20/04/2026
Асманда жаңырган алгачкы кыргыз үнү
Бошумова Тлеухор Изембековна – Улуттук авиациянын эмгек сиңирген кызматкери, Кыргызстандагы алгачкы стюардессалардын бири. Жашы 80ден ашып калса да, Авиация институтунун музейин жетектеп, үзүрлүү эмгектенип келет.
Ал стюардесса болуп иштеп жүргөндө, ошол учурда Жарандык авиация башкармалыгын жетектеп турган Ишембай Абдраимовго барып, учактагы жарыялардын эмне үчүн кыргызча айтылбай жаткандыгын сурайт. Ишембай Адраимов болсо жарыяларды кыргыз тилине которуп көрүүсүн сунуштайт.
Тлеухор Бошумова теги казак болгонуна карабастан, аларды которуп чыгат. Ошондон баштап аба жолундагы жарыялар кыргыз тилинде да айтыла баштаган.
Тлеухор Бошумованын авиация тармагына кошкон салымы жана бүгүнкү күнгө чейин талыкпай эмгектенип жаткандыгы баарыбыз үчүн үлгү.
20/04/2026
15-апрелде И. Абдраимов атындагы Кыргыз авиациялык институтунда “Кыргыз Республикасындагы тил саясаты, мамлекеттик тилди өнүктүрүүдөгү жогорку окуу жайлардын орду жана ролу” аттуу семинар өткөрүлдү.
Семинарда Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиясынын Тил саясаты бөлүмүнүн башкы адиси Асылбек Орозов, Санарип жана инновациялар бөлүмүнүн башкы адиси Талгат Садырбеков, Окуу-маалыматтык жана котормо борборунун директору Карлыгач Жумакадырова, аталган борбордун жетектөөчү адиси Зияда Шамуратова баяндама жасашты.
Семинарда “Кыргызтест” системасы, тестке даярдануудагы методикалык көрсөтмөлөр жана Окуу-маалыматтык жана котормо борбору тарабынан иштелип чыккан видеосабактар тууралуу кеңири маалымат берилди. Ошондой эле, 2021-2025-жылдарга мамлекеттик тилди өнүктүрүү программасынын алкагында иштелип чыккан “Айтил” улуттук жасалма интеллекти, Document.gov.kg порталы, “Кыргызча оңой / Easy Kyrgyz” мобилдик тиркемеси, балдарга арналган колдонмолор тууралуу баяндамалар жасалды. Мындан сырткары, Мамлекеттик тил жана тил саясаты боюнча улуттук комиссия тарабынан окуу жайга китептер белекке тапшырылды.
Семинардын алкагында коноктор институттун ишмердүүлүгү менен таанышып, институттун музейин көрүп чыгышты.
16/04/2026
2026-жылдын 8-9-апрелинде Чүй облусунун Ички иштер башкы башкармалыгынын кызматкерлери үчүн окуу семинары ийгиликтүү өткөрүлдү.
Семинар Кыргыз Республикасынын Президентине караштуу Мамлекеттик тил жана тил саясаты боюнча улуттук комиссиянын алдындагы Окуу-маалыматтык жана котормо борборунун кызматкерлери тарабынан уюштурулуп, ага жалпысынан 100 кызматкер катышты.
Эки күндүк окууда борбордун директору, ф.и.к. доцент Карлыгач Жумакадырова жана борбордун жетектөөчү адиси Зияда Шамуратова катышуучуларга Кыргызтестке даярдануу боюнча методикалык жардам, тактап айтканда, “Жазуу” жана “Сүйлөө” субтесттерин тапшырууда эске алуучу жагдайлар жана баалоо критерийлери тууралуу кенен маалымат беришти.
Окуу семинары практикалык тапшырмалар, талкуулар жана суроо-жооп форматында өтүп, катышуучулар өз билимдерин бекемдей алышты. Жыйынтыгында семинар катышуучулар үчүн пайдалуу болуп, алардын мамлекеттик тилде сабаттуу жазуу жана эркин сүйлөө көндүмдөрүн өнүктүрүүгө өбөлгө түздү.
27/03/2026