08/08/2026
話咁快，一連五日嘅 14–16歲 Summer Architecture Workshop 就圓滿完成啦。🏡
其實呢個 workshop 嘅出現，源自一個好簡單嘅對話。
有一日同一位中學生傾偈，佢同我講，原來暑假好多朋友都唔知可以做咩，每日就咁過；更加唔知道自己鍾意咩、擅長咩。聽完之後，我就諗 如果有一個機會，可以俾佢哋喺暑假接觸一樣平時唔會接觸到嘅事情，會唔會幫到佢哋認識自己多啲？
我記得自己細個都係一樣，根本唔知道自己想做咩，更加唔會知道世界上有一科叫 Architecture。所以，我一直都覺得，年青人最需要嘅未必係一早就知道自己將來要做咩，而係有機會去試。
試咗之後，你可能會發現自己好鍾意；又或者發現原來唔適合自己。其實兩樣都係收穫。如果有同學因為呢五日，知道 Architecture 可能係自己將來想讀嘅其中一個方向，我已經覺得呢個 workshop 好值得。
五日，其實真係唔算長。
但喺呢五日入面，同學由 Site Analysis、Bubble Diagram、Design Concept、建築大師 Case Study 開始，到學用 Scale 畫圖、做 Site Model、發展設計，再完成自己嘅模型同圖紙，最後仲要向大家做 Presentation……對一班未正式接觸過建築嘅中學生嚟講，其實一啲都唔容易。
最令我surprise嘅，係見到佢哋放學之後，會自己返屋企改設計、畫多幾張圖、甚至繼續砌模型。呢啲，就係每一個讀建築嘅人都經歷過嘅日常。最後一日，仲要企喺自己同其他同學嘅家長面前介紹自己嘅設計。其實嗰一刻，比起作品做得幾靚，我更加欣賞嘅係佢哋願意站出嚟，講自己嘅想法，接受別人嘅意見，再學識思考點樣可以做得更好。
當然，如果用建築學生嘅標準去 Crit，仲有好多可以改善嘅地方。
但老實講，我諗返自己十四、十五歲嗰陣，可能連自己做緊乜都未搞清楚。所以，喺我眼中，每一位同學都已經好叻、好用心。
我希望，呢五日帶走嘅唔單止係一個模型。
而係將來當佢哋去旅行、行街、去到一棟建築物、一個廣場、一間餐廳，會開始停一停，望多一眼。開始思考：「點解個空間會咁設計？點解光會由呢度入？如果係我，我會點做？」
如果有一日，Architecture 變成咗佢哋睇世界嘅其中一個角度；
如果有一日，因為呢五日，令一位同學搵到自己真正有興趣嘅方向。
咁我相信，呢個 Summer Workshop，就已經成功。
多謝每一位同學五日嘅投入、多謝每位家長嘅信任同支持。
希望今次，只係大家探索世界嘅開始。❤️
如果有興趣參加將來舉辦既workshop, 可以去以下既link register interest. https://www.archikei.co.uk/event-details-1/architecture-workshop-interest
