Seminariu de Filoloxía Asturiana

AULA "INTRODUCCIÓN A LA INVESTIGACIÓN FILOLÓXICA" 2026: MATRICULACIÓN EN SETIEMBRE

L'Aula d'Estensión Universitaria "Introducción a la Investigación Filolóxica nel Ámbitu del Asturianu y del Gallego-Asturianu" va celebrase n'ochobre próximu. La matriculación va abrise en setiembre.

[Esta información atópase tamién na web del Seminariu de Filoloxía Asturiana]:

https://sfa.grupos.uniovi.es/actualidad/-/blogs/aula-introduccion-a-la-investigacion-filoloxica-2026-matriculacion-en-setiembre?_33_redirect=https%3A%2F%2Fsfa.grupos.uniovi.es%2Factualidad%3Fp_p_id%3D33%26p_p_lifecycle%3D0%26p_p_state%3Dnormal%26p_p_mode%3Dview%26p_p_col_id%3Dcolumn-1%26p_p_col_count%3D1

EL TRADUCTOR ESLEMA ABRE ESTENSIÓN EN CHROME Y FIREFOX

ESLEMA, el sistema de traducción automática castellanu-asturianu desendolcáu pola Universidá d'Uviéu a partir de la tecnoloxía Apertium, presenta 15 años depués una estensión de Chrome y Firefox.

La nueva estensión permite tanto la traducción páxina a páxina como continua, acompañando la navegación, de páxines en castellanu al asturianu.

Anque nun se trata d'un proyectu activu, trátase d'una pequeña contribución a la comunidá qu'utiliza entá güei de forma activa'l traductor.

🔗 Chrome Web Store:

https://chromewebstore.google.com/detail/hacobgkkfdbaihkbokoagmdkgocdpaad?utm_source=item-share-cb

🔗 Firefox Add-ons:

https://addons.mozilla.org/es-ES/firefox/addon/eslema-navega-n-asturianu/

Eslema — Navega n'asturianu – Consigue esta extensión para 🦊 Firefox (es-ES) Descargar Eslema — Navega n'asturianu para Firefox. Traduz páxines web del castellanu al asturianu. Basáu nel traductor Eslema (Apertium).Traduz páxines web del castellanu al asturianu automáticamente. Basáu nel motor de traducción Apertium y nel proyectu Eslema de la Universidá d'Uviéu.

ALDERIQUE SOBRE NORMATIVIZACIÓN

Un momentu del diálogu ente Tamara Flores (Universidá da Beira, Portugal) y Ramón d’Andrés (Universidá d’Uviéu) sobre’l tema «Retos y llogros nos procesos de normativizació: los casos del Val de Xálima (Estremadura) y del Principáu d’Asturies. L’actu tevo moderáu por Miguel R. Monteavaro, dientro de la serie «Diálogos sobre diversidá llingüística nel ámbitu románicu».

HOMENAXE AL ROMANISTA JOSÉ ENRIQUE GARGALLO

José Enrique Gargallo baxó al aula «Joan Maragall» de la so Facultá de Lletres, al envís, según-y dicíen con engañu, d’atender a un llingüista armeniu. Pero yera un pretestu: lo que-y aguardaba yera un homenaxe sorpresa onde lu gasayaron abondos colegues de dientro y fuera de Cataluña.

El llunes 18 de mayu celebróse na Universidá de Barcelona un merecíu homenaxe a José Enrique Gargallo Gil, catedráticu de Filoloxía Románica. Esti tributu foi iniciativa de dos colegues: l’asturiana Claudia Menéndez, de la Universidá d’Uviéu; y el gallegu Xosé Afonso Álvarez, de la Universidá d’Alcalá de Henares.

Menéndez y Álvarez caltuvieron en secreto a lo llargo d’un añu la preparación d’esti homenaxe sorpresa, nun trabayu organizativu perfectu. Unviaron mensaxes a colegues d’abondes universidaes convidándolos a sumase al homenaxe, participando nun llibru colectivu con contribuciones académiques de temes variaos.

Nel actu del pasáu 18 de mayu falaron el rector de la Universidá de Barcelona; el decanu de la Facultá de Lletres; el profesor Joan Veny, figura cimera de la llingüística catalana; la vicepresidenta del Institut d’Estudis Catalans —del que Gargallo ye miembru—, los organizadores del actu y el propiu homenaxáu. El Coru Universitariu punxo’l fondu musical a un actu perprestosu, pola trayectoria intelectual y la calidá humana del profesor Gargallo.

Hebo presencia asturiana: amás de la propia Claudia Menéndez, taben los profesores Ana María Cano, Antonio Fernández Insuela y Ramón d’Andrés.

Nel actu presentóse’l llibru colectivu fechu a escondidielles a lo llargo d’un añu. Titúlase «De l’amor per la paraula: Estudis en homenatge al professor José Enrique Gargallo Gil». Ta formáu por 43 artículos de colegues del homenaxáu que toquen asuntos de paremioloxía, fraseoloxía, etimoloxía, gramática, léxicu, dialectoloxía, toponimia, sociollingüística, onomástica, lliteratura oral y otros. Inclúi, amás, trés semblances biográfiques y personales a cargu de los organizadores y dellos amigos. Nesti llibru hai contribuciones asturianes de Claudia Menéndez, Ana María Cano, Xulio Viejo Fernández y Ramón d’Andrés.

Al mesmu tiempu, abrióse una web d’homenaxe titulada «Memòria del cor. Homenatge a José Enrique Gargallo Gil». Nella atópase’l llibru homenaxe, que se puede baxar (completu o por artículos); una galería de semeyes; semblances de colegues y amigos; y enllaces a conferencies y intervenciones diverses.

José Enrique Gargallo Gil (Puebla de Arenoso, Castellón, 1960) ye una de les figures más destacaes de la Filoloxía Románica europea. De llingua materna castellana, ye un investigador qu’escaza per toles realidaes del mundu llingüísticu románicu, con un rixu especial pola paremioloxía (estudiu de los refranes) y poles fronteres llingüístiques. Ye autor de manuales de Llingüística Románica y responsable de la dixitalización d’obres monumentales, como l’Onomasticon Cataloniae, de Joan Coromines. Conoz Asturies y aprecia la so llingua hasta’l puntu de falala. Los sos colegues asturianos tamién lu apreciamos pola so sabencia, xenerosidá y bonhomía.

●ENLLAZ A LA WEB HOMENAXE «MEMÒRIA DEL COR»
Esti ye l’enllaz:
https://memoriadelcor.org/

●CÓMO BAXAR EL LLIBRU HOMENAXE
El llibru homenaxe al profesor Gargallo puede baxase nesti enllaz:
https://memoriadelcor.org/libro/amor-paraula-viva.pdf

●CÓMO BAXAR LES CONTRIBUCIONES ASTURIANES AL LLIBRU.

–Ana María Cano González: «Posible antroponimización de dellos topónimos de noyos de población del conceyu de Somiedu (Asturies)»:
https://memoriadelcor.org/capitols/09-Cano.pdf

–Claudia Elena Menéndez Fernández: «”Rebolada, vientu o agua”: los refranes meteorolóxicos d’Asturies nel ALPI»:
https://memoriadelcor.org/capitols/30-Menendez.pdf

–Xulio Viejo Fernández: «Refranes meteorolóxicos y temporales inéditos nos archivos de Fernán-Coronas»:
https://memoriadelcor.org/capitols/43-Viejo.pdf

–Ramón d’Andrés: «El paisatge lingüístic de sis pobles fronterers entre València i Catalunya»:
https://memoriadelcor.org/capitols/16-DAndres.pdf

●SEMEYES:

–Semeyes 1 y 2. Momentu en que José Enrique Gargallo entra engañáu nel aula «Joan Maragall» de la Facultá de Lletres de Barcelona, pensando que tien qu’atender a un llingüista armeniu.

–Semeya 3. Claudia Menéndez, profesora de la Universidá d’Uviéu y coorganizadora del homenaxe, esplica nun perfectu catalán los detalles del llibru homenaxe.

–Semeya 4. Los organizadores del actu, Claudia Menéndez y Xosé Afonso Álvarez, entréguen-y el llibru homenaxe a José Enrique Gargallo.

–Semeya 5. El decanu de la Facultá de Lletres da-y la palabra al profesor José Enrique Gargallo.

[Esta información atópase tamién na web del Seminariu de Filoloxía Asturiana]:

https://sfa.grupos.uniovi.es/actualidad

L’ASTURIANU Y LA FALA DE XÁLIMA

En requexu noroccidental de la provincia de Cáceres fálase una modalidá peculiar de gallegoportugués: la fala del valle de Xálima, nos pueblos de Sa Martín de Trevellu, Valverdi du Fresnu y As Ellas.

Presentada por GONZALO LLAMEDO, TAMARA FLORES ―llingüista xalimega que trabaya na Universidá da Beira (Portugal)― va esplicar qué ye la fala de Xálima y qué situación sociollingüística tien.

Darréu, xunto con RAMÓN D’ANDRÉS, de la Universidá d’Uviéu, van entamar un alderique sobre los procesos de normativización llingüística, a partir de les esperiencies de Xálima y d’Asturies; modera MIGUEL R. MONTEAVARO.

L’actu faise na mañana del 25 de mayu na Sala de Conseyos del Departamentu de Filoloxía Clásica y Románica (1er. pisu de la Facultá de Filosofía y Lletres, Campus de Santuyano o Milán, Uviéu).

ENTRADA LLIBRE.