Netizens Foundation School

16/08/2026

🇮🇳 *जय हो! जय हो!*🇮🇳
*नेटीझन्स फाउंडेशन स्कूलमध्ये स्वातंत्र्यदिन उत्साहात साजरा*

देशभक्तीचा उत्साह, विद्यार्थ्यांचा उत्स्फूर्त सहभाग आणि जोशपूर्ण वातावरणात नेटीझन्स फाउंडेशन स्कूल, लातूर येथे 80 वा स्वातंत्र्यदिन उत्साहात साजरा करण्यात आला.
शाळेच्या *गुणवंत विद्यार्थ्यांच्या हस्ते ध्वजारोहण* या परंपरेनुसार शैक्षणिक वर्ष 2025-26 मधील इ.5 वी व 8 वीतील शिष्यवृत्तीधारक विद्यार्थ्यांच्या हस्ते, संस्थापक-संचालक प्रा.एस.जे. तोडकर सर तसेच संचालक महेश तोडकर, सूर्यकांत तोडकर, मुख्याध्यापक (प्रशासन) पठाण सर, समन्वयक मुंडे सर, फाउंडेशन अकॅडमी कॉर्डिनेटर सदाफुले सर व AAC प्रमुख सूरज नाईकवाडे सर यांच्या प्रमुख उपस्थितीत राष्ट्रध्वजारोहण करण्यात आले.
यानंतर गीतसमूहाने राष्ट्रगीत, राज्यगीत व देशभक्तीपर गीतांचे सुमधुर सादरीकरण केले. शिष्यवृत्तीधारक विद्यार्थ्यांचा गौरव, इ.1 ली ते 9 वीतील विद्यार्थ्यांची मनोगते, इ.1 लीच्या विद्यार्थिनींचे देशभक्तीपर नृत्य आणि इ. 5 वी च्या विद्यार्थिनीच्या नृत्याभिनयाने कार्यक्रमाला विशेष रंगत आली.
मार्गदर्शन करताना प्रा. एस.जे.तोडकर सरांनी स्वातंत्र्याचा खरा अर्थ स्पष्ट करताना, *“स्वातंत्र्य म्हणजे अनिर्बंध मोकळीक नव्हे; तर इतरांच्या स्वातंत्र्याचा विचार करून जबाबदारीने वागणे होय,”* असा संदेश दिला. विद्यार्थ्यांनी स्वच्छता, स्वावलंबन, सहकार्य, वस्तूंची काळजी, मोबाईल व सोशल मीडियाचा मर्यादित वापर आणि पालकांशी सुसंवाद यांसारख्या दैनंदिन जबाबदाऱ्या स्वीकारण्याची सामूहिक शपथ घेतली.
महिंद्रा शोरूमच्या ‘Freedom Ride’ उपक्रमातील इ.4 थीच्या ( सकाळ NIE उपक्रमातील 100% सहभागी वर्ग) उत्कृष्ट चित्रकला सादर करणाऱ्या विद्यार्थ्यांना बक्षिसे देण्यात आली. खाऊ वाटपाने कार्यक्रमाची सांगता झाली.
कार्यक्रमाचे सूत्रसंचालन मनस्वी पाटील, प्रांजल कांबळे व हर्षिता धुर्वे यांनी केले.

🇮🇳 राष्ट्रप्रेम, विद्यार्थ्यांचे कर्तृत्व आणि जबाबदार नागरिकत्वाचा संदेश देणारा हा स्वातंत्र्यदिन सोहळा विद्यार्थ्यांसाठी प्रेरणादायी व अविस्मरणीय ठरला.

*उपक्रम व प्रसिद्धी विभाग*
नेटीझन्स फाउंडेशन स्कूल, लातूर

15/08/2026

26/07/2026

🌼🙏*आषाढी एकादशीनिमित्त नेटीझन्स फाउंडेशन स्कूलमध्ये भक्ती आणि संस्काराचा अनोखा संगम!*🙏🌼

टाळ आणि मृदुंगाच्या मंगल निनादात, हरिनामाच्या अखंड गजरात आणि विठ्ठलभक्तीच्या पावन वातावरणात नेटीझन्स फाउंडेशन स्कूल, लातूर येथे आषाढी एकादशीनिमित्त आयोजित करण्यात आलेला वारकरी दिंडी सोहळा अत्यंत उत्साहात व भक्तिभावाने संपन्न झाला.
भारतीय संतपरंपरेचा वारसा, वारकरी संप्रदायातील समता, सेवा, भक्ती आणि संस्कार विद्यार्थ्यांपर्यंत पोहोचावेत या उद्देशाने या उपक्रमाचे आयोजन करण्यात आले होते.

सोहळ्याची सुरुवात इ.5 वी ते 7 वीच्या विद्यार्थी-विद्यार्थिनींनी टाळ आणि मृदुंगाच्या तालावर सादर केलेल्या भक्तिमय पावलांनी झाली. विद्यार्थ्यांनी टाळ-मृदुंगाच्या तालावर साकारलेले वारकरी पावलांचे रिंगण उपस्थितांसाठी विशेष आकर्षण ठरले. इ. पहिलीतील चिमुकल्यांनी संतांच्या वेशभूषेत साकारलेले मनमोहक दर्शन सर्वांचे लक्ष वेधून घेतले. इ. चौथीचा विद्यार्थी शार्दुल कोहाळे याने सादर केलेल्या अभंग गायनाने वातावरण अधिकच भक्तिमय झाले.

यानंतर सर्व वर्गांतील विद्यार्थी-विद्यार्थिनींच्या सहभागातून नेटीझन्स फाउंडेशन स्कूल ते श्री.गजानन महाराज मंदिर या मार्गावर भव्य वारकरी दिंडी काढण्यात आली. भगव्या पताका, टाळ-मृदुंगाचा नाद आणि हरिनामाच्या गजराने परिसर जणू पंढरपूरच्या वारीचेच दर्शन घडवत होता. दिंडीच्या मार्गावर नागरिक, महिला, बंधू-भगिनी यांनी पालखीचे व श्री.विठ्ठलाचे पूजन करून दर्शन घेतले. यावेळी शाळेतील शिक्षक, पालक आणि विद्यार्थ्यांनी पारंपरिक वारकरी फुगड्या खेळत भक्ती आणि संस्कृतीचा सुंदर आविष्कार साकारला.
शेवटी श्री.गजानन महाराज मंदिरातील विठ्ठल मंदिरात महाआरती करून या भक्तिमय दिंडी सोहळ्याची सांगता करण्यात आली.

विद्यार्थी, शिक्षक, पालक आणि शिक्षकेतर कर्मचाऱ्यांच्या उत्स्फूर्त सहभागामुळे हा संस्कारमय उपक्रम अत्यंत यशस्वी ठरला.

नेटीझन्स फाउंडेशन स्कूलमध्ये गुणवत्तापूर्ण शिक्षणाबरोबरच विद्यार्थ्यांच्या सर्वांगीण विकासासाठी अशा संस्कारप्रधान उपक्रमांचे सातत्याने आयोजन करण्यात येते,भारतीय संस्कृती आणि जीवनमूल्यांचे संवर्धन करण्यासाठी शाळा सातत्याने प्रयत्नशील आहे.

॥ पुंडलिक वरदा हरी विठ्ठल ॥
॥ श्री ज्ञानदेव तुकाराम ॥

*उपक्रम व प्रसिद्धी विभाग*
नेटीझन्स फाउंडेशन स्कूल,लातूर.

24/07/2026

📚*नेटीझन्सच्या भविष्यवेधी अभ्यासक्रमाच्या पुस्तकांचे शानदार प्रकाशन !*📚📖

नेटीझन्स फाउंडेशन तर्फे इ. 6 वी, 7 वी आणि 8 वी साठी 'NCERT Plus' गणित व विज्ञान विषयांच्या पुस्तकांचे नेटीझन्स वार्षिक सन्मान- संवाद सोहळ्यात मान्यवरांच्या हस्ते प्रकाशन करण्यात आले.

राष्ट्रीय शैक्षणिक धोरण NEP 2020, NCERT आणि महाराष्ट्र राज्य मंडळाच्या सुधारित अभ्यासक्रमाचा प्रभावी समन्वय साधत विद्यार्थ्यांमध्ये संकल्पनात्मक आकलन, चिकित्सक विचारशक्ती, समस्या सोडविण्याचे कौशल्य आणि स्पर्धात्मक परीक्षांसाठी आवश्यक क्षमता विकसित करण्याच्या उद्देशाने नेटीझन्सचा नवीन भविष्यवेधी अभ्यासक्रम आणि पुस्तके तयार करण्यात आले आहेत.

मागील अनेक महिन्यांपासून विषयतज्ज्ञ शिक्षक, संपादक, शैक्षणिक समन्वयक, ग्राफिक्स डिझायनर आणि व्यवस्थापन यांच्या अथक परिश्रमातून साकारलेले हे अध्ययन साहित्य विद्यार्थ्यांच्या सर्वांगीण प्रगतीसाठी निश्चितच मैलाचा दगड ठरेल.

संस्थेचे संस्थापक-संचालक प्रा.एस.जे.तोडकर सर यांच्या दूरदर्शी नेतृत्वातून साकार झालेला हा उपक्रम गुणवत्तापूर्ण शिक्षणासाठी नेटीझन्सची असलेली सातत्यपूर्ण बांधिलकी अधिक दृढ करणारा ठरेल, याचा आम्हाला विश्वास आहे.

संपूर्ण नेटीझन्स परिवाराचे मनःपूर्वक हार्दिक अभिनंदन!

नेटीझन्स फाउंडेशन, लातूर.
शिक्षणाची आनंदयात्रा...
समर्पित | सूक्ष्म | समृद्ध 🌸

23/07/2026

🌺 *माजी उपमुख्यमंत्री स्वर्गीय अजितदादा पवार यांच्या लोकसेवेच्या प्रेरणादायी प्रवासाला विनम्र अभिवादन!* 🌺

नेटीझन्स फाउंडेशन स्कूल, लातूर येथे काल महाराष्ट्राचे माजी उपमुख्यमंत्री स्वर्गीय अजितदादा पवार यांच्या जयंतीनिमित्त अभिवादनाचा कार्यक्रम उत्साहात संपन्न झाला.
यावेळी त्यांच्या प्रतिमेस पुष्पहार अर्पण करून विनम्र अभिवादन करण्यात आले. केमिस्ट्री शिक्षक श्री.सुरज मस्के-पाटील सरांनी त्यांच्या कार्याचा, राज्याच्या सर्वांगीण विकासासाठी केलेल्या योगदानाचा, लोकाभिमुख नेतृत्वाचा आणि अविरत कार्यशैलीचा विद्यार्थ्यांना परिचय करून दिला.
महाराष्ट्र शासनाने त्यांच्या जयंतीचा समावेश राष्ट्रपुरुष व थोर व्यक्तींच्या अधिकृत जयंती कार्यक्रमांमध्ये करून त्यांच्या कार्याला दिलेला सन्मान हा संपूर्ण महाराष्ट्रासाठी अभिमानाची बाब आहे.
विद्यार्थ्यांनीही त्यांच्या कार्यातून प्रेरणा घेत समाजहित, विकास आणि कर्तव्यनिष्ठेची मूल्ये अंगीकारण्याचा संकल्प केला.
याप्रसंगी शाळेचे मुख्याध्यापक ( प्रशासन) पठाण सर, पर्यवेक्षक मुंडे सर, सर्व शिक्षकवृंद, शिक्षकेतर सहकारी आणि मोठ्या संख्येने विद्यार्थी उपस्थित होते.

*उपक्रम व प्रसिद्धी विभाग,*
नेटीझन्स फाउंडेशन स्कूल, लातूर.

21/07/2026

🏆 हार्दिक अभिनंदन!!🏆

आपल्या संस्थेचे संस्थापक- संचालक, आदरणीय प्रा.एस.जे.तोडकर सर यांना SilverZone Foundation या अग्रगण्य शालेय स्पर्धा परीक्षा संस्थेकडून Academic Leadership Excellence Award 2025-26 हा पुरस्कार नुकताच प्रदान करण्यात आला.

हा पुरस्कार संस्थेच्या यश-गौरवासोबतच शिक्षण क्षेत्रातील दूरदृष्टीपूर्ण नेतृत्व,विद्यार्थीकेंद्रित विचारसरणी, गुणवत्तापूर्ण शिक्षणासाठीची अविरत बांधिलकी आणि शैक्षणिक उत्कृष्टतेचा सातत्यपूर्ण ध्यास यांचा सन्मान आहे.

शिक्षणात ज्ञानदानाच्या बरोबरीने विद्यार्थ्यांच्या व्यक्तिमत्त्व विकासाची, मूल्यसंवर्धनाची आणि उज्ज्वल भविष्य घडविण्याची जबाबदारी आहे, या विचारावर दृढ विश्वास ठेवून तोडकर सरांनी हजारो विद्यार्थ्यांच्या आयुष्याला दिशा देण्याचे कार्य केले आहे. त्यांच्या नेतृत्वाखाली नेटीझन्स फाउंडेशनने ज्ञान, नीती आणि संस्कार या मूल्यांवर आधारित शिक्षणाची एक वेगळी ओळख निर्माण केली आहे.

विद्यार्थ्यांमध्ये स्पर्धात्मकता, गुणवत्ता, आत्मविश्वास आणि जागतिक दृष्टिकोन विकसित करण्यासाठी त्यांनी घेतलेले उपक्रम, शैक्षणिक नवकल्पनांचा स्वीकार आणि शिक्षक-विद्यार्थी विकासासाठी केलेले सातत्यपूर्ण प्रयत्न हेच या गौरवामागील खरे कारण आहे.

आपले नेतृत्व, कार्यतत्परता आणि शिक्षणाविषयीची निष्ठा आम्हा सर्वांसाठी प्रेरणादायी आहे. आपण अशीच शिक्षण क्षेत्रात नवनवीन उंची गाठावी आणि आपल्या मार्गदर्शनाने असंख्य विद्यार्थ्यांच्या आयुष्यात ज्ञानाचा प्रकाश यावा,हीच सदिच्छा.

🌟 आपला हा सन्मान म्हणजे संपूर्ण नेटीझन्स परिवारासाठी अभिमानाचा क्षण आहे! पुढील यशस्वी वाटचालीसाठी मनःपूर्वक शुभेच्छा! 💐

नेटीझन्स फाउंडेशन परिवार.