Shivaji University Kolhapur

08/09/2026

विद्यार्थ्यांच्या स्वप्नांना सत्यात उतरण्यासाठी शिक्षकांचे मार्गदर्शन महत्वाचे :
माजी प्र-कुलगुरू प्रा.डॉ.पी.एस.पाटील
कोल्हापूर : शैक्षणिक जीवनात विद्यार्थ्यांच्या स्वप्नांना सत्यात उतरण्यासाठी शिक्षकांचे मार्गदर्शन महत्वाचे असल्याचे प्रतिपादन शिवाजी विद्यापीठाचे माजी प्र-कुलगुरू तथा डी.वाय.पाटील एज्युकेशन सोसायटीच्या आंतरविद्याशाखीय संशोधन केंद्राचे संशोधन संचालक प्रा.डॉ.पी.एस.पाटील यांनी केले.
शिवाजी विद्यापीठाच्या दूरशिक्षण व ऑनलाईन शिक्षण केंद्राच्या सर्व समन्वयक, सहा.प्राध्यापक व विद्यार्थी यांच्यासाठी माजी राष्ट्रपती डॉ.सर्वपल्ली राधाकृष्णन यांच्या जयंती निमित्ताने शिक्षक दिनाचे आयोजन करण्यात आले होते. या प्रसंगी शिवाजी विद्यापीठाचे माजी प्र-कुलगुरू तथा डी.वाय.पाटील एज्युकेशन सोसायटीच्या आंतरविद्याशाखीय संशोधन केंद्राचे संशोधन संचालक प्रा.डॉ.पी.एस.पाटील यांचे शिक्षक : विद्यार्थ्याच्या स्वप्नांना पंख देणारा मार्गदर्शक’ या विषयावर विशेष ऑनलाईन व्याख्यान आयोजित करण्यात आले होते.अध्यक्षस्थानी संचालक प्रा.डॉ.प्रतिभा पाटणकर होत्या.यावेळी कुलसचिव डॉ.विलास शिंदे, प्रा.डॉ.ए.एम.गुरव, डॉ.शशिकांत पंचगल्ले, डॉ.प्रल्हाद माने,ऍड.अनिल घाटगे विविध अभ्यासकेंद्राचे शिक्षक, सहा.प्राध्यापक, समन्वयक,विद्यार्थी ऑनलाईन उपस्थित होते.
प्रा.डॉ.पाटील म्हणाले की,प्रत्येक विद्यार्थ्याला स्वतःची ओळख होणे महत्वाचे आहे.आपली आवड कशात आहे हे ओळखता येणे महत्वाचे आहे. आपण आई – वडील,मित्र – मैत्रिणीशी बोलतो परंतु स्वताशी बोलत नाही.विद्यार्थ्यांनी स्वतःशी बोलले पाहिजे.आपला आतला आवाज ओळखता आला पाहिजे. माजी राष्ट्रपती डॉ.सर्वपल्ली राधाकृष्णन व ए.पी.जे अब्दुल कलाम यांचे विचार विद्यार्थी आणि शिक्षकांनी आत्मसात केले पाहिजेत.
विद्यार्थी आणि शिक्षक यांच्या नात्यातून व्यक्तिमत्वाची जडणघडण होत असते. शिक्षकांनी विद्यार्थ्यांना देनायासाठी ज्ञान आणि कौशल्य आत्मसात केले पाहिजे.सक्षम विद्यार्थी घडविण्यासाठी शिक्षकांनी सक्षम असले पाहिजे. समाज आणि देशाच्या विकासासाठी योगदान देण्यासाठी शिक्षकांनी विद्यार्थ्यांना सकारात्मक विचार दिला पाहिजे.असे प्रा.डॉ.पाटील म्हणाले.
यावेळी स्वागत व प्रास्ताविक समन्वयक डॉ.कृष्णा पाटील यांनी केले.पाहुण्यांचा परिचय ऑनलाईन एम.बी.ए कोर्स को-ऑर्डीनेटर डॉ.नगीना माळी यांनी करून दिला.सूत्रसंचालन सहा.प्राध्यापक डॉ.सचिन पाटील यांनी केले.आभार समन्वयक डॉ.सुर्यकांत गायकवाड यांनी मानले.

31/08/2026

डिजिटल पत्रकारांनी कायद्यांची जाण ठेवावी : डॉ. शिवाजी जाधव
सांगलीत राज्यस्तरीय कार्यशाळा; डॉ. ग. गो. जाधव पत्रकारिता अध्यासनाचा उपक्रम

कोल्हापूर : डिजिटल माध्यमांचा वाढता प्रभाव लक्षात घेता पत्रकारांनी बातमी देण्याच्या वेगासोबतच कायदेशीर बाबींचे भान ठेवणे आवश्यक आहे. डिजिटल प्लॅटफॉर्मवर प्रसिद्ध होणाऱ्या प्रत्येक मजकुराची कायदेशीर जबाबदारी समजून घेऊन पत्रकारांनी काम करावे, असे आवाहन शिवाजी विद्यापीठाच्या पद्मश्री डॉ. ग. गो. जाधव पत्रकारिता अध्यासनाचे समन्वयक डॉ. शिवाजी जाधव यांनी केले.
शिवाजी विद्यापीठाचे पद्मश्री डॉ. ग. गो. जाधव पत्रकारिता अध्यासन आणि अखिल भारतीय मराठी पत्रकार परिषद यांच्या संयुक्त विद्यमाने सांगली येथे पत्रकारांसाठी एकदिवसीय राज्यस्तरीय कार्यशाळेचे आयोजन करण्यात आले. विश्रामबाग येथील पोलीस मुख्यालयाच्या सभागृहात झालेल्या या कार्यशाळेस राज्यभरातून ३०० हून अधिक पत्रकारांनी सहभाग घेतला.
कार्यशाळेतील पहिल्या सत्रात डॉ. शिवाजी जाधव यांनी ‘डिजिटल माध्यमांसाठी कायदेशीर तरतुदी’ या विषयावर मार्गदर्शन केले. डिजिटल माध्यमांवर बातमी, छायाचित्र, व्हिडिओ किंवा अन्य माहिती प्रसिद्ध करताना पत्रकारांनी कोणत्या कायदेशीर बाबींची काळजी घ्यावी, सोशल मीडिया आणि डिजिटल प्लॅटफॉर्मच्या वापरामुळे निर्माण होणाऱ्या जबाबदाऱ्या कोणत्या आहेत, तसेच पत्रकारितेतील निष्काळजीपणामुळे कायदेशीर अडचणी कशा निर्माण होऊ शकतात, याचे त्यांनी विविध उदाहरणांच्या माध्यमातून विवेचन केले.
‘बातमी सर्वप्रथम देण्याच्या स्पर्धेपेक्षा बातमी अचूक आणि कायदेशीरदृष्ट्या सुरक्षित असणे अधिक महत्त्वाचे आहे,’ असे सांगत त्यांनी डिजिटल पत्रकारांनी माहितीची पडताळणी करूनच ती प्रसिद्ध करण्याचे आवाहन केले. सोशल मीडियावर एखादी माहिती मोठ्या प्रमाणात प्रसारित होत आहे म्हणून ती खरी असेलच असे नाही. त्यामुळे स्रोताची विश्वासार्हता तपासणे आणि आवश्यक त्या कायदेशीर बाबींचा विचार करणे ही पत्रकारांची जबाबदारी असल्याचे त्यांनी स्पष्ट केले.
कार्यशाळेच्या दुसऱ्या सत्रात ज्येष्ठ पत्रकार विवेक वाघमोडे यांनी ‘फेक न्यूज कशी ओळखावी?’ या विषयावर मार्गदर्शन केले. सोशल मीडिया आणि डिजिटल माध्यमांमुळे चुकीची अथवा दिशाभूल करणारी माहिती वेगाने प्रसारित होत असून त्याचा परिणाम समाजाच्या विचारप्रक्रियेवर होऊ शकतो. त्यामुळे पत्रकारांनी व्हायरल संदेश, छायाचित्रे, व्हिडिओ आणि दावे यांची तथ्य पडताळणी करूनच त्यांचा बातमीसाठी वापर करावा, असे त्यांनी सांगितले.
फेक न्यूज ओळखण्यासाठी माहितीचा मूळ स्रोत शोधणे, उपलब्ध संदर्भ तपासणे, छायाचित्र किंवा व्हिडिओची सत्यता पडताळणे आणि संबंधित व्यक्ती अथवा संस्थेकडून माहितीची पुष्टी करणे आवश्यक असल्याचे वाघमोडे यांनी स्पष्ट केले.
या कार्यशाळेस मराठी पत्रकार परिषदेचे मार्गदर्शक आणि ज्येष्ठ पत्रकार एस. एम. देशमुख, अखिल भारतीय मराठी पत्रकार परिषदेचे राष्ट्रीय अध्यक्ष शिवराज काटकर, डॉ. सुमेधा साळुंखे, जयप्रकाश पाटील यांच्यासह राज्यातील विविध भागांतून आलेले ३०० हुन अधिक पत्रकार उपस्थित होते.

फोटो ओळी
पत्रकारांच्या राज्यस्तरीय कार्यशाळेत बोलताना डॉ. शिवाजी जाधव

31/08/2026

शिवाजी विद्यापीठात २ सप्टेंबरला
खांडेकर सुवर्ण स्मृतिवर्ष सांगता समारंभ
कोल्हापूर, दि. २९ ऑगस्ट: शिवाजी विद्यापीठाचा मराठी अधिविभाग आणि आंतरभारती शिक्षण मंडळ, कोल्हापूर यांच्या संयुक्त विद्यमाने ‘वि. स. खांडेकर सुवर्ण स्मृतिवर्ष सांगता समारंभ स्मृती व्याख्यान’ कार्यक्रमाचे आयोजन बुधवार, दि. २ सप्टेंबर २०२६ रोजी सकाळी १०.३० वा. शिवाजी विद्यापीठाच्या राजर्षी शाहू सभागृहात आयोजित केले आहे.
समारंभाच्या उद्घाटन सत्रामध्ये ‘वि. स.खांडेकर: सुवर्ण स्मरण’ या विषयावर ज्‍येष्‍ठ विचारवंत आणि मुंबई विद्यापीठाचे माजी कुलगुरू डॉ. भालचंद्र मुणगेकर मांडणी करणार आहेत. या समारंभासाठी आंतरभारती शिक्षण संस्थेच्या कार्याध्यक्ष पल्लवी कोरगावकर, प्रा. सुनीलकुमार लवटे, डॉ. अतुल कापडी यांची प्रमुख उपस्थिती असेल. सत्राच्या अध्यक्षस्थानी विद्यापीठाच्या प्र-कुलगुरू डॉ. ज्योती जाधव असतील.
दुसऱ्या सत्रामध्ये ‘वि. स. खांडेकरांच्या ग्रंथांवर चर्चा आणि ग्रंथ प्रकाशन’ होणार आहे. या सत्राचे अध्यक्ष विद्यापीठाचे कुलसचिव डॉ. विलास शिंदे असतील, तर प्रमुख पाहुणे म्हणून प्रा. मिलिंद जोशी (पुणे) उपस्थित असणार आहेत. या सत्रामध्ये प्रा. सुनिलकुमार लवटे यांनी संपादित केलेल्‍या ग्रंथांचे तसेच राम देशपांडे व नीलम माणगावे यांच्‍या ग्रंथांचे प्रकाशन होणार आहे.
कार्यक्रमाच्या तिसऱ्या सत्रात वि. स. खांडेकर सुवर्ण स्मृतीवर्ष विशेषांकाचे प्रकाशन करण्यात येईल. यामध्ये साधना साप्ताहिक (पुणे), दक्षिण महाराष्ट्र साहित्य पत्रिका (कोल्हापूर), जडणघडण (पुणे), मेहता ग्रंथ जगत या अंकांचे प्रकाशन होणार आहे. यामध्‍ये विनोद शिरसाठ, प्रा. चंद्रकांत पोतदार, सागर देशपांडे, अखिल मेहता, भाग्‍यश्री पाटील, अमेय मेहता सहभागी होत आहेत. या सत्राचे अध्यक्ष ज्येष्ठ पत्रकार व संपादक डॉ. विजय चोरमारे असतील. तरी कार्यक्रमाचा लाभ रसिकांनी घ्‍यावा, असे आवाहन मराठी अधिविभागाचे प्रमुख डॉ. रणधीर शिंदे यांनी केले आहे.

31/08/2026

आदिवासींनी केलेल्या बांबूच्या राख्यांना
शिवाजी विद्यापीठात प्रतिसाद
कोल्हापूर, दि. २९ ऑगस्ट: पालघर जिल्ह्यातील आदिवासी महिलांनी बांबूपासून तयार केलेल्या पर्यावरणपूरक राख्यांचा प्रसार, प्रसिद्धी आणि विक्रीच्या कामी शिवाजी विद्यापीठाच्या स्वयंसिद्धाच्या माध्यमातून आणि यु. जी. सी. स्कीम फॉर पर्सन्स विथ डिसेबिलिटी केंद्राकडून मोठा हातभार लाभला. राबविलेल्या या उपक्रमांतर्गत सुमारे ४५०० रुपयांच्या राख्यांची विक्रीही करण्यात केंद्राला यश आले. तसेच दिव्यांग विद्यार्थ्यांसाठी रक्षाबंधन उपक्रमही घेण्यात आला.
पालघर जिल्ह्यातील आदिवासी महिलांना आर्थिकदृष्ट्या सक्षम करण्यासाठी 'सेवा विवेक' ही संस्था अग्रेसर आहे. तेथील आदिवासी महिलांनी बांबूपासून वेगवेगळ्या वस्तू तयार केलेल्या आहेत. बांबूपासून तयार केलेल्या राख्या खूप सुंदर व सुबक आहेत. पारंपारिक राखीला पर्यावरणपूरक आणि आकर्षक पर्याय म्हणून बांबूच्या राख्यांकडे पाहिले जाते. महिलांना स्वयंरोजगारातून सक्षमीकरण करण्यासाठी, त्या महिलांनी तयार केलेल्या राखी विकत घेऊन त्यांच्या या कार्याला हातभार विद्यापीठामध्ये 'स्वयंसिद्धा' केंद्राच्या सहकार्यातून लावण्यात आला आहे. या राख्या विद्यापीठातील अधिविभाग व महाविद्यालयांतील विद्यार्थिनी, शिक्षक व शिक्षकेतर कर्मचाऱ्यांनी विकत घेतल्या. समाजशास्त्र अधिविभाग, शिक्षणशास्त्र अधिविभाग आणि विद्यार्थिनी वसतिगृहातील विद्यार्थिनींनी या राख्या मोठ्या प्रमाणात खरेदी केल्या. जयवंत महाविद्यालय इचलकरंजी यांनीदेखील मोठ्या संख्येने राख्या खरेदी केल्या.
स्वयंसिद्धा केंद्राच्या आणि यु. जी. सी. स्कीम फॉर पर्सन्स विथ डिसेबिलिटीच्या माध्यमातून दिव्यांग विद्यार्थ्यांसाठी रक्षाबंधनाचा कार्यक्रमही घेण्यात आला. विद्यापीठातील स्वयंसिद्धाच्या समन्वयक डॉ. प्रतिभा बा. देसाई, दीप्ती कांबळे यांनी या उपक्रमास विशेष योगदान दिले.

31/08/2026

*चंद्रपूरच्या जंगलात' अभिवाचनाला शिवाजी विद्यापीठात मोठा प्रतिसाद*
कोल्हापूर: प्रतिनिधी
शिवाजी विद्यापीठाचा बी. ए. फिल्म मेकिंग विभाग आणि 'एन अनुप जत्राटकर मल्टीमीडिया प्रॉडक्शन्स' यांच्या संयुक्त विद्यमाने आयोजित 'चंद्रपूरच्या जंगलात...' या नाटकाच्या अभिवाचनाला शिवाजी विद्यापीठात मोठा प्रतिसाद मिळाला.
नाट्य क्षेत्रात वेगळी ओळख निर्माण केलेल्या 'अवकाश' चे हे सादरीकरण उपस्थितांची वाहवा मिळवून गेले. ज्येष्ठ लेखक विक्रम वाटवे यांची कलाकृती रंगमंचावर जिवंत करण्याचे काम सुप्रसिद्ध अभिवाचक समीर दळवी आणि दिग्दर्शक हृदयनाथ जाधव यांनी केले. तासभर सुरू असलेल्या या प्रयोगाने सर्वांना खिळवून ठेवले होते. कार्यक्रमानंतर दिग्दर्शक हृदयनाथ जाधव आणि समीर दळवी यांच्याशी शिक्षक आणि विद्यार्थ्यांनी संवाद साधला.
स्वागत अनुप जत्राटकर यांनी केले. प्रास्ताविक फिल्म मेकिंगचे समन्वयक डॉ. शिवाजी जाधव यांनी केले. सूत्रसंचालन साक्षी वाघमोडे हिने केले. आभार प्रवीण पांढरे यांनी मानले. यावेळी इंग्रजी विभागाच्या डॉ. तृप्ती करेकट्टी, सामाजिक वंचितता विभागाचे अविनाश भाले, शरद आजगेकर, डॉ. प्रमोद कसबे, विकास कांबळे, डॉ. सुमेधा साळुंखे, जयप्रकाश पाटील यांच्यासह नाट्यशास्त्र विभागाचे विद्यार्थी उपस्थित होते.

फोटो: 'चंद्रपूरच्या जंगलात'चे अभिवाचन करताना दिग्दर्शक हृदयनाथ जाधव आणि समीर दळवी.

31/08/2026

https://unishivsandesh.blogspot.com/2026/08/blog-post_31.html

शिवाजी विद्यापीठात ‘ एनईपी - २०२० ’ विषयक कार्यशाळेला मोठा प्रतिसाद शिवाजी विद्यापीठात राष्ट्रीय शैक्षणिक धोरण.....

31/08/2026

*बी.एस्सी. जीवरसायनशास्त्र प्रवेशासाठी १५ सप्टेंबरपर्यंत संधी*
कोल्हापूर, दि. ३१ ऑगस्ट: शिवाजी विद्यापीठाच्या जीवरसायनशास्त्र अधिविभागात सन २०२६-२७ पासून बारावीनंतर बी.एस्सी. (जीवरसायनशास्त्र) या विषयात पदवी अभ्यासक्रम सुरू करण्यात आला आहे. करिअरच्या आणि संशोधनाच्या अभिनव संधी असणाऱ्या या अभ्यासक्रमाला प्रवेश घेण्यासाठी येत्या १५ सप्टेंबरपर्यंत मुदतवाढ देण्यात आली आहे. ही माहिती अधिविभागाचे प्रमुख डॉ. कैलास सोनवणे यांनी दिली आहे.
डॉ. सोनवणे यांनी दिलेल्या माहितीनुसार, शिवाजी विद्यापीठाच्या जीवरसायनशास्त्र अधिविभागात एम.एस्सी. (जीवरसायनशास्त्र) आणि पीएच्.डी. (जीवरसायनशास्त्र) हे अभ्यासक्रम गेल्या ४० वर्षांपासून प्रभावीपणे सुरु आहेत. सन २०२६-२७ या शैक्षणिक वर्षापासून बी.एस्सी. (जीवरसायनशास्त्र) (एईडीपी) हा अभ्यासक्रम नव्याने सुरू करण्यात आला आहे. या अभ्यासक्रमाच्या पूर्ततेनंतर विद्यार्थ्यांना औषध निर्माण कंपन्या, शासनाच्या प्रयोगशाळांत ड्रग टेस्टिंग, फूड टेस्टिंग, शासकीय न्यायवैद्यक तसेच नमुना परीक्षण प्रयोगशाळा, माहिती तंत्रज्ञान कंपन्यामध्ये विविध आजारांवरील असणाऱ्या माहितीचे डेटा मायनिंग, डेटा विश्लेषण, पॅटर्न रिकग्निशन इत्यादी कामे, विविध दवाखान्यांत क्लिनिकल डेटा रिसर्च व एनालिसीस तसेच संशोधन व विकास क्षेत्रांत करिअरच्या मोठ्या संधी उपलब्ध आहेत.
या अभ्यासक्रमांतर्गत सहाव्या सेमिस्टरमध्ये घेण्यात येणाऱ्या औद्योगिक प्रशिक्षणांतर्गत रु. १२,५००/- इतका मासिक भत्ता देण्याचीही व्यवस्था आहे. तरी, इच्छुक विद्यार्थ्यांनी या संधीचा लाभ घ्यावा. तसेच, अधिक माहितीसाठी अधिविभागास भेट द्यावी अथवा दूरध्वनी क्र. ०२३१-२६०९१५३/ ८९८३३८१३२९ ईमेल पत्ता [email protected] येथे संपर्क साधावा, असे आवाहन करण्यात आले आहे.

31/08/2026

*दूरशिक्षण व ऑनलाईन शिक्षण केंद्राच्या वतीने सेट परीक्षा मार्गदर्शन कार्यशाळेचे आयोजन*
कोल्हापूर दि.३१ ऑगस्ट : महाराष्ट्र व गोवा राज्यातील सहायक प्राध्यापक पदासाठी घेण्यात येणाऱ्या महाराष्ट्र राज्य पात्रता परीक्षा सेट (SET) परीक्षेची प्रभावी तयारी करण्यासाठी शिवाजी विद्यापीठाच्या दूरशिक्षण व ऑनलाईन शिक्षण केंद्राच्या वतीने दि. १ सप्टेंबर ते ५ सप्टेंबर २०२६ दरम्यान सकाळी ११ ते सायं.६ या वेळेत सेट परीक्षा मार्गदर्शन कार्यशाळेचे आयोजन करण्यात आल्याची माहिती संचालक प्रा.डॉ.प्रतिभा पाटणकर यांनी दिली.
या कार्यशाळेचे उदघाटन प्र - कुलगुरू प्रा.डॉ.ज्योती जाधव करणार असून प्रमुख उपस्थितीत कुलसचिव डॉ. विलास शिंदे असणार असून अध्यक्ष स्थानी संचालक प्रा.डॉ. प्रतिभा पाटणकर उपस्थित असणार आहेत.
या कार्यशाळेत सेट (SET) परीक्षेचे स्वरूप, अभ्यासक्रम, प्रश्नपत्रिकेचे स्वरूप, प्रश्न सोडविण्याच्या पद्धती, वेळेचे नियोजन, संदर्भ साहित्याची निवड तसेच परीक्षेच्या दृष्टीने महत्त्वाच्या घटकांवर तज्ज्ञ मार्गदर्शकांकडून मार्गदर्शन करण्यात येणार आहे. पेपर-१ मधील अध्यापन व संशोधन अभिवृत्ती, तर्कशक्ती, संवाद कौशल्य, माहिती व संप्रेषण तंत्रज्ञान यांसह विविध घटकांवर डॉ.कृष्णा पाटील,डॉ.शशिकांत अन्नदाते.डॉ.मारुती लोंढे व डॉ.शशिकांत शिंदे यांचे विशेष मार्गदर्शन मिळणार आहे.
त्याचबरोबर दुसऱ्या पेपरसाठी विषयनिहाय प्रा.डॉ.भारती पाटील व डॉ.सुचिता सुरगीहळी (राज्यशास्त्र), डॉ.दिग्विजय पाटील व डॉ.मोहन सोरटे (अर्थशास्त्र),प्रा.डॉ.संजय कोळेकर व डॉ.प्रल्हाद माने (समाजशास्त्र), प्रा.डॉ.सुरेश शिखरे व डॉ.हृषिकेश दळवी (इतिहास), डॉ.सुधीर लेंडवे व श्री.दीपक भादले (इंग्रजी), प्रा.डॉ.अनिल गवळी व डॉ.गजानन अपिने (मराठी), प्रा.डॉ.संदीप कदम व प्रा.डॉ.नरसिंह कदम (हिंदी),डॉ.कुलवीर कांबळे व डॉ.प्रवीण जाधव (एम.बी.ए,) डॉ.सागर वाळवेकर व डॉ.रोहित बसनाईक (वाणिज्य) श्री.बालाजी मोहिते व श्री.सौरभ स्वामी (गणित) आदी तज्ज्ञ मार्गदर्शक मार्गदर्शन करणार आहेत.
सेट(SET) परीक्षेत यश मिळविण्यासाठी नियोजनबद्ध अभ्यास, योग्य संदर्भ साहित्य आणि प्रश्नपत्रिका सोडविण्याचा सराव महत्त्वाचा असतो. या उद्देशाने विद्यार्थ्यांना परीक्षेची शास्त्रीय तयारी करण्यासाठी कार्यशाळेचा निश्चितच लाभ होणार आहे. पदव्युत्तर शिक्षण घेत असलेल्या तसेच सेट/नेट (SET/NET) परीक्षेची तयारी करणाऱ्या विद्यार्थ्यांनी https://meet.google.com/hso-hmkt-oii या गुगल मीट लिंकला जावून सहभागी होवून या मार्गदर्शन कार्यशाळेचा लाभ घ्यावा, असे आवाहन शिवाजी विद्यापीठाच्या दूरशिक्षण व ऑनलाईन शिक्षण केंद्राच्या वतीने संचालक डॉ.प्रतिभा पाटणकर यांनी केले आहे.

27/08/2026

https://unishivsandesh.blogspot.com/2026/08/blog-post_27.html

शिवाजी विद्यापीठात तृतीयपंथी कायद्याविषयक कार्यशाळेच्या उद्घाटन समारंभात बोलताना कुलगुरू डॉ. राजनीश कामत. शिव....

27/08/2026

https://unishivsandesh.blogspot.com/2026/08/blog-post_173.html

शिवाजी विद्यापीठाच्या विद्यार्थिनी वसतिगृहात आयोजित कायदेविषयक कार्यक्रमात बोलताना प्र-कुलगुरू डॉ. ज्योती जा.....