MR Ahmed ElGaara

لو ابنك هياخد درس في مجموعة أو سنتر واحنا في موسم حجز الدروس الخصوصية للعام الدراسي الجديد

# رسائل هامة إلى كل ولي أمر :

1- انزل احجز بنفسك عند المدرسين واعرف مكان المدرس وخد تليفونه واعرف المواعيد و قيمة الشهر والمذكرات بكام بالظبط.

2- وانت بتحجز لابنك او بنتك حاول تنسق المواعيد بنفسك ..ابنك ميقدرش يستغني عن رأيك ف الموضوع ده.

3- اطلب من المدرس انه يبعتلك تقرير علي الأقل شهري بغياب الطالب ودرجاته وفلوس الشهر.

4- عايزك تبقى عارف إن مفيش مدرس بيزود فلوس الشهر و العام الدراسي شغال .. ولما ابنك أو بنتك يقولولك فيه كورس إضافي مثلا بــ 200 جنيه اتصل اسأل الاول .

5- لو فجأة ابنك أو بنتك قالولك انا طلعت من الدرس وروحت لمدرس تاني ، اتصل بالمدرس الأول و اعرف منه السبب . يمكن الغلط من عند ابنك بسبب سوء مستواه أو سلوكه .. و اتصل برده بالمدرس التاني واعرف منه المواعيد والفلوس وياريت لو تروحله وتعرف مكانه.

6- فاجئ أولادك بزيارة للمدرسين كلهم واسأل علي حضورهم وغيابهم و درجات امتحاناتهم و علاقاتهم بزمايلهم و سلوكياتهم و برده اتأكد فلوس الشهر بيدفعوها ولا لأ .

7- لما تروح للمدرسين سيب رقم تليفونك بنفسك.

9- لو ظروف حضرتك المادية ما تسمحش بدفع فلوس الشهر كاملة ومحتاج تعمل تخفيض . اطلب ده بنفسك و بعزة وكرامة .. فضلكم وخيركم كتير ع المدرسين .. و لو المدرس رفض أو كلمك وحش رد عليه الرد المناسب وخد ابنك وامشي.

10- ادي السلطة الكاملة للمدرس إنه يربّي ابنك و يعلّمه و يعاقبه لو استاهل العقاب.
...............................................

يمكن بعض منكم مش هيكون فاهم هدف النصايح دي ايه ، بس أكيد أولادكم فاهمين كويس.. واحنا كمدرسين عارفين الحاجات اللي بتحصل بحجة الحصة و بفلوس الحصة وفي وقتها.. وكتير أولياء أمور اكتشفوا مصايب بتحصل لا داعي لذكرها.

أولادكم يستاهلوا رقابة و متابعة واهتمام منكم أكتر من كده. 👌
ربنا يجبر بخاطركم جميعاً ويجعل تعبكم مع أولادكم نهايته فرحة وسعادة 🤲

والله ما كتبت البوست ده كمدرس، كتبته كأخ حاسس بالناس وباللي بتمر بيه بيوت كتير اليومين دول.

كل يوم بشوف ولي أمر شايل فوق طاقته، وأم بتجري بين شغل وبيت وتربية، وأب بيحاول يوفر لولاده كل حاجة وهو بالكاد قادر يوفّر أبسط الاحتياجات.

عشان كده هعرض ليكم القرارات اللي بمشي بيها من اول يوم في الشغلانه دي ..

1️⃣ التوأم هيدفعوا اشتراك طالب واحد.

2️⃣ الطالب اللي فقد والده أو والدته مجانا تماما

3️⃣ أبناء الأم المعيلة لهم نصف الاشتراك.

وفي طلاب هيكونوا معانا مجانًا تمامًا… لأن في ظروف مينفعش نقف قدامها ونطلب فلوس، وفي وجوه لما بشوفها بحس إن واجبي أساندها قبل ما أشرح لها.

أنا مؤمن إن ربنا هو الرزاق، وإن الطالب اللي ظروفه تمنعه من التعليم لازم يلاقي حد ياخد بإيده، مش حد يقفل الباب في وشه.

ادعوا لنا ربنا يقدرنا نكمل، ويجعلنا سببًا في الخير، ويبارك في أولادكم🤍🤍

لأن الرياضيات أساس كل تفوق... هنبسطهالك من الصفر لحد الـ 100%!
مع الأستاذ / احمد الجعاره الرياضيات مش حفظ.. الرياضيات متعة وفهم.