ຫ້ອງການສຶກສາທິການ ແລະ ກິລາ ເມືອງຮ້ຽມ ແຂວງຫົວພັນ

31/08/2024

06/09/2023

ຫ້ອງການສຶກສາທິການ ແລະ ກິລາ ເມືອງຮ້ຽມ
ເປີດກອງປະຊູມ ຜູ້ບໍລິຫານການສຶກສາ ແລະ ກິລາ ທົ່ວເມືອງ ສົກຮຽນ 2022-2023.

ໃນວັນທີ 5 ກັນຍາ 2023 ນີ້ ຫ້ອງການສຶກສາທິການ ແລະ ກິລາ ເມືອງຮ້ຽມ ແຂວງຫົວພັນ ໄດ້ເປີດກອງປະຊຸມຜູ້ບໍລິຫານການສຶກສາຂື້ນຢ່າງເປັນທາງການ ຢູ່ທີ່ຫ້ອງປະຊຸມ ສກມ, ໂດຍພາຍໃຕ້ການເປັນປະທານຂອງ ທ່ານ ທອງຄຳ ຫງຽນມະລົມ ຄະນະປະຈໍາພັກເມືອງ ຮອງເຈົ້າເມືອງ ເມືອງຮ້ຽມ, ເປັນກຽດເຂົ້າຮ່ວມ ຂອງທ່ານ ລີນອານົງ ທອງຄໍາມີ ຮອງຫົວໜ້າພະແນກສຶກສາທິການ ແລະ ກິລາແຂວງຫົວພັນ ແລະ ທ່ານ ນ. ຊ່ຽນ ສີດາວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງຮ້ຽມ, ມີຫົວໜ້າ, ຄະນະພັດທະນາການສຶກສາຂັ້ນເມືອງ ຄະນະພັກກຸ່ມບ້ານ 5 ກຸ່ມບ້ານ, ຄະນະຮັບຜິດຊອບກອງປະຊຸມ, ຫົວໜ້າ, ຮອງຫົວໜ້າຫ້ອງການສຶກສາ ແລະ ຜູ້ອໍານວຍການໂຮງຮຽນໃນທຸກຊັ້ນທົ່ວເມືອງຮ້ຽມ ເຂົ້າຮ່ວມຢ່າງພ້ອມພຽງ.
ຜູ້ເຂົ້າຮ່ວມກອງປະຊຸມ ໄດ້ຮັບຟັງ ບົດສະຫຼຸບ ການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ, ປະຈຳສົກຮຽນ 2022-2023 ແລະ ທິດທາງແຜນການ ປະຈໍາສົກຮຽນ 2023-2024, ບົດວິໄຈສະພາບການສຶກສາຈາກ ທ່ານ ນາງ ອ່ອນສີ ພອນຄໍາທອງ ຮອງຫົວໜ້າຫ້ອງການສຶກສາທິການ ແລະ ກິລາ ໄດ້ໃຫ້ຮູ້ວ່າ ໃນສົກຮຽນ 2022-2023 ຢູ່ເມືອງຮ້ຽມ ມີໂຮງຮຽນທັງໝົດ 65 ແຫ່ງ, ມີນັກຮຽນທັງໝົດ 3,615 ນ້ອງ. ໃນນັ້ນ, ມີໂຮງຮຽນອະນຸບານ 29 ແຫ່ງ, ມີນັກຮຽນທັງໝົດ 804 ນ້ອງ, ໂຮງຮຽນປະຖົມ 31 ແຫ່ງ, ມີນັກຮຽນ 1,204 ນ້ອງ, ໂຮງຮຽນມັດທະຍົມຕົ້ນ 4 ແຫ່ງ, ມີນັກຮຽນ 883 ນ້ອງ ແລະ ມັດທະຍົມສົມບຸນ 2 ແຫ່ງ, ມີນັກຮຽນ 688 ນ້ອງ, ມີພະນັກງານ-ລັດຖະກອນສຶກສາທັງໝົດ 271 ຄົນ, ຍິງ 129 ຄົນ, ໃນນັ້ນມີຄູອາສາສະມັກ 4 ຄົນ, ຍິງ 3 ຄົນ, ໄລຍະຜ່ານມາຜູ້ບໍລິຫານການສຶກສາ ແລະ ກິລາ ແຕ່ລະຂັ້ນ ໄດ້ເອົາໃຈໃສ່ປຸກລະດົມສ້າງໂອກາດໃຫ້ເດັກທີ່ມີເກນອາຍຸໄດ້ເຂົ້າຮຽນຫຼາຍຂຶ້ນ, ຈັດຕັ້ງປະຕິບັດ 3 ຂໍ້ແຂ່ງຂັນທີ່ ກະຊວງສຶກສາທິການ ແລະ ກີລາວາງອອກ (ສອນດີ-ຮຽນເກັ່ງ, ຕ້ານປະກົດການຫຍໍ້ທໍ້ ແລະ ສ້າງສິ່ງແວດລ້ອມໃນໂຮງຮຽນ) ເຫັນໄດ້ວ່າມີຜົນສໍາເລັດຫຼາຍຂຶ້ນກວ່າປີທີ່ຜ່ານມາ; ໃນສົກຮຽນ 2023-2024 ໄດ້ມີແຜນສູ້ຊົນເພື່ອແກ້ໄຂບັນຫາຕ່າງໆທີ່ກົດໜ່ວງການພັດທະນາການສຶກສາ ແລະ ກິລາ ຜູ້ບໍລິຫານໂຮງຮຽນ ແຕ່ລະທ່ານ ຕ້ອງປັບປຸງແບບແຜນວິທີເຮັດວຽກໃຫ້ໜັກແໜ້ນເຂັ້ມແຂງທຸກດ້ານ ໂດຍສະເພາະແມ່ນຂອດຈັດຕັ້ງປະຕິບັດ ແລະ ຂອດປະສານງານໃຫ້ສອດຄ່ອງກັບຄວາມເປັນຈິງ ພ້ອມທັງສູ້ຊົນສົ່ງເສີມໃຫ້ເດັກນ້ອຍໄດ້ເຂົ້າໂຮງຮຽນຕາມເກນອາຍຸ, ຊຸກຍູ້ສົ່ງເສີມພໍ່ແມ່ຜູ້ປົກຄອງເດັກໃຫ້ໄດ້ເຂົ້າຮຽນຫຼາຍຂຶ້ນ, ສ້າງຮັບຜິດຊອບສູງໃຫ້ຜູ້ບໍລິຫານໂຮງຮຽນ, ຄູສອນ, ຄູສຶກສານິເທດ ແລະ ຄະນະພັດທະນາການສຶກສາແຕ່ລະຂັ້ນ, ຕິດຕາມຊ່ວຍເຫຼືອການຮຽນ-ການສອນ ຢູ່ໃນໂຮງຮຽນໃຫ້ມີປະສິດທິພາບສູງ, ແບ່ງຄວາມຮັບຜິດຊອບໃຫ້ເໝາະສົມ, ເພື່ອຮັບປະກັນດ້ານຄຸນນະພາບການສຶກສາແຕ່ລະຊັ້ນຮຽນ ຕ້ອງບໍາລຸງນັກຮຽນເກັ່ງ ແລະ ສອນເພີ່ມນັກຮຽນອ່ອນ, ສະໜອງອຸປະກອນການຮຽນ-ການສອນ ທີ່ຈໍາເປັນພື້ນຖານໃຫ້ແຕ່ລະໂຮງຮຽນ ແລະ ສືບຕໍ່ສ້າງໂຮງຮຽນປອດຢາເສບຕິດໃຫ້ເປັນຂະບວນຟົດຟື້ນ, ໃນນີ້ ຜູ້ແທນເຂົ້າຮ່ວມຍັງໄດ້ສົນທະນາປະກອບຄຳຄິດຄຳເຫັນ ແລະ ໃຫ້ທິດທາງແກ້ໄຂບັນດາຂໍ້ຂ້ອງໃຈຕ່າງໆ ຂອງວຽກງານຖັນແຖວການສຶກສາ ແລະ ກິລາເມືອງ, ພ້ອມກັນປະກອບຄໍາຄິດຄໍາເຫັນໃສ່ບົດສະຫຼຸບ-ແຜນການ ຢ່າງເປັນເອກະພາບ.
ໃນຕອນທ້າຍ ທ່ານ ທອງຄໍາ ຫງຽນມະລົມ ຄະນະປະຈໍາພັກເມືອງ ຮອງເຈົ້າເມືອງເມືອງຮ້ຽມ ປະທານກອງປະຊຸມເຊິ່ງທ່ານໄດ້ ສະແດງຄວາມຍ້ອງຍໍຊົມເຊີຍຕໍ່ ຫ້ອງສຶກສາທິການສຶກສາທິການ ແລະ ກິລາເມືອງ, ຄະນະພັດທະນາການສຶກສາຂັ້ນເມືອງ, ຂັ້ນບ້ານ ແລະ ອໍານວຍການໂຮງຮຽນທີ່ເຂົ້າຮ່ວມກອງປະຊຸມຈົ່ງພ້ອມກັນເອົາໃຈໃສ່ດ້ວຍຄວາມຕັ້ງໃຈດ້ວຍຄວາມຮັບຜິດຊອບສູງຕໍ່ໜ້າທີ່ວິຊາສະເພາະຂອງຕົນ. ຈາກນັ້ນ, ທ່ານຍັງໄດ້ຮຽກຮ້ອງໃຫ້ຜູ້ບໍລິຫານການສຶກສາທຸກຂັ້ນ, ຄູອາຈານທຸກຄົນຈົ່ງພ້ອມກັນນຳເອົາບັນດາເນື້ອໃນກອງປະຊຸມທີ່ສຳຄັນຕ່າງໆ ແລະ ມະຕິກອງຂອງປະຊຸມໃນຄັ້ງນີ້ ນໍາໄປຈັດຕັ້ງຜັນຂະຫຍາຍໃຫ້ເປັນແຜນການ-ແຜນງານລະອຽດ ແລະ ພ້ອມຈັດຕັ້ງປະຕິບັດໃຫ້ເກີດດອກອອກຜົນສູງສຸດ ໃນສົກຮຽນ 2023-2024.
ກອງປະຊູມດັ່ງກ່າວ ໄດ້ດໍາເນີນໄປເປັນເວລາ 1 ວັນເຕັມ ແລະ ປິດລົງໃນຕອນແລງຂອງວັນດຽວກັນ.
ພາບໂດຍ: ທ ໄມແສງ
ຂ່າວໂດຍ: ນາງ ໄມວ່າງ

09/08/2023

ບົດຂ່າວ : ກອງປະຊຸມຝຶກອົບຮົມ ເຜີຍແຜ່ເອກະສານໃຫ້ ພະນັກງານ - ຄູ ໄລຍະພັກສິ້ນປີຮຽນ
ສົກຮຽນ 2022-2023
ວັນທີ 2 ສິງຫາ 2023 ນີ້ຫ້ອງການສຶກສາທິການ ແລະ ກິລາ ເມືອງຮ້ຽມ ແຂວງຫົວພັນ ໄດ້ຈັດກອງປະຊຸມຝຶກອົບຮົມ, ເຜີຍແຜ່ເອກະສານໃຫ້ ພະນັກງານ - ຄູ ໄລຍະພັກສິ້ນປີຮຽນ ສົກຮຽນ 2022-2023 ຂຶ້ນຢູ່ທີ່ສະໂມສອນຂອງເມືອງ ໂດຍໃຫ້ກຽດເປັນປະທານຮ່ວມຂອງທ່ານ ເຄນທະນູ ພຸດທະວົງສາ ຮອງຫົວໜ້າພະແນກສຶກສາທິການ ແລະກິລາແຂວງຫົວພັນ ແລະ ທ່ານ ນາງຊ່ຽນ ສີດາວົງກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາ ເມືອງຮ້ຽມ, ມີ ຄະນະຮັບຜິດຊອບຂັ້ນແຂວງ,ຂັ້ນເມືອງ, ອຳນວຍການໂຮງຮຽນແຕ່ລະໜວດໂຮງຮຽນທົ່ວເມືອງ, ຄູ- ອາຈານ ພ້ອມດ້ວຍພະນັກງານ-ລັດຖະກອນຫ້ອງການສຶກສາທິການ ແລະ ກິລາເມືອງເຂົ້າຮ່ວມທັງໝົດ 180ຄົນ,ຍິງ 77 ຄົນ
ກອງປະຊຸມຄະນະຮັບຜິດຊອບຂັ້ນແຂວງ, ຂັ້ນເມືອງໄດ້ພັດປ່ຽນກັນເຜີຍແຜ່ເອກະສານເຊີ່ງມີ: ເອກະສານ ການຄຸ້ມຄອງ ແລະ ບໍລິຫານໂຮງຮຽນສາຍສາມັນສຶກສາ, ດຳລັດຂອງລັດຖະບານ ວ່າດ້ວຍລັດຖະກອນຄູ, ຈັນຍາບັນ, ຂໍ້ຫ້າມຂອງຄູ ແລະ ບຸກຄະລາກອນຂະແໜງການສຶກສາ ແລະ ກິລາ, ຄຳສັ່ງແນະນຳການສະກັດກັ້ນ ແລະ ການແກ້ໄຂພະນັກງານຕໍ່ກັບພະນັກງານ, ຄູ - ອາຈານ, ນັກສຶກສາ ແລະ ນັກຮຽນທີ່ພົວພັນ ແລະ ຕິດສິ່ງເສບຕິດ, ແຜນການຄຸ້ມຄອງການເງິນ, ກໍ່ສ້າງ ແລະ ຊັບສິນ ແລະ ມະຕິກອງປະຊຸມຄົບຄະນະບໍລິຫານງານສູນກາງພັກສະໄໝ XI, ພ້ອມທັງໄດ້ເນັ້ນໜັກວຽກງານທີສຳຄັນເປັນຕົ້ນ: ອໍານວຍການໂຮງຮຽນ, ຄູ-ອາຈານຕ້ອງໄດ້ພ້ອມກັນເອົາໃຈໃສ່ຕໍ່ວຽກງານການຄຸ້ມຄອງ ແລະ ບໍລິຫານໂຮງຮຽນໄປຕາມ 7 ວຽກຂອງການຄຸ້ມຄອງ-ບໍລິຫານໂຮງຮຽນ, ປະຕິບັດຕາມ 4ຈັນຍາບັນຂອງຄູຄືຈັນຍາບັນຕໍ່ຕົນເອງ, ຈັນຍາບັນຕໍ່ວິຊາຊີບ,ຈັນຍາບັນຕໍ່ການຈັດຕັ້ງ, ຈັນຍາບັນຕໍ່ປະຊາຊົນ ແລະ ສັງຄົມ ແລະ ປະຕິບັດຕາມຂໍ້ຫ້າມ ທີ່ກະຊວງສຶກສາທິການ ແລະ ກິລາໄດ້ວາງອອກ, ປະຕິບັດຕາມຄຳສັ່ງແນະນຳຂອງພະແນກສຶກສາທິການ ແລະ ກິລາແຂວງວາງອອກ ກ່ຽວກັບການສະກັດກັ້ນ ແລະ ການແກ້ໄຂຕໍ່ກັບ ພະນັກງານ, ຄູ-ອາຈານ, ນັກສຶກສາ ແລະ ນັກຮຽນ ທີ່ພົວພັນ ແລະ ຕິດສິ່ງເສບຕິດ ເພື່ອເປັນການຕ້ານ, ສະກັດກັ້ນ ແລະ ແກ້ໄຂບັນຫາ ສິ່ງເສບຕິດ ບໍ່ໃຫ້ເກີດຂຶ້ນໃນຖັນແຖວການສຶກສາ ແລະ ກິລາ ໃນຂອບເຂດທົ່ວແຂວງ, ທັງເຮັດໃຫ້ການແກ້ໄຂບັນຫາ ມີຄວາມເປັນເອກະພາບກັນ ໃນຖັນແຖວການສຶກສາ ແລະ ກິລາ ທຸກຂັ້ນ ທົ່ວແຂວງ ແລະ ເອົາໃຈສ່ປະຕິບັດວຽກງານການເງິນ,ການຄຸ້ມຄອງ ແລະ ປົກປັກຮັກສາອາຄານຮຽນ ໃຫ້ໄດ້ນຳໃຊ້ຢ່າງຍາວນານ.
ໃນຕອນທ້າຍກອງປະຊຸມເຜີຍແຜ່ເອກະສານຄັ້ງນີ້ທ່ານ ເຄນທະນູ ພຸດທະວົງສາ ຮອງຫົວໜ້າພະແນກສຶກສາທິການ ແລະ ກິລາແຂວງໄດ້ມີຄຳເຫັນໂອ່ລົມເພື່ອເຮັດໃຫ້ ອໍານວຍການໂຮງຮຽນ, ຄູ-ອາຈານໄດ້ຮັບຮູ້ເຂົ້າໃຈຢ່າງເລິກເຊິງຕໍ່ກັບບັນດາເອກະສານຕ່າງເພື່ອນຳໄປຈັດຕັ້ງປະຕິບັດໃນສົກຮຽນຕໍ່ໜ້າໃນການຄຸ້ມຄອງ ແລະ ບໍລິຫານໂຮງຮຽນ, ປະຕິບັດຕາມຈັນຍາບັນຂອງຄູ, ການແກ້ໄຂບັນຫາຍາເສບຕິດ, ຄຸ້ມຄອງວຽກງານການເງິນ ແລະ ປະຕິບັດມະຕິກອງປະຊຸມຄົບຄະນະບໍລິຫານງານສູນກາງພັກສະໄໝ XI ໃຫ້ມີຜົນສຳເລັດ,ຄູສອນຕ້ອງເອົາໃຈໃສ່ປະຕິບັດວຽກວິຊາສະເພາະຂອງຕົນເອງເປັນແບບຢ່າງທີ່ດີເພື່ອເຮັດໃຫ້ຄຸນນະພາບການຮຽນຂອງນັກຮຽນມີຄວາມກ້າວໜ້າຂື້ນເລື້ອຍໆ
ກອງປະຊຸມດັ່ງກ່າວໄດ້ດຳເນີນເປັນເວລາ 01 ວັນເຕັມຈິ່ງໄດ້ປິດລົງດ້ວຍໝາກຜົນອັນຈົບງາມ.
ຂ່າວໂດຍ : ທ ໄມແສງ ພັນວົງໄຊ

25/07/2023

ແຈ້ງການ : ຮັບພະນັກງານ-ຄູສອນ,ນັກສຶກສາ ແລະ ນັກຮຽນ ຜູ້ທີ່ສົນໃຈຢາກໄປຮຽນຢູ່ ວິທະຍາໄລພະລະສຶກສາ ປະຈຳສົກຮຽນ 2023-2024

13/07/2023

ຊົມເຊີຍວັນກິລາ-ກາຍຍະກຳແຫ່ງຊາດຄົບຮອບ57ປີຢ່າງສຸດໃຈ

11/07/2023

ບົດຂ່າວ: ກອງປະຊຸມຝຶກອົບຮົມຫຼັກສູດໃໝ່ຊັ້ນ ປ5 ທົ່ວເມືອງຮ້ຽມ
ສົກຮຽນ 2022 – 2023
ໃນຕອນເຊົ້າຂອງວັນທີ 04 ກໍລະກົດ 2023 ຜ່ານມານີ້ຫ້ອງການສຶກສາທິການ ແລະ ກິລາເມືອງຮ້ຽມໄດ້ຈັດກອງປະຊຸມຝຶກອົບຮົມຫຼັກສູດຊັ້ນ ປ5 ສະບັບປັບປຸງໃໝ່ໃຫ້ຄູສອນປະຈໍາການ ແລະ ອໍານວຍການໂຮງຮຽນໃນທົ່ວເມືອງຮ້ຽມປະຈຳປີ 2022 - 2023 ຂຶ້ນຢ່າງເປັນທາງການ ໂດຍການໃຫ້ທຶນການຊ່ວຍເຫຼືອຈາກໂຄງການບີຄວາ, ກອງປະຊຸມດັ່ງກ່າວພາຍໃຕ້ການເປັນປະທານຂອງ ທ່ານ ນາງອ່ອນສີ ພອນຄຳທອງ ຮອງຫົວໜ້າຫ້ອງການສຶກສາທິການ ແລະ ກິລາເມືອງພ້ອມດ້ວຍຄູຝຶກຫຼັກແຫຼ່ງຂັ້ນແຂວງ 3 ທ່ານ,ຍິງ 01 ທ່ານ, ຄູຝຶກຂັ້ນເມືອງ 1 ທ່ານ, ຍິງ 0 ທ່ານ ແລະ ນັກສຳມະນາກ່ອນ 35 ທ່ານ, ຍິງ 9 ທ່ານລວມທັງໝົດ 40 ທ່ານ, ຍິງ ທ່ານເຂົ້າຮ່ວມຢ່າງພ້ອມພຽງ.
ຈຸດປະສົງຂອງການຝຶກອົບຮົມໃນຄັ້ງນີ້ແມ່ນເພື່ອແນໃສ່ຝຶກໃຫ້ຄູສອນຂັ້ນຮຽນ ປ5 ແລະ ຝຶກການຕິດຕາມການນິເທດໃຫ້ຜູ້ອໍານວຍການໂຮງຮຽນໃນການນໍາໃຊ້ຫຼັກສູດສະບັບປັບປຸງໃໝ່ ເພື່ອເຮັດໃຫ້ການສອນ - ການຮຽນຊັ້ນ ປ5 ໃຫ້ມີຄຸນນະພາບດິຂື້ນກວ່າເກົ່າ, ກອງປະຊຸມຝຶກອົບຮົມໃນຄັ້ງນີ້ໄດ້ດຳເນີນມາເຖິງວັນທີ 09 ກໍລະກົດ 2023 ຈິ່ງໄດ້ສໍາເລັດລົງ, ໃນຕອນທ້າຍ ຂອງກອງປະຊຸມທ່ານນາງ ອ່ອນສີ ພອນຄຳທອງ ປະທານກອງປະຊຸມໄດ້ມີຄໍາເຫັນໂອ້ລົມ ແລະ ໃຫ້ຄໍາຍ້ອງຍໍຊົມເຊີຍຕໍ່ຄະນະຮັບຜິດຊອບທຸກທ່ານທີ່ໄດ້ຫ້າງຫາກະກຽມຄວາມພ້ອມທາງດ້ານເນື້ອໃນເອກະສານ, ສະຖານທີ່ຈັດກອງປະຊຸມ, ນັກວິທະຍາກອນ ແລະ ນັກສໍາມະນາກອນທີ່ພ້ອມກັນເອົາໃຈໃສ່ ແລະ ມີຄວາມຮັບຜິດຊອບສູງຕໍ່ໜ້າທີ່ຂອງຕົນຈົນເຮັດໃຫ້ກອງປະຊຸມຝຶກອົບຮົມຂອງພວກເຮົາໃນຄັ້ງນີ້ມີຜົນສໍາເລັດດ້ວຍໝາກຜົນອັນຈົບງາມ.

04/07/2023

ແຈ້ງເຖິງນັກຮຽນທີຮຽນຈົບຊັ້ນ ມັດທະຍົມຕອນປາຍທົ່ວເມືອງຮ້ຽມ ສົນໃຈສອບເສັງເຂົ້າຮຽນຢູ່ມະຫາວິທະຍາໄລວິທະຍາສາດສຸຂະພາບ(ມວສ) ແລະ ວິທະຍາໄລວິທະຍາສາດ ສຸຂະພາບຊຽງຂວາງ ສົກປີ 2023-2024.(ລາຍລະອຽດອ່ານຕາມແຈ້ງການ).

14/06/2023

ເມືອງຮ້ຽມ : ໄດ້ເປີດພິທີການສອບເສັງຈົບຊັ້ນ ມ4 ສົກຮຽນ 2022 – 2023..................................................................................................
ໃນຕອນເຊົ້າຂອງວັນທີ 13 ມິຖຸນາ 2023 ຫ້ອງການສຶກສາທິການ ແລະ ກິລາເມືອງຮ້ຽມ ໄດ້ຈັດພິທີເປີດສອບເສັງຈົບຊັ້ນມັດທະຍົມສຶກສາຕອນຕົ້ນຊັ້ນ ມ4 ໄດ້ເປີດຂຶ້ນເປັນທາງການ,ຢູ່ທີ່ສະໂມສອນໃຫຍ່ ຂອງເມືອງໃນການສອບເສັງຈະໄດ້ດໍາເນີນຂື້ນໃນລະຫວ່າງວັນທີ 14 - 16 ມິຖຸນາ 2023 ໂດຍພາຍໃຕ້ການເປັນປະທານ ຂອງ ທ່ານ ນ. ຊ່ຽນ ສີດາວົງ ກໍາມະການພັກເມືອງ ຫົວໜ້າຫ້ອງການສຶກສາ ແລະ ກິລາ ເມືອງຮ້ຽມ ເຊິ່ງໄດ້ເປັນເອກະພາບກັນທົ່ວເມືອງຮ້ຽມ ໃນນັ້ນ ສົກຮຽນ 2022 - 2023 ທົ່ວເມືອງຮ້ຽມ ມີນັກສອບເສັງທີ່ມີໜ້າເຂົ້າສອບເສັງທັງໝົດ 242 ຄົນ, ຍິງ 121 ຄົນ, ໄດ້ແບ່ງສູນສອບເສັງອອກເປັນ 2 ສູນ ສອບເສັງຄື: ສູນ ມສ ຮ້ຽມ ແລະ ສູນ ມຕ ດາວເຮືອງ, ລວມ ມີ 11 ຫ້ອງສອບເສັງ, ມີຄະນະປະທານປະຈໍາສູນສອບເສັງ 2 ທ່ານ, ຄະນະປະທານ ແລະ ຄະນະຮັບຜິດຊອບນໍາພາສອບເສັງແຕ່ລະສູນລວມທັງໝົດ 8 ທ່ານ, ກຳມະການຍາມຫ້ອງເສັງ,ກວດບົດສອບເສັງ ແລະ ປ້ອງກັນສູນ 26 ທ່ານ.
ໃນຄະນະດຽວກັນ ທ່ານ ນາງ ຊ່ຽນ ສີດາວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງຮ້ຽມ, ທັງເປັນປະທານການສອບເສັງຈົບຊັ້ນມັດທະຍົມສຶກສາຕອນຕົ້ນ ມ4 ໃນປີນີ້ໄດ້ກ່າວວ່າ: ສໍາລັບການສອບເສັງຈົບຊັ້ນມັດທະຍົມສຶກສາຕອນຕົ້ນຊັ້ນ ມ4 ໃນສົກຮຽນ 2022 - 2023 ນີ້ ການນໍາຫ້ອງການສຶກສາທິການ ແລະ ກິລາເມືອງຮ້ຽມ ກໍ່ໄດ້ຈັດກອງປະຊຸມວາງແຜນການ, ແບ່ງຄວາມຮັບຜິດຊອບແຕ່ລະໜ້າວຽກໃຫ້ແຕ່ລະອະນຸກຳມະການແຕ່ລະຂັ້ນ, ປຶກສາຫາລືກັບຄະນະຮັບຜິດຊອບຢູ່ຂັ້ນເມືອງ ແລະ ຂັ້ນໂຮງຮຽນບ່ອນທີ່ຈັດເປັນສູນສອບເສັງນັ້ນ ໂດຍອິງໃສ່ຕາມແຈ້ງການຂອງ ພະແນກສຶກສາທິການ ແລະ ກິລາແຂວງວາງອອກຢ່າງເຂັ້ມງວດ ເພື່ອໃຫ້ສຳເລັດຜົນຕາມກຳນົດເວລາທີ່ກຳນົດໄວ້, ຂະນະທີ່ແຕ່ລະສູນກຳລັງຈັດການສອບເສັງນັ້ນ ການນຳເມືອງ ເຊິ່ງນຳໂດຍ ທ່ານ ທອງຄໍາ ຫງຽນມາລົມ ຮອງເຈົ້າເມືອງ ເມືອງຮ້ຽມ ຜູ້ຊີ້ນໍາຂົງເຂດວັດທະນາທໍາ - ສັງຄົມ ເມືອງຮ້ຽມ ໄດ້ເອົາໃຈໃສ່ ສົມທົບກັບຫົວໜ້າຄະນະຫ້ອງການ, ຄະນະຮັບຜິດຊອບຮຽກຮ້ອງໃຫ້ມີຄວາມຮັບຜິດຊອບສູງ, ເອົາໃຈໃສ່ຕິດຕາມການສອບເສັງຢ່າງຕໍ່ເນື່ອງຈົນໃຫ້ມີຜົນສຳເລັດການສອບເສັງ ທັງນີ້ກໍ່ເພື່ອເປັນການໃຫ້ກຳລັງໃຈແກ່ຄະນະກຳມະການ ທີ່ຮັບຜິດຊອບຢູ່ໃນແຕ່ລະສູນສອບເສັງນັ້ນມີຄວາມເຊື່ອໝັ້ນຕໍ່ການນຳພາຂອງ ພັກ - ລັດ ຂັ້ນເທິງ, ຄວາມເປັນຫ່ວງເປັນໄຍ, ຄວາມເປັນລະບຽບຮຽບຮ້ອຍ, ຄວາມສະຫງົບບໍ່ໃຫ້ມີຊ່ອງຫວ່າງ ແລະ ບັນຫາທີ່ຈະເກີດຂື້ນໃນບັ້ນສອບເສັງຈົບຊັ້ນມັດທະຍົມສຶກສາຕອນຕົ້ນຊັ້ນ ມ4 ໃນສົກຮຽນນີ້, ທ່ານ ນາງ ຊ່ຽນ ສີດາວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາເມືອງຮ້ຽມ, ທັງເປັນປະທານການສອບເສັງຈົບຊັ້ນມັດທະຍົມສຶກສາຕອນຕົ້ນຊັ້ນ ມ4 ທ່ານຍັງໄດ້ໃຫ້ຮູ້ຕື່ມອີກວ່າ: ສໍາລັບການສອບເສັງຈົບຊັ້ນມັດທະຍົມຕອນຕົ້ນໃນສົກຮຽນນີ້ ຫ້ອງການສຶກສາທິການ ແລະ ກິລາເມືອງຮ້ຽມໄດ້ຕັ້ງເປົ້າໝາຍໄວ້ເພື່ອໃຫ້ໄດ້ລື່ນຄາດໝາຍກວ່າສົກຮຽນຜ່ານມາ,ຄາດວ່າສົກຮຽນ 2022 – 2023 ນີ້ນັກສອບເສັງຈະສາມາດເສັງໄດ້ 100%.
ໃນມື້ຕໍ່ມາວັນທີ 14 ໄດ້ມີພິທິເປີດຫົວບົດສອບເສັງຢາງເປັນທາງການໃນເວລາ 9:00 ຢູ່ທີ່ສູນສອບເສັງ ໂຮງຮຽນ ມສ ຮ້ຽມ ໂດຍເປັນກຽດເປີດຫົວບົດດ້ວຍທ່ານ ນາງຊ່ຽນ ສີດາວົງ ກໍາມະການພັກເມືອງ ຫົວໜ້າຫ້ອງການສຶກສາທິການ ແລະ ກິລາ ເມືອງຮ້ຽມ ຮ່ວມກັບ ຄະນະຮັບຜິດ ແລະ ຄະນະກໍາມະການສອບເສັງ, ຢ່າງເປັນທາງການ ພິທີສອບເສັງຈະດຳເນີນໄປເປັນເວລາ 3 ມື້ເຕັມ ນັບແຕ່ວັນທີ 14-16 ມີຖຸນາ 2023 ນີ້.



ຂ່າວໂດຍ:ໄມແສງ ພັນວົງໄຊ

09/09/2022

ແຈ້ງ:ເຖິ່ງຜູ້ທີ່ມີພອນສະຫວັນທາງດ້ານກິລາປະເພດຕ່າງໆເພື່ອຄັດເລືອກກະກຽມເຂົ້າຮ່ວມງານແຂ່ງຂັນກິລາແຫ່ງຊາດຄັ້ງທີ່ 11 ທີ່ຈະຈັດຂື້ນຍູ່ແຂວງຊຽງຂວາງໃນທ້າຍປີ 2022ນີ້,ຖ້າທ່ານໃດຫຼືກົມກອງຫ້ອງການໃດສົນໃຈສາມາດພົວພັນເພີ່ມເຕີ່ມນໍາໜ່ວຍງານກິລາ-ກາຍະກຳຫ້ອງການສຶກສາທິການ ແລະ ກິລາເມືອງຮ້ຽມ,
ໂທ020 5735 7405

23/08/2022

ສກມຮ້ຽມ ຈັດກອງປະຊຸມຜູ້ບໍລິຫານການສຶກສາ ແລະ ກິລາ ປະຈໍາສົກຮຽນ 2021 – 2022...................................................................................................................................
ກອງປະຊຸມຜູ້ບໍລິຫານການສຶກສາ ແລະ ກິລາ ເມືອງຮ້ຽມ ແຂວງຫົວພັນໄດ້ໄຂຂື້ນຢ່າງເປັນທາງການ ໃນຕອນເຊົ້າ ວັນທີ 22 ສິງຫາ 2022 ຜ່ານມານີ້ ຢູ່ທີ່ຫ້ອງປະຊຸມຫ້ອງການສຶກສາທິການ ແລະ ກິລາເມືອງຮ້ຽມໂດຍພາຍໃຕ້ການເປັນປະທານຂອງ ທ່ານ ປອ ບຸນວິໄຊ ກົງປາລີ ກໍາມະການພັກແຂວງ ເລຂາພັກເມືອງ ເຈົ້າເມືອງເມືອງຮ້ຽມ ເປັນກຽດເຂົ້າຮ່ວມໂດຍ ທ່ານ ສຸພະກອນ ແກ້ວຄໍາພູ ຫົວໜ້າຂະແໜງສາມັນ ພະແນກສຶກສາທິການ ແລະ ກິລາ ແຂວງຫົວພັນ , ມີຄະນະພັດທະນາການສຶກສາຈາກຂັ້ນເມືອງ ແລະ ຂັ້ນບ້ານ, ຫົວໜ້າ ຄະນະຫ້ອງການ ສກມ ຮ້ຽມ ແລະ ພະນັກງານພາຍໃນຫ້ອງການ, ຄະນະອຳນວຍການໂຮງຮຽນທຸກໝວດທົ່ວເມືອງຮ້ຽມເຂົ້າຮ່ວມຢ່າງພ້ອມພຽງ.
ໃນພິທີ ທ່ານ ແສງພອນ ບຸນມະນີຈັນ ຮັກສາການຫົວໜ້າຫ້ອງການສຶກສາທິການ ແລະ ກິລາໄດ້ຜ່ານບົດສະຫຼຸບຫຍໍ້ການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ຂອງເມືອງຮ້ຽມ ປະຈໍາ ປີ 2022 ແລະ ແຜນພັດທະນາປະຈໍາປີ 2023 ເຊີ່ງໃນນີ້ ກໍ່ໄດ້ຍົກເອົາຜົນສຳເລັດທີ່ພົ້ນເດັ່ນຂອງວຽກງານບາງດ້ານຂື້ນມາໃຫ້ເຫັນເປັນຕົ້ນອັດຕາເຂົ້າຮຽນຂອງເດັກ 5 ປີ ເພີ່ມຈາກ 100% ເປັນ 100,48%ທຽບໃສ່ແຜນຂອງເມືອງລື່ນ 0,48%,ອັດຕາເຂົ້າຮຽນໃໝ່ສຸດທິ ປ1 ຮັກສາໄດ້ 100% ທຽບໃສ່ແຜນບັນລຸຄາດໝາຍ,ອັດຕາເຂົ້າຮຽນໃໝ່ລວມ ປ5 ຈາກ 99,5% ມາເປັນ 100,48%ທຽບໃສ່ແຜນລື່ນ 0,48 %, ອັດຕາປະລະການຮຽນຂອງນັກຮຽນ ປ1 ຫຼຸດຈາກ 2% ເປັນ 0,36% ທຽບໃສ່ແຜນລື່ນ3,2%, ອັດຕາເລືອນຂັ້ນ ແລະ ຈົບຊັ້ນປະຖົມ ເພີ່ມຈາກ 98,96%ເປັນ 99,23%ທຽບໃສ່ແຜນລື່ນ 3,04%,ອັດຕາການເລືອນຂັ້ນຈາກ ປ5 ຫາ ມ1 ເພີ່ມຈາກ 95,7% ເປັນ 106,4% ທຽບໃສ່ແຜນ ລື່ນ 15,06 %, ຜົນການສອບເສັງຈົບຊັ້ນປະຖົມ,ມັດທະຍົມຕົ້ນ ແລະ ມັດທະຍົມປາຍປະຕິບັດໄດ້ 100% , ໄດ້ບັນຈຸ,ຊັບຊ້ອນຄູສອນເຂົ້າໃສ່ແຕ່ລະຂັ້ນ,ຊັ້ນຮຽນ,ສາຍຮຽນຖືກຕ້ອງຕາມວຸດທິການສຶກສາຂອງຄູທີ່ຮຽນຈົບສາຍວິຊາສະເພາະຕາມຊັ້ນ,ຕາມສາຍຕ່າງໆ.
ໃນຕອນທ້າຍພິທີ ທ່ານ ປອ ບຸນວິໄຊ ກົງປາລີ ເຈົ້າເມືອງເມືອງຮ້ຽມ ໄດ້ມີຄຳເຫັນໂອ້ລົມຕໍ່ກອງປະຊຸມ ກ່ອນອື່ນທ່ານກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດຊອບກອງປະຊຸມທີ່ໄດ້ເອົາໃຈໃສ່ຫ້າງຫາກະກຽມເອກະສານທັນຕາມກຳນົດເວລາ ແລະ ຜົນງານທີ່ຍາດມາໄດ້ໃນໄລຍະຜ່ານມາ ຍ້ອງຍໍຊົມເຊີຍຕໍ່ຜູ້ແທນເອົາໃຈໃສ່ຮັບຟັງການເຜີແຜ່ເອກະສານຕ່າງໆ ແລະ ພ້ອມກັນປະກອບຄຳຄິດເຫັນແບບກົງໄປກົງມາ. ເພິ່ນຍັງໄດ້ເນັ້ນໜັກໃຫ້ຜູ້ອຳນວຍການໂຮງຮຽນເອົາໃຈໃສ່ຄຸ້ມຄອງພະນັກງານຄູອາຈານຂື້ນຫ້ອງໃຫ້ເຕັມໂມງເວລາສິດສອນເພື່ອໃຫ້ນ້ອງຫຼານນັກຮຽນສາມາດອ່ານໄດ້ຂຽນເປັນ, ສ້າງໂຮງຮຽນຕົນເອງໃຫ້ເປັນໂຮງຮຽນສີຂຽວ ສະອາດ ປອດໄພ, ຕ້ານທຸກປະກົດການຫຍໍ້ທໍ້ທີ່ອາດຈະເກີດຂື້ນໂດຍສະເພາະບັນຫາສີ່ງເສບຕິດ, ເພື່ອຊຸກຍູ້ໃຫ້ການຮຽນການສອນເປັນໄປຕາມ 5 ຫຼັກມູນຂອງການສຶກສາ ທີ່ກະຊວງສຶກສາທິການ ແລະ ກິລາວາງອອກ. ຈາກນັ້ນ ທ່ານ ສຸພະກອນ ແກ້ວຄໍາພູ ຫົວໜ້າຂະແໜງສາມັນ ພະແນກສຶກສາທິການ ແລະ ກິລາ ແຂວງຫົວພັນຍັງໄດ້ມອບຄັອມພິວເຕີໂນດບຸກໃຫ້ ສກມຮ້ຽມ ຈໍານວນ 1 ເຄື່ອງເພື່ອປະກອບເຂົ້າໃນວຽກງານໃຫ້ມີຄວາມສະດວກຍິ່ງຂື້ນ ກອງປະຊຸມໄດ້ດໍາເນີນໄປເປັນເວລາ 1 ວັນເຕັມ ແລະ ໄດ້ສໍາເລັດລົງດ້ວຍໝາກຜົນອັນຈົບງາມ.

29/07/2022

ສກມ ຮ້ຽມ ຈັດກອງປະຊຸມເຝິກອົບຮົມການສອນພາສາລາວເດັກຊົນເຜົ່າ ແລະ ຫ້ອງຄວບໃຫ້ແກ່ຄູປະຈໍາການ .
ກອງປະຊຸມເຝິກອົບຮົມການສອນພາສາລາວເດັກຊົນເຜົ່າ ແລະ ຫ້ອງຄວບໃຫ້ແກ່ຄູປະຈໍາການໄດ້ຈັດຂື້ນໃນຄັ້ງວັນທີ 27-28 ກໍລະກົດ 2022 ຢູ່ທີ່ຫ້ອງປະຊຸມຫ້ອງການສຶກສາທິການ ແລະ ກິລາເມືອງຮ້ຽມພາຍໃຕ້ການເປັນປະທານຂອງ ທ່ານ ນ ອ່ອນສີ ພອນຄໍາທອງ ຮອງຫົວໜ້າຫ້ອງການສຶກສາທິການ ແລະ ກິລາເມືອງຮ້ຽມ,ມີຄະນະຮັບຜິດຊອບຂັ້ນເມືອງ ແລະ ຄູປະຈໍາການເຂົ້າຮ່ວມຈໍານວນ 29 ທ່ານ,ຍິງ 16 ທ່ານໃນພິທີ ທ່ານ ນ ສອນດາ ພິມໄພເພັດ ວິຊາການໜ່ວຍງານພັດທະນາຄູໄດ້ຜ່ານຂໍ້ຕົກລົງແຕ່ງຕັ້ງຄະນະຮັບຜິດຊອບກອງປະຊຸມ,ເຊິ່ງຄະນະຮັບຜິດຊອບໄດ້ຜ່ານເອກະສານການສອນພາສາລາວໃຫ້ເດັກຊົນເຜົ່າ,ການສອນຫ້ອງຄວບ,ການແຕ່ງບົດສອນ ຈາກນັ້ນຄູເຝິກກໍ່ໄດ້ພັດປ່ຽນກັນສອນສາທິດ ວິຊາຄະນິດສາດ ແລະ ວິຊາພາສາລາວ.
ຕອນທ້າຍພິທີທ່ານປະທານຍັງໄດ້ເໜັ້ນໜັກໃຫ້ຄູເຝິກຕ້ອງແຕ່ງບົດສອນ,ຜະລິດສື່ການສອນໃຫ້ຫຼາກຫຼາຍ,ຂື້ນຫ້ອງໃຫ້ທັນໂມງເວລາຈົ່ງພ້ອມກັນຈັດຕັ້ງປະຕິບັດນໍາເອົາບັນດາບົດຮຽນໃນການເຝິກອົບຮົມໃນຄັ້ງນີ້ໄປໝູນໃຊ້ໃນການຮຽນ-ການສອນໃຫ້ໄດ້ຮັບປະສິດຕິພາບສູງ.ກອງປະຊຸມໄດ້ດໍາເນີນໄປເປັນເວລາ 2 ມື້ ແລະ ໄດ້ປິດລົງດ້ວຍຜົນສໍາເລັດອັນຈົບງາມ.