11/07/2026
എരുമേലി എം.ഇ.എസ് കോളേജിൽ നവാഗതർക്ക് ആത്മവിശ്വാസം പകരാൻ പൂർവ്വ വിദ്യാർത്ഥി സംരംഭകർ കൈകോർത്തു
എരുമേലി : എം.ഇ.എസ് കോളേജിലെ ബിസിനസ് അഡ്മിനിസ്ട്രേഷൻ വിഭാഗം വിദ്യാർത്ഥികളിൽ സംരംഭക മനോഭാവം വളർത്തുകയും പഠനത്തെ പ്രായോഗിക തലത്തിലേക്ക് ഉയർത്തുകയും ചെയ്യുന്നതിനായി സംഘടിപ്പിച്ച Industrial Visit & Entrepreneur Connect പരിപാടി ശ്രദ്ധേയമായി. ഈ പരിപാടിയുടെ ഭാഗമായി, കോളേജിലെ 2006–2009 ബിബിഎ ബാച്ചിലെ പൂർവ്വ വിദ്യാർത്ഥികളും ഇന്ന് വിവിധ മേഖലകളിൽ വിജയകരമായി സംരംഭങ്ങൾ നയിക്കുന്ന യുവ സംരംഭകരും ഒത്തുചേർന്ന് നിലവിലെ വിദ്യാർത്ഥികളുമായി അനുഭവങ്ങൾ പങ്കുവെച്ചു.
പത്തനംതിട്ട ജില്ലയിലെ കോട്ടാങ്ങലിൽ പ്രവർത്തിക്കുന്ന പ്രമുഖ ഭക്ഷ്യ ഉൽപ്പാദന സ്ഥാപനമായ ഫാബീസ് ഫുഡ്സിൽ നടന്ന പരിപാടിക്ക് ആതിഥേയത്വം വഹിച്ചത് സ്ഥാപനത്തിന്റെ മാനേജിങ് ഡയറക്ടറും എം.ഇ.എസ് കോളേജ് എരുമേലിയുടെ പൂർവ്വ വിദ്യാർത്ഥിയുമായ ശ്രീ. ഫൈസൽ ടി. എച്ച്. ആയിരുന്നു. സ്ഥാപനത്തിന്റെ വളർച്ചാ യാത്ര, സംരംഭക ജീവിതത്തിലെ വെല്ലുവിളികൾ, വിജയത്തിന്റെ അനുഭവങ്ങൾ എന്നിവ അദ്ദേഹം വിദ്യാർത്ഥികളുമായി പങ്കുവെച്ചു.
ഈ അധ്യയന വർഷത്തിൽ പ്രവേശനം നേടിയ നവാഗതർക്കായി സംഘടിപ്പിച്ച സംവാദത്തിൽ, പഠനത്തോടൊപ്പം തന്നെ സംരംഭകത്വത്തിലേക്ക് കടന്നുവരാൻ ആവശ്യമായ മാർഗനിർദേശങ്ങളും പ്രായോഗിക പിന്തുണയും പൂർവ്വ വിദ്യാർത്ഥികൾ ഉറപ്പുനൽകി. ഭാവിയിൽ വിദ്യാർത്ഥികൾ തൊഴിൽ അന്വേഷിക്കുന്നവരല്ല, തൊഴിൽ സൃഷ്ടിക്കുന്നവരായി വളരണമെന്ന ലക്ഷ്യത്തോടെ പുതിയ സംരംഭക വികസന പദ്ധതിക്കും രൂപം നൽകി.
മൂന്ന് പതിറ്റാണ്ട് പൂർത്തിയാക്കുന്ന ബിസിനസ് അഡ്മിനിസ്ട്രേഷൻ വിഭാഗത്തിൽ നിന്ന് പഠിച്ചിറങ്ങിയ നൂറുകണക്കിന് പൂർവ്വ വിദ്യാർത്ഥികൾ ഇന്ന് ഇന്ത്യയിലും വിദേശത്തുമായി ചെറുതും വലുതുമായ നിരവധി വ്യവസായ-വാണിജ്യ സംരംഭങ്ങൾ വിജയകരമായി നയിക്കുന്നതിൽ അഭിമാനമുണ്ട്. ഈ പൂർവ്വ വിദ്യാർത്ഥി ശൃംഖലയെ ഉപയോഗപ്പെടുത്തി നിലവിലെ വിദ്യാർത്ഥികൾക്ക് സൗജന്യ ഇന്റേൺഷിപ്പ്, മെന്ററിംഗ്, വ്യവസായ പരിശീലനം, സംരംഭം ആരംഭിക്കുന്നതിനുള്ള മാർഗനിർദേശം, നെറ്റ്‌വർക്കിംഗ് അവസരങ്ങൾ എന്നിവ തുടർച്ചയായി ലഭ്യമാക്കുന്നതിനുള്ള പദ്ധതികൾക്കും രൂപം നൽകി.
വിദ്യാർത്ഥികൾക്ക് ആത്മവിശ്വാസം പകരുകയും തൊഴിൽ സാധ്യതകൾ വിപുലീകരിക്കുകയും സംരംഭക സംസ്കാരം വളർത്തുകയും ചെയ്യുന്ന ഈ മാതൃകാപരമായ സംരംഭം കോളേജിന്റെ അക്കാദമിക-വ്യവസായ സഹകരണ പ്രവർത്തനങ്ങൾക്ക് പുതിയ ദിശാബോധം നൽകുന്നതായി അധ്യാപകരും പൂർവ്വ വിദ്യാർത്ഥികളും അഭിപ്രായപ്പെട്ടു. നവാഗതരെ തൊഴിൽദാതാക്കളാക്കി മാറ്റുക എന്ന ലക്ഷ്യത്തോടെ ആരംഭിച്ച ഈ സംരംഭം വിദ്യാർത്ഥികൾക്കിടയിൽ വലിയ ആവേശവും പ്രതീക്ഷയും സൃഷ്ടിച്ചു.
