30/05/2025
တန်အောင်ရှင်သန်နေထိုင်ပါ 💚
“ငွေအတွက်သက်သက် ရှင်သန်နေရတဲ့ ဘဝလောက် လူဖြစ်ရှုံးတာ မရှိဘူး”
🔳 Dead Poets Society ဆိုတဲ့ ရုပ်ရှင်ကားထဲက ထင်ရှားတဲ့ ဒိုင်ယာလော့ဂ်တစ်ခု ရှိတယ်။
“Medicine, law, business, engineering – these are noble pursuits, and necessary to sustain life.
But poetry, beauty, romance, love – these are what we stay alive for.”
ဆေးပညာ၊ ဥပဒေ၊ စီးပွားရေး၊ အင်ဂျင်နီယာအတတ် စတာတွေက လူတွေကို အသက်ရှည်စေတယ်။
ကဗျာ၊ အလှတရား၊ ချစ်ခြင်းမေတ္တာတွေကတော့ လူတွေ ရှင်သန်နေရတဲ့ အကြောင်းရင်း ဖြစ်တယ်တဲ့။
သိပ်လှတဲ့ စကားလေ။ ထင်းခနဲ လင်းခနဲ ဖြစ်သွားစေတဲ့ နှိုင်းယှဉ်မှု။
🔳 ဗဟုသုတ၊ သိပ္ပံပညာ၊ ဒါတွေက လူသားမျိုးနွယ်အတွက် အင်မတန် အရေးကြီးတယ်။ လူတွေရဲ့ဘ၀ ပိုပိုပြီး အဆင်ပြေလာတာ၊ လွယ်ကူလာတာတွေဟာ ဒီပညာရပ်တွေ တိုးတက်မှုနဲ့ အများကြီး သက်ဆိုင်တယ်။
ဒါပေမဲ့ နှလုံးသားပါမလာတဲ့ ပညာသက်သက်၊ ကိုယ်ကျင့်တရားတွေနဲ့ ထိန်းကွပ်မထားတဲ့ တိုးတက်မှုသက်သက်ဟာ တစ်ခါတရံမှာ လူမှုအသိုင်းအဝိုင်းအတွက် ပိုဆိုးတဲ့အရာတွေကို သယ်ဆောင်လာတတ်တယ်။
ဥပမာအနေနဲ့ ကမ္ဘာမှာရော၊ မြန်မာမှာပါ ရှိတယ်။ အင်မတန် တိုးတက်တဲ့ စစ်လက်နက်ပစ္စည်းတွေဟာ အင်မတန် ယုတ်ညံ့တဲ့လူတွေရဲ့ လက်ထဲရောက်နေတဲ့အခါ ဘာဖြစ်ကုန်သလဲ။
🔳 ကိုယ့်တစ်ကိုယ်စာအနေနဲ့ စဉ်းစားကြည့်မယ်ဆိုလည်း ကျွန်တော်တို့ ပညာတွေ သင်ကြတယ်။ လေ့ကျင့်ကြတယ်။ ဒါမှ လူ့လောကထဲမှာ အသက်မွေးနိုင်မယ်။ ငွေရှာနိုင်မယ်။
သုတစာအုပ်တွေ ဖတ်တယ်။ ဘဝနေနည်း၊ စီးပွားရေးလုပ်နည်း၊ ငွေရှာနည်း စသဖြင့် နည်းပေါင်းစုံကို လေ့လာကြတယ်။ ပြန်အသုံးချနိုင်လာတဲ့အခါ တိုးတက်လာတယ်။ ကြီးပွားလာတယ်။
🔳 ဒါနဲ့တင် လုံလောက်ပြီလား ဆိုတော့ မလုံလောက်သေးဘူး။ နှလုံးသားတွေ လှဖို့လည်း လိုသေးတယ်။ ကိုယ်ချင်းစာတတ်အောင်၊ ချစ်ခြင်းမေတ္တာ ထားတတ်အောင်၊ ဘဝမှာ ကြုံတွေ့ရတဲ့ လောကဓံတွေကို တည်တည်ငြိမ်ငြိမ် ရင်ဆိုင်နိုင်အောင်ပေါ့။
ဒါတွေကျ သုတစာပေနဲ့ မလုံလောက်တော့ဘူး။ ရသစာပေကိုလည်း ဖတ်ရှုရတယ်။ ဒီကနေတဆင့် မသိမသာ ကိုယ့်ရဲ့ ကိုယ်ကျင့်တရား၊ စံတန်ဖိုး၊ ဂုဏ်သိက္ခာ စတာတွေကို ပုံသွင်းသွားတာ ဖြစ်ပါတယ်။
🔳 ဆက်စပ်ပြီး ထပ်စဉ်းစားကြည့်တယ်။
လူတစ်ယောက် အသက်ရှင်ဖို့ဆို ဘာလိုသလဲ။ စားဝတ်နေရေး လိုတယ်။ ဆေးဝါးလိုတယ်။ အချုပ်ပြောရရင် ပိုက်ဆံပေါ့။
အိုခေ ဒါဆို ချမ်းသာရင် ရပြီလား ဆိုတော့ နိုး။ မရသေးဘူး။ ငွေအတွက်သက်သက်နဲ့ ရှင်သန်နေရတဲ့ ဘဝဟာ အင်မတန် လူဖြစ်ရှုံးတယ်။
🔳 ဒီနေရာမှာ ငွေကြေးအဆင်မပြေလို့ တစ်နေ့တစ်နေ့ စားဝတ်နေရေးအတွက်ပဲ မနည်းရုန်းကန်နေရသူတွေကို ထားလိုက်ဦးနော်။
ဘဝမှာ ငွေရှိမှ တင့်တယ်တာ၊ ငွေဆိုတာ ဒုတိယဘုရားသခင်ပဲ ဆိုပြီး ငွေမှငွေ၊ ပိုက်ဆံမှပိုက်ဆံ ဖြစ်နေသူတွေကို အဓိက ဆိုလိုတာ။ ဘယ်နည်းနဲ့ရရ ဘယ်သူသေသေ ငတေမာရင်ပြီးရော ဆိုတဲ့သူတွေကို ပြောချင်တာ။
🔳 ချစ်ခြင်းမေတ္တာဆိုလည်း ငွေနဲ့ ဝယ်လို့ရမယ် ထင်နေတယ်။ သူငယ်ချင်းဆိုလည်း ငါ ငွေရှိနေသရွေ့၊ ဒီကောင်တွေကို အမ်းနိုင်သရွေ့ ငါ့နား နေကြလိမ့်မယ် မြင်နေတယ်။ မဟုတ်တာ လုပ်ပြီးရင်လည်း ငွေနဲ့ ဖုံးပစ်လိုက်မယ်။
အဲဒီအခါ အပေါ်ယံတော့ ပျော်နေတယ် ထင်ရပေမဲ့ အတွင်းထဲမှာက လစ်ဟာနေတယ်။ တစ်ခုခု လိုအပ်နေတယ်။
ဒါကြောင့် ငွေဟာ ရှင်သန်စေတာ မှန်ပေမဲ့ ဘာအတွက် အသက်ရှင်နေရတယ် ဆိုတဲ့ အကြောင်းရင်းကို တိတိပပ သိထားမှသာ လူ့ဘဝဟာ အဓိပ္ပါယ်ရှိတာ ဖြစ်တယ်။ အခက်အခဲတွေကို ရင်ဆိုင်နိုင်တာ ဖြစ်တယ်။
🔳 Ikigai (အီခီဂိုင်း) ဆိုတဲ့ ဂျပန်စကားလုံး။ တော်တော်များများ ရင်းနှီးပြီးသား ဖြစ်ကြမယ်လို့ ထင်တယ်။ အဓိပ္ပါယ်က “A reason for being” တဲ့။ ရှင်သန်နေရတဲ့ အကြောင်းရင်း လို့ ဆိုလိုတယ်။
အဲဒါ သိထား၊ ရှိထားရင် ဘဝကို ပိုကျေနပ်တယ်။ ပိုပျော်ရွှင်တယ်။ ပိုပြီးလည်း တက်ကြွတယ်။ စိတ်ပိုင်းဆိုင်ရာ ကျန်းမာရေးအတွက် အထောက်အကူဖြစ်တယ်။ အသက်လည်း ပိုရှည်စေတယ်လို့ ပြောကြတယ်။
🔳 ကျွန်တော့်အတွက်ဆို အီခီဂိုင်းဟာ စာရေးခြင်းပဲ။ ကိုယ့်ခေါင်းထဲက အတွေးတွေ၊ ရင်ထဲက ခံစားချက်တွေကို စာလုံးတွေအဖြစ်နဲ့ ချရေးရတာဟာ ဘဝရဲ့ အဓိပ္ပါယ်ပဲ။
ကံကောင်းချင်တော့ ဒီအလုပ်နဲ့ပဲ အသက်မွေးလို့ရတယ်။ ပြည့်စုံအောင် နေနိုင်တဲ့ အခြေအနေဖြစ်တယ်။ ငွေရဖို့အတွက် တခြားအလုပ်တစ်ခု လုပ်နေရတာမျိုး မဟုတ်ဘူး။ တစ်ချက်ခုတ် နှစ်ချက်ပြတ် ဖြစ်သွားတယ်။
🔳 တချို့အတွက်ကျ အဲဒီလို မဟုတ်ဘူး။ ရူးသွပ်တဲ့အလုပ်က တစ်ခု။ ပိုက်ဆံ ဒီလောက်မရတော့ ဝင်ငွေအတွက် နောက်အလုပ်တစ်ခုကို လုပ်နေရတယ်။ ဘယ်လိုပဲဖြစ်ဖြစ် ကိုယ့်ဘဝမှာ ထမင်းမေ့ ဟင်းမေ့ လုပ်နိုင်တဲ့အရာ၊ ဒါကို လုပ်နေရရင် ငွေရရ မရရ၊ နာမည်ကြီးကြီး မကြီးကြီး၊ ပျော်ရွှင်နေတယ် ဆိုတာမျိုး တစ်ခုခုတော့ ရှိသင့်တယ်။ မသိသေး၊ မရှိသေးရင်လည်း ရှာဖွေနေဖို့ လိုတယ်။
တစ်ခါတလေလည်း ကိုယ့်ရဲ့ အီခီဂိုင်းက လူတစ်ယောက်အတွက်၊ လူအများအတွက် ဖြစ်သွားတာမျိုး ရှိတတ်တယ်။ ဥပမာ ကိုယ့်ကလေးအတွက်၊ ကိုယ့်မိဘအတွက်၊ ဒုက္ခရောက်နေတဲ့ ပြည်သူအများအတွက် ငါ ကြိုးစားမယ်။ ထောက်ပံ့မယ်။ ကူညီမယ် ဆိုတာမျိုးပေါ့။
🔳 ပြန်ချုပ်ရရင်တော့ သိပ္ပံပညာဟာ လူမှုအသိုင်းအဝိုင်းကို တိုးတက်စေတယ်။ ပိုလှပလာစေတာကတော့ အနုပညာဖြစ်တယ်။
သုတစာပေက ဦးနှောက်ကို ဖွံ့ဖြိုးစေပြီး ရသစာပေက နှလုံးသားတွေကို ပိုပြည့်ဝလာစေတယ်။
ငွေကြေးက ကိုယ့်အသက်ရှင်ဖို့ လိုအပ်တာ မှန်ပေမဲ့ အဲဒီတစ်ခုတည်းသက်သက်နဲ့ ဘဝကို တည်ဆောက်လို့ မရနိုင်ဘူး။ ငါ ဘာအတွက် ရှင်သန်နေတာလဲ ဆိုတဲ့ အကြောင်းရင်းကိုလည်း သိထားဖို့ လိုအပ်ပါတယ်။
🔳 သိပ္ပံခေတ်၊ သုတခေတ်၊ ငွေသာလျှင် အဓိက ဖြစ်နေတဲ့ခေတ်မှာ တစ်ဖက်စောင်းနင်း မဖြစ်စေဘဲ မျှမျှတတကလေး ရှင်သန်ကြစေချင်တယ်။ ကိုယ့်ကလေးတွေကိုလည်း အဲဒီအတိုင်း ပျိုးထောင်ကြစေချင်ပါတယ်။
ဒေါက်တာ ဖြိုးသီဟ
၂၉.၅.၂၀၂၅
