28/06/2025
20250628【逆天而行不可行】
1. 【香港無處不旅遊？】K仔以前好鍾意去下白泥影日落，好鍾意由尖鼻咀行到去元朗影雀。呢幾年已經冇去，因為人太多！已經破壞得好緊要。下白泥嘅泥灘，係大自然嘅巧妙安排，又平又闊，孕育好多鹹淡水生物。破邊洲更係大自然嘅鬼斧神工。硬崩崩要喺呢啲地方製造方便遊客嘅設施根本上就係破壞大自然！就好似沙灘咁，天然形成嘅先至可以歷久不衰，靠嘅係海浪同地質千萬年嘅磨合。而人造沙灘呢？今日填完砂，聽日就被浪沖走，要不斷補砂先維持到個樣。呢啲就係「逆天而行」破壞大自然嘅代價：唔單止浪費金錢，仲破壞咗自然嘅平衡。唔好畀「遊客帶動經濟」 就一窩蜂去破壞大自然！南大嶼山、南丫島會係災難區！
2. 【一個旅遊區要有好多配套，唔係你話叫佢做旅遊區就會順順利利】近排政府計劃發展南丫島石礦場用地、南大嶼生態康樂走廊、尖鼻咀、白泥，話要搞「生態旅遊」。但係，生態旅遊真係可以同大自然和平共處咩？太多人流湧入，垃圾、噪音、人為破壞，樣樣都係致命傷。 一定要好好規劃，特別係需要有環保同交通嘅協調！你去過南丫島就知道啲路有幾有幾窄，遊客有咩事，只能夠由海路去救。再加上附近有綠海龜繁殖，你畀咁多遊客上個島，海龜多得你唔少！
3. 【香港生態災難實錄】
a. 【破邊洲】你睇下西貢東壩同破邊洲，呢個地質奇觀近年成為打卡熱點，結果點？假日人山人海，遊客為咗影相亂咁攀爬六角石柱，搞到岩石受損；垃圾隨處可見，甚至有人喺保護區生火露營。地質公園嘅美譽，就快變做「垃圾公園」！ 大佬，嗰度水塘區根本就唔應該咁多車走入去，你要去睇咪自己行10km 入去囉，更加離譜嘅就係整咗個咁肉酸嘅觀景台，你整咗圍欄，啲人未又係一樣爬返出去影相？你幻想下如果第日整埋電梯會幾肉酸呢！
b. 【貝澳、水口、西貢海】大嶼山嘅貝澳濕地本來係候鳥天堂，而家俾人踩到七零八落。水口原本係重要嘅潮間帶生態區，因為掘蜆熱潮，灘塗被挖到千瘡百孔，生物棲息地永久破壞。西貢嘅珊瑚礁因為遊客亂咁潛水同垃圾，破壞速度驚人。
c.【大埔龍尾】唔想再講人造沙灘，諗起都好嬲！可憐嘅吐露港海洋生物 😭😭😭😭
d.【浪茄、大浪四灣】政府根本冇人去執法嗰啲非法露營，大量垃圾破壞曬嗰度嘅環境，最後啲垃圾係沖曬落海！
4. 【發展加保育？】政府成日話「發展」同「保育」可以並存，但實際上呢？佢哋嘅「發展」往往係將自然改造成人造景點。而啲遊客破壞完個生態景點永久都復原唔到，你發展嘅旅遊區根本就唔再會有收成！
東壩破邊洲明明係地質保護區，卻完全冇有效管理。遊客可以隨意進出，冇人數限制，冇教育宣傳，更加冇完善嘅垃圾收集設施。結果呢？海岸線堆滿膠樽同即棄餐具，有啲PK仲係啲六角柱石上高塗鴉！
5. 【日本富士山登山管制嘅啟示】如果真係要搞生態旅遊，不如學下人哋日本點樣保護富士山：
✓ 實施預約制控制人流
✓ 收取環境保全協力金
✓ 設立指定行山路線
✓ 嚴格執行垃圾管制
反觀東壩破邊洲，明明係地質公園，卻：
✗ 冇人數限制
✗ 冇垃圾管理
✗ 冇執法罰則
😭 水口掘蜆熱潮持續多年，政府一直冇有效規管，直到生態幾乎不可逆轉！
南丫島石礦場、南大嶼海岸、尖鼻咀白泥，呢啲都係香港最後嘅自然瑰寶。與其大搞發展破壞生態，不如參考國際經驗，設立：
1. 承載量限制系統
2. 預約參觀制度
3. 生態導賞員計劃
4. 嚴格執法罰則
6. 【大自然唔係屬於香港政府嘅，係屬於地球媽媽嘅，你破壞佢，佢一定會反撲】大自然用咗億萬年先塑造出呢啲奇觀，我哋唔應該為咗一時嘅經濟利益而摧毀佢。記住：「順天者昌，逆天者亡」，等到最後一片淨土消失嗰日，後悔就已經太遲！
7. 【政府唔該喺小紅書做嘢：保育】叫啲人下次你去郊遊時，請諗諗你腳下踩緊嘅，可能係獨一無二嘅地質遺產。你隨手掉嘅垃圾，會害死瀕危生物。保護自然，由我哋每個市民做起！嘅每一個決定，都可能影響緊下一代仲有冇機會見到呢啲自然美景！
