23/09/2026
ليش الجاهل مفكر حاله عالم.. والعالم مفكر حاله جاهل؟!
كثير بنشوف ناس ما عندهم هالعلم والذكاء الكبير بس واثقين من حالهم زيادة عن اللزوم، وبنفس الوقت كثير من أصحاب العلم والفطنة بشككوا بقدراتهم وبمارسوا جلد الذات يوميًّا..
طب شو السبب🤔
العلماء اكتشفوا 3 ظواهر علمية بفسروا الحالة:
1️⃣ تأثير (Dunning-Kruger): الجاهل ما عنده القدرة المعرفية الكافية ليدرك مدى جهله يعني بجهل إنه جاهل، فلما يكتسب أي معلومة جديدة بفكر حاله ختم العلم.
2️⃣ متلازمة المحتال (Imposter Syndrome): العالِم بعرف إنه في بحار واسعة من المعرفة وبدرك حجم علمه مقارنة بهذه البحار؛ فبحس حاله جاهل، وبشوف مكانته بين الناس مجرد حظ أو حتى احتيال لإنه مش ذكي زي ما الناس بفكروا
3️⃣ انحياز السلبية: الإنسان بطبعه بتأثر بالكلام السلبي أكثر من الإيجابي؛ لإنه النقد بعبر عن سلبية ممكن تسبب خطر لبقائه أما المدح فمجرد كلام لا بقدم ولا بأخر.
وانت يا طالب الطب، قبولك بكلية الطب مش معناه إنك وصلت ذروة المعرفة، فخليك متواضع، بس برضه ما تقلل من حالك لما تشوف زخم المواد وصعوبة الدراسة..
دينا أمرنا بالوسطية فكل إشي، إنه نقدر مهاراتنا ومعرفتنا عشان نثق بحالنا ونعزز نفسيتنا ونقدر نفيد غيرنا، وبنفس الوقت ما نتكبر عالناس لإنه شو ما تعلمنا وتقدمنا بتضل قدراتنا محدودة.
《حاول اوصل للكمال، بس اتأكد إنك مش حتصله》
||
