ចៅកម្ពុជា / Chao Kampuchea

✍️ អំពីពាក្យ ចួប ឬ ជួប
ជារឿងមួយគួរឱ្យត្រេកអរ ដែលប្រិយមិត្តអ្នកអានចាប់អារម្មណ៍លើអក្ខរាវិរុទ្ធនៃអត្ថបទចុះផ្សាយរបស់ខ្ញុំ។

ដូចកាលពីព្រឹកមិញ ក្នុងអត្ថបទចុះផ្សាយរបស់ខ្ញុំមួុយអំពីលោក ឡោត កេស្សរមុលី ខ្ញុំបានសរសេរពាក្យ «ចួប» នៅក្នុងអត្ថបទនោះ ហើយអ្នកអានមួយចំនួនក៏បានលើកឡើងថា ពាក្យនេះជាពាក្យខុស ឯពាក្យត្រូវ គឺ «ជួប»។

ជាការពិតណាស់ ពាក្យពីរនេះ គឺប្រើបានដូចគ្នា។ សេចក្ដីយោងដូចមានក្នុងសៀវភៅពីរខាងក្រោមនេះ៖
១). វចនានុក្រមខ្មែរ សម្ដេចព្រះសង្ឃរាជ ជួន ណាត បោះពុម្ពផ្សាយ១៩៦៧
២). វចនានុក្រម នួន ប៊ុត បោះពុម្ពផ្សាយ ឆ្នាំ១៩៥៤

សូមអរគុណខ្លាំងណាស់ ដែលបានយកចិត្តទុកដាក់លើសំណេររបស់ខ្ញុំ និងជាពិសេស គឺអក្ខរាវិរុទ្ធ។
+ ផ្សព្វផ្សាយដោយ៖ ចៅកម្ពុជា

ជាលើកទី២ ដែលខ្ញុំបានចួបគាត់។ គាត់មានឈ្មោះ ឡោត កេស្សរ៉ាមុលី ជាសិស្សជំនាន់ទី២ នៅសាលាខ្មែររ៉ូ-អង់គ្លេស។ ពិតណាស់ គាត់គឺជាគ្រូបង្រៀនមែន. . .

ខ្ញុំបានសួរទៅគាត់បញ្ជាក់ម្ដងទៀត ថាគាត់បង្រៀននៅសាលាខ្មែររ៉ូ-អង់គ្លេសមែនទេ? គាត់បានមានប្រសាសន៍ថា៖
- ខ្ញុំជាអតីតសិស្សនៅទីនោះ ហើយក្រោយមកខ្ញុំបានបង្រៀននៅសាលាឯកជន (ប៉ា វិណ្ណា) និងតាមផ្ទះ!

គួរបញ្ជាក់ថា កាលខ្ញុំជួបលើកមុន វាជាវេលាដែលមានមនុស្សអ៊ូអរ ហើយស្ថិតនៅអំឡុងពេល Walk-Street លើតីរវិថីព្រះស៊ីសុវត្ថិ សូម្បីតែឈ្មោះក៏ពុំបានសួរនាំឱ្យបានចប់ចុងចប់ដើមដែរ. . . ទើបជាហេតុដែលខ្ញុំយល់ថា ក្រែងខ្ញុំស្ដាប់ច្រឡំ បង្ការកុំឱ្យខុសឆ្គាំឆ្គង ក៏ថ្ងៃទី១៨ ខែមិថុនា កន្លងទៅថ្មីៗនេះ ខ្ញុំមានឱកាសបានជួបគាត់ជាថ្មី ក៏សួរបញ្ជាក់ម្ដងទៀត។

ក្រោយការផ្សព្វផ្សាយរបស់ខ្ញុំម្ដងពីរដងរួចមក ដំណឹងនេះក៏បានលេចឮដល់មិត្តភក្តិរួមជំនាន់គាត់ជាច្រើន ទាំងនៅក្នុងស្រុក និងនៅឯក្រៅប្រទេស។ មានមិត្តភក្តិរួមជំនាន់គាត់កាលពីដើមទសវត្សរ៍៦០ បានទៅចួបគាត់ និងរំឭកអនុស្សាវរីយ៍កាលយុវវ័យផងដែរ។
+ ផ្សព្វផ្សាយដោយ៖ ចៅកម្ពុជា

ទិដ្ឋភាពដំណាក់ស្ដេច នៅមាត់បឹងយក្សឡោម ខេត្តរតនគិរី រូបភាពឯកសារដកស្រង់ចេញពីទស្សនាវដ្ដីសង្គមរាស្ត្រនិយម។

អតីតដំណាក់ស្ដេច ដែលកសាងនៅលើភ្នំគិរីរម្យ (បុរីជូឡុង) នាអំឡុងទសវត្សរ៍ឆ្នាំ៦០ សព្វថ្ងៃគឺនៅសល់តែបំណែកអគារដូចមានភ្ជាប់រូបជូននៅខាងក្រោមនេះប៉ុណ្ណោះ។ រូបថតបំណែកអគារចាស់ៗនោះ គឺខ្ញុំបានថតនៅថ្ងៃទី៨ ខែកញ្ញា ឆ្នាំ២០២៤។
+ ផ្សព្វផ្សាយដោយ៖ ចៅកម្ពុជា

អតីតលំនៅដ្ឋានរបស់តាម៉ុក - ខេត្តតាកែវ

អតីតលំនៅដ្ឋានរបស់លោក ឈិត ជឿន ហៅ តាម៉ុក លេខាបក្សកុម្មុយនីស្តកម្ពុជា ប្រចាំភូមិភាគនិរតី ក្នុងរបបកម្ពុជាប្រជាធិបតេយ្យ (១៩៧៥-១៩៧៩) ស្ថិតនៅក្រុងដូនកែវ ខេត្តតាកែវ។

ផ្ទះនេះកសាងក្នុងឆ្នាំ១៩៧៧ ហើយសព្វថ្ងៃពុំឃើញកំណត់អត្តសញ្ញាណឱ្យពិតប្រាកដថាប្រើប្រាស់ជាទីតាំងអ្វីឡើយ ព្រោះនៅជុំវិញមានដុះស្មៅ រុក្ខជាតិ ព័ទ្ធពាសជុំទិស ឯផ្ទៃខាងក្នុងល្ហល្ហេវគ្មានអ្វីគួរឱ្យកត់សម្គាល់ឡើយ។
+ ផ្សព្វផ្សាយដោយ៖ ចៅកម្ពុជា

លោក សុះ ម៉ាត់ (1) និងអ្នកស្រី ឈឺន អង្គារ៉ា (2) រួមទាំងសិល្បករដទៃទៀត កាលបានទៅដល់ប្រទេសបារាំង ក្នុងអំឡុងខែមិថុនា ឆ្នាំ១៩៦៤ ដើម្បីសម្ដែងរបាំព្រះរាជទ្រព្យ ដែលដឹកនាំដោយលោក ហង្ស ធុនហាក់។ រូបថតដោយលោក Roger ចុះផ្សាយក្នុង ទំព័រ Galiica។

រាជវត្តមានរបស់សម្ដេចព្រះប្រមុខរដ្ឋ នរោត្តម សីហនុ ក្នុងពិធីបុណ្យព្រះសព ព្រះវ័នរ័ត អុីវ ទួត ធម្មជ្ជោតត្ថេរោ ក្នុងឆ្នាំ១៩៦៨ ដែលព្រះអង្គជាអតីតព្រះរាជគណៈថ្នាក់ឯក ព្រះមេគណ ខេត្តបាត់ដំបង និងជាអតីតព្រះចៅអធិការវត្តពោធិ៍វាល ក្រុងបាត់ដំបង។
+ ផ្សព្វផ្សាយដោយ៖ ចៅកម្ពុជា

អគារបញ្ជាការដ្ឋានសព្វថ្ងៃ បានកសាងឡើងតាំងពីសម័យសង្គមរាស្ត្រនិយម សម្រាប់ប្រើប្រាស់ជាទីតាំងក្រសួងហិរញ្ញវត្ថុ និងការពារជាតិជំនាន់នោះ។ យោងតាមសៀវភៅ Cambodge Sangkum Reastr Niyum បានសរសេររៀបរាប់ថា៖

« នេះជាមជ្ឈមណ្ឌលថ្មីនៃរដ្ឋបាល មានក្រសួងហិរញ្ញវត្ថុ និងការពារជាតិ ជាប់នឹងនេះមានមហាវិទ្យាល័យភូមិន្ទ និងវិចិត្រសិល្បៈ រួមទាំងទីស្តីការគណៈរដ្ឋមន្ត្រី។»
+ ផ្សព្វផ្សាយដោយ៖ ចៅកម្ពុជា