15/08/2026
അരൂർ സെന്റ് അഗസ്റ്റിൻസ് ഹയർ സെക്കൻഡറി സ്കൂളിൽ പ്രൗഢഗംഭീരമായി സ്വാതന്ത്ര്യദിനാഘോഷം:-
അരൂർ സെന്റ് അഗസ്റ്റിൻസ് ഹയർ സെക്കൻഡറി സ്കൂളിൽ സ്വാതന്ത്ര്യദിനാഘോഷം വളരെ ഭംഗിയായും ദേശഭക്തിനിർഭരമായും സംഘടിപ്പിച്ചു.
സ്കൂൾ ലോക്കൽ മാനേജർ ഫാ. ജിനീഷ് പീറ്റർ ദേശീയപതാക ഉയർത്തി ചടങ്ങുകൾക്ക് തുടക്കം കുറിച്ചു. തുടർന്ന് എസ്.പി.സി. കേഡറ്റുകളുടെ നേതൃത്വത്തിൽ ഫ്ലാഗ് സല്യൂട്ടും മനോഹരമായ പരേഡും നടന്നു. വിദ്യാർത്ഥികളുടെ അച്ചടക്കവും ആത്മവിശ്വാസവും പ്രകടമാക്കിയ പരേഡ് ചടങ്ങിന് ഏറെ മികവേകി.
ഗൈഡ്സ് വിദ്യാർത്ഥികൾ അവതരിപ്പിച്ച മാസ് ഡ്രില്ലും, ജൂനിയർ റെഡ് ക്രോസ്സ് വിദ്യാർത്ഥികളുടെ നൃത്തവും ഏറെ ശ്രദ്ധേയമായി. കുട്ടികളുടെ ദേശഭക്തി ഗാനവും ആഘോഷങ്ങൾക്ക് കൂടുതൽ ആവേശം പകർന്നു.
സ്കൂൾ ചെയർമാൻ നിർമൽ ഫ്രാൻസിസ് സ്വാഗതം ആശംസിച്ച ചടങ്ങിൽ ഫാ. ജിനീഷ് പീറ്റർ, പി.ടി.എ. പ്രസിഡന്റ് നിൻസി, വാർഡ് മെമ്പർ ശ്രീ. ജോസഫ് ഫ്രാൻസിസ്, ഹെഡ്മാസ്റ്റർ ജോർജ് മാത്യു, സ്കൂൾ ലീഡർ പാർവതി എന്നിവർ ആശംസകൾ അർപ്പിച്ച് സംസാരിച്ചു. ലഹരിവിരുദ്ധ പ്രതിജ്ഞയും, വൃക്ഷത്തൈ വിതരണവും ഉണ്ടായിരുന്നു.
സ്വാതന്ത്ര്യത്തിനായി സ്വന്തം ജീവൻ ബലിയർപ്പിച്ച ധീരരക്തസാക്ഷികളുടെ ത്യാഗസ്മരണ ചടങ്ങിൽ പ്രത്യേകം അനുസ്മരിച്ചു. രക്തസാക്ഷികളുടെ വേഷമണിഞ്ഞ് വിദ്യാർത്ഥികൾ അവതരിപ്പിച്ച സ്മരണാഞ്ജലി ഏറെ ഹൃദയസ്പർശിയായി. അവരുടെ ത്യാഗവും ദേശസ്നേഹവും പുതുതലമുറയ്ക്ക് പകരുന്ന മനോഹരമായ സന്ദേശമായി ഈ അവതരണം മാറി.
