19/09/2026
ရန်ကုန်မြို့လယ်တွင် ကားတစ်စီးက အခြားယာဉ်များကို ဆက်တိုက်တိုက်မှုဖြစ်ပွား
စက်တင်ဘာ ၁၉၊ ၂၀၂၆ — ZT MEDIA
ရန်ကုန်မြို့၊ ကျောက်တံတားမြို့နယ် ပန်းဆိုးတန်းလမ်းနှင့် မဟာဗန္ဓုလလမ်းထောင့်တွင် စက်တင်ဘာ ၁၉ ရက် ညပိုင်းက ကားတစ်စီးသည် လမ်းပေါ်ရှိ အခြားယာဉ်များကို ဆက်တိုက်ဝင်တိုက်ခဲ့သည့် ဖြစ်စဉ်တစ်ခု ဖြစ်ပွားခဲ့ကြောင်း ဒေသခံများထံမှ သိရသည်။
မျက်မြင်တွေ့ရှိသူများ၏ ပြောဆိုချက်အရ အဆိုပါကားသည် ပန်းဆိုးတန်းလမ်းထောင့်ရှိ ဟိန္ဒူဘုရားရှိခိုးကျောင်း၏ အုတ်နံရံကို ဝင်တိုက်ပြီးနောက် ကားကို နောက်ပြန်မောင်းနှင်ကာ လမ်းပေါ်ရှိ ယာဉ်အချို့ကို ဆက်လက်တိုက်ခဲ့ခြင်းဖြစ်သည်။
ဖြစ်စဉ်အတွင်း ကားအချို့နှင့် ဘုရားရှိခိုးကျောင်း၏ အုတ်နံရံ ထိခိုက်ပျက်စီးခဲ့သော်လည်း လူထိခိုက်ဒဏ်ရာရရှိမှု မရှိခဲ့ကြောင်း ဒေသခံများက ပြောသည်။
ယာဉ်မောင်းသူ၏ အခြေအနေမှာ မူးယစ်ဆေးဝါးသုံးစွဲထားသူကဲ့သို့ ဖြစ်နေသည်ဟု မျက်မြင်တွေ့ရှိသူအချို့က ပြောဆိုထားသော်လည်း ၎င်းမှာ မည်သည့်အရာသုံးစွဲထားသည်ကို သီးခြားအတည်ပြုနိုင်ခြင်း မရှိသေးပေ။
ကားကို ဆက်လက်မောင်းနှင်နေမှုအား အနီးဝန်းကျင်ရှိ ပြည်သူများက ဝိုင်းဝန်းတားဆီးဖမ်းဆီးပြီးနောက် ဖြစ်စဉ် ရပ်တန့်သွားခဲ့ကြောင်း သိရသည်။
လက်ရှိတွင် အဆိုပါယာဉ်မောင်းသူကို ရပ်ကွက်တာဝန်ရှိသူများနှင့် ရဲတပ်ဖွဲ့ဝင်များက ကျောက်တံတားမြို့နယ်ရဲစခန်းသို့ ခေါ်ဆောင်သွားကြောင်း ဒေသခံများက ပြောသည်။
ရုပ်သံ — CJ
#ရန်ကုန် #ကျောက်တံတား #ယာဉ်တိုက်မှု
