24/08/2026
ជីវិតមនុស្សម្នាក់ៗ តែងតែរត់តាមរកសេចក្ដីសុខ លុយកាក់ កិត្តិយស និងការស្រឡាញ់ ប៉ុន្តែនៅក្នុងជម្រៅនៃចិត្ត យើងម្នាក់ៗតែងតែភ្លេចខ្លួនថា អ្វីៗគ្រប់យ៉ាងដែលយើងកំពុងតែមាន គឺគ្រាន់តែជាការខ្ចីបណ្ដោះអាសន្នប៉ុណ្ណោះ។
នៅពេលដែលចក្ខុបញ្ញារបស់យើងចាប់ផ្ដើមបើក យើងនឹងមើលឃើញលោកិយតាមសេចក្តីពិត សេចក្តីពិតដែលថា គ្មានអ្វីមួយដែលនៅស្ថិតស្ថេរអមតៈនោះឡើយ។ រូបកាយដែលយើងខិតខំថែរក្សា លម្អដោយសម្លៀកបំពាក់ថ្លៃៗ និងគ្របដណ្ដប់ដោយគ្រឿងអលង្ការដ៏ស្រស់ស្អាត នៅទីបំផុត វានៅតែជាធាតុអនិច្ចំដែលត្រូវបែកធ្លាយ និងត្រឡប់ទៅរកដីវិញដដែល។
ការជាប់ជំពាក់ ស្រឡាញ់ ស្អប់ និងតណ្ហានានា ដែលយើងបានសន្សំ គ្មានអ្វីក្រៅពីអន្ទាក់អាថ៌កំបាំងដែលដុតរោលបេះដូងយើងឱ្យឈឺចាប់រៀងរាល់ថ្ងៃនោះទេ។
🌱ធម្មតានៃសង្ខារទាំងឡាយ
កុំនៅសោកស្តាយមិនបានអី
ព្រមឃើញសិក្សាធម៌កំពុងមានរាល់ថ្ងៃ
បញ្ញាលកលៃឃើញតាមសេចក្តីពិត។
🌱រូបកាយប្រែក្លាយមិនទៀងទាត់
រូបនេះអភ័ព្វគាប់គង់បែកធ្លាយ
រូបត្រូវកម្មអាហារចិត្តឧតុទាំងឡាយ
រូបត្រូវបែកធ្លាយព្រោះជាសង្ខារ ។
🌱រូបនេះជាធាតុមិនដឹងអីទាល់តែសោះ
រូបនេះហាក់ស្មោះនឹងសត្វទាំងឡាយ
រូបនេះតែងជាប់ទៅគ្រប់ពេលហើយ
រូបនេះចុងក្រោយត្រូវគេដុតឬកប់។
🌱រូបនេះពោរពេញដោយរបស់បដិកូល
រូបនេះជាទីប្រមូលប្រជុំដង្កូវទាំងឡាយ
រូបនេះជាអសុភមិនស្អាតសោះឡើយ
រូបនេះហើយដែលជាអារម្មណ៍តណ្ហា។
🌱រូបប្រុសស្រីគឺរូបគ្រាន់តែសន្មតិឡើង
រូបដែលចម្រើនដោយបច្ច័យផ្សេងៗ
រូបនាំទុក្ខចំបែងដោយទុក្ខាទាំងឡាយ!
រូបជាបរមត្ថមិនមានអត្តាតួខ្លួនឡើយ
រូបនេះបញ្ញាកើតហើយឃើញថាមិនទៀង។
🌱តណ្ហាប្រែថាជាប់ជំពាក់
ចងធ្វើជាអន្ទាក់ដាក់សត្វលោកិយ
ចងជាប់មិនឱ្យរបូតពីដៃ
ចងក្នុងភពបីឥតប្រែប្រួល។
🌱កើតទុក្ខមួម៉ៅក្តៅឱរា
ឈឺចាប់ពឺតផ្សាណាម្ចាស់ថ្លៃ
ចុកចាប់ក្តៅណែនរៀងរាល់ថ្ងៃ
ដុតរោលឥតថ្ងៃត្រជាក់ចិន្តា។
🌱កើតទុក្ខ ទុក្ខកើតព្រោះតែគិតខុស
គិតនេះគិតនោះមិនដឹងច្បាស់ត្រង់ណា
ចាប់ចុះចាប់ឡើងវង្វេងស្រវា
ចាប់ចុះឡើងណាប៉ះតែធាតុក្តៅ។
🌱ប្រាថ្នាដូចចិត្តគំនិតតណ្ហា
បើអត់បានដូចប្រាថ្នាទោសាកើតថ្មី
វង្វេងងប់ងល់យ៉ាងនេះរាល់ថ្ងៃ
វិលទៅវដ្តសង្សារបីឥតទីបំផុតឡើយ។
ពាក្យពេចន៍កម្រងភួងទាំងនេះ មិនមែនធ្វើឱ្យយើងអស់សង្ឃឹមក្នុងជីវិតនោះទេ ប៉ុន្តែជា ឱសថទិព្វសម្រាប់ព្យាបាលចិត្តដែលកំពុងវង្វេង។ ទុក្ខវេទនាដែលកើតឡើងរាល់ថ្ងៃ មិនមែនមកពីអ្នកដទៃ ឬព្រឹត្តិការណ៍ខាងក្រៅឡើយ ប៉ុន្តែមកពីចិត្តយើងខ្លួនឯងដែល គិតខុស គិតថារូបកាយ និងលោកិយនេះជារបស់យើង គិតថាសេចក្តីសុខលោកិយនឹងនៅជាមួយយើងជានិច្ច។
នៅពេលណាដែលយើងរៀនលែងដៃពីតណ្ហា រៀនទទួលស្គាល់សេចក្តីពិតនៃរូបកាយដែលជាត្រឹមតែប្រជុំធាតុ នៅពេលនោះហើយដែល បញ្ញា នឹងចាប់ផ្ដើមកើតឡើង។
ចិត្តដែលធ្លាប់តែក្តៅក្រហាយដោយកំហឹង និងសេចក្តីប្រាថ្នា នឹងត្រឡប់ជាស្ងប់ ត្រជាក់និងមានសេរីភាពពិតប្រាកដ។ ចាប់ពីពេលនេះតទៅ ចែករំលែកសេចក្តីល្អ រស់នៅក្នុងបច្ចុប្បន្នភាព ហើយមើលគ្រប់យ៉ាងតាមសេចក្តីពិត ដើម្បីកុំឱ្យជីវិតនេះវិលវល់ក្នុងវដ្ដសង្សារដោយគ្មានទីបញ្ចប់ទៀតឡើយ។❤️
