حضانة الطفل المسلم للغات بالشوكا

تغيير شامل في منظومة التعليم بقرارات تُعلن لأول مرة:

لو عندك طالب في أي صف دراسي أو مرحلة تعليمية اقرأ الكلام ده علشان فيه مفاجآت جديدة لازم تعرفها:

أولا: السنة الجاية لو ابنك في تانية ابتدائي أو تالتة ابتدائي هيلاقي منهج الرياضيات متغير كله.. هيلاقي منهج ياباني.. منهج الرياضيات بتاع تانية وتالتة السنادي هيتلغي كله ويتعمل مكانه منهج رياضيات جديد.. ياباني.

ثانيًا: خلال ٣ سنين من النهاردة هتتغير مناهج الرياضيات لجميع الصفوف الدراسية.. كلها هتبقى رياضيات يابانية.. من أولى ابتدائي لحد ٣ ثانوي.. بس السنة الجاية تانية وتالتة ابتدائي فقط.. وكدة كدة رياضيات أولى ابتدائي اتغيرت السنادي وبقت رياضيات ياباني.

ثالثا: العلوم والرياضيات في نظام البكالوريا هتبقى ياباني.. يعني هتلاقي رياضيات ياباني فيزياء ياباني كيمياء ياباني أحياء ياباني.. المناهج الجديدة اللي هتنزل البكالوريا ياباني.. والكلام على الصفوف الثانوية الثلاثة مش صف واحد.

رابعا: كولى امر وغيري كتير جدا كانوا اتكلموا واشتكوا من مناهج العلوم بتاعت ابتدائي.. فلو ابنك بقى رايح رابعة أو خامسة أو سادسة ابتدائي مش هيلاقي مناهج العلوم بتاعت السنادي.. هيلاقي مناهج علوم كلها ياباني.. يعني مناهج علوم جديدة بتدرس في اليابان.. هندرسها باللغة المصرية للمدارس العربي.. وباللغة الإنجليزية لمدارس اللغات (تجريبي وخاص).. بس هتتراجع مع أساتذة الجامعات المصرية لما تخلص عشان تبقى بلغة وثقافة مصرية.

خامسا: لو رايح أولى بكالوريا أو أولى ثانوي.. هتلاقي البرمجة في وشك.. على منصة يابانية.. وحتى لو رايح أولى ثانوي فني.. برضو هتدرس البرمجة.. المادة مكملة مش هتتلغي.. ده هيدخل معاها كمان مادة الثقافة المالية بس دي مفيهاش نجاح ورسوب دي مادة نشاط.. لكن مادة البرمجة أساسية ومفيهاش كتب وفيها نجاح ورسوب.

سادسا: الموضوع مش هيقف عند المناهج الياباني لكل الصفوف.. ده هيكون فيه تدريب ياباني لكل المعلمين.. تدريب لمدة سنة كاملة.

سابعا: لو ابن حضرتك في مدرسة دولية.. فهو هيكمل دراسة مواد الهوية الوطنية (التربية الدينية، واللغة العربية، والتاريخ).. المواد دي أساسية ومش هتتلغي ولا هتكون خارج المجموع.. والمدرسة اللي هتخالف هيتحفظوا عليها.

ثامنا: هتطبق البكالوريا التكنولوجية.. ودي غير البكالوريا المصرية بتاعت الثانوية العامة.. دي بكالوريا تكنولوجية فنية.. خاصة بالتعليم الفني.. ودي فيها محاولات امتحانية مختلفة ومسارات شبيهة بمسارات البكالوريا وتقدر تحسن مجموعك وكدة.. وأي طالب هيتخرج منها هيكون واخد شهادة من دولة أوروبية.. علشان المدارس التكنولوجية هتكون تحت شهادات دولية بحيث اللي يتخرج يشتغل بالشهادة الدولية.. والحكومة عايزة يكون فيه إقبال على التعليم التكنولوجي أكتر من الإقبال على البكالوريا والثانوية العامة.

ده اللي واضح للعام الدراسي المقبل من النهاردة.. واللي عرفته إن فيه مفاجآت تانية بالجملة لسه مظهرتش.

وده ملخص كلام وزير التربية والتعليم النهاردة قدام جلسة مجلس الشيوخ.

كله ياباني 🤝

مواعيد التقييم النهائى للصفين الأول والثانى الابتدائى للعام الدراسى 2025/2026 م