Керимбай уулу Сарыбай атындагы жалпы билим беруу мектеби

30/04/2026

Урматтуу кесиптештер жана кадырман мекендештер!
Бүгүн биздин өлкөдө билим берүү тармагына болгон мамиле жаңы баскычка көтөрүлүп, мугалимдердин кадыр-баркын арттырууга багытталган алгылыктуу иштер ишке ашууда. Агартуучунун эмгегин баалап, анын социалдык абалын жакшыртуу — бул келечекке болгон эң чоң инвестиция.
Ушул маанилүү учурда, билим берүү кызматкерлеринин эмгек акысын жогорулатуу чечими үчүн Кыргыз Республикасынын Президенти Садыр Нургожоевич Жапаровго жана Агартуу министрлигине терең ыраазычылык билдирем.
Бул жөн гана каржылык колдоо эмес, бул — мугалимдин талыкпаган эмгегине берилген бийик баа жана чоң ишеним. Мындай камкордук ар бир педагогго дем-күч берип, сапаттуу билим, татыктуу тарбия берүү жолундагы жоопкерчиликти ого бетер арттырат.
Мамлекеттин мындай колдоосуна жооп катары:
• Биз, агартуучулар, заман талабына шайкеш келген билим берүүгө;
• Инновациялык ыкмаларды колдонууга;
• Мекенчил жана билимдүү муунду тарбиялоого болгон бардык аракетибизди жумшайбыз.
Элибизде амандык, жерибизде тынчтык болсун! Билим берүү тармагы өнүгүп, кыргызстандык окуучулар дүйнөлүк аренада өлкө намысын коргой беришсин.
Терең урматым менен Керимбай уулу Сарыбай атындагы жалпы билим берүү мектебинин директору Сартманбетова Назира Төлөгөновна

#БилимБерүү #МугалимМөмөлүүДарак #Ыраазычылык #Агартуу Министрлиги #Кыргызстан #КелечекБилимде

10/04/2026

Керимбай уулу Сарыбай атындагы жалпы билим берүү мектебине Ага-Хан өнүктүрүү фондунун MSDSP KG коомдук фонду тарабынан мектеп аймагын жашылдандыруу максатында баалуу көчөттөр алып келинип, ийгиликтүү отургузулду.

Бул иш-чаранын алкагында төмөнкү көчөттөр тигилди:
Тянь-Шань карагайы, кадимки карагай, бал карагай (лиственница), көк карагай, пирамидалдуу терек, тал жана ыйлаак тал.

Айлана-чөйрөнү көрктөндүрүүгө, экологияны сактоого жана келечек муун үчүн жашыл мурас калтырууга багытталган мындай демилге ар бирибиз үчүн чоң мааниге ээ. Отургузулган көчөттөр мектеп аймагына көрк берип гана тим болбостон, окуучуларга жаратылышка болгон аяр мамилени үйрөтөт.

Ушул мүмкүнчүлүктү пайдаланып, мектеп жамаатынын атынан Ага-Хан өнүктүрүү фондуна жана MSDSP KG коомдук фондуна терең ыраазычылык билдиребиз. Сиздердин колдооңуздар – келечекке жасалган чоң салым. Иштериңиздерге ийгилик, чың ден соолук жана дагы көптөгөн пайдалуу долбоорлорду ишке ашырууну каалайбыз!

24/03/2026

Кыргыз Республикасынын Президентинин “Улуттук дем – дүйнөлүк бийиктик” уңгужолу жөнүндө Жарлыгын ишке ашыруу максатында, улуу манасчы Тыныбек Жапый уулунун 180 жылдык мааракесине карата мектеп окуучулары арасында уюштурулган “Манас таануу” интеллектуалдык телетаймашынын райондук (шаардык) баскычында III орунду багынткан жетишкендик — бул Исагакунов Сагын агайдын талыкпаган эмгегинин жана окуучулардын тырышчаактыгынын, билиминин жана аракетинин жыйынтыгы болуп саналат.

Бул жеңиш менен окуучулар кийинки баскычка жолдомо алышып, өздөрүнүн билим деңгээлин дагы да жогорулатууга чоң мүмкүнчүлүккө ээ болушту. Бул — алардын алдыга умтулуусунун жана максатка жетүүгө болгон ишениминин айкын далили.

Урматтуу окуучулар, сиздерди бул жетишкендигиңиздер менен чын жүрөктөн куттуктайбыз! Ар дайым билимге умтулуп, жаңы ийгиликтерди жаратып, келечекте дагы бийиктиктерди багындыра беришиңиздерге тилектешпиз.

Ошондой эле сиздерди туура багытка жетелеп, билим жолунда колдоо көрсөткөн Исагакунов Сагын агайга терең ыраазычылык билдиребиз.

Баарыңыздарга чың ден соолук, талыкпас аракет жана мындан аркы чоң ийгиликтерди каалайбыз!

23/03/2026

23/03/2026

Улуу Нооруз майрамынын урматына 21-март күнү Керимбай уулу Сарыбай атындагы жалпы билим берүү мектебинин 10-классынын окуучулары жогорку деңгээлдеги майрамдык иш-чараны сармерден форматында тартуулашты. Бул иш-чара улуттук каада-салттарды даңазалаган мазмуну, көркөмдүгү жана уюштурулушу менен өзгөчөлөндү.

Кечеде окуучулар улуттук бийлерди бийлеп, обондуу ырларды жандуу аткарып, жаңылмач, макал-лакап, табышмактар аркылуу көрүүчүлөргө мыкты маанай тартуулашты. Ошондой эле улуттук дасторкон жайылып, анда олобо, быжы, кара куурдак, бозо, жарма, чалап сыяктуу салттуу тамак-аштар кеңири сунушталды. Бул аракеттер Нооруздун берекесин, элдик нарк-насилди терең чагылдырды.

Аталган тарбиялык иш-чарага ата-энелер да жигердүү катышып, окуучулардын кийим-кечесинен тартып жалпы даярдык иштерине чейин чоң салым кошушту. Класс жетекчи Сарыбаева Бактыгүл эжейдин талыкпаган эмгеги өзгөчө байкалып, иш-чаранын жогорку деңгээлде өтүшүнө чоң түрткү болду.

Окуучулар аккордеон жана комуздун коштоосунда жандуу ырдап, айрымдары өздөрү комуз чертип өнөрүн көрсөтүштү. Бул биздин мектепте таланттуу, өнөрлүү жаштар көп экенин дагы бир жолу далилдеди.

Иш-чарага өз салымын кошуп, аккордеон жана комуз менен коштоп берген Төлөбек агайга, Эсен агайга жана Бакалай агайга терең ыраазычылык билдиребиз. Ошондой эле ар дайым мектеп жашоосуна кайдыгер карабай, окуучуларды колдоп, моралдык жана каржылык жактан дем берип келген айыл башчы Асанжан агайга өзгөчө ыраазычылык айтабыз.

Жогорку деңгээлдеги иш-чараны уюштурган 10-класстын класс жетекчиси Сарыбаева Бактыгүл эжейге жана абдан активдүү катышкан ата-энелерге терең ыраазычылык билдиребиз.

Ошондой эле мектебибиздин директору Сартманбетова Назира эжей 10-класстын буга чейинки окуудагы жетишкендиктерин, өздөрүн алып жүрүүсүн, сабакка катышуусун жана тазалыгын баса белгилеп, мектеп администрациясы тарабынан Бишкек шаарына экскурсияга жолдомо ыйгарды.
Жакшы башчы – ийгиликтин башаты. Дал ушундай көрөгөч жетекчинин аркасында мектебибизде мыкты демилгелер ишке ашып, ар бир иш-чара жогорку деңгээлде өтүп келе жатат.
Учурдан пайдаланып, Назира эжейге бекем ден соолук, ишине ийгиликтерди каалап, ар дайым коллективдин ынтымагын бекем сактап, мыкты иштерди аткарып жатканыңыз үчүн терең ыраазычылык билдиребиз.

Айыл элине майрамдык маанай тартуулаган 10-класстын жалпы окуучуларына окууларында ийгиликтерди, кең келечек каалайбыз!

17/03/2026

Дээрлик эки жумага созулган кыргыз тили, орус тили, англис тили мугалимдери жана китепканачы эжекеден түзүлгөн «Кенч» усулдук бирикмесинин декадасы жогорку деңгээлде уюштурулуп, ийгиликтүү өттү.

Жумалыктын жүрүшүндө үч мамлекеттин маданияты, улуттук кийимдери, каада-салттары, ыр-бийлери жана кызыктуу улуттук оюндары кеңири чагылдырылып, окуучуларга өзгөчө таасир калтырды. Ар бир иш-чара мазмундуу, тарбиялык мааниси терең болуп, окуучулардын кызыгуусун арттыра алды.

Мындан тышкары, мугалимдер тарабынан өтүлгөн ачык сабактар 12 жылдык билим берүүнүн структурасын толук камтып, заманбап талаптарга ылайык уюштурулду. Сабактарда телевизор, интерактивдүү доска сыяктуу жаңы технологиялар натыйжалуу колдонулуп, окутуунун сапаты жогорулатылды.

Жумалыкка 3-класстан 11-класска чейинки окуучулар активдүү катышып, өздөрүнүн чыгармачылык жөндөмдөрүн көрсөтүүгө кеңири мүмкүнчүлүк алышты. Декаданын ар бир күнү өзгөчө мазмунга бай болуп, билим берүү менен бирге тарбиялык мааниси жогору иш-чараларга толо болду.

Жыйынтыгында, бул декада мугалимдердин кесиптик чеберчилигин арттырып, окуучулардын тил үйрөнүүгө болгон кызыгуусун күчөткөн маанилүү жана эсте каларлык иш-чаралардын бири болуп калды.

17/03/2026

"КЫЛМЫШСЫЗ – КЕЛЕЧЕК" аталышындагы 1 айлыктын алкагында

Керимбай уулу Сарыбай атындагы жалпы билим берүү мектебинин 8-классынын окуучулары үчүн мазмундуу жана тарбиялык мааниси чоң иш-чара уюштурулду.

Аталган иш-чаранын негизинде окуучулар Нарын райондук ички иштер бөлүмү жана Нарын райондук прокуратурасы тарабынан өткөрүлгөн "Ачык эшиктер күнү" иш-чарасына катышышты. Иш-чарага класс жетекчи, социалдык педагог, ИДН кызматкери А.Турумбекова жана ата-энелер да активдүү катышты.

Иш-чаранын жүрүшүндө окуучулар жана ата-энелер Нарын райондук ички иштер бөлүмү, Нарын облустук прокуратурасы, Нарын райондук прокуратурасы жана Нарын медициналык колледжи менен таанышышты. Нарын райондук ички иштер бөлүмүнүн башчысы, милициянын майору Б.Мавлянкулов, ошондой эле Нарын облустук прокуратурасынын орун басары Т.Азизов жана Нарын райондук прокуратурасынын прокурору А.Сатинбаев жашы жете элек өспүрүмдөргө өздөрүнүн кызматтык ишмердүүлүгү тууралуу маалымат берип, окуучулар менен ата-энелердин суроолоруна жооп беришти.

Мындан тышкары, окуучулар Нарын шаардык медициналык колледжи менен да таанышып, медициналык билим берүү тармагы, адистиктер жана окуу шарттары тууралуу кеңири маалымат алышты.

Ошондой эле Нарын райондук прокуратурасынын колдоосу менен окуучулар тарбиялык мааниси зор болгон "*Бейиш Эненин таманында"* аттуу кинону көрүүгө мүмкүнчүлүк алышты. Кино аркылуу окуучулар ата-энеге болгон урмат-сый, үй-бүлөлүк баалуулуктар жана адамдык парз тууралуу терең ой жүгүртүштү.

Иш-чаранын жүрүшүндө окуучуларга укук бузуулардын алдын алуу, кылмыш жоопкерчилиги, жаш өспүрүмдөрдүн укук жана милдеттери тууралуу кеңири маалыматтар берилди. Алар өздөрүн кызыктырган суроолорду берип, тиешелүү адистерден жооп ала алышты.

Бул иш-чаранын негизги максаты — жаш өспүрүмдөрдүн укуктук сабаттуулугун жогорулатуу, мыйзамдуулукту урматтоого тарбиялоо жана кылмыштуулуктун алдын алуу болуп саналат.

Жыйынтыгында, мындай иш-чаралар окуучулардын аң-сезимин кеңейтип, келечекте туура багыт тандап, мыйзамга баш ийген, коомго пайдалуу жаран болуп калыптанышына өбөлгө түзөт.

10/03/2026

Чейректин жыйынтыгында окуучулардын билим деңгээлин текшерүү максатында аралаш предметтер боюнча түзүлгөн суроолор менен сабак өтүлдү. Сабакты окуу-тарбия иштери боюнча директордун орун басары Исагакунова Сайкал заманбап усулдарды колдонуу менен өткөрдү.

Сабактын жүрүшүндө интерактивдүү доска колдонулуп, суроолор окуучуларга оюн элементтери аркылуу сунушталды. Аралаш предметтерди камтыган тапшырмалар окуучулардын логикалык ой жүгүртүүсүн өнүктүрүп, сабактарда алган билимдерин эске түшүрүүгө жана бекемдөөгө жардам берди. Окуучулар интерактивдүү тапшырмаларга активдүү катышып, суроолорго ыкчам жана так жооп берүүгө аракет кылышты.

Мындай сабак формасы окуучулардын кызыгуусун арттырып, алардын билим деңгээлин аныктоого жакшы мүмкүнчүлүк түздү. Ошондой эле заманбап технологияларды колдонуу сабактын мазмунун байытып, окуу процессин жандуу жана натыйжалуу өткөрүүгө өбөлгө болду.

Азыркы замандын талабы,окуучулардын кызыгуусун арттыруу үчүн баарыңыздарга сунуштайбыз

06/03/2026