27/08/2026
Soo koobid dulucda gabayga "Xiin finiin" ee abwaan Sayid Maxamed Cabdulle Xasan.
si guud gabaygani waa warcelin ku saabsan nin abwaanka waydiistay faras uu aad u jeclaa isla jeerkaana aanu rabin inuu bixiyo kaasi oo calmaday faraskaas Xiin finiin la odhan jiray ka dib markii rag ay Sayidka is hayeen kusoo direen iyagoo raba inay isku diraan sayidka iyo ninkaa faraska waydiistay oo uu inan ka qabay.
Haddaba abwaanku waxa uu ninkii isu raaciyay gabaygan iyo faraskii uu rabay. Abwaanku waxa uu u sheegayaa ninkaa xushmadda iyo qaddarinta uu u hayo isagoo Sayidku isku tilmaamay marka h**eba inuu ahaa nin gobonimo badan balse uu isaga si gaara u xurmayn jiray wax walbana uu la jeclaa inuu u dhammaystiro haddii ay tahay yarad, haddii ay tahay waxsiin xigaal, mid xididnimo iyo mid kaleba. Balse waxa uu tilmaamayaa inaanu ka filayn halkaa uu taabtay oo ah inuu waydiisto faraskaa uu aadka u jeclaa Sayidku ee Xiin finiin, isagoo hoosta ka xarriiqay inaanu cid dunida korsaaran siiyeen haddii wax waliba dhacaan maadaama neefkani uu ahaa mid uu jacayl gaara u qabay hawlo badan oo ay ka mid yihiin dagaalo, safarro, sahamin, in wixii laga dhaco uu kusoo ceshto iyo qaar kaloo badana uu ku qaban lahaa.
Waxa uu tilmaamayaa in faraskan diinta Alle mooyee wixii kaloo dhan uu ka dooran lahaa tanoo muujinaysa heerka uu faraskaasi u joogay. Waxaana uu ku darayaa in uu dareensan yahay in dhabarka laga soo daabtay oo gacan kale ay dhexdooda ku jirto taasina ay keentay inuu faraskaa xusho.
Ugu danbayn waxa uu gudagalayaa guddoonsiin iyo inuu faraskii soo wareejiyay sidaana uu ku haysto faraskii uu calmaday ciddii uu usoo dirayna ay u keeni doonto isagoo iska fogaynaya in haddii faraskaa uu quudhi waayo in lagu canaanto ama lagu caayo. Waxaana uu kula dardaarmayaa inuu faraskaasi yahay mid noolaha kale uga duwan cid aan isaga ahayna aanu siin lahayn haddii wax waliba dhacaan, balse mar haddii isaga oo ah suldaan ay xididnimo iyo xigaalnimo isku leeyihiin uu sidaa awgeed kusiiyay maanta laga bilaabona uu isagu xoolaystay.
Gabayguna waa kan:
Xayow Faaraxow hadal rag waa, loo xutubiyaaye
Nin xishood leh baan ahay haddaan, lay xistiyahayne
Xabiib baan ahaa jeer kufriga, laygu xaasidaye
Adna xaashi baad iila timid, xaakin soo diraye
Xaddigii adduunyada haddaad, xoolo iga dooni
Marna anigu kaama xistiyeen, xaalaad leedahaye
Inaan kuu xaf gooyaan jeclaa, geel xawaar badane
Kumanyaal xawaadaan lahaa, xawd u sii mariye
Markaad Xiin Finiin damacday baan, kaa xanuunsadaye
Walaalow xirgiga qaarkii waa, lagu xujoobaaye
Waxaan kugu xutubiyaaba waa, xuuradaan nahaye
Nin kalaan xafiilaba adaan, xayda kaa rogaye
Xigto iyo qaraabiyo hadduu, xidid i weydiisto
Xayow iyo qayuumeey haddii, la igu xoodaansho
Xubigayga kuma hayn inaan, xiisow bixiyaaye
Xamar weeye oo midab fardood, kala xariir roone
Xawaariyo kabtiyo raaxo iyo, xawli iyo jeefag
Xaggii loo eryaba waa gammaan, xulashadiisiye
Xubna toosanlow neefku waa, xaalad gooniya e
Goortaan xusuus ula noqdaa, xiisa ii qabanne
Waxaan xarafka diimeed ahayn, igaga xeel dheere
Xarbaddiyo jihaadkaan lahaa, xoogsi ugu fuule
Isagaan xatooyada lahaa, xuurta ugu looge
Xiniinyaha ku goo baan lahaa, gaalka xaylka lehe
Xayskaa da’aayaan lahaa, Xallin ka dooyeeye
Xaqaygii maqnaa baan lahaa, xag ugu raacdeeye
Meesha iyo xeebtaan lahaa, xiito ka eryoode
Xujey-reebta Reer Hagar anoon, xabashyadii ruubin
Xinjoortoda dhiigga leh haddaan, lagu xaraaraysan
Xaaqaamaquuqiyo haddaan, xaaluf laga yeelin
Xiddaysane ma dhiibeen anoon, xaaladday bogane
Xaaraami unbaa arlada, xula abidkiise
Wax unbay xushleeyaan sidii, Xabashi Iidoore
Aniguna xogtaydaan ka baqi, inay xumeeyaane
Xaashaa Lillaahiye nin gob ah, xamasho waw ceebe
Goorteer anoo xaajiyaan, xinif awoodayne
Intii aniga lay xaman lahaa, xil iga soo meerye
Aduu galabta kuu xoolo yahay, Xamarkii dheeraaye
Waa Xiin Finiin neefka aad, xadhigga haysaaye
Xayawaanka oo idil naftey, kala xaroodaane
Mar hadduu suldaan igu xil lihi, igaga xayddaabtay
Xadhiggiisa qabo aadmi kale, kuma xurmeeyeene.
