السبيل - Alsabil

انا شخص عشوائي جدا، مبحبش الروتينات ولا التخطيط وبمشي اليوم بيومه 😂

ده طبعا مش صح كطالبة دكتوراه، لأن المفروض برتب للتجربة من قبليها بفترة و ببقي عارفة هعمل ايه بالظبط- لما بقارن نفسي بزمايلي، ناس منظمة أوي يا بختهم.

المهم حاولت مع نفسي بس فشلت لأن ده ضد طبيعتي ومش عارفة أغيرها فعلا.

وصلت لحل وسط، كل يوم الصبح بكتب هعمل ايه بالظبط بتفاصيل علشان أنا بنسي بسرعة 😂.

حتي لو اليوم مش مليان، او هعمل تجربة واحدة، ساعات بنسي أصلا اني شغالة تجربة وسبت مرة العينات في نص التجربة علشان اتلبخت في حاجة تانية.

اانا اشتريت بلانر وحركات برده وفشلت، وجربت اكتب علي ال calendar زي زمايلي والمشرفة برده فشلت 😂

فدي نصيحة لأي حد زيي، اكتب خطة يوم بيومه في كشكول عادي جدا بس بكل التفاصيل وكل ما تخلص حاجة اشطب عليها ده هيقلل ضغط اليوم شوية و في نفس الوقت هيفكرك انت وراك ايه و هيرتب الدنيا شوية و هيحسسك بالإنجاز برده.

مساء الخير، لو مكنتوش شوفتوا الفيديو 🥰

اتكلمت فيه عن إزاي تكتب خطاب نية Cover letter لمنحة أو لمراسلة دكتور وأشهر الأخطاء اللي شوفتها

ده أهم حاجة بتضمن القبول لو كتبته صح 😎

https://youtu.be/S4eg8UwBXqg

مستنية أسئلتكم وأرائكم 😊

الفيديو الجديد نزل،

ازاي تكتب خطاب نية أو Cover letter أو Motivation letter لأي منحة أو دكتور علشان تاخد منحة؟

✔ العناصر الأساسية لخطاب نية ناجح للمنح الدراسية
✔ كيفية تنظيمه وتنسيقه بشكل احترافي
✔ الأخطاء الشائعة التي يجب تجنبها
✔ نصائح ذهبية لجعل طلبك مميزً

https://youtu.be/S4eg8UwBXqg

متنسوش تشيروه علشان الكل يستفيد ✨️

مساء الخير 🥰✨️

جاهزين؟

لينك القناة
https://youtube.com/-8838?si=KopKmDRlBq0AaW1D

اشتركوا واستنوا فيديو قصير ملخص زتونة ال cover letter 😉

فرصة دكتوراه في uk في اكبر معامل في الbacteriophage، فرصة متتعوضش.

https://www.findaphd.com/phds/project/selection-of-bacteriophages-for-therapeutic-use-in-cystic-fibrosis-associated-pseudomonas-aeruginosa-infections/?p176728

Hello ❤️

مساء الخير،

المشرفة بتاعتي عرفت بالصدفة ان عندي متابعين و قناة يوتيوب 😂

فقلتلي اقولكم لازم يكون عندكم خطط بديلة ومينفعش تفضلوا مستنيين فرصة واحدة بس تيجي.

بمعني، مينفعش افضل مستني اشتغل مع دكتور معين علشان وعدني او علشان ممكن يبقي عنده فرصة متاحة (بتحصل كتير وده كان سبب النقاش اصلا).

ومينفعش افضل بقدم في منحة واحدة او جامعة معينة او مكان معين و مش حاطط بدايل تانية والاقي نفسي ضيعت وقت وعمر و طاقة.

لازم يكون فيه كذا خطة بديلة و احدد وقت معين لكل خطة علشان لو مجتش اشوف اللي بعده.

وقتك وعمرك وطاقتك مهمين، استغلهم صح.

أ ب بحث علمي،

المصادر الموثوقة للبحث العلمي هي المجلات العلمية اللي تبع دار نشر springer, elsiever, wiley والمؤسسات الكبيرة زي who, cdc

اي موقع أخبار، مدونة، اي حاجة مش في دول، بلح.

مساء الخير،

انا كل يوم بتأكد ان المؤتمرات في مصر اللي مش تبع جهات حكومية او جامعات عبارة عن سبوبة للشركات الصغيرة.

معنديش مشكلة لو فيه استفادة تستاهل، لكن متجبليش ناس مشهورة عالفيس سواء عندهم محتوي او لا فهيجيبولك الطلبة او الناس اللي بتابعهم وتكسب انت.

قبل ما تحضر وتدفع فلوس في اي حاجة، شوف الspeakers ومؤهلاتهم كويس.

لو ببلاش، روح كده كده مش هتخسر حاجة.

مساء الخير،

مش بتكتب اي معلومات مكتوبة في ال cv بتاعك وتكرره في ال cover letter.

يعني مش بتكتب اسمي كذا و خريج كذا واي كلام مكرر من ده، ده هيقلل معاك من عدد الكلمات و كمان مش هيبقي ممل للي بيقرأ.

مسا، الخير،

مهم تبقي عارف المجال اللي انت عايز تكمل فيه بعد التخرج.

المجالات بقت متشعبة ومتداخلة جدا، فمينفعش حد يقول عايز منحة في الزراعة او الميكروبايولوجي او الصيدلة او تسأل ايه المجال الترند دلوقتي علشان اكمل فيه (بجد بتسأل كده).

أعرف إزاي؟

١- جوجل: اقرأ كتير أبحاث عن المجال بتاعك و اعرف المصطلحات العلمية بتاعته (اكتبها عندك) و ابدأ دور جواها وهتلاقي الدنيا بتوضح مرة في مرة.

٢- انزل تدريبات في مجالات مختلفة وشوف شغلها العملي ازاي و الكلام النظري شدك ولا ممل بالنسبالك.

ومهم برده تعرف انك ممكن تغير المجال بتاعك عادي في اي وقت، يعني مش ده المجال اللي هتكمل فيه حياتك كلها، فعادي تجرب.

مساء الخير،

ال cover letter او personal statement او Statement of Purpose، أرجوكم يبقي ٥٠٠ كلمة او بالكتير اوي صفحة.

زيادة عن كده، سبب كافي لرفضه من غير ما يتقرأ أصلا لأن مفيش حد فاضي يقرأ صفحتين و ٣ و ٤ وقدامه مئات غيرك مقدمين!!