16/06/2026
إن لله وإن إليه راجعون
الطفله تيا احمد فؤاد لقيت مصرعها اثر سقوطها من مبنى مدرسة سما ابن خلدون للغات
نسأل الله أن يتغمدها بواسع رحمته وأن يلهم أهلها الصبر والسلوان
منقول
الطفلة تيا احمد فؤاد
٤ سنين
يوم الاتنين الموافق ١٥ يونيو
كان اول يوم للطفلة في مدرستها الجديدة سما ابن خلدون بشبرا الخيمة، المدرسة كانت عاملة اسبوعين تدريب صيفي لمجموعة اطفال ( حوالي ٧-٨ اطفال) علشان يتعودوا على المدرسة
الام سلمت الطفلة المدرسة الساعة ٩ ونص الصبح، وكانت هترجع تاخدها الساعة ٢ بعد انتهاء اليوم حسب الجدول المقرر من المدرسة
والام سلمت الطفلة في فصل مجهز للتدريب وفيه شاشة عرض للشرح للاطفال .. ومشيت بعدها
علشان تفاجئ بتليفون الساعة ١٢ ونص إن بنتها وقعت وفي المستشفى .. تجري الام على المستشفى علشان تفاجئ ببنتها شبه ميتة، والمستشفى ترفض انها تشوف بنتها تقديرا لمشاعر الام لأن البنت كانت في حالة صعبة وكسور مضاعفة في الجمجمة
المستشفى لما استقبلت البنت بلغت النيابة كإجراء طبيعي في الحالات دي، والنيابة بدأت تحقيق الفوز
تم تفريغ الكاميرات من النيابة واللي حصل كالآتي:
- الاطفال كانوا في الفصل بتاعهم وقعدوا فيه وقت قليل جدا بعدها نزلوا الدور الارضي لوقت قليل برضه، بعدها طلعوا لفصلهم تاني، والأطفال كانت طالعة لوحدها و٣ مدرسين طالعين وراهم بفترة
- البنت اول يوم ليها ومش عارفة حاجة في المدرسة فطلعت كذا دور زيادة وفاكرة إن الفصل هناك، كانت تايهة بتدور على فصلها، طلعت الدور الاخير ودخلت فصل وبعدها خرجت منه، ودخلت الفصل اللي جنبه وطلعت على دكة جنب الشباك وبصت لتحت علشان تحاول تعرف فين الاطفال وهي فين .. اختل توازنها ووقعت من الدور السادس
- طبعا وهي طالعة مفيش اي حد يقولها رايحة فين ، ولا حد من المدرسين لاحظ غيابها مع العلم إن الأطفال كلهم على بعضهم ٧ او ٨ اطفال
- البنت وقعت مباشرة على دماغها من الامام وحصل ليها كسور مضاعفة شديدة في جمجمتها
- محدش من المدرسة اتحرك وطلب الاسعاف، لكن قرروا انهم ياخدوا اغبى قرار ممكن يتاخد في حالات الكسر المضاعف. شالوها على أيديهم ومشيوا بيها في الشارع مسافة حوالي كيلو في الشمس ورجة الطريق
- طبعا ده اتسبب في مضاعفات طبية ادت انها وصلت المستشفي الخلايا الجزعية في المخ ميتة، رغم انه وباستشارة اكتر من طبيب إن لو كانت الطفلة فضلت مكانها متحركتش واتنقلت باسعاف بعد اخد الاحتياطات الطبية من تثبيت الجمجمة والجسم، كان الوضع هيكون افضل
- المدرسة مبلغتش الام الا بعد اكتر من ساعتين كاملين!!!
- المدرسة بلغت أهل البنت انها وقعت من على السلم، محدش جاب سيرة انها وقعت من الدور السادس
- المدرسة مقدرتش تراعي ٧ او ٨ اطفال !! ومفروض انهم يراعوا مئات الطلاب خلال الدراسة
- المدرسة لم تتبع ابسط إجراءات الاسعافات الاولية اللي مفروض عارفها اي شخص بيشتغل في المجال التعليمي بحكم شغله واحتكاكه باطفال
- الإهمال لم يتوقف عند الحادثة، لكن استمر بعدها بإنعدام ضمير لا متناهي وكذب واخفاء الحقيقة عن الأهل والتسبب في سوء الحالة اكتر من ما هي سيئة
- المدرسة كل اللي مهتمة بيه انهت تبرأ نفسها عن طريق الاستعانة بطقم كامل من المحاميين لمحاولة انهم يبرأوا المدرسة من المسئولية، وكأن الطفلة دي كانت في الشارع مش في مدرسة
والنتيجة، ام واب يفقدوا فلزة كبدهم واصغر ابنائهم نتيجة اهمال لا متناهي من المدرسة .. ام بتودي بنتها المدرسة بإيدها علشان ترجع تستلمها جثة من المستشفى وفي وضع حتى لا يحتمل انها تشوف بنتها فيه
نرجوا من كافة المسئولين بسرعة التحقيق واثبات الحقائق ورد حق الطفلة وتوقيع اقصى العقوبات على المتسببين في الحادث
ونسألكم الدعاء للطفلة ولأهلها بالصبر