District Education Office Patan

પાટણ જિલ્લામાં ધોરણ ૧૦ અને ૧૨ ની બોર્ડની પરીક્ષાનો પ્રારંભ
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ દ્વારા ધોરણ 10 અને 12ની પરીક્ષાનો આજથી પ્રારંભ થયો છે. પાટણ જિલ્લામાં બે ઝોનમાં ધોરણ 10ના 22 કેન્દ્રો પર 18,630 વિદ્યાર્થીઓ પરીક્ષા આપી રહ્યા છે. પરીક્ષા શાંતિપૂર્ણ માહોલમાં ચાલી રહી છે.
સમગ્ર રાજ્યની જેમ પાટણ જિલ્લામાં પણ પ્રથમ દિવસે સોમવારે સવારે 10 કલાકે એસ.એસ.સી.માં ગુજરાતી વિષયની પરીક્ષા સાથે બોર્ડની પરીક્ષાનો પ્રારંભ થયો. વિદ્યાર્થીઓ શાંતિપૂર્ણ વાતાવરણમાં પરીક્ષા આપી શકે તે માટે જિલ્લા શિક્ષણ વિભાગ દ્વારા તમામ તૈયારીઓ કરવામાં આવી છે. તો બપોરે 3 કલાકથી એચ.એસ.સી. વિજ્ઞાન પ્રવાહમાં ભૌતિક વિજ્ઞાન જ્યારે એસ.એસ.સી. સામાન્ય પ્રવાહમાં અર્થશાસ્ત્રની પરીક્ષા લેવાશે.
ધોરણ 10ની પરીક્ષા શરૂ થવાના અડધો કલાક પહેલા વિદ્યાર્થીઓને પ્રવેશ આપવામાં આવ્યો. પ્રથમ દિવસે શ્રી અશોકકુમાર એન. ચૌધરી, જિલ્લા શિક્ષણાધિકારી,પાટણ સહિત લાયન્સ ક્લબ, ભારત વિકાસ પરિષદ અને શિક્ષકો દ્વારા શેઠ બી.એમ.હાઇસ્કુલ,પાટણ ખાતે વિદ્યાર્થીઓને કુમકુમ તિલક, ગુલાબ અને સાકરથી મોં મીઠું કરાવી આવકારવામાં આવ્યા તેમને બોલપેન અને ચોકલેટ આપી શુભેચ્છાઓ પણ પાઠવવામાં આવેલ.
પાટણ જિલ્લાના તમામ પરીક્ષા શાળાઓના બ્લોકમાં સીસીટીવી કેમેરાની દેખરેખ હેઠળ પરીક્ષા યોજાઈ રહી છે. વિદ્યાર્થીઓની કારકિર્દી ઘડતર માટે મહત્વપૂર્ણ આ બોર્ડ પરીક્ષા ગુરુવારથી શરૂ થઈ છે. પરીક્ષા આપવા આવેલા વિદ્યાર્થીઓની બેગ, બૂટ, ચપ્પલ, મોબાઇલ સહિતની વસ્તુઓ પરીક્ષા ખંડની બહાર રાખવામાં આવેલ.
વધુમાં, ધોરણ 12 સામાન્ય પ્રવાહમાં 14 કેન્દ્રો પર 10,367 વિદ્યાર્થીઓ અને વિજ્ઞાન પ્રવાહમાં 4 કેન્દ્રો પર 1,721 વિદ્યાર્થીઓ જિલ્લામાં પરીક્ષા આપી રહ્યા છે. સમગ્ર પરીક્ષા વિદ્યાર્થીઓ શાંતિપૂર્ણ રીતે આપી શકે તે માટે સુવ્યવસ્થિત આયોજન કરવામાં આવ્યું છે. તેમજ તમામ વિદ્યાર્થીઓને શુભેચ્છાઓ પાઠવેલ.

District Education Office Patan