Bláa sólin

19/09/2026

Kæru vinir, leggið töluna 978-9935-35-185-2 á minnið.

Nei, smá djók, en þetta verður ISBN númer Bláu sólarinnar,

15/09/2026

Í dag sendi ég beiðni um tilboð á prentun á 6 prentsmiðjur, 3 innlendar og 3 erlendar.

Handritið er enn í yfirlestri hjá ritstjóra en mér fannst orðið tímabært að fara að huga að prentun.

Þegar ég hugsa til baka til þessa hráa handrits sem ég átti í upphafi árs og var varla hæft til birtingar er ég orðinn mjög ánægður með hvernig þessi saga hefur þróast. Ég tel mig segja mína sögu og stundum annarra á gamansaman, dramatískan en umfram allt sanngjarnan hátt.

08/09/2026

Smá nostalgía frá því um 1980–1981. Ég man vel eftir barnaþáttunum Little Blue, eða Blámanni eins og hann var kallaður á íslensku. Þættirnir fjölluðu um lítinn fíl sem varð blár eftir að penni lak yfir hann í baði og þurfti svo að takast á við að vera öðruvísi en hinir.
Eftir einhverfugreininguna skil ég betur af hverju þessi saga sat svona sterkt í mér. Það var eitthvað við það að vera öðruvísi, en samt reyna bara að mæta í skólann og vera með, sem hitti greinilega beint í mark.
Ég söng meira að segja lag úr þáttunum með bulltexta í afmæli hjá bekkjarfélaga — og fékk óvænt mikla athygli fyrir.
Hér er upphafsstefið fyrir þá sem muna eftir þessu:

Opening title sequence to the Yorkshire Television children's progr...

21/08/2026

Í dag sendi ég handritið að Bláu sólinni aftur til ritstjórans eftir að hafa lokið við eftirmálann.

Þegar ég byrjaði á bókinni ætlaði ég fyrst og fremst að skrá minningar. Á leiðinni varð hún líka saga um áhugamál, vináttu, fjölskyldu, þrjósku og hvernig einhverfugreining síðar á ævinni getur hjálpað manni að skilja eigin sögu betur.

Síðustu vikur hef ég svo unnið við það verkefni að raða handritinu upp í tímaröð. Það tók mig ekki nema 19 daga, sem er kannski ágætis vísbending um hversu gaman það er að vinna þetta.

Nú er eftirmálinn kominn á sinn stað, handritið komið aftur til ritstjórans og næsti áfangi tekinn.

Ég held bara áfram "til hinnsta blóðdropa".

14/08/2026

Nú er handritið að *Bláu sólinni* komið á nokkuð nýjan stað.

Þegar ég skrifaði bókina skipti ég henni í þrjá meginhluta: skólagöngu, áhugamál og starfsferil. Það hjálpaði mér að halda utan um minningarnar og minnkaði líkurnar á að eitthvað mikilvægt gleymdist. Gallinn var hins vegar sá að lífið virðir sjaldnast svona snyrtilega flokkun. Skólinn, vinirnir, íþróttirnar, stelpurnar og sumarvinnan áttu það nefnilega til að gerast öll á sama tíma. Ótrúleg ósvífni af lífinu.

Ritstjórinn minn lagði því til að sagan yrði öll sögð í tímaröð. Nú hef ég unnið meginhluta handritsins upp á nýtt með þeim hætti, frá leikskólaárunum og fram til ársins 2002, þegar ég hóf störf hjá Fjármálaeftirlitinu.

Þessi breyting hefur reynst stærri en að færa bara textabúta til. Atvik sem áður tilheyrðu ólíkum köflum tengjast nú betur saman. Íþróttaáhuginn verður til dæmis ekki bara áhugamál heldur leið inn í félagslífið. Sumarstörfin verða hluti af námsárunum og þroskasögunni. Og þegar Sía kemur inn í söguna sést mun skýrar hvernig kynni okkar breyttu því hvert lífið stefndi.

Handritið er þó ekki alveg komið í mark. Enn þarf að fjarlægja nokkra drauga úr gamla skipulaginu, laga tilvísanir í kafla sem eru ekki lengur til, fínstilla kaflaskiptinguna, finpússa og mögulega skýra hluti betur á nokkrum stöðum og gera eftirmálann að almennilegum lokapunkti.

En mér finnst sagan nú flæða betur og vera orðin líkari einni ævisögu en þremur skýrslum um sama manninn. Það hlýtur að teljast framför — jafnvel þótt tryggingastærðfræðingurinn í mér hafi vissulega ákveðna samúð með skýrsluforminu.

04/08/2026

Ég hef nú fengið handritið aftur frá ritstjóranum mínum. Henni fannst textinn skýr og efnið áhugavert, en lagði jafnframt til töluverða breytingu: að sagan yrði öll sögð í tímaröð.

Hingað til hefur handritinu verið skipt í þrjá hluta. Fyrsti hlutinn fjallaði um skólagönguna, annar um áhugamál og frístundir og sá þriðji um starfsferilinn.

Ég er sáttur við að hafa upphaflega skrifað bókina eftir þessum þemum, því það gerði það að verkum að ég gleymdi síður mikilvægum atriðum. Gallinn við þetta skipulag er hins vegar sá að töluverð skörun verður á milli kafla. Margt af því eftirminnilegasta sem gerðist í sumarvinnunni tengdist til dæmis starfinu lítið sem ekkert. Þá slasaðist ég í körfubolta sama dag og ég tefldi mína einu biðskák á skákferlinum — sem varð til að körfuboltakaflinn þurfti að innihalda þessa útskýringu á skákferlinum.

Nú tekur því við að færa texta til og flétta skóla, vinnu, áhugamál, vináttu og rómantík saman eftir æviskeiðum. Það gefur mér líka tækifæri til að bæta við sögum sem mér fannst áður ekki réttlæta sérstakan kafla.

Ég get meðal annars sagt meira frá píanónáminu, þessari einu nótt sem ég vann sem uppvaskari á Gauki á Stöng og fleiri vandræðalegum samskiptum við stelpur sem urðu aldrei sérstakar sögupersónur.

Það er sem sagt nokkur vinna fram undan — en ég held að sagan geti orðið heilsteyptari og betri fyrir vikið.

02/08/2026

I got over 30 reactions on one of my posts last week! Thanks everyone for your support! 🎉

01/08/2026

Nú er handritið að Bláu sólinni komið í hendur vinkonu minnar, sem ætlar að lesa það yfir með ferskum augum.

Það er svolítið sérstök tilfinning að afhenda öðrum alla söguna í einu – bernskuna, skólagönguna, vinnuna, áhugamálin, sigrana, ósigrana og ýmislegt sem ég hefði líklega aldrei sagt frá nema vegna þessarar bókar.

Á meðan hún les ætla ég að leyfa handritinu aðeins að anda. Síðan tekur við næsta umferð: að fara yfir ábendingar, laga það sem betur má fara og undirbúa bókina fyrir næstu skref.

Bláa sólin færist því enn nær því að verða að alvöru bók. Ég hlakka til að halda áfram að segja ykkur frá ferðalaginu.

05/07/2026

Í dag náði ég mikilvægum áfanga í bókarskrifunum: ég er búinn að endurskrifa allt handritið.

Þegar ég hóf þessa söfnun var ég með hrátt handrit sem hafði orðið til á tæplega fjórum árum. Stærsta verkefnið hefur því ekki bara verið að skrifa heldur líka að finna bókinni tón, stíl og rauðan þráð.

Næst á dagskrá er að lesa handritið aftur með gagnrýnum augum, fara yfir málfar og stafsetningu, skoða innra samræmi og ganga úr skugga um að ég hafi ekki klippt út eitthvað sem hefði átt að fá að vera með.

Vonandi getur ritstjórinn tekið við keflinu í ágúst. Ef allt gengur að óskum gæti bókin síðan verið komin í hendur áskrifenda í haust.

Það er dálítið skrýtið að vera á leiðinni að gefa út rúmlega 40.000 orð um eigið líf. Um leið hlakka ég til að koma sögunni út. Ferlið hefur kennt mér margt og ég vona að aðrir geti haft bæði gagn og gaman af henni.