15/01/2022
വടക്കുപറമ്പ് എം.എം.എൽ.പി സ്കൂളിൽ ഫിറ്റ് ഇന്ത്യയുടെ ഭാഗമായി കായിക വാരത്തിന് തുടക്കം കുറിച്ചു. ജില്ലയിലെ മികച്ച കോച്ചിനുള്ള പുരസ്കാരം കരസ്ഥമാക്കിയ പന്തല്ലൂർ സ്കൂൾ കായികാധ്യാപകൻ ശ്രീ.വി.പി. സുധീർ പതാക ഉയർത്തി ഉദ്ഘാടനം ചെയ്തു.
പ്രതിരോധ ശേഷി വർധിപ്പിക്കുന്നതിൽ കായിക പരിശീലനങ്ങൾക്ക് വലിയ പ്രാധാന്യമുണ്ടെന്ന് ഉദ്ഘാടകൻ പറഞ്ഞു.
സ്പോർട്സ് ഉപകരണങ്ങളടങ്ങുന്ന കിറ്റ് സുധീർ മാസ്റ്ററിൽ നിന്നും സ്കൂൾ പാർലമന്റ് പി.ഇ.ടി ലീഡർ സന. കെ.പി ഏറ്റുവാങ്ങി.
തുടർന്ന് കബ് & ബുൾബുൾ ടീമിന്റെ മാർച്ച് പാസ്റ്റും അരങ്ങേറി.
കോവിഡാനന്തര കാലത്തെ കുട്ടികളുടെ ആരോഗ്യപരിരക്ഷകക്കും വ്യക്തിത്വ വികാസത്തിനുമുതകുന്ന വ്യത്യസ്ത മത്സരങ്ങളാണ് കായിക വാരത്തോടനുബന്ധിച്ച് സംഘടിപ്പിക്കുന്നത്.
വരും ദിവസങ്ങളിൽ ഫുട്ബാൾ, ബാഡ്മിൻറൺ, സ്കിപ്പിങ് റോപ്, റിങ്ങ്സ് തുടങ്ങി കായിക ഇനങ്ങൾക്ക് പരിശീലനം നൽകും.
പ്രധാനാധ്യാപകൻ സി.പി. ജലീൽ, അധ്യാപകരായ കെ. അബ്ദു മാസ്റ്റർ, എം.ഫസീല, വി.രാഹുൽ തുടങ്ങിയവർ നേതൃത്വം നൽകി.
