24/08/2026
ສະມາຄົມການສຶກສາພາກເອກະຊົນ ໄດ້ຈັດພິທີປິດຝຶກອົບຮົມຍົກລະດັບຂີດຄວາມສາມາດ ຄູສອນທີ່ບໍ່ຖືກຊັ້ນຖືກສາຍ ແລະ ຄູສອນທີຍັງບໍ່ຜ່ານວິຊາຄູ ໃນສາຍອະນຸບານ ແລະ ປະຖົມສຶກສາ
_==≠===============
ໃນຕອນບ່າຍ ຂອງ ວັນທີ 23 ສິງຫາ 2026 ທີ່ຫ້ອງປະຊຸມຊັ້ນ 5 ຂອງໂຮງຮຽນ ຄິມເບີ ໄດ້ຈັດພິທີປິດການຝຶກອົບຮົມຍົກລະດັບຂີດຄວາມສາມາດດ້ານການສອນ ສຳລັບຄູສອນທີ່ຍັງບໍ່ທັນຖືກຊັ້ນ-ຖືກສາຍ ແລະ ຄູສອນທີ່ຍັງບໍ່ທັນໄດ້ຜ່ານການຮຽນວິຊາຄູ ໃນຫຼັກສູດສ້າງຄູອະນຸບານສຶກສາ ແລະ ສ້າງຄູປະຖົມສຶກສາຢ່າງເປັນທາງການ. ໃນນັ້ນມີບັນດາທ່ານຄູຝຶກຈາກວິທະຍາໄລຄູ ດົງຄຳຊ້າງ ຈຳນວນ 23 ທ່ານ ເປັນຍິງ17ທ່ານ ແລະ ຜູ້ທີ່ເຂົ້າຮ່ວມຝຶກອົບຮົມໃນຄັ້ງນີ້ມີທັງ ສາຍສ້າງຄູ ອະນຸບານ ຈຳນວນ 120 ທ່ານ/ຍິງ 118 ທ່ານ, ສາຍສ້າງຄູປະຖົມສຶກສາ ຈຳນວນ 64 ທ່ານ/ຍິງ 56ທ່ານ. ໃຊ້ເວລາການຝຶກອົບຮົມທັງໝົດ 4 ອາທິດ ເປັນ 120 ຊົ່ວໂມງ.
ພິທີດັ່ງກ່າວໄດ້ຈັດຂຶ້ນພາຍໃຕ້ການເປັນປະທານຂອງ ທ່ານ ປອ ລຳພູນ ຫຼວງໄຊ ຫົວໜ້າກົມພັດທະນາຄູ ແລະ ການບໍລິຫານການສຶກສາ, ມີ ທ່ານ ສີພອນ ວັນນະລາດ ຜູ້ອຳນວຍການວິທະຍາໄລຄູ ດົງຄຳຊ້າງ ເປັນປະທານ ຮ່ວມ ແລະ ທ່ານ ບຸນຕີ ສິດທິນົນທອງ ຮອງປະທານສະມາຄົມການສຶກສາພາກເອກະຊົນ ໂດຍມີບັນດາທ່ານຜູ້ອຳນວຍການ, ຮອງຜູ້ອຳນວຍການ, ຄູ-ອາຈານ, ຄູຝຶກ ແລະ ນັກຝຶກອົບຮົມ ເຊິ່ງເປັນຄູ ຈາກໂຮງຮຽນອະນຸບານ ແລະ ປະຖົມສຶກສາ ເຂົ້າຮ່ວມຢ່າງພ້ອມພຽງ.
ການຈັດພິທີປິດຝຶກອົບຮົມໃນຄັ້ງນີ້ ກໍໄດ້ມີການຜ່ານບົດສະຫຼຸບຜົນສຳເລັດໃນການຈັດຕັ້ງປະຕິດບັດ ວຽກງານການຝຶກອົບຮົມຄັ້ງນີ້ ແລະ ມອບໃບ ຢັ້ງຢືນ ໃຫ້ແກ່ບັນດາທ່ານ ຄູຝຶກ ແລະ ນັກຝຶກອົບຮົມ ຢ່າງເປັນຂະບວນການ ເຊິ່ງມີຈຸດປະສົງຕົ້ນຕໍກໍເພື່ອພັດທະນາ ແລະ ຍົກລະດັບຂີດຄວາມສາມາດໃຫ້ແກ່ຄູສອນທີ່ບໍ່ຖືກຊັ້ນຖືກສາຍ ໃຫ້ມີຄຸນນະພາບໃນການສອນ ເນັ້ນໃສ່ການສ້າງ ແລະ ປັບປຸງທັກສະ, ເຕັກນິກວິທີການສອນ, ພ້ອມທັງເຕັກນິກການຄຸ້ມຄອງຫ້ອງຮຽນ ໃຫ້ກັບຄູ ທີ່ປະຕິບັດໜ້າທີ່ສອນບໍ່ຖືກຕາມສາຍວິຊາທີ່ຮຽນມາ ແລະ ຄູທີ່ຍັງບໍ່ທັນໄດ້ຜ່ານການຮຽນວິຊາຄູ ໃຫ້ມີຄວາມຮູ້-ຄວາມສາມາດ, ທັກສະດ້ານຈິດຕະວິທະຍາ ແລະ ເຕັກນິກການສອນທີ່ຖືກຕ້ອງຕາມຫຼັກສູດສ້າງຄູອະນຸບານ ແລະ ປະຖົມສຶກສາທີ່ກະຊວງສຶກສາທິການ ແລະ ກິລາ ວາງອອກ.
ໃນພິທີດັ່ງກາວ, ທ່ານ ປອ ລຳພູນ ຫຼວງໄຊ ຫົວໜ້າກົມພັດທະນາຄູ ແລະ ການບໍລິຫານການສຶກສາ ໄດ້ມີຄຳເຫັນໂອ້ລົມ ຕໍ່ບັນດານັກຝຶກອົບຮົມດັ່ງນີ້:
1) ໃຫ້ບັນດານັກຝຶກອົບຮົມຮັກສາກຽດແລະສັກສີຂອງຄວາມເປັນຄູແລະຍົດສະຖານະຄູທຸກຄົນໃຫ້ກ່າວສູສາກົນ.
2).ໃຫ້ຄູທຸກຄົນຍົກລະດັບຂີດຄວາມສາມາດ ໃນການຝຶກອົບຮົມເພື່ອໃນໃຊ້ຄວາມສາມາດໃນການຈັດກິດຈະກຳການຮຽນ-ການສອນ ພ້ອມດຽວກັນນັ້ນ, ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມການຝຶກອົບຮົມທຸກທ່ານ ຈົ່ງເອົາໃຈໃສ່ຕິດຕາມ, ເກັບກ່ຽວເອົາຄວາມຮູ້, ບົດຮຽນ ແລະ ທັກສະໃໝ່ໆ ຈາກການຖ່າຍທອດຂອງວິທະຍາກອນຢ່າງເຕັມຮູບແບບ ຖືຫຼັກການວິທະຍາສາດ ເພື່ອນຳໄປປັບໃຊ້ເຂົ້າໃນການສອນຕົວຈິງຢູ່ຕາມໂຮງຮຽນຂອງຕົນ ໃຫ້ມີປະສິດທິພາບ ແລະ ເກີດປະໂຫຍດສູງສຸດ.
ໃນທ້າຍຂອງພິທີ ທ່ານ ບຸນຕີ ສິດທິນົນທອງ ຮອງປະທານສະມາຄົມການສຶກສາພາກເອກະຊົນ ກໍໄດ້ກ່າວຮັບຄຳໂອ້ລົມຂອງທ່ານປະທານ ແລະ ໄດ້ກ່າວຄຳຂອບໃຈພ້ອມຮັບເອົາເນື້ອໃນຕ່າງຄຳໄປຈັດຕັ້ງປະຕິບັດໃຫ້ແກ່ບັນດາທ່ານຄູທີ່ມາຝຶກອົບຮົມໃຫ້ມັນເກີດດອກອອກຜົນ ແລະ ພ້ອມທີ່ຈະຜັນຂະຫຍາຍເນື້ອໃນບົດຮຽນຄຳຄິດເຫັນໃຫ້ແກ່ບັນດາທ່ານຄູສອນທີ່ຍັງບໍ່ທັນໄດ້ຜ່ານວິຊາຊີບຕໍ່ໃນຄັ້ງຕໍ່ໄປ.
#ສະມາຄົມການສຶກສາພາກເອກະຊົນ
ຮູບພາບເພີ່ມເຕີ່ມໄດ້ທີ່👇🏻👇🏻
https://drive.google.com/drive/folders/1FwJBud-0_pnAY2F8nZZBGwC0Ky0RrFJT?usp=sharing
