Rèv Mwen Se Bousòl Mwen

26 oktòb 2025 - 26 novanm 2025, fè egzakteman yon mwa depi reyalizasyon dezyèm Edisyon Fowòm RMSBM nan, yon randevou kote nou te chita sou yon sèl tematik: Transfòmasyon.

Fowòm nan pa t fèt pou bay rezilta imedya. Li te fèt pou kreye yon deklik, ak refleksyon nan lespri tout moun ki te la — moun ki poko jwenn chimen yo, menm jan ak moun ki te deja sou wout la e ki bezwen ranfòse kapasite yo.

Tematik nou te abòde yo te akse sou :

1. Angajman Kominotè

kapasite pou patisipe nan lavi kominote a, pote solisyon, epi travay ansanm pou kreye chanjman pozitif.

2. Devlopman Pèsonèl

Se travay nou fè sou tèt nou pou grandi : aprann, amelyore kapasite nou, bati konfyans, epi rive pi lwen nan objektif nou.

3. Entèlijans Atifisyèl (IA)

Se teknoloji ki ede nou travay pi vit ak pi entèlijan, kreye nouvo opòtinite, epi prepare pou avni ki pi modèn.

Fowòm nan te fèt pou kreye yon etensèl, ede jèn yo reflechi sou fason yo wè tèt yo ak fason yo ta dwe enplike ak angaje yo nan kominote yo.

Kisa n ap chache :

- Aksyon konkrè k ap pote chanjman reyèl,
- Jèn ki vin plis kwè nan tèt yo,
- Chanjman nan mantalite.

2em edisyon Fowòm RMSBM an pa t selman yon senp evènman, men yon eksperyans pou ede w transfòme lavi w.

Nan non asosiyasyon RMSBM an, n ap swete yon bon rekòt kafe ak vis kòwodonatris nou Darlie Sintumas.

Ekip la di w mèsi pou enplikasyon ak angajman nan kontribiye nan vizyon asosiyasyon an.

Nou swete w anpil siksè 🥳

FOWÒM RMSBM - PRESTASYON

Yon Bèl Prestasyon ki Make Jou a

Witney ak Rébecca te ofri yon moman ekstraòdinè pandan fowòm nan, ak tout talan ak pasyon yo mete nan pèfòmans lan.
Nou remèsye medam sa yo pou talan ak kreyativite yo te pote nan evènman an.

Piblik la te vrèman apresye prezans nou, e nou di nou felisitasyon pou bèl travay sa !

FOWÒM RMSBM - PANEL ENTÈLIJANS ATIFISYÈL

Yon Refleksyon sou Avni nou

Dènye panèl fowòm nan te aske ak sijè entèlijans atifisyèl. Panèl sa t anime pa Darlise Sintumas kòm moderatris.

Li te akonpanye tou Ricardo Cambronne ak Kendy Morandi Compère.

Ricardo Cambronne te mete aksan sou enpòtans teknoloji nan devlopman kominotè, sitou nan domèn edikasyon ledikasyon.
Morandy Compère, pou pati pa li, te montre kijan entèlijans atifisyèl kapab tounen defi oswa yon opòtinite, swa atravè fason nou ap travay oswa amelyorasyon nan relasyon moun.

Yon bèl echanj ki ouvè je nou sou posiblite sou avni dijital la pou jenerasyon k ap vini yo.

Bon rekot Kafe Christopher Pierre ☕🎉

Ekip RMSBM ap swete yon bon rekòt kafe ak Christopher Pierre, responsab relasyon piblik nou an.
Yon jèn dinamik nan ekip la, nan gran jou sa, nou kontan selebre ak ou.

Nou kontan gen yon jèn tankou ou nan ekip la.

Mèsi pou angajman w

Byen selebre chanpyon 🌟

DEYÈ CHAK GRAN SIKSÈ, GEN YON EKIP K AP AJI

Nan tout aksyon RMSBM, fòs nou soti nan moun ki kwè nan misyon an, ki angaje. Chak reyalizasyon se rezilta yon travay kolektif, pasyon ak detèminasyon.

Kolaborasyon se baz tout siskè. Chak manm nan ekip la gen kontribisyon ke li pote, konpetans, enèji, disponibilite. Se konplemantarite sa ki fè fòs paske se ansanm n ap grandi, e ansanm nou kontinye fè plis eksplwa.

RMSBM remèsye tout manm ekip la pou devouman, disponiblite ak lespri kolaborasyon yo nan 2em edisyon fowom sa. Nou fyè de rezilta travay la.

Chak etap ki rive franchi se pa yon viktwa endividyèl, men se yon siksè kolektif.

Ekip RMSBM fyè de nou.

Kominikasyon RMSBM

KF : Yveson DESTIN

TRANSFÒMASYON PA FÈT SAN PATISIPASYON KOLEKTIF

Rèv Mwen Se Bousòl Mwen pa sèlman yon enstitisyon ki ankouraje jèn yo antenn potansyèl yo. Nou kwè nan devlopman kominote a tou, paske pa gen transfòmasyon san patisipasyon kolektif.

Egzanp sa te klè pandan Fowòm nan, kote nou te gen plezi sipòte inisyativ “Konstriksyon Bibliyotèk Lise Divivye” a, yon pwojè panelis Pierre Marc Baptiste ap mennen nan komin Site Solèy. Objektif la se ofri jèn yo ak popilasyon an yon espas konesans ak aprantisaj. Kote yo lanse yon kanpay pou ranmase liv.

Nou kwè fòk chanjman ak transfòmasyon pase pa edikasyon. Se poutèt sa nou fyè dèske nou te kapab pote kontribisyon nou nan pwojè sa.
Chapo pou, Pierre Marc, pou vizyon w ak modèl lidèchip ou. Nou swete w anpil siksè ak ekip nan reyalizasyon bèl inisyativ sa ki pral sèvi ak kreye transfòmasyon nan lavi jèn yo.

Pèsonalite ki sou foto a :
Darlie Sintumas, vis kodonatris,
Pierre Marc Baptiste, sitwayen angaje,
Hajiel Junior PIERRE, kodonatè jeneral.

Kf : Yveson DESTIN

FOWÒM RMSBM - PANEL ANGAJMAN KOMINOTÈ
Yon envitasyon pou n angaje nan kominote a.

Dezyèm panel fowòm nan, te anime pa Hajiel Junior Pierre, yon panèl ki te gen jèn angaje tankou Yvens Gomez, Emmanuel Michel ak Pierre Marc Baptiste.

Nan echanj yo, Yvens Gomez te montre kijan angajman se yon zouti esansyèl pou konstwi konfyans ak solidarite nan kominote yo.

Pierre Marc te pwofite raple nou angajman pa dwe rete yon patisipasyon pasif, men yon efò aktif pou nou chèche solisyon ak rezoud pwoblèm sosyal yo.

Emanuel Michel te mete aksan sou lidèchip responsab, chak endividi nan kominote a gen yon wòl pou jwe nan kreye yon espas pataj, vizyon ak devlopman kolektif.

Nan seyans kesyon yo, patisipan yo te mete limyè sou enpòtans solidarite ak transparans, ki se de poto mitan pou bati yon klima konfyans.

Angajman kominotè, se pa pale anpil se aji ansanm pou chanje lavi n tout bon vre.

Ane pase, nou te poze premye wòch la kreye yon espas refleksyon, pataj ak koneksyon, ki te bati sou yon sèl konviksyon : Rèv pa yon liks, ni yon ilizyon. Li se bousòl nou, yon direksyon, yon fòs k ap pouse nou avanse pou pi devan

Pou 2025 la, nou ale pi lwen ke sa, tèm ki te rasanble nou an te akse sou "TRANSFÒMASYON".

Transfòme, se grandi, se chanje pèsepsyon nou yo. Se konprann ke lavi pa chanje pa aza, men li chanje parapò ak desizyon, ak angajman ke nou pran.

Nan yon peryòd nan peyi a ki chaje ak anpil ensètitid, li fasil pou n santi nou enpwisan fas ak deriv yo.Men, se la menm transfòmasyon kòmanse: nan moman nou pa deside bay vag.

Lè nou chwazi kwè, leve kanpe, aprann, pou n toujou rete alinye ak sa nou ye ak sa nou vle vrèman.