أنـــــا

اول خطوات الأمان
هي المعرفة

احتاج اعرف المقابل.. حتى بعدها اطمئن له

زين شلون اعرفه؟

لما كانوا يگولون جهنم و عذاب القبر و و و
هما مو ضروري ديختلقون هذه الاشياء
بسسسس

كان تعريفنا على الله من جانب (الخوف)
اللي هو اخليهم يخافون منه حتى يسمعون كلامه

شنو اللي صار؟

خفنا؟ اي خفنا
الخوف خلانا نتجنب هواية محرمات؟؟ اكيدد

بس هذا الخوف حرمنا من شي كللللش مهم!
وهو الأمان بالله!

تخيل انت خايف من شي (لله المثل الاعلى)
صح رح تتجنب تخالفه.. بس هم رح تتجنبه
رح تبتعد عنه .. و قد تنفر!

زين الدنيا كلها بكل ناسها و مواردها.. ما توفر الامان اللي نحتاجه من مصدره الاساسي (الله)
فشلون تكون حياة شخص.. خايف من خالق الامان!!

باوعي حواليچ.. هي هاي حياته
شخص قلق.. متوتر.. وقد يكون فاقد الامل اصلا!

فأول خطوة هنا صارت تعريف الطفل على الله من الاتجاه اللي يبني الامان اولا..
وهنا نبدي بالحب ❤️

احنا المن نحب؟
المُعطي ❤️ الكريم ❤️ الرحيم ❤️ الجبار ❤️ الغفور❤️ الودود ❤️ القريب ❤️ المجيب ❤️ العفو ❤️ اللطيف ❤️

شلون اوصلهم للطفل بطريقة غير مباشرة تماما؟

اذا عندكم تجربة بالموضوع شاركوها وياية.. ممكن اضيفها للبوستات الجاية و الكل يستفادون❤️

واذا حابين تحضرون محاضرة تفصيلية عن بناء علاقة اطفالنا بالله

فالموعد يوم ٤-٢ (الاربعاء)
الساعة ٩ ونص مساءاً بتوقيت العراق على زووم

الاشتراك بسعر رمزي

دزيلنا مسج.. او كتبي محاضرة (السند) بالكومنتات وتوصلك كل التفاصيل ❤️

و شير شير شير

سند ثابت؟ لو مهزوز!

گلنا انه نخاف من الفقد وخاصة على اطفالنا

زين شلون احميه من شي ماعندي سيطرة عليه؟

تعالي نفكر شنو المخيف بالفقد؟

التوهان!

فماذا لو كان لهذا الطفل سند قوي لا يُفقَد؟؟
بوقتها رح يكون اي فقد.. هو حزن فراق مو توهان و ضياع!

تدرين حتى حبك لاطفالك مو مضمون!
ممكن تمرضين! ممكن حالتج النفسية ما تكون مستقرة! وممكن تأذيهم لان كرهتيهم! شلون يعني!!!! تصير.. مو هواية بس تصير
أم تقتل اطفالها (اسم الله) او تتخلى عنهم او او او

فالأمان لا بحب الام ولا الاب ولا اي بشر
لان البشر ضعيف و متغير

الامان بالثبات والاستناد الى الاقوى

ومن هنا بدت رحلة تعريف الاطفال على "الله" السند ❤️

شلون اعرف اطفال صغار على الله حتى يطمئنون بي و يكون مرجعهم وامانهم في هذا العالم المتغير اللي مابي اي ضمانات!

رح نسوي سلسلة پوستات عن هذا الموضوع

بس اذا تريدين تفاصيل اكثر او عندك اسئلة هواية عن الموضوع
كتبي (السند) و توصلك تفاصيل المحاضرة القادمة
على زووم ❤️

ساعدوا بالشير كمساهمة في نشر الامان لقلوب اهل واطفال اكثر ❤️

كم مرة فكرتي (اذا متت.. شنو رح يصير بأطفالي)؟

هواية طبعا
مو لأن انتِ نكدية ولا تحبين الاحزان 😌
وانما غريزة الام هي اللي تحركك

احنا نبقى نخاف على اطفالنا حتى من ابوهم مرات
وسمعت مؤخرا معلومة تقول انه المرأة غريزياً تبتعد عن الرجل اللي تحسه ما راح يكون أب جيد..

مو معناها كل الاباء جيدين.. ولكن نحچي عن شي فطري بدون وعي يحدث

ولأن اني هم أم .. وورة حادث وفاة شخص قريب و صغير بالعمر.. بدت هذه المخاوف تعلى عندي

سمعت مرة من تربوية مشهورة جدا قالت انه هي طمنت اطفالها انه الام ما راح تموت اصلا.. اتذكر هذا الشي زيَّد خوفي و كتبتلها تعليق.. تخيلي اذا لا سمح الله متِّي.. شنو رح يكون شعور الطفل؟

احنا نحاول نحمي الطفل من الخوف من الفقد.. فنحطه في احتمال الصدمة و التوهان و الفقد..

اخر شي استقريت على حل
من جملة قالتها مرة (د. سارة سيف) بمحاضرة لأم اولادها تعرضوا لفقد احد الاقارب المقربين
قالت بما معناه (اذا الله كتبلهم هذا الشي.. فهو رح يقدرهم عليه)

و تحول تفكيري من شلون نحميهم.. الى شلون نعلمهم يتعاملون عامةً

اكمللكم بالپوست الجاي ان شاءالله

شنو اكثر شي تخافين عليه في حال تعرض اولادك للفقد؟
مشاعر معينة؟ تصرفات معينة؟

شنو هي اكبر مخاوفك؟ (لا سمح الله اذا فقدوك او اي احد اخر بالعائلة)

مستعدة فعلا للتغيير؟

مو كل توهان معناه تغيرين الطريق 💜

عواقب الارتجال!

راجعين من المدرسة
طخ براسي انه اوديهم اشتريلهم شي

(ملاحظة قبلها انه اني كنت بالدوام و يوم طويل ومتعب،، وهما هم راجعين من يوم دراسي طويل..قررت عود افرحهم و گلت نروح نشتري فد عصير او بسكت)

راجعين بالطريق وهما متحمسين وديفكرون شيشترون.. طخت براسي انه (هااا ادم مو جنت تريد فلان كتاب؟ تعال نروح نشتريه من المكتبة)

رحنا للمكتبة.. ملگينا الكتاب.. زين نشتري دفتر تلوين من الهايبر ماركت..
خلصنا.. وييي صدك ادم بنطرونك گصر وتحتاج بنطرون

ماما اريد پيجاما هم مال فلان شخصية كارتونية

هاي هم فد نص ساعة لخ

مختصر مفيد.. رجعنا للبيت.. بعدنا مواصلين اذن المغرب!!

وهنا واخيرا اجة ببالي اسأل ادم
🧕🏻شنو عدكم واجبات اليوم؟
👦🏻 عدنة ٥ كلمات نكتب كل وحدة ٥ مرات

🧕🏻 اي؟ بعد؟
👦🏻 عدنا واجب صفحة بالscience
ها صدك و عدنا امتحان unit كامل بالانگليزي
ومدري شنو بعد بدرس الكردي

🧕🏻😭😭😭😭 يلهووووي

طبعا راجعين للبيت تعبانين و جوعانين وورانا كومة دراسة!!

ندخل للبيت.. تعال ادم گدر الهدوم
انزع البس انزع البس
يلا بسرررعة
خلص عاااد
طلع الكتب

وهنا يحدث الانفجاررررر

👦🏻 اني اكررررره المدرسة
اكررره الواجبات 😭😭😭😭

"الحمدلله والله على نعمة التعلم المستمر.. تذكرت معلومة قبل كم يوم سمعتها.. بعد يوم طويل وخربطة بالجدول و بالاحتياجات الاساسية مثل الاكل والنوم لازم نستعد انه رح الطفل "يتعرض" لنوبة غضب"

ليش گلنا يتعرض مو يسوي؟
لان علميا هي شي يصير بالطفل.. مو هو يسويه
فواجبنا نكون وياه بهذا الوقت و ندعمه

احضان وطبطبة و حقك و دا افتهم
لما بدة شوية يقل انفعاله

🧕🏻انت متعصب حبيبي لانه الجدول تخربط وتحس وراك كللللش هواية اشياء صح؟
👦🏻 اييي هواية ما اكدر اخلص كل هذا 😭😭😭

🧕🏻تعال حبيبي اعلمك طريقة و نجربها سوى

اول شي كتبنا كل الشغلات اللي مطلوبة منه اليوم
وراها قسمناهم على حسب شنو اللي لاازم يتسوة اليوم وشنو اللي ممكن يتأجل لباچر
وراها، شفنا شغلات اليوم ، و خليته يرتبهم من الاصعب للاسهل

🧕🏻 هسة يا واجب تحب تبدي بي؟

هو اختار اسهل واحد.. وهنا اعرف من يخلصه رح يرجع يتنحس علمود الصعب

🧕🏻باوع ادم.. هذا الواجب الطويل المزعج يعتبر 🐸
والواجب السهل يعتبر 🍰
والمثل يكول Eat your frog first
👦🏻ليش؟ خلي اكل الكيكة اطيب
🧕🏻صح.. بس انت اول وتالي لازك تسوي اثنينهم.. فتحس الصح انه تاكل الكيكة ووراها الضفدع! لو العكس حتى تبقى حاس بالطعم الحلو بالنهاية؟
👦🏻يعني الضفدع اول 😞
🧕🏻بالضبط! عفية عليك.. يلا جيب الدفتر و اني گاعدة يمك لحد ما تخلص ❤️❤️ متأكدة انت تگدر ❤️

يجيب كتبه ونخلص الواجبات الحمدلله

هل مشى كل اليوم بسلام؟
لا للاسف.. لان اني هم طاقتي خلصت وراها و صارت مشكلة بالطابعة و بترتيب اسئلة الامتحان و وو و

بس طلعنا من هذا اليوم بشغلتين

الاولى: انه ابد ما اسمح لنفسي ارتجل بخطة اليوم!! خطة اليوم تنحط الصبح و نمشي عليها.. ممكن نغير طبعا بس شغلات بسيطة.. مو نخترع او نضيف اشياء ابد ما محسوب حسابها!!!
الثانية: ادم تعلم و بمثال وتطبيق عملي.. شلون يتصرف و يرتب دماغه من يكون اكو وراه هواية واجبات و بدة يحس بالعجز و الاستياء ❤️

قبل النوم.. چنت غاضبة جدا من ادم.. حضنته و كلله اليوم جان يوم فعلا صعب ومرهق.. اني احبك.. باچر ان شاء الله نحچي ونحل ❤️

مو كل موقف رح تتصرفين صح
ولا كل موقف رح يعدي بأحسن طريقة

بس لازم يكون الغالب هو "الامان"

انه نتقبل و نستوعب انه الخطأ هو فرصة للتعلم
و ان نتأكد ان كل فرد مطمئن انه هو محبوب مهما صار

🤍🤍🤍🤍🤍
الشير يساعدني اوصل لمعلومة لعدد اكبر

ويعلي فرص اطفالكم انه يلتقون بأطفال عندهم نفس الافكار

فشير يرحمكم الله 😌😉

أما آن لهذه النفس ان تهدأ؟ ❤️🤍

الام المتهورة

صباح جميل هاديء
بس اليوم مو بس رح ابدل للاطفال و يروحون للمدرسة يلا ابدي استعد لدوامي
اليوم للاسف لازم اني اوصلهم الصبح.. فلازم نجهز سوى و نطلع كلش من وقت!

رتبت يومي
- اسوي الريوك (الفطور) واللانچ بوكس
- ابدللهم واجهزهم واني وياهم اليوم حتى نخلص اسرع
- اجهز اني و ننطلق

گعدتهم بهدوء و لطف و حب
يلا حبايبي صحصحوا علما احضر الاكل
ردت شوية ياخذون وقت قبل التبديل حتى لا يكون اكو مقاومة
خلصت الاكل
جيت ابدللهم.. ادم الحمدلله تم بسلام وكان متعاون وخلص من وكت

امن اجة شوية بدايات نعوصة
يلا حبيبي اشرب هذا شي دافي
يلا نلبس
وبكللللل سذاجة و عدم اكتراث.. شلت فد ستيكر من على هدومه و ذبيته بالزبل واني دا اسولف وياه عاااادي
وهنا….
تيراا رااا
بدت الانهيارااات
- لييييش ذبيتي الستيكررررر هذا عليه تروفي 🏆

الجدير بالذكر انه كل يوم ياخذ ستيكر و كل يوم اني اذبه بالزبل وعادي و ميتأثر.. بس الحظظ اليوم

🧕🏻- اووو حبيبي كنت تريده! كلش اسفة معرفت تريده

بكاااء ونحيييب واحزان .. وكان باقيلنا اخرررر قطعة ملابس.. وعاند ما يلبس

🧕🏻- حبيبي والله حقك.. معرفت تريدها.. انت كلش انقهرت؟ هسة انطيك غيرها..

ماكووو فايدة و عاند ميقبل يلبس

گعدت يمه بالگاع (وآدي قعدة)

ماكو فايدة هو قافل و يبچيييييي و يشوف ادم يگوللـه بكلللل قهر (ادم ماما ذبت الستيكر مالتي 😭😭😭)

مقهورة عليه كلش.. بس بديت اتوتر و أُستفز و ماكو ببالي غير لبسيه بالقوة وعود بعدين نراضيه..

بعدين قررت انسحب.. كافي خلي اهدأ
ماكو شي مستعجل.. اذا تأخرنا شوية عالمدرسة مو نهاية الدنيا اليوم.. خلي يكون هذا موقف افرح انه حليته صح.. مو مصدر ندم و فشل..

راح هو للغرفة.. كتله يلا حبيبي ارتاح شوية و اني رح ابدل علما انت تهدأ

نايم ومتغطي و يحچي و يبچي خطية من كل قلبه تأثر

بدلت هدأت رجعتله
فعليا ماكو وقت تأخير بعد

يلا أموني ارتاحيت؟ اني اعرف انت زعلت.. تعال انطيني حضونة (ندلع الحضن لازم 🤕)

بعده قافل
ماااا ألبسسسسسسس

اوكي حبيبي براحتك لا تلبس
اذا تحب نروح للمدرسة بدون البلوز بكيفك.. إلبس يلا الجاكيت..

وكان هذا اخر حلولي.. انه هو لابس بلوز ابو الرقبة ابيض وهاي هي خلي يلبس فوكاه الجاكيت.. وممكن علما نوصل للمدرسة الله يهديه و يلبس عود بالريسپشن

بدينا نلبس الجاكيت.. اشو الله هداه

👦🏻 لا لبسيني مال مدرسة البلوز 😢

كلللللليش .. هلهلت بقلبي

🧕🏻يلا اوكي ..

و لبسته واحنا دنحچي عن غير موضوع و هوووپ هيا بنا

رحنا.. وبالطريق نسى الموضوع

والادهى انه من رجع.. باوعت هم حاطيله ستيكر
گلتله الله انطوك ستيكر
شال بكل ثقة
انطانياه
👦🏻 ماما طبقيه و حطي بالزبالة

😵‍💫😵‍💫😵‍💫😵‍💫😵‍💫😵‍💫
الاستنتاجات والتوصيات بأول تعليق 🤕