Reiðmaðurinn

21/09/2026

FRÆÐSLUDAGUR REIÐMANNSINS 2026
31. október | Grunnskólinn í Borgarnesi & Miðfossar

Fræðsludagur Reiðmannsins er ætlaður öllum nemendum Reiðmannsins I–III ásamt nemendum í frumtamningarnámi Reiðmannsins.
Á fræðsludeginum verður boðið upp á fjölbreytta og fróðlega dagskrá þar sem reyndir sérfræðingar á sviði reiðmennsku, þjálfunar, heilbrigðis og velferðar hesta miðla þekkingu sinni og reynslu.
Fjallað verður um viðfangsefni sem nýtast nemendum í námi þeirra og áframhaldandi þjálfun, með áherslu á aukin skilning, fagleg vinnubrögð og betra samspil hests og knapa.
Við kynnum með ánægju fyrirlesara fræðsludagsins.
________________________________________
METTE MOE MANNSETH
Reiðmennska, þjálfun og samspil hests og knapa

Hvernig getum við byggt upp þjálfun hestsins þannig að hún leiði til jafnvægis, léttleika og betra samspils milli hests og knapa?
Mette Moe Mannseth er tamningarmeistari og yfirreiðkennari við Háskólann á Hólum og var fyrsta kona á Íslandi til að ljúka meistaraprófi í reiðmennsku.
Hún hefur áratuga reynslu af kennslu, þjálfun og ræktun íslenska hestsins og hefur náð framúrskarandi árangri bæði á keppnis- og kynbótabrautinni.
Í reiðmennsku sinni leggur Mette áherslu á vandaða grunnþjálfun, jafnvægi, léttleika og skýrt samspil knapa og hests. Hún leggur ríka áherslu á að sjá einstaklinginn í hverjum hesti og byggja þjálfunina upp af skýrleika, þolinmæði og virðingu fyrir forsendum hans.
Á fræðsludegi Reiðmannsins mun Mette miðla þekkingu sinni og reynslu af þjálfun og reiðmennsku og sýna hvernig hægt er að þróa betra samspil við hestinn. Fyrirlestur og sýnikennsla Mettu mun vera fyrir alla nemendur reiðmannsins.

„Góð reiðmennska byggist á skilningi, tilfinningu og virðingu fyrir hestinum."
________________________________________
DR. SIGRÍÐUR BJÖRNSDÓTTIR
Heilsa og velferð íslenska hestsins

Hvernig getum við sem hestamenn lært að lesa hestinn betur, fyrirbyggja vandamál og bregðast rétt við þegar eitthvað er að?
Dr. Sigríður Björnsdóttir er prófessor í hestafræðum við Landbúnaðarháskóla Íslands og sérfræðingur á sviði heilbrigðis og velferðar íslenska hestsins.
Hún er dýralæknir með yfir 30 ára reynslu af hrossum og hefur meðal annars sérhæft sig í helti, slitgigt, smitsjúkdómum og velferð hrossa. Sigríður lauk doktorsnámi á sviði myndgreiningar og faraldsfræði og hefur birt hátt í 40 ritrýndar vísindagreinar.
Í starfi sínu leggur hún áherslu á að tengja vísindalega þekkingu við daglegt hestahald, umhirðu og þjálfun, þannig að þekkingin nýtist hestamönnum í raunverulegum aðstæðum.
Á fræðsludegi Reiðmannsins mun Sigríður fjalla um heilsu og velferð íslenska hestsins fyrir alla nemendur reiðmannsins.

„Betri þekking leiðir til heilbrigðari hesta og betri hestamennsku."„
________________________________________
HEIÐRÚN HALLDÓRSDÓTTIR
Pilates fyrir knapa – líkamsvitund, jafnvægi og skýrari ábendingar

Hefur þú einhvern tímann velt því fyrir þér af hverju hesturinn bregst ekki alltaf við ábendingunni þinni? Eða fengið leiðbeiningar eins og „slakaðu á“, „notaðu fótinn“ eða „réttu úr þér“ og hugsað: En hvernig geri ég það í raun?

Heiðrún Halldórsdóttir hefur sérhæft sig í Pilates og ásetu fyrir knapa. Hún kynntist Pilates í námi í Kaliforníu árið 2006 og lauk námi sem Pilates and Dance Conditioning Instructor árið 2009.
Árið 2012 lauk hún námi sem fullnuma Pilateskennari frá Romana’s Pilates, þar sem hún lærði undir leiðsögn Janice Dulak, frumkvöðuls Pilates for Dressage. Árið 2019 lauk Heiðrún fullum réttindum í Pilates fyrir knapa.
Á fræðsludegi Reiðmannsins mun Heiðrún kynna fyrir 1 árs nemendum reiðmannsins hvernig aukin líkamsvitund, styrkur, jafnvægi og liðleiki geta hjálpað knapanum að verða skýrari og nákvæmari í samskiptum við hestinn.
Sérstök áhersla verður lögð á ósýnilegar ábendingar – litlar breytingar í líkama knapans sem hesturinn finnur þótt þær sjáist lítið utan frá.
Þátttakendur fá jafnframt tækifæri til að spyrja Heiðrúnu um eigin áskoranir í ásetu, svo sem hvers vegna hælar lyftast, hvers vegna knapinn hallar fram eða aftur og hvernig hægt er að verða stöðugri og slaka betur á í líkamanum.
Markmiðið er að verða sterkari, liðugri og meðvitaðri knapi – og ná þannig betra og skýrara samspili við hestinn.

„Betri líkamsvitund – skýrari ábendingar – betra samspil við hestinn.“
________________________________________
ÞÓRARINN RAGNARSSON
Þórarinn Ragnarsson er landsliðsknapi, tamningamaður og reiðkennari, menntaður frá Háskólanum á Hólum. Starfar við tamningar, þjálfun og reiðkennslu í Vesturkoti.
Þórarinn hefur náð góðum árangri í gæðinga-, íþrótta- og kynbótabrautinni. Hann sigraði meðal annars A-flokk gæðinga á Landsmóti 2014 með Spuna frá Vesturkoti og varð Íslandsmeistari í fimmgangi með Spuna árið 2017. Árið 2025 var hann valinn í íslenska landsliðið með Herkúles frá Vesturkoti.
Í þjálfun sinni leggur Þórarinn ríka áherslu á vandaða grunnvinnu, traust og gleði, þar sem hesturinn fær að byggjast markvisst upp bæði líkamlega og andlega.
Þórarinn hefur mikla reynslu af tamningum og þjálfun íslenska hestsins og leggur áherslu á vandaða grunnvinnu, traust og gleði í þjálfuninni.
Á Fræðsludegi Reiðmannsins mun Þórarinn miðla af þekkingu sinni og reynslu þar sem reiðmennska og þjálfun íslenska hestsins verða í brennidepli. Þórarinn mun flytja fyrirlestur fyrir þriðja árs nemendur reiðmannsins og sýnikennslu ásamt Mette fyrir alla nemendur reiðmannsins.

„Góð tamning byggist á trausti, skýrleika og gleði í verkefninu.“
________________________________________
SIGURÐUR TORFI SIGURÐSSON
Hófhirða, járningar og heilbrigð hreyfing
Hvað segir hófurinn okkur um heilbrigði, hreyfingu og endingu hestsins – og hvernig getum við með réttri hófhirðu fyrirbyggt vandamál áður en þau koma upp?
Sigurður Torfi Sigurðsson er járningameistari og ráðunautur hjá RML með áratuga reynslu af járningum, kennslu og ráðgjöf.
Hann hefur sérhæft sig í hófhirðu íslenska hestsins og rannsakað hófa íslenskra reið- og kynbótahrossa.
Sigurður Torfi hefur víðtæka þekkingu á því hvernig járningar, hófstaða og jafnvægi hófsins geta haft áhrif á heilbrigði, ganglag og endingu hestsins.
Í starfi sínu leggur hann áherslu á að horfa á þarfir hvers hests fyrir sig, læra að lesa hófinn, þekkja merki um ójafnvægi og vinna markvisst að heilbrigðri hreyfingu.
Á fræðsludegi Reiðmannsins mun Sigurður Torfi miðla þekkingu sinni til nemenda á öðru ári reiðmannsins á hófhirðu, járningum og því hvernig rétt umhirða hófa getur stutt við heilbrigði og endingu reiðhestsins.

„Heilbrigður hófur er grunnurinn að heilbrigðum og endingargóðum reiðhesti."

29/07/2026

Eitt pláss var að losna í Frumtamninganámi Reiðmannsins hjá Spretti í Kópavogi sem hefst 12. september. Skráning og nánari upplýsingar:

Frumtamninganám Reiðmannsins– Markviss byrjun fyrir unghross og knapa –   Frumtamningar í Vesturkoti – Fullt en hægt að skrá sig á biðlistaReiðkennari: Þórarinn Ragnarsson Vika 110. október11. október Vesturkot2 verklegir tímar2 verklegir tímar Vika 219. október Teams kl. 20 m...

16/07/2026

Á aðeins þremur dögum hafa sextán af 24 plássum í Frumtamningum Reiðmannsins verið tryggð og eru því aðeins átta pláss laus ✨

Við erum ótrúlega þakklát fyrir þessar frábæru viðtökur við nýju námsleiðinni okkar! 🐴🫶

Hafir þú áhuga á að taka þátt mælum við með að þú skráir þig sem fyrst. Athugið að ganga þarf frá greiðslu námskeiðsgjalds til að tryggja plássið.

Hestamannafélagið Sprettur
Endurmenntun LBHÍ
Landbúnaðarháskóli Íslands
Vesturkot Hrossarækt
Henna Johanna Sirén
Þórarinn Ragnarsson
Birna Tryggvadóttir
Áshildur Bragadóttir

13/07/2026

✨NÝTT Í REIÐMANNINUM Í HAUST – FRUMTAMNINGANÁM ✨
Frumtamninganám Reiðmannsins er hagnýtt 8 vikna lotunám fyrir hestafólk sem vill fá meiri þjálfun og reynslu í tamningum unghrossa.

Á námskeiðinu vinna nemendur markvisst með eigið unghross undir leiðsögn reyndra reiðkennara og tamningamanna. Verkleg kennsla, heimavinna og regluleg eftirfylgni á Teams mynda samfellda heild þar sem þú færð stuðning í gegnum allt ferlið.

Áhersla er lögð á:
• Traust, ró og örugg samskipti
• Grunnvinnu og hringteymingu
• Að lesa viðbrögð hestsins
• Undirbúning fyrir fyrstu skref undir knapa
• Grunnábendingar: Áfram, stopp og stefnubreytingar
• Fyrstu reiðtúra utandyra ef hesturinn er tilbúinn
• Einstaklingsmiðaða framvindu án þess að flýta ferlinu

Námið hentar bæði þeim sem eru að taka sín fyrstu skref í tamningum og þeim sem hafa einhverja reynslu en vilja bæta við sig þekkingu, öryggi og markvissari vinnubrögðum.

Kennslustaðir og kennarar
📍 Hestamannafélagið Sprettur í Kópavogi
Kennari: Henna Siren
📍 Vesturkot í Skeiða- og Gnúpverjahreppi
Kennari: Þórarinn Ragnarsson

Námið er metið til 4 fein og er ætlað þátttakendum 18 ára og eldri.

Námsfyrirkomulag:
• 12 verklegar kennslustundir
• 3 leiðsagna✨- og stuðningstímar á Teams milli verklegra tíma
• Sjálfstæð og markviss vinna milli kennslutíma
• 1 fræðsluerindi á Teams um atferli hrossa
• Þátttaka í Fræðsludegi Reiðmannsins

Skráningarfrestur til 31. ágúst. Skráningar og nánari upplýsingar: https://endurmenntun.lbhi.is/frumtamningar/
Verð: 135.000 kr.

Reiðmaðurinn er bóklegt og verklegt nám í hestafræði og reiðmennsku á vegum Endurmenntunar LBHÍ. Boðið er upp á fimm námsleiðir, Reiðmaðurinn I, II og III, Keppnisnám og Frumtamninganám. Margir af reyndustu reiðkennurum landsins koma kennslunni.

29/06/2026

Nokkur sæti laus🐴 Markviss kennsla, hópatímar, góður félagsskapur og metnaðarfullir kennarar. Fyrir hestafólk sem vill læra meira, efla sig í reiðmennskunni og njóta þess að vera í skemmtilegum hóp yfir veturinn.

„Það er aldrei of seint að fara með hestamennskuna á hærra plan“
Jói kom inn í Reiðmanninn með mikla reynslu — en fór út með nýja sýn, meiri meðvitund og markvissari vinnubrögð. Hér segir hann frá upplifun sinni af náminu.

Jóhann Albertsson, eða Jói eins og hann er jafnan kallaður, hefur verið í hestamennsku frá því hann man eftir sér. Þrátt fyrir áratuga reynslu segir hann Reiðmanninn hafa gefið sér nýtt líf í hestamennskuna.

„Hestamennskan hefur svo mikið breyst og maður nútímavæddist,“ segir Jói.

Fyrir Jóa snerist námið ekki aðeins um að læra nýjar æfingar eða bæta tæknina í hnakknum. Það snerist líka um að breyta hugsuninni, hlusta betur á hestinn og festa ný vinnubrögð í sessi.

„Sniðugasta við þetta nám er þessi samfella. Þú festir breytinguna í sessi.“

Jói kom inn í námið með mikla reynslu, en líka með hest sem reyndist honum áskorun. Hesturinn var ör, viljugur og stór, og ýmislegt sem þurfti að vinna með. Á köflum var þetta krefjandi ferðalag og sjálfstraustið sveiflaðist, en með leiðsögn, þolinmæði og reglulegri endurgjöf fór árangurinn smám saman að koma í ljós.

„Stundum var maður alveg að gefast upp, en svo small þetta að lokum,“ sagði Jói.

Það sem honum fannst dýrmætast var að fá leiðsögn yfir lengri tíma. Í stað þess að fara á eitt helgarnámskeið og detta svo aftur í gamla farið, fékk hann reglulega kennslu, verkefni til að vinna með heima og skýra stefnu á milli tíma.

„Þú færð alltaf endurgjöf og veist að hverju þú átt að stefna.“

Jói nefnir líka að það hafi skipt miklu máli hvernig bóklegi og verklegi þátturinn fylgdust að. Nemendur gátu lesið sér til um það sem verið var að vinna með í reiðtímunum, undirbúið sig betur og kafað dýpra í efnið á milli kennslulota.

„Þú gast alltaf lesið þig til. Það fannst mér þægilegt.“

Í gegnum námið lærði Jói að skoða hestinn sinn með öðrum augum. Hann fór að velta meira fyrir sér misstyrk, líkamlegum og andlegum þáttum og því hvers vegna hesturinn svaraði ekki alltaf eins og hann bað um. Reiðmennskan varð meðvitaðri, nákvæmari og markvissari.

Hópurinn skipti einnig miklu máli. Jói lýsir samheldnum hópi þar sem nemendur lærðu ekki aðeins í eigin reiðtímum heldur líka með því að horfa á aðra, hlusta, ræða saman og styðja hvert annað. Félagsskapurinn varð stór hluti af upplifuninni.

„Hópurinn skiptir mjög miklu máli,“ segir hann.

Þegar Jói er beðinn um að lýsa Reiðmanninum í þremur orðum segir hann: „Nútímavæðing, gaman og fróðlegt.“

Að hans mati á námið erindi við marga, ekki síst þá sem hafa verið lengi í hestamennsku en vilja endurnýja sig, bæta sig og skilja betur þær breytingar sem hafa orðið í reiðmennsku síðustu ár.

„Það er aldrei of seint að byrja,“ segir Jói. „Hestamennskan fer á hærra plan eftir svona nám.“

26/06/2026

Innilegar hamingjuóskir Hanna Rún Ingibergsdóttir með þessa glæsilegu og verðskulduðu viðurkenningu❣️

Hanna Rún hefur starfað sem reiðkennari við Reiðmanninn í sjö ár og er hluti af okkar góða hópi reiðkennara. Hún vinnur af miklum metnaði að því að veita nemendum innblástur, efla skilning og laða fram það besta — bæði í hestinum og okkur sjálfum sem reiðmönnum. Við erum afar stolt af því að hafa Hönnu Rúnu í okkar hópi.

Við afhendingu á fjöðrinni var lesinn upp eftirfarandi texti:

„Hanna Rún Ingibergsdóttir hlýtur FT fjöðrina fyrir sýningu sína á Hvarmi frá Brautarholti í
tölti meistaraflokks. Mikil útgeislun einkennir þetta par, léttleiki og hesturinn einstaklega framhár. Reiðmennskan er prúð og falleg. Hanna Rún er kurteis innan vallar sem utan, ávallt vel til höfð og til fyrirmyndar. Innilegar hamingjuóskir Hanna Rún !“

FT Fjöðrin er veitt á stærstu mótum keppnistímabilsins, Íslands- og Landsmótum.
FT Fjöðrin er veitt af Félagi Tamningamanna fyrir ákveðna sýningu á einum hesti sem uppfyllir eftirfarandi skilyrði:

Reiðfærni þess sem FT fjöðrina hlýtur skal einkennast af léttleika, lipurð og samspili þar sem saman fer einstök útgeislun og jafnvægi.
Knapi og hestur ljóma af heilbrigði, krafti og gleði.
Verðlaunin eru veitt fyrir einstaka útgeislun knapa og hests.
Hesturinn sé sjálfberandi, sterkur og mjúkur. Reiðmennska einkennist af samspili og léttleika.

Á liðnu Íslandsmóti fullorðinna og ungmenna hlaut Hanna Rún Ingibergsdóttir FT fjöðrina fyrir sýningu sína á Hvarmi frá Brautarholti. Þau keppti í tölti í meistaraflokki og enduðu þar í fimmta sæti með einkunnina 8,72 eftir að hafa unnið B úrslit.

Hanna Rún Ingibergsdóttir hlaut FT fjöðrina á Íslandsmóti fullorðinna og ungmenna 2026.

Reiðfærni þess sem FT fjöðrina hlýtur skal einkennast af léttleika, lipurð og samspili þar sem saman fer einstök útgeislun og jafnvægi. Knapi og hestur ljóma af heilbrigði, krafti og gleði. Verðlaunin eru veitt fyrir einstaka útgeislun knapa og hests. Hesturinn sé sjálfberandi, sterkur og mjúkur. Reiðmennska einkennist af samspili og léttleika.

Hanna Rún Ingibergsdóttir hlýtur FT fjöðrina fyrir sýningu sína á Hvarmi frá Brautarholti í tölti meistaraflokks. Mikil útgeislun einkennir þetta par, léttleiki og hesturinn einstaklega framhár . Reiðmennskan er prúð og falleg. Hanna Rún er kurteis innan vallar sem utan, ávallt vel til höfð og til fyrirmyndar ✨

Innilegar hamingjuóskir Hanna Rún ! 🩵

Mynd: Björk Media (Ásta Björk Friðjónsdóttir)

09/06/2026

🐴✨Fresturinn er liðinn, en dyrnar eru ekki alveg lokaðar!
Nokkur sæti laus fyrir áhugasama nemendur
á völdum stöðum á landinu.
👉Kynntu þér málið á endurmenntun.lbhi.is

⏳ Umsóknarfrestur til 15. júní

Reiðmaðurinn er bóklegt og verklegt nám í hestafræði og reiðmennsku á vegum Endurmenntunar LBHÍ. Boðið er upp á fimm námsleiðir, Reiðmaðurinn I, II og III, Keppnisnám og Frumtamninganám. Margir af reyndustu reiðkennurum landsins koma kennslunni.

02/06/2026

Augnablik úr kennslunni — þar sem tenging, þekking og tilfinning mætast. 😊

01/06/2026

Reiðmaðurinn I í Hestamannafélagið Hörður í Mosfellsbæ. Snorri Dal sigraði tvöfalt um helgina og var kjörin knapi mótsins. Snorri mun kenna reiðmaðurinn I í Herði í vetur. Ertu búin að skrá? Snorri hlaut einkunina 9 í B-flokk & 8,80 Í A flokk. í Hestamannafélagið Sörli er reiðmaðurinn II í boði og kennari þar Katla Sif. Katla var rétt á eftir Snorra með einkunina 8,73 í B flokk & 8,61 í A flokk. Við óskum þeim innilega til hamingju með uppskeru helgarinnar og óskum þeim góðs gengis á Landsmót hestamanna. 🥳 Umsóknarfrestur til 5. júní endurmenntun.lbhi.is/

29/05/2026

Vertu með í vetur! Umsóknarfrestur til 5. júní