Carl Marwan Klink

انا الباحث
انا الباحث يلي عم حمل مسؤولية بالتساوي لناس قاعدين بمدينة بريف دمشق هجم علهيهم قطيع من المتطرفين وهدفهن الانتقام الطائفي بغض النظر مين صاحب التسجيل

انا الباحث
انا اللي بيطلع بيحكي بفيديو من ط*ز الضو عم اطلب فيه من الهجري يروح عالشام مع انو الشام طنشت لما طلعت مظاهرات بجامعات سوريا حللت فيه دم ولادو، وبعد ما شاف ولاد عمومتو بالساحل عم يتذبحوا

انا الباحث
انا الباحث يلي قاعد عم ناقض حالي كل يوم خمس مرات، شي بقول انو التاريخ لن يرحم لحدا ببوست عن ايمن زيدان، وشي بقول انو لازم ننسى التاريخ لما بخكي عن الجودادي

انا الباحث
انا اللي عندي استعداد مصمص لآلاف الاسلامويين بس لأنهم احترموني شوي وعطوني قيمة وانا بالاساس بلا قيمة وبحثي العلمي حقو نص فرنك وانا تركت شغلي بالبحث العلمي لانو بعد عشرين سنة ماعندي شي عليه القيمة بين ابحاثي

انا الباحث
انا الباحث يلي اذا بكرا بيبصق بوشي جماعة ابو احمد حدود كرمال صورة مع الجودادي انا رح قول الدنيا عم تشتي

انا الباحث الط*زي.

انااااا رح موت من الفرحة

ماعم صدق حالي

معقول!!! معقول انو حلمي قرب يتحقق، معقول اقدر حب حالي ولو لمرة بالحياة؟

معقول اقدر استلم مركز الابحاث يلي رح يعملولي ياه جماعتي وبعدها اقدر اتبرأ منن واعمل حالي طبيعي من جديد؟

شو الحرية قدام منشأة أبحاث بالخلية السرطانية؟
بدنا مؤتمر دولي بحديقة تشرين، ووزارة اسمها “شؤون التنور”!
بدنا قانون بيعاقب اللي ما بينشر بحث، ومكافأة للي بينشر بحثين!

بدنا مكتبة فوق كل سطح، ونسأل الناس:
“شو رأيك بمعهد ماكس بلانك؟” بدل “شو رأيك بالدستور؟”

الحرية مضيعة وقت…
المرحلة هي مرحلة التدوين المخبري، مو التدوين الثوري!
خلونا نشتغل صح يا جماعة!

هامش:
انا كتير مبسوط، ماعم اقدر سيطر على نفسي من الفرح، ما عمبقدر نام من كتر الفرح، يا الله، يا الله شو حلو الفرح!!!!!!!!! هو

انا متفائل، والجاية احلى

وانا مع الحق، وانا مع العلم، وانا مع الاسلاميين لأن هنن حبابيين ورح يعملولي مركز ابحاث حلو فش قهري فيه، وهنن رح يعملوا انتخابات ويتخلوا عن الكرسي اذا سقطوا، هنن هيك قالولي

وانا لأنا، وهيك!!

وبالمناسبة، القائد ما اسمو ابو محمد، اسمو السيد الرئيس احمد

بحبكون كتير، يا ريتني لو معكون هلا

🕺🏻🕺🏻🕺🏻بلدنا زهّرت 🕺🏻🕺🏻🕺🏻

أنا بالشغل ما عم حك ضهري بالحكّاكة، والسوشال ميديا عندي زهّرت يا جماعة!!
أخبار من هون، إنجازات من هون، البلد عم تبقبئ بقبئة، وكلو بآخر كم ساعة!

🏃‍♂️ شي من وزارة الشباب والرياضة، يلي أطلقت اليوم “البرنامج الوطني لإعادة تأهيل الأرواح عبر رياضة الزومبا”،
طبعًا ما بنسى ذكر مشروع “ملعب بدون كراسي” لتشجيع الوقوف الحضاري.

👑 شي من وزارة شؤون رئاسة الجمهورية يلي أعلنت عن تأسيس أكاديمية تطوير لغة الجسد للمواطن الواعي، وبلشت توزّع مناهج للسلام بطريقة محسوبة ديناميكياً.

🍚 شي من وزارة الرز بحليب، يلي أعلنت عن إطلاق قافلة **سكر وطن**:
“الحلويات مقاومة، ولبن العيران قرار سيادي”.
المبادرة بلشت فعلياً بالقطيفة، وكانت ردّة الفعل: “ييييي شو طيب!!”

وغير هيك، في شي تسعوستين خبر اضافي عم اتلذذ فيهن.

وأنا هون؟
مو قدران تابع متل العالم… لا قدرت ادرس ولا قدرت اطبخ لبيتي وانا بالي فاضي!!!
بس عم قرا وبدي شارك مشان خلي ابي فخور فيني ولو لمرة وحدة بحياتي، بابا الله يخليك حبّني.

يعني مع احترامي لكل النقاشات الكبرى… بس أنا برأيي المتواضع (والمدعوم بداتا عندي عالمكتب) لازم نبلّش ببناء مركز أبحاث الخلية السرطانية بزملكا، لأنو إذا ما أسسنا البنية التحتية العلمية بالأحياء الشمالية، كيف بدنا نكمل تحرير جبل قاسيون من الفلول؟

يا جماعة، الأولويات! 🥹🥹

بعدين أنا ما بقبل أبدا بانتقاد الحكومة الحاليّة من غير دراسة وافية، يعني قبل ما تحكي، شوف:
هل عندك خطة بديلة فيها ميزانية، علاقات خارجية، ومختبر فيه مايكروسكوب و"بيت سكان"؟
لا؟
طيب ليش عم تحكي؟
أنا كنت معارض، وبشدة، بس لما شفت إنو في إمكانية يقدروني ويخلوني حس باحساسي ابي حرمني منها، مع مكتب وشباك بمبنى البلدية، غيرت موقفي وعاطيهن فرصة ٣ سنين. العلم بده مرونة، مش عناد!

بعدين بتلاقو العالم فايقين، ومخدرة ط**زهن، وبلشو ينزلوا منشورات:
“خلص! ما عاد في أمل!”
“الاتحاد الأوروبي طفّى الضوء!”
أخي… ريّحنا، شراب شوية تفاح، وتعال احكي بالعلم، مش بالإصبع.

وأنا هون مو عم قول ما بدنا معارضة، بالعكس، ضروريّة كتييير، بس لازم تكون معارضة بناءة. مثلي أنا، لما عارضت، كنت كل يوم ببعت إيميلات فيها خرائط طابقية للمركز يلي بدي يعملولي ياه إلي. هذا اسمه نقد علمي!

رح نزّل بوست فيه أسماء ٩٢ معارض أنا شايف إنن بيفهمو، رغم إنو ما بيعرفو يميزو بين الإنزيم والباذنجان. بس عالقليلة، خطّن حلو ومنسّق، وبيستخدمو إيموجيز بذكاء.

الخلاصة؟
بدنا نفكر بعقل، بس نحلم بجرأة.
وهون بحب ذكّر الجميع إنو التنوين بالشامي بيجي عآخر الألف، مو قبل بحرف.
يعني “باحثاً” مو “باحثن”، رجاءاً.