02/10/2026
სიახლე ქართულ მეცნიერებასა და გეოგრაფიულ კარტოგრაფიაში!
სულ ახლახანს გამოიცა „ქვემო ქართლის რეგიონის გეოგრაფიული ატლასი“. ეს მასშტაბური კარტოგრაფიული ნამუშევარი, რომელიც თბილისის სახელმწიფო უნივერსიტეტის ვახუშტი ბაგრატიონის სახელობის გეოგრაფიის ინსტიტუტის მიერ შოთა რუსთაველის საქართველოს ეროვნული სამეცნიერო ფონდის მხარდაჭერით მომზადდა, ქვემო ქართლის რეგიონის სრულფასოვან კარტოგრაფიულ ენციკლოპედიას წარმოადგენს. ატლასის კონცეფციის ავტორი და დიზაინერია ცნობილი ქართველი კარტოგრაფი, გეოგრაფიის დოქტორი, გეოგრაფიის ინსტიტუტის კარტოგრაფია-გეოინფორმატიკის განყოფილების ხელმძღვანელი გულიკო ლიპარტელიანი. მასალების მომზადებასა და რუკების შედგენაში კი ჩართული იყო ავტორთა მრავალრიცხოვანი კოლექტივი.
ქვემო ქართლის რეგიონის გეოგრაფიული ატლასი ვახუშტი ბაგრატიონის სახელობის გეოგრაფიის ინსტიტუტში 2018 წელს დამუშავებული რეგიონული კარტოგრაფირების კონცეფციისა და მეთოდოლოგიის საფუძველზე შეიქმნა. ამ პროექტის ფარგლებში, რომელიც ითვალისწინებს საქართველოს 12 რეგიონისთვის კომპლექსური ატლასების შედგენას სერიის სახით - ,,საქართველოს რეგიონული ატლასები", უკვე გამოიცა კახეთის რეგიონის გეოგრაფიული ატლასი. ქვემო ქართლის ატლასი აღნიშნული სერიის მეორე გამოცემაა.
198 გვერდიან ატლასში შესული რუკები შემდეგი თემების მიხედვითაა განაწილებული: მდებარეობა, ისტორია, ტერიტორიული მოწყობა, ბუნება, მოსახლეობა, ეკონომიკა, ჯანდაცვა და სოციალური მომსახურება, განათლება და კულტურა, ტურიზმი. ამ უმაღლესი დონის კარტოგრაფიულ ნაშრომში რუკებთან ერთად არის ტექსტები, დიაგრამები, გრაფიკები და ფოტოსურათები. ატლასს ახლავს აგრეთვე ბიბლიოგრაფიის ვრცელი სია.
საგულისხმოა ის ფაქტი, რომ შოთა რუსთაველის საქართველოს ეროვნული სამეცნიერო ფონდის ფუნდამენტური კვლევების ფარგლებში განხორციელებული ამ მნიშვნელოვანი პროექტის ფარგლებში, ტრადიციული ბეჭდური ვერსიის გარდა, შეიქმნა თანამედროვე ინტერაქტიული ვებ-ატლასი. ციფრული პლატფორმა მომხმარებელს სთავაზობს მრავალმასშტაბიან კარტოგრაფირებას, დინამიკურ ფანჯრებსა და მონაცემთა მართვის მოქნილ ფენებს.
ატლასის როგორც ბეჭდური, ისე თანამედროვე ციფრული ვერსია იდეალური რესურსია მკვლევრების, რეგიონული დაგეგმარების სპეციალისტებისა და საგანმანათლებლო ინსტიტუციებისათვის.
