, නැගෙනහිර දිශාව ඔස්සේ දකුණු පැසිෆික් සාගරය, ජාත්යන්තර දින රේඛාව, ඇමරිකා එක්සත් ජනපද ගුවන් සීමාව සහ අත්ලාන්තික් සාගරය පසුකරමින් සමස්ත පෘථිවියම වටා පියාසර කරමින් (Around the Globe Circumnavigation) පැය 24යි විනාඩි 23ක නොනවතින පියාසැරියක් සාර්ථකව නිම කිරීමට මෙම යානය සමත් විය.
මෙම ගමන අතරතුරදී, දකුණු පැසිෆික් සාගරයට ඉහළින් අඩි 33,000කට වඩා උසින් පියාසර කරද්දී හමු වූ ප්රබල ජෙට් ස්ට්රීම් (Jet Stream) පසුපස සුළං ධාරා හේතුවෙන්, යානයේ පොළොවට සාපේක්ෂ වේගය එනම් Ground Speed එක පැයට නාවික සැතපුම් 662ක් දක්වා ඉහළ ගියේය. එය මුහුදු මට්ටමේදී ශබ්දයේ වේගයට සමාන අගයක් වුවද, යානය ශබ්දයේ වේග සීමාව ඉක්මවා නොගිය අතර (Subsonic), සුළං ශක්තිය මඟින් අත්කරගත් මෙම අධික වේගය ඉන්ධන පිරිමැසීමට සහ අතිදීර්ඝ දුරක් කෙටි කාලයකින් පසුකිරීමට විශාල පිටුවහලක් විය.
මෙම විශේෂිත පියාසැරිය සඳහා Airbus පරීක්ෂණ නියමුවන් සහ ඉංජිනේරුවන්ට අමතරව Qantas සමාගමේ ජ්යෙෂ්ඨ නියමුවන් දෙදෙනෙකුද එකතු වී සිටියහ. මෙම පරීක්ෂණයේ ප්රධාන අරමුණ වූයේ යුරෝපීය ගුවන්සේවා ආරක්ෂණ නියෝජිතායතනයේ (EASA) නිල සහතිකය ලබාගැනීම සඳහා යානයේ පද්ධති පරික්ෂා කිරීමයි. ඒ වෙනුවෙන් යානය තුළ ලීටර් 20,000ක අමතර ධාරිතාවකින් යුත් Rear Center Fuel Tank එකෙහි කාර්යක්ෂමතාව, Rolls-Royce Trent XWB-97 එන්ජින්වල දීර්ඝකාලීන ක්රියාකාරීත්වය, සහ New Generation Air Chiller නම් නවීන ගුවන්යානා galley ශීතකරණ පද්ධති සියුම්ව නිරීක්ෂණය කරන ලදී.
මගීන් රහිතව සිදුකළ මෙම ගමනේදී මගී ශරීරවලින් පිටවන තාපය කෘතිමව නිර්මාණය කරන තාප ආකෘති (Heat Dummies) යානය තුළ අටවා තිබූ අතර, කිලෝමීටර් ගණනාවක් පුරා දිවෙන තැඹිලි පැහැති රැහැන් පද්ධතියක් මඟින් සම්බන්ධ කරන ලද සංවේදක (Sensors) 1,000කට අධික ප්රමාණයක් සහ ටොන් 5ක බරින් යුත් පරීක්ෂණ උපකරණ (Flight Test Instrumentation) මඟින් යානයේ සියලුම දත්ත සජීවීව සටහන් කරගන්නා ලදී. Flightradar24 හි වැඩිම දෙනෙක් සජීවීව නැරඹූ ගුවන් ගමන බවට පත් වූ මෙය, Toulouse-Blagnac ගුවන්තොටුපල වෙත පහත් වීමේදී කෙලින්ම ගොඩබැස්වූයේ නැත. Airbus සමාගමේ සාම්ප්රදායික ගුවන් සිරිතට ගෞරව කරමින්, ධාවන පථයට ඉහළින් අඩි සිය ගණනක් පහතින් Low Pass (Flyby) ආචාරයක් සිදු කර, ඉන් අනතුරුව වටයක් කැරකී ඉතා සුමට ලෙස ගොඩබස්වනු ලැබීය.
මෙය සාමාන්ය මගීන් නොමැති පරීක්ෂණ පියාසැරියක් බැවින් නිල වාණිජ මගී ගුවන් ලෝක වාර්තාවක් ලෙස සටහන් නොවූවද, එය Airbus A350 මාදිලියක් තැබූ දීර්ඝතම නොනවතින පරීක්ෂණ පියාසැරිය ලෙස ඉතිහාසයට එක්වේ. මෙම පරීක්ෂණ සාර්ථක වීමත් සමඟ, 2027 අප්රේල් මාසයේදී ප්රථම A350-1000ULR යානය Qantas වෙත හිමිවන අතර, 2027 ඔක්තෝබර් මාසයේදී සිඩ්නි සහ ලන්ඩන් අතර "Project Sunrise" නිල වශයෙන් ආරම්භ වීමත් සමඟ, පැය 22ක අඛණ්ඩ ගමනින් ලොව දීර්ඝතම නිල වාණිජ මගී ගුවන් ගමනේ ලෝක වාර්තාව පිහිටුවීමට නියමිතය.
