24/08/2023
Mata duree Jireenya keenyaa
Nasru Kush tu barreeyse
Wlh hoggaan barreeyfama kana dubbisu ija imimmaaniin guutameen ba'aa ummaan tiyya okhaa fi matatti fuutee garaa beelaatiin guyyaa magaalaa malkaa raafuu ooltee galgala galtee osoo dadhabbii hin baafanne ganama subii waan achii fidde ba'attee amna guyyaa guutuu aduu barahaa sumaalee keeysa miilaan deemaa galgala Harbukkaale magaalaa nannoo sumaalee geeysee borummaa achitti waan geeysite gurgurattee ammaas guyyaa tokko deemaa ooltee mana keenyatti galtuun yaadadha😥😥😥 gudee tiyya waan ati naguddisuuf taate moo😥😥
Dheeratuus ... Ni dubbiftan je'eetiin yaada!
Ani ilma qotee bulaati. Joollee baadiyyaati. Jireenya keeysatti guddannee fii waan Jireenya keenya keeysatti nu mudate hin hirraanfannu. Jireenya ulfaataa fii rakkoo adda addaatiin guutame jiraachaa turre. Jireenya golgolaawaa tahuus garuu jireenya gammachuu ture. Gaafas jireenyi keenya hangam ulfaataa tahuus, nuti ulfaataa jennee hin yaannu. Jireenyi kanuma jennee hamamfanne. Arra garuu akka gaafasatiin wahi taatee xiqqo Jireenyi nama biraa maal akka fakkaatu ni agarre. Bayyanata arraa kana keeysa teenyee yeroo jireenya as dabarre yaadannu, yeroo takka ni gaddina. Yeroo biraa ammoo ni gammanna. Ifiif quuna. Silaa gaafas Jireenyi akka ammaa kana tahuu barree akkam akka taanu yaaddee? Arra keeysa teenyee yeroo if duubo deebinee Jireenya keenya kan dabre daawwitii yaadannoo gurraattii keeysatti daawwannu, waa meeqa yaadanna.
Irra hedduun keenya joollee baadiyyaati. Maatii qotee bulaa irraa dhalanne. Jireenya gaafa joollummaa keenya maatii wajjiin taligaa (itti gaafatamummaa tahe takka) bahachaa guddanne. Horii tiiysine. Re'ee bobbaafnee galchina. Bariin kaanee bishaan waraabnee aayyoo gammachiifna. Warraaf ergamaa ajaja isaaniitiif abboomaa umrii joollummaa hiriyoota jaalannu wajjiin dabarsine. Jaallan (hiriyoota) keenya wajjiin tapha joollummaa kan inuma sammuu keeysaa nun haqamne hedduutu nu dura dhufa. Jireenya ulfaataa ammallee yeroo yaadannu nu gammachiisu jiraachaa turre!
Maatiin keenya hin baranne. Ifii carraa barachuu waan hin arkatiniif nuti carraan kun akka nun dabarreef mana barnootaa akka seennu nu godhan. Uffata tokkoon waggaa tokkoofii lama deemaa guddanne. Kophee takkittii nuuf bitan dhumtee bifa dhabuu isiitu addaan nu baasa. Maatiin keenya waa qabaatanii nurraa achi kaayyatanii miti. Ifiifuu akkuma keenya! ifii beelawanii nu nyaachisan, ifii daaranii nu uwwisan. Duydaan aannan magaalaa lafa karaa dheeraa deemanii gurguranii waa maatitti bitanii galan. Cilee fii qoraan gurguranii akka na guddisan yeroon isiniif himu gammachuudhaani! Wallaahi itti hin qaanfadhu! Bakkayyu, barayyu hin dagadhu!
Maatiin keenya maatii miskiina. Maatii jaalalaa! Ifii dukkana keeysaa taa'anii akka nuti qayyabannuuf lambaa nuuf kannaa, ganamaan akka kara mana barnootaa deemnuuf biddeena duraa liqimsinee akka mana barnootaa dhaynu nu godhaa, qaceellummaa fii ilmoo gaarii akka taanuuf badii fii hammeenyarraa nu dhoorkaa, gaafa nuti baxraanne miila jala shaf nu godhaa, gorsaa fii ajaja adda addaatiin nu bira dhaabbachaa naamusaa fii amala gaariin akka guddannu nu godhan! Anilleen maatii miskiina, warra jaalalaa, maatii namaafii anaafillee yaadan, akkasumattillee dhugumaan naaf yaadanii garaa kana na booreeysaniin qaba. Aabboo kiyya Rabbiin tokkichi teeysuma tee firdoows siif haa godhu. caffee jannataa siif haa afu. Rahmanni gooftaa sibira haa guutu. Aayyoo tiyyammoo umrii tee naaf sihaa dheereeysu. Fayyaa fii umrii dheertuu naaf sihaa dhiisu. Anillee ilma akka qabu, kan osoo ati lubbuun jirtuu caayaa si teeysifatu na haa godhu. Abbaa kiyya osoon akkana je'ee yaaduutiin dhabe. Abadan aayyoo tiyya rabbiin hangaan akkaan yaadetti gammachiisuu wal nun dhoorku! Fira kiyya, Atillee haadhaa fii abbaa kee (yoo jiraatan) rabbiin siif haa dhiisu. Yoo gama fuula rabbii deeman ammoo rabbiin rahmta haa godhuuf! Osoo lubbuun jiranii isaan gammachiisuu gooytaan siif haa laaffisu!
Ee! Maatiin keenya miskiinni akka hunda tahee rabbii wajjiin guddisanii asiin nu gahan. Nu barsiisanii sadarkaa amma jirru tana akka dhaabbannu nu godhan. Arra nuti haa xiqqaatuu bakka ifaan jiru jirra. Guyyatti qarshiillee qabaachuu baannu ijaan numa agarra. Uffata bareedaa uffannee diddibanna. Nyaataa fii dhugaatii akka maatiin keenya hin nyaannee nyaanna. Jireenyi keenya kan maatii keenyaa wajjiin walfakkaataadha yoon je'e niin maqe. Maatiin keenya jireenyuma akka duraan nuti wajjiin jiraachaa turree ammaas jiraachaa jiran. Amma sa'aan barreeffama kana barreeysutti maatiin ifaa dhabaaf dukkana keeysa jiran, kan nyaata dhabaaf afatarra ciisaa jiran jiraachuu malu. Maatiin ifii hadhaa jireenyaa meeqa dhamdhamaa nu barsiisan, arraas akkasuma keeysa jiraachuutu nama gaddisiisa. Wallaahi wabillaahi anuu ifittiin gadda! Yeroon kana yaadadhu, yeroo takka takka jireenyaan jibba! An akkana keeysa jiraachaa isaan... Ati akkana keeysa jiraachaa isaan jireenya akka kalee kan nu gaddisiisu keeysa jiraachuun nama dhukkubsa!😪 Wallaahi!
"Abshir Aayyoo tiyya! Waadaan siif seena. Wallaahi! An ilmi kee yoon nama akka qabu tahe, sumarraahiin jijjiira. Osoon sin gammachiifne rabbiin adda nun baasu. Dhugaa akkaan yaade kana osoon galmaan hin geenye yoo karatti hafe, jireenya hanga darree naaf hafe gammachuun hin jiraadhu! Aayyoon tiyya gonkuma jireenya akkaan dur wajjiin jiraachaa turee arra akka jiraattu hin fedhu. Akkumaan tahu tahee, akka sanirraa numaan jijjiira" je'eetiin ifitti hima. Aayyoon garaan laafaadha. Akka kana narraa dhageeysu imimimmaan buufti. Imimmaan isii arkurra, ifumaa ifitti himee waadaa kana guutuuf tattaafachuutu irra wayyakaa! Yeroo takka takka waan garaa keeysa nu ciisaa yeroo yaadannu miira addaatu nutti dhagahama. Aniis osoon dubbadhee natti tola. Garuu hin dubbadhu! Kun barreeffama gabaabaadhaan ibsuuf ni ulfaata. Tahuus hangumaan je'uun jea je'eetiin hangana waa je'e! Niin dheereyse mii? Haayakaa, dhiifama aaddee!
Mee niin xumura. Aaddee kiyya jireenya keetii fii warra keetii walbiratti laali. Akka isaan keeysa jiranii fii akka ati keeysa jirtu walcinaa qabi. Yoo akkuma kiyyatti si gaddisiise, akkuma taateefuu taatee akka san akka irraa jijjiirtuuf waadaa seeniif. Dhugaa silaa isaantu jireenya qananii jiraachuu qabna. Isaan jireenya qananii keeysa jiraatanii gammachuun nuti yoo barbaanne jireenya dukkanaawaa akka dur san keeysa yoo jiraanne humaa! Gammachuun gammachuu caaltu, maddi gammachuu hundarra caalu gammachuu warri kee gammadaniidha. Fuula isaaniirraa gammachuu fii ifa arkuu, mararafannaan isaan siif qabaniif imimmaan siif buusuu! ... Nama kiyya, gammachuu tana arkuu rabbi (sihaa/nuhaa) milkeeysu! Isaan gammachiisee nama milkaawu nuhaa godhu! Ummii Abshir! Akkanatti hin haftu! Inshaa allaah! ...
galagala gaarii naaf qabaadhaa aaddee!❤️/// guyyaa gaarii qabaadhaa!
🙏🙏🙏
