រឿងពិត បែបប្រឌិតកថា - Knowledge Worth Sharing

ក្នុងដំណាក់កាលនេះ ប្រហែលជាគ្មាននរណាសាកសមជាងសម្តេចក្នុងការដឹកនាំតទល់ប្រយុទ្ធនឹងថៃនោះទេ។ ទោះគាត់មិនអាចបំពេញចិត្តរបស់ពួកយើងបានគ្រប់គ្នាក៏ដោយ ទាំងពីអតីតកាល រឺក្នុងពេលបច្ចុប្បន្ន ក្នុងកាលៈទេសៈពេលនេះ ពួកយើងគួរគប្បីនៅឈរខាងគាត់ គាំទ្រគាត់។ ប្រហែលមានតែគាត់ម្នាក់ទេ ដែលមានទឹកមាត់ប្រៃ ក្នុងការដឹកនាំទាហានប្រយុទ្ធទប់ទល់នឹងទាហានថៃបាន។ ម្យ៉ាងទៀតបើគាត់ចាញ់ ស្មើប្រទេសយើងចាញ់។ អស់រយៈពេលរាប់រយឆ្នាំហើយ ប្រហែលជាមានតែពេលនេះនោះទេ ដែលសាមគ្គីផ្ទៃក្នុងរបស់ខ្មែរមានភាពស្រុះគ្នាក្នុងវិសាលភាពធំ ក្នុងការតតាំងប្រឆាំងនឹងសត្រូវឈ្លានពាន។

បន្ទាប់ពីសង្គ្រាមជួរមុខ ភាគីថៃបានបើកសង្គ្រាមចិត្តសាស្ត្រតាមបណ្តាញសង្គមឌីជីថល ដើម្បីវាយប្រហារទឹកចិត្ត និងបំបែកបំបាក់ផ្ទៃក្នុងយើង។ ក្នុងប្រវត្តិសាស្ត្របានប្រាប់យើងគ្រប់គ្នាថា នៅពេលដែលយើងមានបញ្ហាផ្ទៃក្នុង នោះយើងនឹងចាញ់រាល់គ្រប់សង្គ្រាម។ ហេតុដូចនេះ ខ្ញុំសូមអំពាវនាវអោយជនរួមជាតិគ្រប់រូបបន្តជំហរគាំទ្ររាជការបច្ចុប្បន្ន។

អ្វីដែលយើងគួរគប្បីធ្វើក្នុងពេលបច្ចុប្បន្នសំរាប់សង្គ្រាមចិត្តសាស្ត្រ៖
- រក្សាស្មារតីមិនរវើរវាយទៅតាមពាក្បពេចន៌ញុះញង់ពីរយៈការផុសមួយចំនួនដែលធ្វើអោយយើងបាត់ទំនុកចិត្តលើរដ្ឋាភិបាល ទាហាន និងលើជាតិសាសន៍គ្នាឯង។
- បន្តរបរការងាររកស៊ីជាធម្មតា និងមិនគួរគប្បីឆ្លៀតឱកាសតំលើងតំលៃទំនិញ ដែលខ្លួនមិនបានចាយដើមបន្ថែមក្នុងពេលទិញចូលរឺពេលផលិត។
- បន្តជួយបរិចាកដល់កងទ័ពជួរមុខទៅតាមលទ្ធភាពដែលខ្លួនមាន។
- បន្តតាមដានព័តមានដែលមានប្រភពច្បាស់លាស់។

វៃ ត្រូវតែវៃ!!!

ឡើកនេះ យើងត្រូវតែវៃ បានចូលតុចចារកើតដែលមានភាគីទី៣ជាអ្នកសម្របសម្រួល។ អ្វីដែលពួកយើងគួរធ្វើ យើងបានធ្វើអស់ទៅហើយ មានតែការវៃតែប៉ុណ្ណោះ។ ការវៃឡើកនេះ នឹងរងការខាតបង់យ៉ាងធ្ងន់ធ្ងរទាំងសងខាង តែយើងគ្មានជំរើសនោះទេ។

#សង្គ្រាមខ្មែរថៃ

ការប្រយុទ្ធលើកនេះ ជាការកំណត់វាសនាអនាគតប្រទេស១០០ឆ្នាំទៅមុខ។

ចាប់ពីថ្ងៃ២៤ខែកក្កដាឆ្នាំ២០២៥ មកដល់ថ្ងៃនេះ ការប្រយុទ្ធនៅតែមានភាពក្តៅគគុក។

ក្នុងប្រវត្តិសាស្ត្រជាង២៥០ឆ្នាំមកនេះ ក្រោមខ្សែរាជវង្សរ៉ាម៉ារបស់សៀម គឺតែងមើលស្រាលនិងមិនអោយតំលៃលើប្រទេសជាតិយើងនោះទេ។ ការប្រយុទ្ធគ្នានេះជាឧទាហរណ៍ជាក់ស្តែងក្នុងពេលបច្ចុប្បន្ន។

វាជាពេលលំបាកមួយសំរាប់យើងគ្រប់គ្នា ប៉ុន្តែនេះក៏ជាឳកាសផងដែរ ដើម្បីបញ្ជាក់ទៅកាន់សៀមវិញថា អ្នកមិនអាចតែចេះមករករឿងយើង រឺធ្វើអ្វីស្រេចតែចិត្តចង់បាននោះទេ។

ទោះក្នុងកាលៈទេសៈបែបណាក៏ដោយ ខ្ញុំសូមអំពាវនាវបងប្អូនគ្រប់រូបត្រូវតែបន្តជំហររួមសុខរួមទុក្ខជាមួយរាជការបច្ចុប្បន្ន ដើម្បីរក្សាអធិបតេយ្យភាព និង តំលៃជាតិសាស្ត្រយើងក្នុងតំបន់អាស៊ីអាគ្នេយ៍ ក៏ដូចជាឆាកអន្តរជាតិ។ តាមការតាមដានរបស់ខ្ញុំ រាជការ គាត់បានត្រៀមលក្ខណៈ និងដឹងពីស្ថានភាពនេះច្បាស់ណាស់ រាប់ខែរាប់ឆ្នាំមកហើយ។

យើងមិនត្រូវចចារជាមួយសៀមតែពីរអ្នកនោះឡើយ ដែលអ្វីជាការចង់បានរបស់សៀម។ យើងត្រូវតបតវិញលុះដល់ពេលសៀមបញ្ឈប់សកម្មភាពទាំងអស់នេះ ដើម្បីអោយសៀមខ្មាស់ខ្លួនឯង និងអន្តរជាតិ ហើយនឹងមិនបន្តទង្វើបែបនេះនៅពេលអនាគត។

ស្នូលនៃសង្គម ៖ ឆន្ទៈ ប្រាជ្ញា និងការតាមដាន

ក្នុងការសំរេចកិច្ចការអ្វីមួយប្រកបដោយជោគជ័យ ការតាមដាននិងប្រាជ្ញា គឺត្រូវដើរទន្ទឹមគ្នា។ ប្រាជ្ញា គឺជាភាពបុិនប្រសបក្នុងការរិះរករូបមន្តដែលត្រូវយកមកអនុវត្តន៌ ដើម្បីសំរេចនូវគោលដៅ។ រីឯ ការតាមដាន គឺជាការអនុវត្តន៌ ការអង្កេត ការដោះស្រាយ ការសំរបសំរួល -ល- ដើម្បីអោយរូបមន្តដែលយើងបានរៀបទុកនោះ ឈានទៅដល់ចំណុចដូចដែលបានគ្រងទុកគិតជាមុន។ ឧទាហរណ៌ដូចជាការសាងសង់ស្ពាន អ្នកសាងសង់ត្រូវប្រើប្រាជ្ញាខ្លួនដើម្បីរៀបចំផែនការសំរាប់ស្ពាននោះ អោយក្លាយជារូបរៀងពិត ហើយអ្នកសាងសង់ក៏មិនអាចដើរចេញនៅពេលរៀបចំផែនការនោះរួចទេ។បើមានប្រាជ្ញារៀបចំផែនការ គ្មានការតាមដានដល់ទីបញ្ចប់ គឺជាមនុស្សខ្វះអំណត់ ប្ញ មិនមែនជាមនុស្សឥតខ្ចោះ។ បើមានទាំង២ ចំណុច គាត់ជាមនុស្សដែលមានប្រៀបនៅក្នុងសង្គម ហើយភាគច្រើននៃពួកគាត់គឺជាស្នូលនៅក្នុងសង្គម។ ទិសដៅ និងស្ថានភាពនៃសង្គមជាទូទៅ គឺត្រូវបានកំណត់ចេញពីការគិត និងការសំរេចចិត្តរបស់ពួកគាត់។ និយាយនេះមិនសំដៅទៅតែលើនយោបាយមួយមុខនោះទេ។ ប្រធានអង្គភាព អ្នកជំនួញ ប្រធានថ្នាក់ មេតុងទីន បងធំបែកស្លុយ -ល- សុទ្ធតែជាមនុស្សមានរបស់ទាំង២នេះ។ យើងអាចកំណត់បានថាធាតុទាំងពីរ ជាមូលដ្ឋានដើម្បីសំរេចកិច្ចការគ្រប់ប្រភេទ។ តែរបស់មួយដែរ មិនអាចមើលរំលង និងខ្វះមិនបាននោះ គឺឆន្ទៈ។ បើនិយាយអោយស្រួលស្តាប់ទៅ ឆន្ទៈគឺដូចជាជំហានទី១អីញ្ចឹង។ យើងមិនអាចយល់ពីប្រមាណវិធីគុណបាននោះទេ បើយើងមិនចេះបូកលេខ។ សង្គមមួយដែលមានការរីកចំរើន និងសុភមង្គលនោះ គឺមានស្នូលប្រកបដោយឆន្ទៈមិនលំអៀងទៅនឹងផលប្រយោជន៌ភាគតិច។

#ទស្សនៈរបស់ខ្ញុំ

បើចង់ចូលធ្វើជំនួញ ត្រូវចាំថា សុខចិត្តអោយគេខុសមកលើយើង ប្រសើរជាជាងយើងខុសទៅលើគេ។ គុណធម៌ និងមេត្តាធម៌ជាផ្លូវដឹកនាំអ្នកអោយជោគជ័យនៅពេលអនាគត។​ បុគ្គលដែលជោគជ័យគឺដោយសារការគោរពពីអ្នកដទៃ ផ្គួបផ្សាំដោយសមត្ថភាពរបស់ខ្លួន។ អ្នកខ្លះដោយសារតែប្រយោជន៌មួយពេល សុខចិត្តបោះបង់ចោលមិត្តភាព។ មនុស្សនេះ សំរាប់ខ្ញុំ មិនមែនជាមនុស្សជោគជ័យនោះទេ ពីព្រោះជោគជ័យបានតែមួយពេល។ ចំណុចមួយទៀតពេលចេញរកស៊ី គឺត្រូវចេះទាំងច្បាប់ស្រុក និងច្បាប់ព្រៃ ពីព្រោះអ្នកខ្លះយល់តែច្បាប់ព្រៃនោះទេ។

#ទស្សនៈអេតមីន

សំណេរសិក្សាពីដំណើរការផ្លាស់ប្តូររបស់សកលលោកសំរាប់២ពាន់ឆ្នាំចុងក្រោយនេះ។ ពេលអ្នកអានចប់ ខ្ញុំគិតថា យ៉ាងហោចណាស់ក៏អ្នកអាចដឹងថាពិភពលោកយើងកំពុងមានទំនោរទៅណាដែរ។ បើប្អូនៗចូលចិត្តប្រវត្តិវិទ្យា រិតតែគួរអាន។

#វិជ្ជាឋាន

ជាង300ឆ្នាំចុងក្រោយនេះ មនុស្សយើងទើបតែរកគ្នាឃើញអស់ទូទាំងពិភពលោក។ តួរអង្គសំខាន់2ដែលមិនទាន់ប្រឈមមុខដាក់គ្នាគឺ ចិន និង អាមេរិក។ ទាំង2ប្រទេសមានភាពខ្លាំងនិងភាពខ្សោយរៀងៗខ្លួន ចាំមើលទាំងអស់គ្នា តើពិភពលោកនឹងក្លាយទៅជាយ៉ាងណា។ ចិនមិនដូចសូវៀត។ សូវៀតប្រឈមនឹងអាមេរិកជាង40ឆ្នាំផ្លាយ។ តាមការស្មាន មិនក្រោមកន្លះរយឆ្នាំទេសំរាប់ការប្រកួតរវាងចិននឹងអាមេរិក ហើយសង្ឃឹមថាវគ្គបញ្ចប់ បញ្ចប់ទៅដោយការរួមគ្នាជាធ្លុងមួយទូទាំងសកលលោក។

Time Dilation

ជាធម្មតា ម៉ោងនាឡិកាក្នុងទូរស័ព្ទរបស់យើងទាំងអស់គ្នា គឺដើរដំណាលគ្នា។ តែធាតុពិត ពេលវេលារបស់យើងម្នាក់ៗ មិនដូចគ្នាទេ ដោយវាអាស្រ័យលើល្បឿនរបស់យើងគ្រប់គ្នា។

ស្តាប់ទៅដូចជារញ៉េរញៃបន្តិច តែមិនពិបាកយល់ប៉ុន្មានទេ។

មោះ! អោយតែចាំ 2 ចំនុចនេះ យើងយល់ហើយ។

1- ដំបូង Isaac Newton គាត់បានយកគំនិតរបស់ Galileo មកសិក្សាបន្តដែលស្តីពីច្បាប់ចលនារបស់អង្គធាតុ។ សមីការមួយគឺ V = D/t ដែលមានន័យថា ល្បឿនរបស់អង្គធាតុគឺស្មើនឹងផលចែករវាងចំងាយចរនឹងរយៈពេល។
2- បន្ទាប់មក ប៉ុន្មានរយឆ្នាំក្រោយមក លោក James Clerk Maxwell បានរកឃើញថា ល្បឿនពន្លឺគឺជាល្បឿនអតិបរិមាសាកល ប្រមាណ 300000គម/វិនាទី ដែលយើងនឹងឃើញវាក្នុងល្បឿននេះដដែល ទោះយើងនៅស្ងៀម រឺ ក្នុងល្បឿនណាមួយក៏ដោយ។

អីលូវ! ចូលវគ្គត្រូវឆ្ងល់

ឧទាហរណ៌៖ បើយើងឈរស្ងៀម ឡានមួយកំពុងបើកក្នុងល្បឿន 100គម/ម៉ យើងនឹងឃើញឡាននោះកំពុងធ្វើចលនា ក្នុងល្បឿន 100គម/ម៉។ តែបើមានមនុស្សម្នាក់ទៀតកំពុងជិះកង់ក្នុងល្បឿន 20គម/ម៉ ក្នុងទិសដៅដូចនឹងឡាននោះ ហើយគាត់ងាកមកមើលឡានមួយនោះដូចគ្នា គាត់នឹងឃើញឡាននោះកំពុងធ្វើចលនាក្នុងល្បឿន 80គម/ម៉វិញ។

តែលោក Maxwell បានរកឃើញពីចំនុចពិសេសរបស់ពន្លឺ ទោះយើងនៅស្ងៀម រឺកំពុងជិះកង់ ក៏យើងឃើញពន្លឺក្នុងល្បឿនរបស់វាដដែល មិនយឺតជាងមុន ហើយក៏មិនលឿនជាងមុន។

ចាប់ផ្តើមឆ្ងល់ហើយមែនទេ? អីចឹងមើលរូបសំរាយខាងក្រោមបន្តិចទៅ ចាំអានបន្ត។ បើមើលអត់យល់ខមមិនសួរបាន។

តាមសំរាយរូបមន្តខាងក្រោម យើងសន្មត់បានថា អង្គធាតុធ្វើចលនាកាន់តែលឿន ពេលវេលារបស់អង្គធាតុនោះគឺកាន់តែយឺត។

ឧទាហរណ៌៖
-​ បើយើងត្រាច់ចរក្នុងល្បឿន 50% នៃល្បឿនពន្លឺ ពេលវេលារបស់យើងនឹងយឺតជាងមុន 15%។
- បើយើងត្រាច់ចរក្នុងល្បឿន 99% នៃល្បឿនពន្លឺ ពេលវេលារបស់យើងនឹងយឺតជាងមុនប្រមាណ 700% រឺ យឺតជាងយើងនៅស្ងៀមជាង 7ដង។

ក្នុងជីវិតប្រចាំថ្ងៃ បើយើងមិនដឹងពីចំនុចខាងលើនេះទេ បើ Albert Einstein មិនបានរកឃើញពីចំនុចនេះទេ ប្រព័ន្ធ GPS នឹងដើរខុសប្រមាណ 2គីឡូម៉ែត្រ។

កំណត់ចំណាំ៖ ត្រូវចាំណា បើល្បឿនពន្លឺមិនមែនជាតំលៃថេរសាកលនោះទេ ការរកឃើញទាំងនេះត្រូវមានការកែសំរួលច្រើនណាស់។

ជួរភ្នំ និង ខ្ពង់រាប

ជួរភ្នំនិងខ្ពង់រាប ជាទីទល់ខ្ពស់ដូចគ្នា តែមានសណ្ឋានខុសគ្នា។ ជួរភ្នំជាបណ្តុំភ្នំតផ្ជាប់គ្នារាប់គីឡូម៉ែត្រ ហើយមានសណ្ឋានចោត មិនរាបស្មើរ ដែលពិបាកអោយមនុស្សរស់នៅ។ រីឯខ្ពង់រាបជាបណ្តុំនៃភ្នំតជាប់គ្នាដូចនឹងជួរភ្នំដែរ តែផ្ទៃខាងលើមានលក្ខណៈរាបស្មើលាតសន្ធឹងធំ ដែលងាយស្រួលអោយមនុស្សរស់នៅបាន។ ភាគខាងជើង និងខាងលិចនៃប្រទេសយើងសំបូរទៅដោយជួរភ្នំ ហើយខ្ពង់រាបភាគច្រើនស្ថិតនៅប៉ែកខាងកើតនៃប្រទេស។

#ចំណេះដឹងភូមិវិទ្យា

បំបាត់កំហឹង

កំហឹងជាអារម្មណ៍មួយស្តែងចេញពីការមិនសុខចិត្ត។ មិនសុខចិត្តពីព្រោះមិនទាន់យល់ពីសាច់រឿង ថាហេតុអ្វីវាចេញជាចឹង។ កំហឹងធ្វើអោយការវិភាគធ្លាក់ចុះ ពីព្រោះខួរក្បាលយើងមួយភាគ អាលែងរវល់យកមកខឹង។ បើខួរក្បាលយើងប្រើអស់សមត្ថភាពក្នុងការវិភាគ នោះយើងនឹងលេងខឹងវិញ។

ងាយស្រួលនិយាយតែពិបាកធ្វើបន្តិច។ តែបើធ្វើបាន វាជួយដល់សុខភាពផ្លូវចិត្តយើងបានច្រើនណាស់។ ដើម្បីរៀនបំបាត់កំហឹង យើងត្រូវការធាតុចំនួន 2 គឺ រៀនវិភាគស្វែងយល់ពីហេតុផល និង រៀនទទួលស្គាល់ការពិត។ ឧទាហរណ៍៖ មនុស្សខ្លះអត្មានិយមណាស់ បើយើងកំពុងមានរឿងជាមួយពួកគាត់ ត្រូវវិភាគសិន ថាមកពីពួកគាត់សុទ្ធ រឺ មកពីយើងខ្លះដែរ។ ហើយបើសិនជាមកពីពួកគាត់សុទ្ធ ត្រូវរៀនទទួលស្គាល់ថា ពួកគាត់គឺចឹង! ទៅខឹងពួកគាត់ក៏អត់បានអីដែរ បានតែខឹងឥតប្រយោជន៍ ធ្វើមិចបើពួកគាត់ចឹងស្រាប់ហើយ។ រៀនទទួលយករឿងនឹងទៅ ហើយជៀសវាងកុំអោយមានរឿងចឹងកើតទៀត។ នៅពេលយើងរៀនធ្វើចិត្តអត់បានហើយ កំហឹងនឹងធ្លាក់ចុះ សុខភាពផ្លូវចិត្តក៏នឹងប្រសើរជាងមុនដែរ។ ខាតបង់រឿងខាងក្រៅសំរាប់យើងវាគ្រប់គ្រាន់ហើយ កុំអោយខាតបង់រឿងខាងក្នុងទៀត។

ធម្មជាតិបង្កើតមនុស្សមកមានល្អមានអាក្រក់ រៀនទទួលស្គាល់ការពិតនៃច្បាប់ធម្មជាតិខ្លះទៅ វានឹងជួយផ្លូវចិត្តយើងបានច្រើន និងធ្វើអោយយើងងាយស្រួលរស់នៅក្នុងពិភពមួយនេះទៀត។

#ទស្សនៈរបស់ខ្ញុំ

ទំងន់ និង បន្ទុក

បន្ទាប់ពីរកឃើញកំលាំងទំនាញរបស់អង្គធាតុ គេក៏ចាប់ផ្តើមកំណត់ម៉ាសស្តង់ដារអន្តរជាតិមួយក្នុងឆ្នាំ1875គឺ 1គីឡូក្រាម ដែលជាម៉ាសគោលមួយសំរាប់យកទៅធៀបនឹងម៉ាសនៃវត្ថុផ្សេងៗ។ ការកំណត់នេះជាការចាំបាច់មួយ ពីព្រោះបើមិនកំណត់ថា ប៉ុន្មានស្មើនឹងមួយគីឡូក្រាមនោះទេ យើងនឹងពិបាកនិយាយប្រាស្រ័យទាក់ទងគ្នាអំពីប្រធានបទនៃបន្ទុក។

តាមការតាមដានរបស់ខ្ញុំ ការបកប្រែភាសាខ្មែររបស់យើង ធ្វើអោយមានការយល់ច្រលំខ្លះ រវាងទំងន់ និងបន្ទុក។ យើងគ្រប់គ្នាពេលទៅផ្សារ ច្រើនសួរអ្នកលក់ថា “យករបស់នេះ ប៉ុណ្នេះគីឡូ” ដោយពួកយើងគិតថាវាជាទំងន់នៃទំនិញនោះ។ ដូចនេះ តាមការយល់ឃើញរបស់ខ្ញុំ ដើម្បីកុំអោយមានការយល់ច្រលំបន្ត យើងគួរបកប្រែពាក្យ “Mass” ថាជាទំងន់ រីឯពាក្យ “Weight or Load” គួរបកប្រែថាជាបន្ទុក។ នាមសំគាល់ទាំងអស់នេះ ស៊ីសងលើយើងជាអ្នកកំណត់ន័យរបស់វានោះទេ ហើយការបកប្រែបែបនេះធ្វើអោយមានការញែកន័យគ្នាដាច់ល្អ និងធ្វើអោយពាក្យទំលាប់ប្រើជាទូទៅរបស់ប្រជាជនយើងមិនខុសទៀត។ កាលនៅវិទ្យាល័យ ឧស្សាហ៌លឺលោកគ្រូរូប តែងឡើកឡើងថា គ្រប់គ្នាគួរតែសួរបែបនេះវិញ ម៉ាសត្រី1គីឡូថ្លៃប៉ុន្មាន។

សំរាប់ពាក្យបន្ទុក គឺច្រើនប្រើនៅក្នុងវិស័យវិស្វកម្ម និងលំហសាស្រ្ត។ បន្ទុកគឺប្រែប្រួលទៅតាមទីតាំងរបស់វា។ ភាពខុសគ្នាខ្លាំងគឺនៅក្នុងចក្រវាល។ បន្ទុកមនុស្សនៅលើផែនដី គឺមានតំលៃខុសគ្នាស្រលះពីបន្ទុករបស់មនុស្សដដែរនោះនៅលើព្រះច័ន្ទ រឺភពផ្សេងៗ។

#ទស្សនៈរបស់ខ្ញុំ

ប្រវែងខ្លីបំផុតនៅក្នុងចក្រវាលគឺ 1.6*10^-35ម ដែលគេអោយឈ្មោះថា Planck Length។ រីឯទំហំអាតូមអុីដ្រូសែដគឺ 1.2*10^-10ម។ ផលធៀបរវាងអាតូមអ៊ីដ្រូសែននឹងប្រវែងខ្លីបំផុតដែលគេកំណត់បានពេលបច្ចុប្បន្នគឺជាង 10^24ដងឯណោះ។ មិនមែនអស់ត្រឹមអាតូមទេ អ្នកវិទ្យាសាស្រ្តកំពុងសិក្សាពីអង្គធាតុតូចៗបន្តទៀត ដើម្បីបកស្រាយពីបាតុភូតផ្សេងៗនៅក្នុងចក្រវាលនេះ។

ពិតជាគួរអោយចាប់អារម្មណ៍ ដើម្បីស្វែងយល់ពីអ្វីគ្រប់យ៉ាង យើងត្រូវដឹងពីរឿងតូចៗទៅជាមុនសិន។

#ចំណេះដឹងរូបវិទ្យា