Política Llingüística Principáu d'Asturies

El vienres 18 tenemos la última actuación de les qu'opten al VIII Premiu Nel Amaro, Formigues, d' Elektra Fiktion, una historia prestosa pa tolos públicos con un mensaxe sobre la individualidá y lo colectivo. Esperámosvos cola reciella nel Teatru Filarmónica a les 18:30 h.

El vienres pasáu Higiénico Papel Teatro representó Gasolina con capullos con bien d'éxitu de públicu nel Filarmónica. Yá namás queda conocer a les Formigues d'Elektra Fiktion, última obra de competición d'esti certame Nel Amaro 2024, que va actuar el vienres 18 a les 18:30. ¡Una obra pa venir colo más pequeñino de la casa!

Daniel García Granda resultó ganador del Premiu «Florina Alías» a la meyor traducción al asturianu por En llucha incierta, la so traducción de la obra del Premiu Nobel John Steinbeck In Dubious Battle. El xuráu destacó la riqueza y la versalidá de la llingua qu'usa'l traductor, que se desenvuelve en una variedá de rexistros, y el retratu que fai d'una cara menos conocida de la sociedá americana, la de los trabayadores del campu. ¡Norabona!

Esti vienres 11 a les 20:00 h. sal a escena nel Teatru Filarmónica'l tercer finalista del Premiu Nel Amaro: Higiénico Papel Teatro, con Gasolina con capullos, escrita por Chechu García y Roberto Corte y protagonizada por Carla Loga y Sidahmed Matala. Un drama onde nun falten toques d'humor sobre la soledá y la incomprensión. Entrada llibre.

Norabona a Xandru Martino Ruz, ganador del II Premiu «Pachín de Melás» de Testos Teatrales cola obra «Subpayaria», una comedia d'enriedu qu'ironiza sobre'l grandonsimu asturianu y otros grandonismos igual de tóxicos.

Ayeri presentóse'l programa del III Reguerada Fest, la feria anual qu'axunta a les empreses, l'ociu y la cultura qu'usa la llingua asturiana como forma d'espresión. Esti añu son 22 les empreses que participen, y la programación abarca actividaes pa tou tipu de públicu a lo llargo del fin de selmana.
Más información: https://politicallinguistica.asturias.es/-/el-iii-reguerada-fest-va-celebrase-en-cand-c3-a1s-del-11-al-13-d-ochobre?redirect=%2F

Esti vienres, a les 20:00 h, La Compañía del Alba va representar nel Teatru Filarmónica «Perendi», una comedia negra escrita por Milio Rodríguez Cueto y protagonizada por Carlos Alba Cellero, Carmen Gloria y Cova Lobos. Entrada llibre
Más información: https://politicallinguistica.asturias.es/perendi

Persones de toles edaes disfrutaron esti vienres cola primer representación del VIII Festival Nel Amaro nel Teatru Filarmónica: Amanda y les castañes máxiques, d' AMBIGÚ MEDIA BROADCAST. ¡Nun pierdas les vinientes!

Mañana, martes 30 d'abril, siguen les celebraciones de la Selmana de les Lletres con dos actividaes bien prestoses d'entrada llibre y gratuita nel Muséu de Belles Artes d'Asturies (Uviéu).
A les 18 h va facese una visita guiada a la esposición «Conceyu Bable y l'arte asturianu contemporaneu», y a les 19 h va poder sentise l'homenaxe poéticu-musical al Nueu Canciu Astur con Xaime Martínez y la Familia tradicional, Mapi Quintana, L-R y l'actriz Izar Gayo, que va recitar poemes d'autores de la primer xeneración del Surdimientu.

Yá llega la 45 Selmana de les Lletres con un garrapiellu d’actos d’homenaxe a Conceyu Bable pa recordar l’Asturies de va mediu sieglu y el camín andáu dende entós pola sociedá asturiana.
El llunes 29 d’abril a les 12:00 arranca oficialmente la selmana na Biblioteca de Asturias "Ramón Pérez de Ayala" (Uviéu) cola proyección del documental «Conceyu Bable: entamar los llabores de la casa». Amás, nesi mesmu sitiu va inaugurase la muestra «50 aniversariu de Conceyu Bable. Esposición de materiales», que va poder vese hasta’l 12 de mayu.
El documental tamién va poder vese al otru día, el martes 30, pela RTPA.
Pela tarde, a les 19:00, preséntase nel RIDEA la obra conmemorativa «Conceyu Bable. El frutu y la semiente», cola intervención de Paco Álvarez, Arantza Margolles Beran y Ramón d'Andrés Díaz. Nel actu va repartise a les persones asistentes un exemplar d’esti llibru, que tamién va regalase cola compra d’un llibru o discu n’asturianu nes llibreríes collaboradores el vienres día 3.

El Gobiernu d'Asturies fai homenaxe a Conceyu Bable na 45 Selmana de les Lletres Asturianes, que se va desenvolver del 29 d'abril al 8 de mayu. Esti movimientu , que tuvo un papel bien importante na defensa de la llingua y la cultura d'Asturies na transición democrática, centra la programación d'esta cuadraxésima quinta edición.
Los actos, qu'incluyen esposiciones, conciertos, meses redondes y presentaciones de llibros, amás de la entrega de premios de los certámenes escolares, van tar repartíos ente Uviéu, Xixón, A Veiga, y Corvera.

Accedi a la información detallao y descarga'l programa completu na web https://politicallinguistica.asturias.es/-/la-selmana-de-les-lletres?redirect=%2F