RST Out Box

رساله من طلبة كلية حاسبات الي دكتور/ياسمين احمد
من أكتر الشخصيات المحترمة والمؤثرة فعلًا في جامعة الريادة
🤍
دكتور ياسمين من الناس اللي وجودها بيفرق مع أي طالب، سواء بكلمة حلوة، نصيحة، أو حتى دعم بسيط في وقت ضغط.
ناس كتير لما اتعاملت معاها، فرق معاهم فعلًا سواء في المذاكرة أو حتى في طريقة تفكيرهم وتنظيم وقتهم.
دايمًا بتساعد بهدوء ومن غير ما تستنى أي مقابل، وده اللي مخلي ليها مكانة كبيرة عند الطلبة ❤️
ربنا يخليها لينا دايمًا، وبجد شكرًا على كل المجهود اللي بتعمليه
🤍

بسم الله الرحمن الرحيم
{يَا أَيُّهَا الَّذِينَ آمَنُوا لَا تَخُونُوا اللَّهَ وَالرَّسُولَ وَتَخُونُوا أَمَانَاتِكُمْ وَأَنْتُمْ تَعْلَمُونَ}
من هنا بحب أوجه الرساله ل إدارة الجامعه يمكن كنا بندعمكم طول السنين ال فاتت وشايفين أن جامعتنا مسيرها هتكبر بينا و بيكم لأن مافيش جامعه من غير طلبه ومافيش جامعه بتتبني الا بسمعتها و كلام الطلبه عليها علي السوشيال ميديا وفي ارض الواقع واحنا اكتر ناس عملنا كدا احنا اكتر ناس جبنا طلبه للجامعه واكتر ناس عملنا فديوهات للجامعه و ماركتينج بطريقه تانيه علشان بس اسم الرياده يطلع للنور و يبقي معروف في كل المحافظات لو فعلا إدراة الجامعه بتحسبها صح تشوف كانت التقديمات كام في اول السنه ولما الطلبه دخلت نفسها نسبة التقديمات زادت قد اي كان فيه سلبيات مش بنقولها وكان فيه مشاكل بينا و بين بعض مستحيل حد يعرف عنها حاجه لان كان فيه ثقه بينا و بين الإدارة اننا واثقين في المكان لأننا واثقين في كلمة الإدارة
ليه تهد الثقه ال بينا وليه تغيير في بنود الجامعه اللي المفروض انها عهد بينك وبين الطالب ويبقي في زياده ع مصاريف اداريه المتفق عليها انها ثابته حتي التخرج و ليه تخلينا مش حابين نكمل في الجامعه ليه تخلي الطلبه كلها تتكلم عن الجامعه باسلوب ميرضيش حد وبعدين تاخد إجراء تسكت بيها الطلبه بحجه انكوا ترجعوا للإدارة الاول وبعدين تيجي تحاسبهم علي كلامهم مهو طبيعي يبقي دا أقل رد فعل لينا علي قرارات زي دا
أخيراً اقول تاني و تالت و رابع اني انا واثق في إدارة الجامعه أنها هتراجع القرار أو علي الاقل توضح للطلبه سبب القرار واي المقابل ال احنا هناخده من قرار زي دا.

بسم الله الرحمن الرحيم
ربنا افتح بيننا و بين قومنا بالحق وأنت خير الفاتحين
علشان نكون من اول الموضوع لاخره واحنا معاكم و فاهمين كل حاجه ف انهارده راحت ناس مننا تتكلم مع الإدارة علشان توضحلها الصوره و حالة الرفض ال حاصله مننا علي قرار الجامعه بزيادة المصروفات الاداريه و الادراة بكل أمانة كانت متفهمه الموقف بتاع الطلبه و الأهالي و اخدنا منهم وعد أنهم هيفكرو في الكلام و يراجعوا الموضوع وان شاء الله نوصل ل حل مرضي لينا كلنا و احنا واثقين في الإدارة وانهم هيدرسو القرار تاني و يردو علينا في اقرب وقت باذن الله
طيب هوا احنا بنتكلم في فلوس؟
لا احنا مش بنتكلم في فلوس احنا بنتكلم في مبدأ و ثقه بتتهزر بين الإدارة و بين الطلبه ثقه لو اتهزت كل حاجه ممكن تقع ما بينا من اول كلام قولناه في حق الجامعه لحد اخر حاجه حصلت بينا ودا هيبقي بالسلب علينا وعلي الجامعه احنا ال بنجيب الطلبه و احنا ال بنتكلم حلو عن الجامعه واحنا ال بنساعد في ان الجامعه تتعرف و تتشهر واحنا السبب الرئيسي في اي طالب بيجي يقدم في الجامعه لأن لو الأهالي سمعت أن الجامعه بتغير كلامها أو أن الجامعه مافيهاش ثقه بين الإدارة و بين الطلبه اكيد محدش هيبقي موافق يحط ابنه في مكان زي دا ونصيحه لإدارة الجامعه حتي لو فيه خساره علي المدي القريب بس حقيقي هيا مكسب كبير علي المدي البعيد لما ترجع الثقه بينك و بين الطلبه و الأهالي تاني
واخيرا احنا واثقين ان الإدارة هتدرس القرار تاني وواثقين أنهم هيوصلوا لحل مرضي للجميع

بسم الله الرحمن الرحيم الرحيم
من المؤمنين رجال صدقو ما عاهدوا الله عليه صدق الله العظيم
كلمتين لإدارة الجامعه بنيابه عني وعن كل الطلبه
احنا لما جينا قدمنا في الجامعه كلنا سالنا عن المصاريف و المصاريف الاداريه وكان كلام الجامعه و سياستها واضحه قدام الكل وعلي كل الصفحات وكان كلامهم واضح جدا و صريح و بالفعل الكلام دا اتنفذ لمدة 3 سنين وكان الكلام واحد وعلشان كدا كنا احنا اول ناس بندافع عن الجامعه حتي لو فيه تقصير في حاجات كتير بس دايما احنا ال بندافع عن الجامعه و نعمل موتمرات وقوافل و نكتب بوستات علشان سمعة الجامعه دي هتاثر علينا بعد كدا في كنا اول ناس بندافع و نشجع الناس أنها تقدم حتي لو كنا شايفين سلبيات بس كنا بنعدي علشان دي في الاول و الاخر جامعتنا
الموضوع مش موضوع فلوس قد ما هوا موضوع مبدا بنمشي عليه و كلمه بتتقال قدام ربنا قبل ما نقولها للناس
وعلشان كدا بنعتذر اننا نكمل ف اي بوست بعد كدا يتكلم عن الجامعه واي حد يسالنا عن الجامعه احنا بنعتذر اننا نرد و بنيابه عني و عن كل اصحابي احنا مش موافقين علي القرار دا و مش موافقين عن اي كلام يتغير من إدارة الجامعه لحد ما إدارة الجامعه تراجع قرارها أو توضح للناس اي ال اتغير
واقولها تاني احنا مش بنتكلم عن فلوس احنا بنتكلم عن مبدا وكلام اتقالنا من اول يوم وعلشان كدا احنا قدمنا في الجامعه ووافقنا عن أي سلبيات شوفناها

ايدي وجعتني من كتر الريفرش