Kau Yan School Kindergarten Section - 救恩學校幼稚園部

⚓【大人都未必知！救恩K2仔仔女女，化身「香港水路小博士」🎓】

我哋平時過海多數會搭港鐵、巴士？我哋低班嘅小朋友，為我哋發掘咗更多方法呀！😎

早前低班嘅小朋友去中環碼頭考察，佢哋發現原來香港有好多款船。返學校同老師查完資料後，佢哋仲親自策劃咗一場「水上交通大比拼」，親身試搭兼比較咗三種特色船隻！

對於呢個階段嘅幼兒，學識「作出比較」對邏輯思維發展非常重要。睇吓佢哋嘅認真大比較：

天星小輪 ⛴️ ｜ 船身最大、最定，凳背可以推嚟推去，遊客最愛。

香港仔舢舨 🚣♂️ ｜ 船身最細、最貼近海面，好似坐搖搖板咁刺激，仲睇到傳統水上人生活。

水上的士 🚕💨 ｜ 最現代化！有冷氣、行得快，好似喺海上面坐緊的士咁。

「老師，舢舨好搖，水上的士就好似坐的士咁舒服呀！」唔好小看小朋友嘅觀察力，連大人都未必坐齊呢三種船，我哋嘅「水路小博士」已經可以做導遊帶爸爸媽媽去體驗喇！

下次過海，不如跟住小朋友嘅步伐，試吓搭港鐵、巴士以外嘅選擇啦！🌊

【一個時代的終結 🕰️ 街市最後的道別與傳承】

👦🏻: 「我想問吓店員，點解街市會冇咗？」
👧🏻: 「我哋可以送心意卡多謝佢哋！」

喺學校附近、承載住50年回憶嘅正街街市，因為人口變化、電子購物普及同競爭，即將喺6月1號光榮結業。多年嚟成日帶小朋友嚟參觀，見到一個時代嘅終結，難免感到有啲唏噓。

生活喺科技日新月異嘅時代，我哋希望教導小朋友「飲水思源」——享受便利嘅同時，不忘上一輩為我哋付出嘅努力。

一班上高信幼兒喺報紙得知消息後，主動向關校長申請外出考察。大家分工合作，有人用平板電腦帶路、有人負責記錄。佢哋決定唔只去觀察，仲會親自購物、進行訪問，並送上親手畫嘅心意卡，向店員叔叔姨姨致謝。

舊建築雖然會消失，但人情味同精神，將會透過小朋友一直傳承落去。正街街市，多謝你呢50年嚟嘅陪伴。

🌸 【愛，係最溫柔嘅守護】致每一位偉大嘅媽媽 🌸

喺幼稚園入面，我哋每日都見到好多匆忙但充滿愛嘅身影。

好多媽咪其實好忙，又要返工，又要兼顧屋企。但無論幾攰都好，只要係關於小朋友嘅活動——由家長觀課到義工幫手，你哋總係會排除萬難出席。

我哋知，呢份唔係「責任」，係一份唔想錯過嘅心。你想俾仔女知道：「喺你成長嘅路上面，媽咪永遠都會喺度陪住你。」 🏃‍♀️💕

👩‍🏫 特別致敬：老師媽咪們

身兼老師同媽媽雙重身份嘅你哋，更加係超人。喺學校，你將溫暖分俾每一位學生；返到屋企，又要將剩餘嘅精力全部留俾仔女。呢份雙倍嘅付出，真係好唔容易。

「媽媽嘅愛，就好似種子咁，一早已經種咗喺小朋友嘅心入面。」🌱

未必每一刻都有掌聲，但你哋嘅付出，小朋友一定感受到。今日，請放低繁忙嘅瑣事，好好抱下自己，同自己講聲：「辛苦喇，我做得好好！」

祝全天下嘅媽咪：
✨ 母親節快樂！身體健康！主恩滿溢！✨

三月份特色生日會，主題：西班牙 🇪🇸🥘
四月份特色生日會，主題：法國 🇫🇷🥐

復活節快到喇！學校除咗有一系列好玩嘅慶祝活動，好似「尋蛋遊戲」、「復活蛋拯救隊」同埋「繽紛小手工」之外，我哋仲為小朋友安排咗一個好有意義嘅體驗活動，帶領佢哋追尋復活節真正嘅主角——主耶穌。✝️

喺呢場體驗中，小朋友嘗試背起十字架，一步一步走過凹凸不平嘅「苦路」。我哋希望小朋友可以透過呢份小小嘅體驗，感受到天父同主耶穌無條件嘅愛。🙏✨

此外，我哋仲進行咗「Godly Play」，同小朋友分享「創造」嘅故事。小朋友知道原來天父創造呢個美麗嘅世界，係送畀我哋最珍貴嘅禮物！我哋要學識感恩，每日起身見到咁靚嘅世界，都要讚美天父。小朋友都好投入進行各類型嘅復活節慶祝活動😊

祝願大家有個充滿愛同恩典嘅假期，復活節快樂！ 🐰🌷