15/06/2021
https://www.facebook.com/109681104110294/posts/326676859077383/
#വെസ്റ്റ്ഹിൽഅത്താണിക്കൽശ്രീനാരായണഗുരുവരാശ്രമം_ശതാബ്ദിയുടെ_നിറവിൽ
കോഴിക്കോട് :
ശ്രീനാരായണഗുരുദേവ തൃപ്പാദങ്ങളുടെ വത്സല ശിഷ്യനായ ദിവ്യശ്രീ ചൈതന്യ സ്വാമികൾ 1920ൽ അത്താണിക്കൽ പ്രദേശത്ത് സ്ഥാപിച്ച പുണ്യ കേന്ദ്രമാണ് ശ്രീനാരായണഗുരു വരാശ്രമം. മലബാറിലെ ശ്രീനാരായണ പ്രസ്ഥാനങ്ങളുടെ ചരിത്രത്തിൽ അദ്വിതീയ സ്ഥാനമാണ് ഈ ആശ്രമത്തിന് ഉള്ളത്. ശതാബ്ദി ആഘോഷങ്ങൾ വെറും ഉപരിപ്ലവമായ ആഘോഷങ്ങളേക്കാളുപരിയായി ക്രിയാത്മകമായ പരിപാടികളോടെ കൊണ്ടാടുവാൻ ആണ് എസ്എൻഡിപി യോഗം കോഴിക്കോട് യൂണിയൻ തീരുമാനിച്ചിരിക്കുന്നത് .
മലബാറിലെ ശ്രീനാരായണ പ്രസ്ഥാനങ്ങളുടെ പഴയകാല ചരിത്ര രേഖകൾ പരിശോധിച്ചാൽ ശ്രീനാരായണഗുരുവ രാശ്രമം കേന്ദ്രീകരിച്ച് ചൈതന്യ സ്വാമികൾ സ്ഥാപിച്ച ഹിന്ദുദേശ സഭയുടെ പ്രവർത്തനങ്ങളെ സംബന്ധിച്ച വിശദമായ പരാമർശങ്ങൾ ആണ് നമുക്ക് കാണാൻ സാധിക്കുക.ദിവ്യശ്രീ സത്യവ്രത സ്വാമികൾ ശ്രീനാരായണഗുരു വരാശ്രമത്തെ കുറിച്ച് പ്രസ്താവിച്ചിരിക്കുന്നത് ഇപ്രകാരമാണ് .
"ഇത് ഭഗവാൻ ശ്രീ നാരായണ പരമ ഹംസ ദേവൻ്റെ നാമധേയ സ്മാരകമായി ലോ കോപകരാർത്ഥം അദ്ദേഹം അരുളി ചെയ്തിട്ടുള്ള ഉപദേശങ്ങളെയും സനാതനധർമ്മ തത്വങ്ങളെയും ജനമദ്ധ്യത്തിൽ പ്രചരിപ്പിക്കണം എന്നുള്ള മഹത്തായ ഉദ്ദേശത്തോടെ അദ്ദേഹത്തിൻ്റെ പ്രധാന ശിഷ്യനായ ശ്രീനാരായണ ചൈതന്യ സ്വാമികൾ സ്ഥാപിച്ച് ഭംഗിയായി നടത്തി വരുന്ന ഒരു ഹിന്ദു ധർമ്മസ്ഥാപനം ആകുന്നു. കോഴിക്കോട് നഗരത്തിന് തൊട്ടു വടക്കുവശം ഉള്ള വരക്കൽ എന്ന സ്ഥലത്താണ് ഗുരു വരാശ്രമം സ്ഥാപിച്ചിരിക്കുന്നത്. അവിടെ പ്രധാനമായി ഒരു ആരാധനാ മന്ദിരം ഉണ്ട് .നിത്യാരാധനക്ക് പുറമേ ആഴ്ചയിലൊരു ദിവസം ഹിന്ദു മതത്തിൽ പെട്ട നായർ ,തിയ്യർ, ബ്രാഹ്മണർ ,പഞ്ചമർ മുതലായ എല്ലാ ജാതി വിഭാഗങ്ങളും ചേർന്ന് പ്രത്യേക ആരാധനയും ഭജനയും നടത്തിവരുന്നു. ഇതിനു പുറമേ സനാതനധർമ്മ സിദ്ധാന്തങ്ങളെ പറ്റി ആ വിഷയത്തിൽ അഗാദ ജ്ഞാനം ഉള്ള മഹാന്മാരുടെ പ്രസംഗങ്ങളും നടത്തിവരുന്നുണ്ട്. ഇതുകൂടാതെ സ്വാമി സന്ദേശങ്ങൾ മതതത്വങ്ങൾ മുതലായവയെപ്പറ്റി പ്രതിപാദിക്കുന്ന ലഘു ലേഖനങ്ങളും മാസത്തിൽ ഒന്നിൽ കുറയാതെ പ്രചരിപ്പിച്ചു വരുന്നു. ശ്രീനാരായണഗുരു അഷ്ടോത്തരശതനാമാവലി എന്നൊരു ചെറിയ ഗ്രന്ഥവും ഇതിൻപ്രകാരം ഗുരുപൂജ ചെയ്യുന്നതിന് ഏറ്റവും തന്മയത്വം ഉള്ള ഗുരുദേവൻ്റെ ഒരു ഫോട്ടോയും അവിടെ ഗുരു പ്രത്യക്ഷ ദൈവതം എന്ന തത്വത്തെ ആദർശമായി സ്വീകരിച്ചിട്ടുള്ള ചൈതന്യ സ്വാമികൾ വിതരണം ചെയ്തിരിക്കുന്നു. കോഴിക്കോടുള്ള മിക്കവാറും ഭവനങ്ങളിൽ സന്ധ്യാസമയത്ത് ദേഹശുദ്ധി ചെയ്ത ശുക്ലാംഭര ഭസ്മധാരികളായി ആബാലവൃദ്ധം ജനങ്ങൾ പ്രകാശമാനമായി കത്തിച്ചു വച്ചിരിക്കുന്ന നിലവിളക്കിന് അടുത്തുള്ള ഗുരുദേവൻ്റെ ഫോട്ടോയുടെ മുന്നിലിരുന്ന് 108 നാമങ്ങളും ഭക്തിപൂർവ്വകവും കർണാനന്ദകരവുമായ വിധത്തിൽ ജപിക്കുന്ന അവസ്ഥ കാണുകയും കേൾക്കുകയും ചെയ്യുന്നത് മത അഭിമാനമുള്ള ഏതൊരു ഹിന്ദുവിൻ്റെയും രക്തം ആനന്ദം കൊണ്ട് തിളച്ചു പോകുന്നതാണ്." ഇത്തരത്തിൽ ഒരു കാലഘട്ടത്തിൽ നാടിന് അഭിമാനമായി പ്രകാശം ചൊരിയുകയും സമൂഹത്തിന് ദിശാബോധം നൽകുകയും ചെയ്തിരുന്ന മഹത്തായ സ്ഥാപനമായിരുന്നു ഗുരുവരാശ്രമം. എന്നാൽ ഗുരുവരാ ശ്രമം ഇടക്കാലത്ത് നാശോന്മുഖമായി മാറിയെങ്കിലും എസ്എൻഡിപി യോഗത്തിന് നവോന്മേഷം പകർന്ന ശ്രീ വെള്ളാപ്പള്ളി നടേശൻ അവർകൾ ജനറൽ സെക്രട്ടറിയായി അധികാരം ഏറ്റെടുത്തതിനു ശേഷം സമുദായത്തിലും സംഘടനയിലും ഉണ്ടായ മുന്നേറ്റം മലബാറിലേക്കും വ്യാപിക്കുകയുണ്ടായി .അതിൻ്റെ ഫലമായി എസ്എൻഡിപി യോഗ പ്രവർത്തനം ഇവിടെയും ഊർജ്ജസ്വലമായി. 2005 മുതൽ യോഗം ജനറൽ സെക്രട്ടറി വെള്ളാപ്പള്ളി നടേശൻ അവർകളുടെ അനുഗ്രഹാശിസ്സുകളോടെ കോഴിക്കോട് യൂണിയൻ്റെ സാരഥ്യം ഏറ്റെടുത്ത പ്രസിഡണ്ട് ഷനൂബ് താമരകുളത്തിൻ്റെ യും സെക്രട്ടറി സുധീഷ് കേശവപുരി യുടെയും നേതൃത്വത്തിൽ ഗുരു വരാശ്രമം പഴയ പ്രഭാവം വീണ്ടെടുക്കുകയുണ്ടായി. ദിവ്യശ്രീ ചൈതന്യ സ്വാമികൾ 1920-ലാണ് ആശ്രമം സ്ഥാപിച്ചത് .1924 പാറമഠത്തിൽ തറവാട്ടിൽനിന്ന് സ്വാമികൾ വാങ്ങിയതാണ് ഈ സ്ഥലം .1952ൽ ചൈതന്യ സ്വാമികളുടെ സമാധി നടന്നതിനുശേഷം 1968ലാണ് ശ്രീ നാരായണ ഗുരു വരാശ്രമ കമ്മറ്റിയും ഹിന്ദു ദേശ സഭയും ആശ്രമം കോഴിക്കോട് യൂണിയന് ദാനമായി നൽകിയിട്ടുള്ളത്. അന്നത്തെ യൂണിയൻ സെക്രട്ടറി ടിഎൻ കാമപാലൻ മാസ്റ്ററായിരുന്നു. എസ്എൻഡിപി യോഗത്തിൻ്റെ കോഴിക്കോട് ജില്ലയിലെ പ്രവർത്തനമാരംഭിച്ചത് ഗുരുവരാശ്രമം കേന്ദ്രീകരിച്ച് ആയിരുന്നു .മലബാർ എസ്എൻഡിപി യോഗം എന്ന പേരിലായിരുന്നു ആദ്യകാലത്ത് മലബാറിലെ സംഘടനാപ്രവർത്തനം പിന്നീട് എസ്എൻഡിപി യോഗത്തിന് കീഴിൽ പ്രവർത്തനങ്ങൾ മാറുകയാണുണ്ടായത് .കോഴിക്കോട് യൂണിയനിലെ നിലവിലുള്ള ഭരണ സമിതിയുടെ നേതൃത്വത്തിൽ കഴിഞ്ഞ ഒന്നര പതിറ്റാണ്ട് കാലത്തെ ത്യാഗനിർഭരമായ പ്രവർത്തനങ്ങളിലൂടെ സംഘടനാപരമായി വലിയ മുന്നേറ്റമാണ് ഉണ്ടായിട്ടുള്ളത്.
ശ്രീനാരായണ സെൻട്രൽ സ്കൂൾ സ്ഥാപിക്കാനും സ്കൂളിന് കേന്ദ്ര സർക്കാരിൻറെ എൻ ഐ ഒ എസ് അംഗീകാരം വാങ്ങുവാനും സാധിച്ചിട്ടുണ്ട്.യൂണിയന് കീഴിൽ അരുവിപ്പുറം നിധി ലിമിറ്റഡ് എന്ന പേരിൽ കേന്ദ്ര സർക്കാർ അംഗീകൃത ധനകാര്യ സ്ഥാപനം സ്ഥാപിക്കുവാനും യൂണിയന് സാധിച്ചിട്ടുണ്ട്. ശതാബ്ദിയോടനുബന്ധിച്ച് ആശ്രമം ഗുരുദേവൻ്റെ പഞ്ചലോഹ പ്രതിഷ്ഠയോട് കൂടി പുതുക്കി പണിയാനും ഗുരുപൂജ ഹാൾ, മെഡിറ്റേഷൻ ഹാൾ, ശ്രീനാരായണ പഠന ഗവേഷണ കേന്ദ്രം, ലൈബ്രറി, സന്യാസിമാർക്കും ഭക്തർക്കുമുള്ള ലളിതമായ താമസ സൗകര്യം എന്നിവ ഉണ്ടാക്കുവാനും ആണ് യൂണിയൻ തീരുമാനിച്ചിട്ടുള്ളത്.ആശ്രമത്തിൻ്റെ ശതാബ്ദി ആഘോഷത്തിൻ്റെ ഉദ്ഘാടനം 2020 സെപ്റ്റംബർ രണ്ടിന് ഗുരുദേവജയന്തി ആഘോഷത്തോടനുബന്ധിച്ച് ബഹുമാനപ്പെട്ട മിസോറാം ഗവർണർ ശ്രീ പി എസ് ശ്രീധരൻ പിള്ള സാറാണ് നിർവഹിച്ചത് .
കോവിഡ് രോഗവ്യാപനത്തെ തുടർന്ന്
ശതാബ്ദി ആഘോഷത്തിൻ്റെ ഭാഗമായി നിശ്ചയിച്ചിരുന്ന വിവിധ പദ്ധതികളും പരിപാടികളും നടപ്പിലാക്കാൻ പറ്റാത്ത സാഹചര്യമാണ് നിലവിലുള്ളത് .2022 മെയ് മാസത്തോടുകൂടി ആശ്രമത്തിൻ്റെ നവീകരണം പൂർത്തീകരിച്ച്
ശതാബ്ദി ആഘോഷ സമാപനം കുറിക്കണമെന്നാണ് യൂണിയൻ ആഗ്രഹിക്കുന്നത്. ചൈതന്യ സ്വാമികൾ സ്ഥാപിക്കുകയും ഗുരുദേവ തൃപ്പാദങ്ങളുടെ പാദസ്പർശം ഏൽക്കുകയും ചെയ്ത ഈ പുണ്യഭൂമി മലബാറിലെ ഗുരുഭക്തരുടെ പ്രമുഖ തീർത്ഥാടന കേന്ദ്രമായി അതിവിദൂരമല്ലാത്ത ഭാവിയിൽ മാറും എന്നുള്ള കാര്യത്തിൽ യാതൊരു സംശയവുമില്ല. ശ്രീനാരായണഗുരു വശ്രമത്തിൻ്റെ നവീകരണ പ്രവർത്തനങ്ങളിൽ മുഴുവൻ സജ്ജനങ്ങളുടെയും പരിപൂർണ്ണമായ സഹായസഹകരണങ്ങൾ അഭ്യർത്ഥിക്കുകയാണ്.
സുധീഷ് കേശവപുരി
