Chea Chanto College

06/10/2026

វិទ្យាល័យ ជា ចាន់តូ មានកិត្តិយស និងសេចក្តីសោមនស្សរីករាយ សូមជម្រាបជូនអំពីកិច្ចសហការរវាងវិទ្យាល័យ ជា ចាន់តូ និង Ibstock Place School ដែលជាគ្រឹះស្ថានអប់រំឯកជនដ៏មានកេរ្តិ៍ឈ្មោះមួយ ស្ថិតនៅទីក្រុងឡុងដ៍ ចក្រភពអង់គ្លេស។

តាមរយៈកិច្ចសហការនេះ Ibstock Place School នឹងផ្តល់អាហារូបករណ៍ជូនសិស្សានុសិស្សនៃវិទ្យាល័យ ជា ចាន់តូ ចំនួន ២រូប (សិស្សប្រុស ១រូប និងសិស្សស្រី ១រូប) ដើម្បីចូលរួមកម្មវិធីផ្លាស់ប្តូរការសិក្សារយៈពេលមួយឆមាសនៅ Ibstock Place School។ ទន្ទឹមនេះ អាហារូបករណ៍ខាងលើ នឹងរ៉ាប់រងលើថ្លៃសិក្សា សំបុត្រហោះហើរទៅ-មក កន្លែងស្នាក់នៅ អាហារហូបចុក និងការចំណាយផ្សេងៗទៀត។

កិច្ចសហការនេះ ជាជំហានដ៏សំខាន់ក្នុងការសម្រេចបាននូវបេសកកម្មរបស់វិទ្យាល័យ ជា ចាន់តូ ដោយបង្កើតនូវឱកាសជាច្រើនដល់សិស្សានុសិស្សកម្ពុជា ក្នុងការទទួលបានការអប់រំ និងការអភិវឌ្ឍសមត្ថភាព ប្រកបដោយគុណភាពកម្រិតអន្តរជាតិ ព្រមទាំងរួមចំណែកដល់ការពង្រឹងកិច្ចសហប្រតិបត្តិការក្នុងវិស័យអប់រំ និងការផ្លាស់ប្តូរវប្បធម៌រវាងកម្ពុជា និងស្ថាប័នអន្តរជាតិ ឱ្យកាន់តែប្រសើរ។

[English]

Chea Chanto College is proud to announce a new partnership with Ibstock Place School, a respected independent co-educational school in London, United Kingdom.

Through this partnership, Ibstock Place School will provide two fully funded scholarships to CCC students, one male and one female, to spend a semester studying at Ibstock Place School. The scholarships will cover tuition, round-trip airfare, accommodation, meals, and related programme costs, giving students the opportunity to gain valuable academic, cultural, and international experience.

This partnership marks another important step in CCC’s commitment to expanding access to world-class learning opportunities and creating new pathways for Cambodian students. By connecting our students with the wider global community, it also helps strengthen educational and cultural ties between Cambodia and international institutions.

ស្វែងយល់បន្ថែមអំពី Ibstock Place School / Learn more about Ibstock Place School: https://www.ibstockplaceschool.co.uk/

03/09/2026

ខ្ញុំស្រឡាញ់វិទ្យាល័យ ជា ចាន់តូ 🙏🏽

03/09/2026

សូមស្វាគមន៍សិស្សានុសិស្សទាំងអស់ មកកាន់ថ្ងៃដំបូងនៃឆ្នាំសិក្សាថ្មី នៅវិទ្យាល័យ ជា ចាន់តូ!

ថ្ងៃទី២ ខែកញ្ញា ឆ្នាំ២០២៦ គឺជាការចាប់ផ្តើមនៃដំណើរថ្មីមួយ និងជាឱកាសសម្រាប់សិស្សានុសិស្សគ្រប់រូបក្នុងការអភិវឌ្ឍសក្តានុពលរបស់ខ្លួន។

វិទ្យាល័យ ជា ចាន់តូ មានសេចក្តីសោមនស្សរីករាយយ៉ាងក្រៃលែងក្នុងការស្វាគមន៍សិស្សានុសិស្សទាំងអស់មកកាន់គ្រួសាររបស់យើង។

សូមស្វាគមន៍មកកាន់វិទ្យាល័យ ជា ចាន់តូ — កន្លែងដែលទេពកោសល្យជួបនឹងឱកាស។

[ English below ]

Welcome to the first day of a new academic year at Chea Chanto College!

September 2, 2026 marks the beginning of a new journey, one filled with opportunities for every student to learn, grow, and realize their full potential.

We are delighted to welcome all of our students to the Chea Chanto College family and look forward to an inspiring year of learning, growth, and achievement together.

Welcome to Chea Chanto College — where talent meets opportunity.

19/02/2026

09/02/2026

វិទ្យាល័យ ជា ចាន់តូ មានសេចក្តីសោមនស្សរីករាយ ក្នុងការប្រកាសពីលទ្ធផលសម្រាំងនៃការជ្រើសរើសបេក្ខជន បេក្ខនារី​ចូលបម្រើការងារ នៅវិទ្យាល័យ ជា ចាន់តូ !

ជាដំបូង យើងខ្ញុំសូមអរគុណដល់បេក្ខជន បេក្ខនារីទាំងអស់ សម្រាប់ចំណាប់អារម្មណ៍ក្នុងការដាក់ពាក្យបម្រើការនៅវិទ្យាល័យរបស់យើង។ ក្នុងអំឡុងពេលបើកទទួលពាក្យ ក្រុមការងារយើងបានទទួលចំនួនពាក្យ ជាច្រើនលើសពីការរំពឹងទុក ដែលសុទ្ធសឹងតែជាបេក្ខជន បេក្ខនារីដែលពោរពេញដោយសមត្ថភាព និងបទពិសោធន៍ក្នុងវិស័យអប់រំ។ ក្រុមការងារវិទ្យាល័យ ជា ចាន់តូ សូមជូនពរ ដល់បេក្ខជន បេក្ខនារីទាំងអស់ទទួលបានភាពជោគជ័យគ្រប់ភារកិច្ច និងបន្តរួមចំណែកក្នុងការអភិវឌ្ឍន៍វិស័យអប់រំនៅក្នុងប្រទេសកម្ពុជាយើង។

ចំពោះបេក្ខជន បេក្ខនារីដែលដាក់ពាក្យជាគ្រូបង្រៀន សូមត្រួតពិនិត្យនូវក្រុមតេឡេក្រាម CCC Prospective Teacher ដើម្បីទទួលបានព័ត៌មានទាក់ទងនឹងការប្រឡងដែលជាជំហានបន្ទាប់នៃដំណើរការជ្រើសរើស។

ចំពោះបេក្ខជន បេក្ខនារី ដែលដាក់ពាក្យជា នាយក នាយិកាសាលា ឬប្រធានផ្នែកប្រតិបត្តិការ និងអាជីវកម្ម សូមត្រួតពិនិត្យ Email របស់អ្នកសម្រាប់លទ្ធផល និងជំហានបន្ទាប់។

សូមអរគុណ !

04/02/2026

សូមគោរពជម្រាបដល់សាធារណជនឱ្យបានជ្រាបថា
ក្រុមការងារនៃវិទ្យាល័យ ជា ចាន់តូ មានសេចក្តីសោមនស្សរីករាយក្នុងការជម្រាបជូនអំពី និមិត្តសញ្ញា ជាផ្លូវការរបស់វិទ្យាល័យ!

និមិត្តសញ្ញានេះមានគោលបំណងបង្ហាញពីទស្សនៈវិស័យ និងបេសកកម្ម របស់វិទ្យាល័យ ជា ចាន់តូ ក្នុងការផ្តល់ ការអប់រំដែលមានគុណភាពកម្រិតស្ដង់ដាពិភពលោកដល់សិស្សឆ្នើម ដែលមក ពី មជ្ឈដ្ឋានពុំមានធនធាន និង ឱកាសគ្រប់គ្រាន់។

រចនាសម្ព័ន្ធនេះតំណាងឱ្យភាពសម្បូរបែបនៃចំណេះដឹង និងប្រាជ្ញា ដែលសិស្សនៅវិទ្យាល័យជាចាន់តូ នឹងទទួលបាន ដោយមានការណែនាំ និងបង្រៀនដោយអ្នកអប់រំដែលមានជំនាញនិងបទ ពិសោធន៍ខ្ពស់។

ខាងក្រោមនេះគឺជាការពន្យល់លម្អិតអំពីធាតុនីមួយៗនៃនិមិត្តសញ្ញារបស់វិទ្យាល័យ ជា ចាន់តូ។

និមិត្តសញ្ញារបស់វិទ្យាល័យមានធាតុសំខាន់ៗចំនួន៤ ដូចខាងក្រោម៖

ទី១: រូបធម្មចក្រ
គឺជានិមិត្តសញ្ញាដែលរុំព័ទ្ធដោយកងចក្រ ដោយក្នុងព្រះធម៌ គឺតំណាងឱ្យ អរិយអដ្ឋង្គិកមគ្គ របស់ ព្រះពុទ្ធសាសនា រួមមាន:
សម្មាទិដ្ឋិ = ការយល់ឃើញត្រូវ
សម្មាសង្កប្បៈ = សេចក្តីត្រិះរិះត្រូវ
សម្មាវាចា = ការពោលពាក្យសម្តីត្រឹមត្រូវ
សម្មាកម្មន្តៈ= ការធ្វើសកម្មភាព ឬការងារត្រឹមត្រូវ
សម្មាអាជីវៈ = ការប្រកបរបររកស៊ីចិញ្ចឹមជីវិតត្រូវ
សម្មាវាយាមៈ = ការព្យាយាមត្រូវ
សម្មាសតិ = ការភ្ញាក់រឮកត្រូវ
សម្មាសមាធិ = ការតម្កល់ចិត្តត្រូវ

គោលការណ៍ទាំងនេះបង្ហាញពីការរស់នៅដែលប្រកបទៅដោយមេត្តា ករុណា បញ្ញា និងសីលធម៌។ រូប​​​​ធម្មចក្រ(កងចក្រនៃព្រះធម៌) តំណាងឱ្យសេចក្ដីគោរពប្រណិប័តដ៏ជ្រះថ្លារបស់ ឯកឧត្តម ជា ចាន់តូ ចំពោះព្រះពុទ្ធសាសនា។

ទី២: ព្រះច័ន្ទរះ
រូបព្រះច័ន្ទរះនៅលើសៀវភៅតំណាងឱ្យ ប្រាជ្ញា ស្ថិរភាព និងភាពជាអ្នកដឹកនាំ។ ការរចនានេះ ត្រូវបានយកគំរូតាម កាក់រូបព្រះអាទិត្យរះរបស់កម្ពុជា ដើម្បីជាការគោរព និងរំលឹកដល់ស្នាដៃរបស់ ឯកឧត្តម ជា ចាន់តូ ក្នុងការពង្រឹងស្ថិរភាព រូបិយវត្ថុជាតិ​ និងការបំពេញការងារដ៏ឧត្តមរបស់ ឯកឧត្តមក្នុងនាមជាទេសាភិបាលកិត្តយស និងជាអតីតទេសាភិបាល ធនាគារជាតិនៃកម្ពុជា ចន្លោះឆ្នាំ ១៩៩៨ ដល់ឆ្នាំ ២០២៣។

ទី៣: សៀវភៅពីរក្បាល
សៀវភៅពីរក្បាលដែលបានដាក់តម្រៀបលើគ្នាត្រូវបានរចនាតាមរចនាបថក្បាច់ខ្មែរដែលតំណាងឱ្យប្រភពនៃចំណេះដឹង និងប្រាជ្ញារបស់សិស្សានុសិស្សនៃវិទ្យាល័យ ជា ចាន់តូ។ ទម្រង់រចនានេះមានប្រភពមកពីមរតក សិល្បៈ ដ៏សម្បូរបែបរបស់កម្ពុជាដែលបង្ហាញពីការគោរព និងការឱ្យតម្លៃដល់សិល្បៈវប្បធម៌ដ៏ត្រចេះត្រចង់របស់ខ្មែរ។ សៀវភៅទាំងពីរតំណាងឱ្យសារៈសំខាន់នៃការអប់រំក្នុងការចូលរួមចំណែកក្នុងការបណ្ដុះបណ្ដាលសមត្ថភាពសិស្សឆ្ពោះទៅរកអនាគតដ៏ភ្លឺស្វាងមួយ។

ទី៤: “សុ. ចិ. បុ. លិ.”
ពាក្យបាលីសំស្រ្កឹតដែលស្ថិតក្រោមសៀវភៅតម្រួត “សុ. ចិ. បុ. លិ.” សំដៅដល់ការរៀនដែលមានប្រសិទ្ធភាព និងអាចកើតឡើងបានតាមរយៈសកម្មភាពសំខាន់ៗ ៤ ប្រការ គឺ ការស្តាប់ ការគិត ការសួរ និងការកត់ត្រា។ សកម្មភាព ទាំង៤នេះ ធ្វើការរួមគ្នា ដើម្បីបំលែងការស្ដាប់បែបធម្មតា ទៅជាការបង្កើនការចងចាំ ដែលនាំឱ្យការយល់ដឹងរបស់បុគ្គលកាន់តែស៊ីជម្រៅ និងមានភាពច្បាស់លាស់។

02/02/2026

ការដាក់ពាក្យធ្វើការនៅវិទ្យាល័យ ជា ចាន់តូ​ បានបិទជាផ្លូវការហើយ!​!!
សូមអរគុណដល់បេក្ខជនទាំងអស់ ដែលបានចូលរួមដាក់ពាក្យ និងសូមរង់ចាំលទ្ធផលពីក្រុមការងារយើងខ្ញុំ​! 🙏

29/01/2026

សល់តែ ៣ ថ្ងៃទៀតទេក្នុងការដាក់ពាក្យធ្វើការនៅវិទ្យាល័យ ជា ចាន់តូ ! 🎓

ចំពោះគ្រូបង្រៀនតាមមុខវិជ្ជាឯកទេស សូមដាក់ពាក្យតាមរយៈ ៖ https://forms.gle/tBLuyCsojGPpf6sh6
ចំពោះនាយកសាលា និងប្រធានគ្រប់គ្រងប្រតិបត្តិការ និងអាជីវកម្ម សូមដាក់ពាក្យដោយផ្ញើរ Resume និង Cover Letter មកកាន់ Email: [email protected]

⏰ ផុតកំណត់ត្រឹមថ្ងៃទី ៣១ ខែមករា ឆ្នាំ២០២៦

28/01/2026

សកម្មភាពនៃកិច្ចប្រជុំសំណេះសំណាលជាមួយ លោកអភិបាលរងស្រុកសន្ទុក ប្រធាន និងអនុប្រធានការិយាល័យអប់រំ យុវជន និងកីឡា ព្រមទាំងលោកនាយក-នាយិកាសាលា នាថ្ងៃទី២៣ ខែមករា ឆ្នាំ២០២៥ ក្នុងគោលបំណងផ្សព្វផ្សាយ និងផ្តល់ព័ត៌មានពីវិទ្យាល័យ ជា ចាន់តូ​ !​

28/01/2026

ក្រុមការងារវិទ្យាល័យ ជា ចាន់តូ បានរៀបចំកិច្ចប្រជុំសំណេះសំណាលជាមួយ លោកអភិបាលរងស្រុកសន្ទុក ប្រធាន និងអនុប្រធានការិយាល័យអប់រំ យុវជន និងកីឡា ព្រមទាំងលោកនាយក-នាយិកាសាលា នាថ្ងៃទី២៣ ខែមករា ឆ្នាំ២០២៥។

កិច្ចប្រជុំនេះមានគោលបំណងផ្សព្វផ្សាយ និងផ្តល់ព័ត៌មានបន្ថែមអំពីវិទ្យាល័យ ជា ចាន់តូ ព្រមទាំងដំណើរការដាក់ពាក្យអាហារូបករណ៍មកសិក្សាបន្តនៅវិទ្យាល័យ ជា ចាន់តូ ។

យើងខ្ញុំសូមថ្លែងអំណរគុណយ៉ាងជ្រាលជ្រៅដល់ លោកអភិបាលរង ប្រធាន និងអនុប្រធានការិយាល័យអប់រំ យុវជន និងកីឡាស្រុកសន្ទុក ព្រមទាំងលោកនាយក-នាយិកាទាំងអស់ ដែលបានចូលរួម ចែករំលែកមតិយោបល់ អនុសាសន៍ដ៏មានតម្លៃ និងបន្តការសហការគាំទ្រដល់បេសកកម្មរបស់ក្រុមការងារយើងខ្ញុំ 🙏