05/11/2025
ກະຊວງສຶກສາທິການ ແລະ ກິລາ ແຫ່ງ ສປປ ລາວ ຮ່ວມກັບລັດຖະບານອົດສະຕຣາລີ ໄດ້ຖ່າຍທຳເລື່ອງທີ່ສາມຂອງແຜນໂຄສະນາສົ່ງເສີມການສຶກສາແຫ່ງຊາດ.
ໃນອາທິດຜ່ານມາ, ກະຊວງສຶກສາທິການ ແລະ ກິລາ ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ຜ່ານແຜນງານບີຄວາ, ໄດ້ເລີ່ມຕົ້ນການຖ່າຍທຳເລື່ອງທີ່ສາມຂອງແຜນໂຄສະນາສົ່ງເສີມການສຶກສາແຫ່ງຊາດຄັ້ງໃໝ່. ນຳພາໂດຍສະຖາບັນຄົ້ນຄວ້າວິທະຍາສາດການສຶກສາ (ສວສ), ສສກ, ແຜນໂຄສະນາດັ່ງກ່າວມີຈຸດປະສົງເພື່ອສ້າງແຮງບັນດານໃຈໃຫ້ຊຸມຊົນ ແລະ ປ່ຽນແປງທັດສະນະຄະຕິຕໍ່ການສຶກສາໃນທົ່ວປະເທດລາວ.
ທ່ານ ສຸກສາຄອນ ສີປະເສີດ, ຜູ້ອຳນວຍການສູນໂຄສະນາຂ່າວສານການສຶກສາ ແລະ ກິລາ, ສະຖາບັນຄົ້ນຄວ້າວິທະຍາສາດການສຶກສາ, ໄດ້ກ່າວເຖິງເປົ້າໝາຍຂອງແຜນໂຄສະນາດັ່ງກ່າວວ່າ: “ເປົ້າໝາຍຂອງພວກເຮົາແມ່ນເພື່ອສະແດງໃຫ້ເຫັນເຖິງຄຸນຄ່າອັນໃຫຍ່ຫຼວງຂອງການສຶກສາ ແລະ ບົດບາດສຳຄັນຂອງຄູໃນການສ້າງອະນາຄົດຂອງປະເທດລາວ. ໃນປັດຈຸບັນ, ລະບົບການສຶກສາຂອງພວກເຮົາປະເຊີນກັບສິ່ງທ້າທາຍຫຼາຍຢ່າງເຊັ່ນ: ນັກຮຽນອອກຈາກໂຮງຮຽນໄວ ເພາະວ່າພວກເຂົາບໍ່ເຫັນຜົນປະໂຫຍດຂອງການຮຽນ. ຄວາມເຊື່ອທົ່ວໄປທີ່ວ່າການສຶກສາບໍ່ໄດ້ຮັບປະກັນການມີວຽກເຮັດງານທຳ. ພໍ່ແມ່ຜູ້ທີ່ອາດມີການສຶກສາທີ່ຈຳກັດ, ກໍ່ຍັງສົງໄສຕໍ່ການສຶກສາ. ຖ້າບໍ່ໄດ້ຮັບການແກ້ໄຂ, ສິ່ງເຫຼົ່ານີ້ອາດຈະນຳໄປສູ່ຄົນລຸ້ນທີ່ມີທັກສະທີ່ຈຳກັດ, ໂອກາດໄດ້ວຽກເຮັດງານທຳໜ້ອຍລົງ ແລະ ການເຕີບໂຕທາງເສດຖະກິດຂອງປະເທດກໍ່ຈະຊ້າລົງ. ນີ້ແມ່ນເຫດຜົນທີ່ວ່າ, ດ້ວຍການສະໜັບສະໜູນອັນລ້ຳຄ່າຈາກລັດຖະບານອົດສະຕຣາລີ, ພວກເຮົາໄດ້ເປີດຕົວວິດີໂອໃນແຜນໂຄສະນານີ້ ເພື່ອສົ່ງເສີມການສຶກສາ. ວິດີໂອທີ 3 ນີ້ ແມ່ນເພື່ອຊຸກຍູ້ໃຫ້ນັກຮຽນສືບຕໍ່ການສຶກສາຂອງເຂົາເຈົ້າຫຼັງຈາກຈົບຊັ້ນປະຖົມ ແລະ ເນັ້ນໃສ່ສາຍຮຽນວິທະຍາສາດ.”
ທ່ານຍັງກ່າວຕື່ມອີກວ່າ: “ພາບສາກວິທະຍາສາດໄດ້ຖ່າຍທຳທີ່ຄະນະວິສະວະກຳສາດ, ເຊິ່ງມີສິ່ງອຳນວຍຄວາມສະດວກທີ່ໜ້າປະທັບໃຈ ແລະ ຫ້ອງທົດລອງທີ່ມີອຸປະກອນຄົບຖ້ວນ. ຂ້າພະເຈົ້າຫວັງວ່າ ການເຫັນພາບສາກເຫຼົ່ານີ້ ຈະເປັນແຮງບັນດານໃຈໃຫ້ນັກຮຽນສືບຕໍ່ການຮຽນຂອງເຂົາເຈົ້າ, ໂດຍຫວັງວ່າເຂົາເຈົ້າຈະສືບຕໍ່ດ້ານການສຶກສາລະດັບທີ່ສູງຂຶ້ນ ໃນຫຼາຍສາຍຮຽນທີ່ໜ້າສົນໃຈ.”
ຂະນະທີ່ທ່ານ ນາງ ວາແນັດຊາ ເຮກາທີ, ເລຂາເອກ ສະຖານທູດອົດສະຕຣາລີ, ໄດ້ອະທິບາຍເຖິງຈຸດປະສົງຫຼັກຂອງແຜນໂຄສະນານີ້ວ່າ: “ພວກເຮົາກຳລັງແກ້ໄຂບັນຫາສຳຄັນທີ່ອັດຕາການເຂົ້າຮຽນຫຼຸດລົງ ແລະ ຄວາມສົງໄສຂອງພໍ່ແມ່ກ່ຽວກັບຄຸນຄ່າຂອງການສຶກສາ. ຜ່ານການເລົ່າເລື່ອງສົມຈິງ ແລະ ການມີສ່ວນຮ່ວມຂອງຊຸມຊົນຢ່າງຕັ້ງໜ້າ, ພວກເຮົາຕ້ອງການກະຕຸ້ນໃຫ້ໄວໜຸ່ມສືບຕໍ່ຮຽນ ແລະ ຊ່ວຍໃຫ້ພໍ່ແມ່ຮັບຮູ້ເຖິງຜົນປະໂຫຍດຕະຫຼອດຊີວິດທີ່ການສຶກສາຈະນຳມາ. ລັດຖະບານອົດສະຕຣາລີ ຮູ້ສຶກເປັນກຽດທີ່ຈະໃຫ້ການສະໜັບສະໜູນດ້ານງົບປະມານ ແລະ ດ້ານວິຊາການ ແກ່ ສສກ ເພື່ອຜະລິດບົດເລື່ອງທີ່ໜ້າສົນໃຈ 4 ເລື່ອງ ເຊິ່ງຈະສ້າງຂຶ້ນເພື່ອປ່ຽນແນວຄິດກ່ຽວກັບການສຶກສາ.”
ສອງບົດເລື່ອງທຳອິດຂອງແຜນໂຄສະນາການສຶກສາກໍ່ຄື ເລື່ອງ “ສອງເສັ້ນທາງ” ແລະ ເລື່ອງ“ຄຸນຄ່າຂອງຄູ” ໄດ້ຮັບການຕ້ອນຮັບເປັນຢ່າງດີຫຼັງຈາກອອກອາກາດໃນເດືອນທີ່ຜ່ານມາ. ເລື່ອງ “ສອງເສັ້ນທາງ” ນຳສະເໜີອະນາຄົດທີ່ແຕກຕ່າງກັນ ຂຶ້ນກັບການຕັດສິນໃຈດ້ານການສຶກສາ, ໂດຍເນັ້ນໜັກເຖິງວິທີທີ່ການສຶກສາຊ່ວຍສ້າງທັກສະທີ່ຈຳເປັນໃຫ້ແກ່ເຍົາວະຊົນ ເຊັ່ນ: ການຄົ້ນຄິດແບບວິເຄາະ ແລະ ໂອກາດໃນການສ້າງຊີວິດທີ່ດີ. ບົດເລື່ອງທີສອງ, “ຄຸນຄ່າຂອງຄູ”, ສະແດງຄວາມເຄົາລົບຕໍ່ການອຸທິດຕົນຂອງຄູ ແລະ ໝາກຜົນອັນເລິກເຊິ່ງທີ່ເຂົາເຈົ້າມີຕໍ່ອະນາຄົດຂອງເດັກ.
ທ່ານ ນາງ ວາແນັດຊາ ໄດ້ກ່າວຕື່ມວ່າ: “ຄວາມຮູ້ສຶກສະເທືອນອາລົມຂອງບົດເລື່ອງນີ້ ເປັນສື່ທີ່ຊົງພະລັງທີ່ຈະຊຸກຍູ້ໃຫ້ເດັກຍິງມີສ່ວນຮ່ວມໃນວິທະຍາສາດ. ຂ້າພະເຈົ້າຂໍສະແດງຄວາມຍິນດີກັບທີມງານຖ່າຍທຳ ແລະ ທີມຜະລິດວິດີໂອ ຕໍ່ວິໄສທັດທີ່ສ້າງສັນຂອງທ່ານເພື່ອເຮັດໃຫ້ເລື່ອງນີ້ສົມຈິງ.”
ວິດີໂອໃໝ່ຫຼ້າສຸດທີ່ກຳລັງຖ່າຍທຳໃນອາທິດນີ້, ບົດເລື່ອງ “ຄວາມຝັນ” ບອກເລົ່າເຖິງເສັ້ນທາງການຮຽນທີ່ປະທັບໃຈຂອງເດັກຍິງຄົນໜຶ່ງ ລາວໄດ້ຂຽນຈົດໝາຍຫາພໍ່ແມ່ທີ່ທຸກຍາກ, ລາວອ້ອນວອນຂໍໃຫ້ພໍ່ແມ່ສະໜັບສະໜູນໃຫ້ລາວສືບຕໍ່ການຮຽນ. ດ້ວຍຄວາມຝັນທີ່ຍິ່ງໃຫຍ່ຂອງລາວ, ລາວມີວິໄສທັດທີ່ຢາກກາຍເປັນ ນັກວິທະຍາສາດ, ນັກວິສະວະກອນ ຫຼື ນັກປະດິດ, ຜູ້ທີ່ຈະພັດທະນານະວັດຕະກຳໃໝ່ໆ ເພື່ອຜົນປະໂຫຍດຂອງຊຸມຊົນທີ່ລາວຢູ່ ແລະ ປະກອບສ່ວນເຂົ້າໃນຄວາມກ້າວໜ້າຂອງປະເທດຊາດ ຊຶ່ງວິດີໂອທັງໝົດຈະອອກອາກາດທົ່ວປະເທດທາງໂທລະພາບ, ສື່ສັງຄົມອອນລາຍ ແລະ ຈະນຳໃຊ້ໂດຍສະມາຊິກສະພາແຫ່ງຊາດເພື່ອເຜີຍແຜ່ຂໍ້ມູນໃນຊຸມຊົນ. ນອກຈາກນັ້ນ, ວິດີໂອຍັງຈະເຜີຍແຜ່ໃຫ້ແກ່ຄູອາຈານ, ຜູ້ເຮັດວຽກສຶກສານິເທດ ແລະ ຜູ້ເຮັດວຽກສຶກສານິເທດພາຍໃນ ເພື່ອຊ່ວຍໂຄສະນາໃນຂັ້ນທ້ອງຖິ່ນພາຍໃນໂຮງຮຽນ ແລະ ບ້ານຕ່າງໆ.
