24/05/2022
#ត្រូវទទួលយកដោយប្រជ្ញា
ខ្ញុំតែម្នាក់តែមានគេមើលឃើញនិងវាយតម្លៃមកផ្សេងៗពីគ្នារាប់មិនអស់ហើយខ្ញុំក៏ព្រមទទួលយកហើយទទួលស្គាល់គ្រប់ទាំងការលើកឡើងរបស់គេគ្រប់គ្នាដែរ។ អ្នកខ្លះក៏ប្រាប់ខ្ញុំថាខ្ញុំជាមនុស្សរួសរាយគួរឲ្យរាប់អាន ខ្ញុំក៏ទទួលយកថាខ្ញុំជាមនុស្សមនុស្សរួសរាយពិតមែន ខ្លះទៀតក៏និយាយប្រាប់ខ្ញុំថា ខ្ញុំជាមនុស្សមានចរឹកក្រអើតក្រទម មិនសូវនិយាយស្ដី ខ្ញុំក៏ទទួលស្គាល់ថាខ្ញុំពិតជាក្រអើតក្រទោម មិនសូវនិយាយស្ដីមែន ខ្លះក៏ខ្ញុំជាមនុស្សទន់ជ្រាយឆាប់ជឿសម្ដីគេ ខ្លះក៏ថាខ្ញុំជាមនុស្សក្លាហាន ឆ្លាត ស្គាល់កាលៈទេសៈ មានច្រើនទៀតណាស់ខ្ញុំជឿថាទោះខ្ញុំមិនសរសេរក៏បងប្អូនអាចស្មានដឹងដែរថាមានអ្វីខ្លះទៀត ពីព្រោះបងប្អូនក៏ជួបប្រទះឆ្លងកាត់នូវរឿងបែបនេះដែរ ។
ខ្ញុំបានលើកឡើងខាងលើនេះថាខ្ញុំទទួលយកគ្រប់យ៉ាងនូវការមើលឃើញនិងការវាយតម្លៃរបស់អ្នកទាំងអស់នោះ ចា៎ពិតមែនខ្ញុំពិតជាទទួលយកពិតមែន ពីព្រោះខ្ញុំជឿថាមនុស្សម្នាក់ៗសុតតែមានឥរិយាបទផ្នត់គំនិតនិងការយល់ឃើញខុសៗគ្នា។ ហើយបងប្អូនធ្លាប់បានលឺទេឃ្លាមួយដែលគេតែងតែលើកមកនិយាយលេងថា "មានតែខ្មោចទេដែលមើលឃើញខ្មោចគ្នាវា" ។ មនុស្សដែលមានគំនិតវិជ្ជមាន ចូលចិត្តភាពរីករាយគាត់នឹងតែងតែនាំមកនូវបរិយាកាសរីករាយ ហើយគាត់ក៏ស្វែងរកឃើញភាពរួសរាយរាក់ទាក់ពីខ្ញុំទៅ។ មនុស្សដែលមានភាពក្រអើតក្រទោមច្រើននៅក្នុងខ្លួន អ្វីដែលគេអាចមើលឃើញមុនគេគឺភាពក្រអើតក្រទោមរបស់ខ្ញុំនេះឯង ។ ចំណែកអ្នកដែលរឹងមាំឯករាជ្រ គេក៏មើលមកឃើញផ្នែកទន់ខ្សោយរបស់ខ្ញុំ ឯអ្នកដែលទន់ខ្សោយក៏មើលឃើញពីផ្នែករឹងមាំរបស់ខ្ញុំ ហើយខ្ញុំក៏ទទួលស្គាល់ទាំង់អស់។
មិនត្រូវខឹងឬតូចចិត្តនូវអ្វីដែលជាការយល់ឃើញរបស់អ្នកដទៃមកលើខ្លួនឯងនោះទេ គាត់គ្រាន់តែមើលឃើញនូវអ្វីដែលយើងបង្ហាញចេញតែប៉ុណ្ណោះ គួររីករាយទទួលយកការទាំងអស់នោះមកដើម្បីអាចឲ្យយើងស្គាល់ខ្លួនឯងកាន់តែច្បាស់ យើងខ្លួនឯងមិនអាចមើលឃើញពីខ្លួនឯងគ្រប់ជ្រុងជ្រោយអស់នោះទេ តែពេលខ្លះទៀតទោះបើមើលឃើញហើយក៏មិនចង់ទទួលស្គាល់ដែរព្រោះគិតថាវាជាចំណុចអវិជ្ជមាន ត្រង់នេះឯងដែលជាបញ្ហា។
តែបញ្ជាក់ណាទទួលស្គាល់ ទទួលយក ដើម្បីអភិវឌ្ឍន៍ចំណុចខ្សោយ ហើយពង្រឹងចំណុចខ្លាំងរបស់ខ្លួនឯង មិនមែនឲ្យយកសម្ដីគេមកគិតហើយផ្លាស់ប្ដូរខ្លួនឯងម្ដងឲ្យដូចមាត់អ្នកនោះ ដល់ពេលលឺអ្នកនេះនិយាយផ្សេងក៏ផ្លាស់ប្ដូរមកតាមអ្នកនេះវិញ បើបែបនេះអ្នកអាចនឹងមានគ្រោះថ្នាក់ អ្នកនឹងចាប់ផ្ដើមបាត់បង់ភាពជាម្ចាស់ការលើខ្លួនឯងម្ដងបន្តិចៗរហូតដល់លែងស្គាល់ខ្លួនឯង។
សូមបែងចែងឲ្យដាច់រវាងការយល់ឃើញ(យល់ + ឃើញ) និង ការចោទប្រកាន់ (ចោទ + ប្រកាន់)
#ត្រូវទទួលយកដោយប្រជ្ញា
#ផ្អែម
#សំណេរដួងចិត្ត
