Сүлүктү шаарындагы А.Кайымкулов атындагы 6 жалпы билим берүү мектеби

КОШ БОЛ АЛТЫН МЕКТЕБИМ!

2026-жылдын 29-майында Сүлүктү шаарындагы А.Кайымкулов атындагы №6 жалпы билим берүү мектебинде “Акыркы коңгуроо” аземи салтанаттуу түрдө өткөрүлдү. Майрамдык иш-чарага Сүлүктү-Тазалык муниципалдык ишканасынын жетекчиси Манас Жалилов, шаардык билим берүү бөлүмүнүн өкүлү Канатбек Кудаяров, шаардык депутаттар кеңешинин депутаты Бекмырза Нурудинович, КУУнун Сүлүктү гуманитардык-экономикалык институтунун ага окутуучусу Асалбубу Сейитмуратова, мектептин ардагер мугалими Абдуганы Аитов, Сүлүктү жол кыймылынын коопсуздугу бөлүмүнүн кызматкери Алмазбек Эргешбаевич, ошондой эле 20 жылдык бүтүрүүчүлөр, ата-энелер, мугалимдер жана окуучулар катышышты.

Азем мектеп босогосун аттап чоң турмушка кадам таштап жаткан бүтүрүүчүлөр үчүн өзгөчө толкундануу менен коштолду. Майрамдык салтанатта келген коноктор бүтүрүүчүлөргө ак жол каалап, келечекте билимдүү, мекенчил жана элине кызмат кылган инсандардан болушуна тилектерин билдиришти. Ошондой эле окуудагы жетишкендиктери, коомдук иштердеги активдүүлүгү жана үлгүлүү эмгеги үчүн бир катар окуучуларга, мугалимдерге Ардак грамоталар жана ыраазычылык каттар тапшырылды.

Иш-чара концерттик программа менен коштолуп, окуучулардын ыр-бийлери, ак тилектери жана мугалимдерге арналган жүрөк толкуткан каалоо-тилектери майрамдын көркүн дагы да арттырды. Өзгөчө акыркы коңгуроонун жаңырыгы бүтүрүүчүлөрдүн мектеп менен коштошкон унутулгус көз ирмемине айланды.

АТА-ЭНЕ МЕНЕН МЕКТЕПТИН БАЙЛАНЫШЫ - САПАТТУУ БИЛИМДИН НЕГИЗИ

2026-жылдын 26-майында Сүлүктү шаарындагы А.Кайымкулов атындагы №6 жалпы билим берүү мектебинде “Ата-эне менен мектептин байланышы — сапаттуу билимдин негизи” аттуу темада ачык эшиктер күнү өткөрүлдү.

Аталган иш-чарага Сүлүктү шаардык билим берүү бөлүмүнүн башчысы Н.М. Жапарова жетектеген жамаат, ата-энелер, мугалимдер жана окуучулар катышышты.

Иш-чаранын жүрүшүндө 2025–2026-окуу жылынын жыйынтыктары чыгарылып, окуучулардын жетишкендиктери, мектептин окуу-тарбия иштериндеги ийгиликтери тууралуу кеңири маалымат берилди. Ошондой эле мектептин усулдук бирикмелери тарабынан ата-энелерге жана мугалимдерге кызыктуу жана пайдалуу мастер-класстар өткөрүлүп, заманбап окутуу ыкмалары көрсөтүлдү.

Мындан сырткары, окуучулардын колунан жаралган чыгармачыл эмгектерден, кол өнөрчүлүк буюмдарынан жана сүрөт иштеринен турган көргөзмөлөр уюштурулуп, келген коноктордун кызыгуусун жаратты.

Иш-чаранын соңунда окууда, коомдук иштерде жана тартипте мыкты жетишкендиктерди көрсөткөн окуучуларга, ошондой эле балдарынын билим алуусуна өзгөчө көңүл буруп, мектеп менен тыгыз байланышта иш алып барган ата-энелерге ыраазычылык каттар жана грамоталар салтанаттуу түрдө тапшырылды.

Мындай иш-чаралар ата-эне, мугалим жана окуучунун ортосундагы кызматташтыкты бекемдеп, сапаттуу билим берүүгө чоң өбөлгө түзөрү белгиленди.

«БАЛДАРДЫН СЫНАГЫНА СЫНБАЙСЫҢБЫ?»

2026-жылдын 25-майында Сүлүктү шаарындагы А.Кайымкулов атындагы №6 жалпы билим берүү мектебинде “Балдардын сынагына сынбайсыңбы?” аттуу темада инсан таануу сабагы жогорку деңгээлде уюштурулду.

Иш-чаранын ардактуу коногу акушер-гинеколог, онколог, радиолог, психолог, режиссер, акын, сүрөтчү жана миң кырдуу өнөр ээси Ибадылла Аджибаев болду. Конок окуучулар менен ачык жана таасирдүү маек куруп, турмуштагы сыноолорго моюн сунбай, ар дайым алдыга умтулуу, билим алуу, максат коюу жана адамдык баалуулуктарды сактоо тууралуу баалуу кеп-кеңештерин бөлүштү. Анын ар бир айткан сөзү окуучуларга чоң мотивация берип, келечекке болгон ишенимин арттырды.

Иш-чаранын жүрүшүндө окуучулар өздөрүн кызыктырган суроолорду берип, турмуштук тажрыйбага негизделген пайдалуу жоопторду алышты. Иш-чарада өспүрүм курактагы психологиялык өзгөрүүлөр, ата-эне менен бала ортосундагы түшүнүшүү, кыял-максатка жетүүдөгү аракет жана руханий баалуулуктар тууралуу кеңири сөз болду.

Иш-чаранын соңунда Ибадылла Аджибаев мектептин алдыңкы жана активдүү окуучуларына өзүнүн стимул берүүчү стипендиясын жеке өзү тапшырып, алардын окууларына ийгиликтерди, бекем ден соолук жана жаркын келечек каалоо менен «Мугалим» аттуу фильмин окуучуларга тартуулады.

БҮТҮРҮҮЧҮЛӨРГӨ ПЕДАГОГИКАЛЫК КЕҢЕШМЕ ӨТКӨРҮЛДҮ

2026-жылдын 22-майында Сүлүктү шаарындагы А. Кайымкулов атындагы №6 жалпы билим берүү мектебинде 9-класстын окуучуларына педагогикалык кеңешме өткөрүлдү. Кеңешменин максаты — окуучулардын окуу жетишкендиктерин талдап, жыл аягындагы жыйынтык баалоого даярдык көрүү жана тарбиялык иштерди күчөтүү болду.

Кеңешмеге ата-энелер, мугалимдер жана окуучулар катышты. Жыйында 9-класстын окуучуларынын сабакка катышуусу, дисциплинасы жана чейректик баалары боюнча маалымат берилди. Айрым окуучулардын окуудагы кемчиликтери белгиленип, аларды жоюу боюнча сунуштар айтылды.

Мугалимдер ата-энелер менен биргеликте окуучулардын сабакка болгон жоопкерчилигин жогорулатуу, үй тапшырмаларын өз убагында аткаруу жана экзамендерге даярдыкты күчөтүү маселелерин талкуулашты.

Ата-энелер өз ойлорун билдирип, балдардын билим алуусуна шарт түзүү жана мектеп менен тыгыз байланышта иш алып баруу керектигин белгилешти.

Жыйынтыгында мектеп администрациясы окуучуларга ийгилик каалап, алдыдагы сынактарга жоопкерчилик менен даярданууга чакырды.

ЖЕҢИШТИН ЖАРЫГЫ ӨЧПӨЙТ

Сүлүктү шаарындагы А. Кайымкулов атындагы №6 жалпы билим берүү мектебинде Улуу Жеңиш күнүнө карата «Жеңиштин жарыгы өчпөйт!» аттуу салтанаттуу иш-чара жогорку деңгээлде өткөрүлдү.

Иш-чарага мугалимдер жана окуучулар катышып, Улуу Ата Мекендик согуштагы баатырлардын эрдигин эскеришти. Кеченин ачылышында мектеп жетекчилиги сөз сүйлөп, 1945-жылдын 9-майы адамзат тарыхындагы эң маанилүү күндөрдүн бири экенин баса белгилешти. Ошондой эле кыргыз элинин Жеңишке кошкон зор салымы, фронтко аттанган жүз миңдеген мекендештерибиз жана алардын арасынан кайтпай калган баатырлар тууралуу айтылды.

Салтанаттуу иш-чаранын жүрүшүндө окуучулар согуш темасындагы патриоттук ырларды көркөм окуп, көрүүчүлөргө терең таасир калтырышты. Айрыкча «Атама кат» аттуу сахналаштырылган көрүнүш согуш жылдарындагы кыйын кезеңдерди, жоокерлердин Мекенге болгон сүйүүсүн жана жеңишке болгон ишенимин чагылдырды.

Кеченин жыйынтыгында мектептин хор жамааты Жеңишке арналган ырларды аткарып, залдагы көрүүчүлөрдүн жүрөгүн толкутту.

ЖАШТАР СПОРТТУ ТАНДАЙТ

2026-жылдын 30-апрель күнү Булак-Башы жалпы билим берүү мектеби мекемесинде зордук-зомбулуктун жана кылмыштуулуктун алдын алуу максатында уюштурулган “Биз бактылуу келечек үчүн!” аттуу волейбол мелдешинде Сүлүктү шаарындагы А.Кайымкулов атындагы №6 жалпы билим берүү мектебинин командасы ийгиликтүү оюн көрсөтүп, байгелүү 3-орунду багындырды

Мелдеш жогорку деңгээлде өтүп, катышуучулар өздөрүнүн спорттук чеберчилигин, ынтымагын жана командалык духун көрсөтө алышты.

Бул жеңиш — окуучулардын эмгегинин, аракетинин жана спортко болгон кызыгуусунун жыйынтыгы. Катышкан бардык командаларга ыраазычылык билдирип, мындан аркы ийгиликтерди каалайбыз!

МЕКТЕП МЕНЕН АТА-ЭНЕНИН БИРГЕЛЕШКЕН АРАКЕТИ - САПАТТУУ БИЛИМДИН НЕГИЗИ

Сүлүктү шаарындагы А. Кайымкулов атындагы №6 жалпы билим берүү мектебинде жалпы ата-энелердин жыйыны өтүп, 2025–2026-окуу жылынын жыйынтыктары талкууланды. Жыйынга ата-энелер жана мугалимдер катышып, окуу-тарбия иштеринин абалы, мамлекеттик аттестация жана окуучулардын коопсуздугу боюнча маанилүү маселелер көтөрүлдү.

Жыйындын жүрүшүндө окуу бөлүмүнүн башчысы С. Рыскулова окуучулардын билим сапаты тууралуу кеңири маалымат берип, үчүнчү чейректин жыйынтыгы боюнча билим сапаты 46,8% түзгөнүн белгиледи. Ошондой эле окуучулардын сабакка катышуусу 95% болуп, жетишүүсү 100%га жеткени айтылды. Бул көрсөткүчтөр мугалимдер менен ата-энелердин биргелешкен эмгегинин жыйынтыгы экени белгиленди.

Мектеп администрациясы окуучулардын билим алуусу менен катар тарбия маселесине да өзгөчө көңүл бурулуп жатканын билдирди. Жыл ичинде зордук-зомбулуктун алдын алуу, жол коопсуздугу, кыздардын адеби сыяктуу темаларда түшүндүрүү иштеринин үзгүлтүксүз жүргүзүлүп турганы маалымдалды. Мындан тышкары, окуучулар ар кандай маданий жана спорттук иш-чараларга активдүү катышып, өздөрүнүн жөндөмдөрүн көрсөтө алышкан.

Жыйындын экинчи бөлүгүндө мектеп директору И. Халпаева алдыдагы мамлекеттик аттестация жана көчүрүү экзамендеринин тартиби менен ата-энелерди тааныштырды. Аттестация негизги төрт предметтен өтөрү, ал эми экзамендер белгиленген күндөрү так убакытта башталаары эскертилди. Ата-энелерге балдардын даярдыгын көзөмөлгө алуу милдети жүктөлдү.

Ошондой эле жыйында окуучулардын коопсуздугу жана тарбиясы боюнча олуттуу маселелер көтөрүлдү. Мектеп жетекчилиги ата-энелерди балдардын сабакка катышуусуна, жүрүм-турумуна жана бош убактысына көбүрөөк көңүл бурууга чакырды. Айрыкча май айындагы эс алуу күндөрүндө балдардын коопсуздугу ата-энелердин жоопкерчилигинде экени баса белгиленди.

Жыйындын жыйынтыгында окуу-тарбия иштеринин натыйжалары канааттандырарлык деп табылып, ата-энелер менен мектептин тыгыз кызматташуусу мындан ары да улантылары айтылды.

“КИТЕП — БИЛИМ БУЛАГЫ” АТТУУ ИНТЕЛЛЕКТУАЛДЫК ТАЙМАШ ӨТТҮ

23-апрель — Бүткүл дүйнөлүк китеп жана автордук укук күнүнө карата А.Кайымкулов атындагы №6 жалпы билим берүү мектебинде 5–6-класстардын окуучулары арасында “Китеп — билим булагы” аттуу интеллектуалдык таймаш өткөрүлдү.

Иш-чараны тарбия иштери боюнча директордун орун басары жана химия мугалими Нурайым Кадырова уюштуруп, окуучулардын китепке болгон кызыгуусун арттыруу, билим деңгээлин текшерүү жана ой жүгүртүүсүн өнүктүрүү максатын көздөдү.

Таймаш кызыктуу суроо-жооптор, логикалык тапшырмалар жана китепке байланышкан викториналар менен коштолду. Окуучулар активдүү катышып, өз билимдерин көрсөтө алышты.

Жыйынтыгында 6-класс өзүнүн мыкты даярдыгы жана тапкычтыгы менен алдыга чыгып, жеңишке ээ болду.

ТААНЫП - БИЛҮҮ САЯКАТЫ: ШААРДЫК МУЗЕЙГЕ ЖАНА КИТЕПКАНАГА САЯКАТ

2026-жылдын 28-апрелинде Сүлүктү шаарындагы А.Кайымкулов атындагы №6 жалпы билим берүү мектебинин башталгыч класстарынын мугалимдери Ташматова Дилбар жана Маллаева Алтынай 3-4-класстарынын окуучуларын Сүлүктү шаардык тарых музейине жана шаардык Борборлоштурулган китепкана тармагынын балдар китепканасына таанып-билүү саякатына алып барышты.

Экскурсиянын негизги максаты – окуучулардын мекенге болгон сүйүүсүн арттыруу, тарыхый мурастар менен тааныштыруу, китепке болгон кызыгуусун күчөтүү жана алардын дүйнө таанымын кеңейтүү болду.

Алгач окуучулар шаардык тарых музейине барышты. Музей кызматкерлери шаар тарыхы, анын өнүгүү жолу, көмүр өндүрүшү, белгилүү инсандары жана тарыхый баалуулуктары тууралуу кеңири маалымат беришти. Окуучулар байыркы экспонаттарды, эски буюмдарды, сүрөттөрдү жана тарыхый документтерди кызыгуу менен көрүштү. Айрыкча ата-бабалардын колдонгон тиричилик буюмдары балдардын өзгөчө көңүлүн бурду.

Андан соң окуучулар шаардык Борборлоштурулган китепкана тармагынын балдар китепканасына барышты. Китепкана кызматкерлери балдарды китепкананын иши, китептердин түрлөрү жана аларды туура пайдалануу эрежелери менен тааныштырышты. Балдар жомок китептерин, энциклопедияларды, сүрөттүү адабияттарды кызыгуу менен карап чыгышты.

Ошондой эле окуучуларга китеп окуунун пайдасы, билим алууда китептин орду жана руханий байлык катары мааниси тууралуу түшүндүрүү иштери жүргүзүлдү. Балдар өздөрүнө жаккан китептер тууралуу ой бөлүшүп, кызыктуу суроолорду беришти.

Саякат абдан кызыктуу жана пайдалуу өттү. Окуучулар жаңы маалыматтарды алып, жакшы таасирлер менен кайтышты. Мындай экскурсиялар балдардын билимге болгон кызыгуусун арттырып, мекенчилдик сезимин калыптандырууда чоң мааниге ээ.