Skólasafn Breiðholtsskóla

Frá því um miðjan nóvember hefur jólabókaklúbburinn verið eitt af föstu bókasafnsverkefnunum en þá lesa nemendur fjórar jólabækur og vinna sér inn happdrættismiða. Lesa má eins margar jólabækur og hver og einn vill – og fjölga happdrættismiðunum um leið.

Í gær dró svo Ásta Bjarney skólastjóri fjögur börn sem hlutu jólaglaðning frá skólanum. Að þessu sinni voru hin heppnu þau Maja Andrulyté í 3. bekk, Uni Dagur Hákonarson og Abdifatah Abdrahman Salim í 4. bekk, og Imran Askari í 6. bekk. Þau fengu fallegan jólabolla og efni og áhöld til að búa til heitt hátíðarsúkkulaði í jólafríinu sínu. Til hamingju krakkar!

Við bókasafnsskvísurnar óskum ykkur öllum svo gleðilegra lestrar-jóla með þökk fyrir árið sem er að líða.
Unnur María og Leonora.

Af mörgum uppáhaldsjólaverkefnum skólabókasafnins mætti nefna jóla-orða-bingóið. Markmið þess er að læra íslensk jólaorð og eiga gleðilega stund saman á aðventunni. Við sama tækifæri eru orð eins og lóðrétt, lárétt, efsta, neðsta og fleiri bingóorð lögð inn. Við reynum að spila 5 umferðir og tökum ýmsar útgáfur en endum yfirleitt á standandi bingói sem er mjög spennandi. Síðustu ár hefur þetta orðið að föstum lið með íslenskuverinu okkar sem er að vinna svo flott starf en auk þess mæta öll börn í 4. og 5. bekk í gleðina og efla orðaforðann hó, hó, hó 🎅

Hér er búið að vera mikið líf og fjör í 1.-3. bekk. Allir nemendur í þessum árgöngum eru búnir að koma í jólasögukósý á bókasafnið og lita jólagrímur. VIð lásum bókina Jóla-Ekki opna þessa bók og óhætt að segja að hún hafi slegið í gegn hjá þessum aldri :-)

Og þá er það niðurstaða 13 manna dómnefndar í Piparkökuhúsakeppni Breiðholtsskóla 2025:

Sigurvegarar í heimabakað og skreytt 1.-5. bekkur.
1. sæti: Sandra Elizabeth Rutkowska og Igne Navickaite í 2. bekk með 35 stig.
2. sæti: Maja Andrulyté í 3. bekk með 22 stig.
3. sæti: Brynja Guðrún Eysteinsdóttir og Freyja Rut Sæland í 3. bekk með 17 stig.

Sigurvegarar í keypt og skreytt 1.-10. bekkur
1. sæti: Lilja Lúkasdóttir Olsen í 2. bekk með 25 stig.
2. sæti: Viktoría Lúkasdóttir Olsen , Annika Paraiso og Aya Askari í 8. bekk með 23 stig.
3. sæti: Viktor Olaf Kislicki í 5. bekk með 16 stig.

Samtals tóku 28 börn í 1.- 8. bekk þátt í piparkökuhúsakeppninni 2025. Piparkökuhúsin voru samtals 22 þótt sum samanstæðu reyndar af piparkökuhúsaþyrpingum. Dómararnir, 13 talsins úr nemenda- og starfsmannahópnum auk gestadómara frá Hótel- og veitingaskóla Íslands, fengu mjög erfitt verkefni eins og svo oft áður og ótrúlega gaman að sjá hversu mikið keppendur lögðu á sig. Eins og myndirnar bera merki vantar ekki sköpunarkraftinn og hugmyndarflugið í Breiðholtsskólamannskapinn! Á morgun, fimmtudaginn 4. desember, munum við svo tilkynna úrslitin og óhætt að segja að spennan sé að magnast!

Mikið líf og fjör á skreytingardegi í dag en þessir góðkunningjar bókasafnsins gáfu sér þó tíma að sitja fyrir með Rikka og Bedda :)

Það þarf engum að leiðast á aðventunni því við erum í óða önn að skrá og plasta inn fullt, fullt, fullt, FULLT af nýjum bókum sem komu út núna fyrir jólin :-)

Þetta eru Rikki og Beddi ofurkrúttbangsar. Á milli sín gæta þeir jólabókadagatala sem allir umsjónarbekkir í 1.-4. bekk fengu í dag frá skólanum til að eiga eitthvað lestrargotterý hjá sér á aðventunni. Umsjónarkennarar ætla að draga daglega út barn í desember sem opnar jólabókadagatalið fyrir hönd síns bekkjar og svo fá þau öll að njóta. Það var stuð og stemning í bekkjunum þegar glaðningnum var dreift í stofurnar ... 📚🎅

Nú styttist í hina æsispennandi og árlegu piparkökuhúsakeppni Breiðholtsskóla. Tekið verður á móti piparkökuhúsum á bókasafninu mánudaginn 1. desember næstkomandi milli kl. 8:00 og 9:00, og dómnefnd hefur störf kl. 10:00. Við getum ekki beðið eftir að fylla bókasafnið af piparkökuilminum og hlökkum til að sjá fagurskreyttu meistaraverkin! Reyndar er ilmur jólanna kominn til okkar því fyrsta húsið kom óvænt í morgun hó, hó, hó!