14/07/2026
कला–कलम सङ्गम, बर्मेक–नाम्फिङ तथा २१२औँ भानु जयन्ती आयोजक समितिद्वारा आयोजित २१२औँ भानु जयन्ती समारोहअन्तर्गत सम्पन्न अनलाइन रामायण पाठ (वरिष्ठ वर्ग) प्रतियोगितामा प्रथम स्थान तथा अनलाइन कविता वाचन प्रतियोगितामा प्रथम र दोस्रो स्थान हासिल गरी विद्यालयको गौरव बढाउन सफल विद्यार्थीहरूलाई आज विद्यालयको विहानी प्रार्थना सभाको अवसरमा आयोजक समितिद्वारा प्रदान गरिएका पारितोषिक तथा प्रमाणपत्र वितरण गरियो।
यसै अवसरमा विद्यार्थीहरूले आदिकवि भानुभक्त आचार्यप्रति सम्मान अर्पण गर्दै आकर्षक नेपाली सांस्कृतिक नृत्य प्रस्तुत गरेका थिए। उक्त नृत्य सुश्री कृष्ण कुमारी शर्मा, स्नातकोत्तर शिक्षिका (नेपाली) को निर्देशन तथा संयोजनमा प्रस्तुत गरिएको थियो। उत्कृष्ट प्रस्तुति दिएका नृत्य टोलीलाई समेत आयोजक समितिको तर्फबाट प्रदान गरिएको पारितोषिक प्रदान गरी सम्मान गरियो।
सभामा कला कलम सङ्गमका संस्कृति सचिव श्री कृष्ण ढुङ्गेलले प्राचार्य महोदयलाई कला-कलम सङ्गमको समसामयिक साहित्यिक पत्रिका "उद्बोधिका"पनि उपहार स्वरुप प्रदान गर्नु भयो।
कार्यक्रमलाई सम्बोधन गर्दै विद्यालयका प्राचार्य श्री भीम शमशेर छेत्रीले विजेता विद्यार्थीहरूलाई हार्दिक बधाई तथा शुभकामना व्यक्त गर्नुभयो। उहाँले यस्ता साहित्यिक, सांस्कृतिक तथा सिर्जनात्मक गतिविधिहरूले विद्यार्थीहरूको प्रतिभा प्रस्फुटन, आत्मविश्वास अभिवृद्धि तथा नेपाली भाषा–साहित्यप्रतिको रुचि विकास गर्न महत्त्वपूर्ण भूमिका खेल्ने बताउनुभयो। साथै निरन्तर परिश्रम, अनुशासन र लगनशीलताका साथ अघि बढ्दै भविष्यमा अझ उत्कृष्ट सफलता हासिल गर्न विद्यार्थीहरूलाई प्रेरित गर्नुभयो।
प्राचार्य महोदयले यस प्रतियोगिताका प्रशिक्षक श्री कृष्ण ढुङ्गेल, स्नातकोत्तर शिक्षक (भूगोल) तथा नेपाली सांस्कृतिक नृत्यकि संयोजक सुश्री कृष्ण कुमारी शर्मा, स्नातकोत्तर शिक्षिका (नेपाली) लाई विद्यार्थीहरूलाई उत्कृष्ट मार्गदर्शन प्रदान गरी विद्यालयलाई गौरवान्वित बनाएकोमा विशेष बधाई तथा हार्दिक धन्यवाद ज्ञापन गर्नुभयो। साथै उहाँले आयोजक समिति, शिक्षकवृन्द तथा सहभागी सम्पूर्ण विद्यार्थीहरूको सक्रिय योगदानको उच्च प्रशंसा गर्दै आगामी दिनमा पनि यस्ता सिर्जनात्मक तथा साहित्यिक गतिविधिमा उत्साहपूर्वक सहभागी हुन सबैलाई आग्रह गर्नुभयो।
