25/09/2026
დიდი სიხარულით გიზიარებთ მნიშვნელოვან სიახლეს.
ჩვენი სკოლის გამოცდილება შევიდა ახალ სახელმძღვანელოში, რაც მნიშვნელოვანი აღიარებაა.
კვლევის უშუალო განმახორციელებელი იყო ლიკა ჯვარიძე Lika Jvaridze და კვლევის პროცესს მენტორობას უწევდა ქეთევან გოგალაძე Ketevan Gogaladze .გვიხარია, რომ ჩვენ სკოლაში ჩატარებული კვლევა ფართო აუდიტორიისთვისაც ხელმისაწვდომი გახდა და იმედი გვაქვს, ეს გამოცდილება სხვა მასწავლებლებსაც გამოადგებათ.
მადლობა ყველას, ვინც ამ პროცესში იყო ჩართული და თავისი წვლილი შეიტანა. ასეთი წარმატებები კიდევ ერთხელ გვარწმუნებს, რომ თანამშრომლობა, კვლევა და პროფესიული განვითარება დადებით ცვლილებებს ქმნის სკოლაში.
„საძიებო-სამოქმედო კვლევა – სახელმძღვანელო მასწავლებლებისათვის“ გამოიცა
საქართველოს განათლების, მეცნიერებისა და ახალგაზრდობის სამინისტროს, მასწავლებელთა პროფესიული განვითარების ეროვნული ცენტრისა და ბრიტანეთის საბჭოს (British Council) თანამშრომლობით გამოიცა ელექტრონული სახელმძღვანელო მასწავლებლებისათვის – „საძიებო-სამოქმედო კვლევა“.
სახელმძღვანელო მასწავლებლებს საკუთარი საკლასო პრაქტიკის შეფასებასა და გაანალიზებაში, არსებული სირთულეების უკეთ გააზრებასა და სწავლა-სწავლების ხარისხის გაუმჯობესებაში ეხმარება. კვლევის პროცესის პრაქტიკაში გამოყენება მასწავლებელს შესაძლებლობას აძლევს, დაგეგმოს და განახორციელოს ისეთი ცვლილებები, რომლებიც ხელს შეუწყობს როგორც მოსწავლეების სწავლას, ისე მის პროფესიულ განვითარებას.
სახელმძღვანელო ეფუძნება საძიებო-სამოქმედო კვლევის (Exploratory Action Research – EAR) მეთოდოლოგიას, რომელიც ორ ძირითად ეტაპს აერთიანებს:
✅ საძიებო ეტაპზე მასწავლებლები სიღრმისეულად იკვლევენ საკლასო გარემოში არსებულ რეალურ გამოწვევებსა და საჭიროებებს;
✅ სამოქმედო ეტაპზე კი, მიღებულ მტკიცებულებებზე დაყრდნობით, გეგმავენ, ახორციელებენ და აფასებენ მცირე, გააზრებულ ცვლილებებს.
სახელმძღვანელოში წარმოდგენილი მაგალითები და კვლევითი ანგარიშები ეფუძნება ქართველი მასწავლებლების მიერ ქართულ სკოლებში განხორციელებულ რეალურ პროექტებს.
განხილული თემებია:
✅ მოსწავლეთა მოტივაცია და ჩართულობა;
✅ წაკითხულის გააზრება;
✅ ინსტრუქციების გაგება;
✅ საშინაო დავალებები;
✅ განმავითარებელი შეფასება.
🌐 სახელმძღვანელოს ელექტრონული ვერსია ხელმისაწვდომია მასწავლებელთა პროფესიული განვითარების ეროვნული ცენტრის ელექტრონული სერვისებისა და რესურსების პორტალზე – განათლების E სახლი:
https://educationhouse.ge/storage/books/exploratory_action_research_manual_for_teachers_3547.pdf
