10/07/2025
आपल्या संस्थेच्या राणी सरस्वतीदेवी कन्या शाळा व मातोश्री सायरबाई चंपालाल बेदमुथा ज्युनिअर कॉलेज ऑफ सायन्स या विभागामध्ये आज गुरुवार दिनांक 10 जुलै 2025 रोजी गुरुपौर्णिमेचा कार्यक्रम अतिशय मंगलमय व प्रसन्न वातावरणात संपन्न झाला.
या कार्यक्रमासाठी प्रमुख पाहुण्या म्हणून सांगली मधील प्रसिद्ध अशा दंतवैद्य डॉ. निलिमा लिमये उपस्थित होत्या.
तसेच याप्रसंगी शाळेच्या माननीय मुख्याध्यापिका श्रीमती सरिता माणकापुरे यादेखील या कार्यक्रमासाठी उपस्थित होत्या.
डॉ. सौ. लिमये यांनी आपल्या मनोगतामधून विद्यार्थिनींना अतिशय मौलिक मार्गदर्शन केले. आपल्या शारीरिक स्वच्छतेसोबतच मानसिक स्वच्छता ही देखील अतिशय महत्त्वाची आहे. आपण कसे दिसतो यापेक्षा कसे आहोत हे जास्त महत्वाचे आहे. आपला देह व देव या दोन्हींच्या मध्ये देश आहे व आपण आपल्या देशासाठी काहीतरी केले पाहिजे हे सदैव आपल्या स्मरणात असले पाहिजे. या वयामध्ये आपल्याकडून कोणतेही चुकीचे पाऊल उचलले जाणार नाही याची प्रत्येकीने दक्षता घ्यावी. आयुष्यात आपल्याला काय बनायचे आहे हे ठरवून त्याप्रमाणे ध्येयाकडे आत्तापासूनच वाटचाल करावी असे सांगून मोबाईल आणि प्रलोभने यांपासून नेहमी लांब रहा असाही सल्ला त्यांनी विद्यार्थिनींना दिला.
शाळेच्या माननीय मुख्याध्यापिका यांनीही विद्यार्थिनींना मार्गदर्शन करताना आज गुरुपौर्णिमेनिमित्त तुम्ही काही भेटवस्तू, गुलाबपुष्प इत्यादी गोष्टी शिक्षकांसाठी आणल्या असतील, पण ज्यावेळी तुम्ही स्वतः कमवायला लागाल, तेव्हा त्या पैशातून तुम्ही एखादी भेटवस्तू शिक्षकांना दिली तर तो शिक्षकांचा खरा सन्मान आहे अशा भावना व्यक्त केल्या.
श्री. अनिलकुमार धायगुडे यांनी प्रमुख पाहुण्या डॉ. नीलिमा लिमये यांची ओळख सर्वांना करून दिली. विभाग प्रमुख सौ. उज्वला पाटील यांनी उपस्थितांचे आभार व्यक्त केले.
इयत्ता 12 वी ची विद्यार्थीनी कु. वैष्णवी घोरपडे हिने संपूर्ण कार्यक्रमाचे सूत्रसंचालन केले.
यावेळी संस्थेचे पदाधिकारी, शिक्षक-शिक्षकेतर सहकारी व सर्व विद्यार्थिनी उपस्थित होत्या.
