04/08/2026
يمكن يعتبر بوست فضفضة... لكنه من أكتر البوستات اللي هكتبها بصدق.
في حاجة يمكن ناس كتير متعرفهاش عني... عمري ما كنت بحب التدريس.
مش قصدي إني كنت بكرهه، لكن عمري ما شفت نفسي فيه. كنت دايمًا شايف إن ليا طريق تاني. وعشان كده، كل صيف تقريبًا كنت أتعلم مهارة جديدة وأقول: "المرة دي هخرج."
اشتغلت Graphic Designer، وبعدها Web Designer، وبعدها Motion Graphics... وكل سنة كنت مقتنع إن دي هتبقى بداية حياتي الحقيقية.
لكن كل مرة كانت المسؤوليات ترجعني لنفس المكان.
لحد من حوالي 3 سنين، قعدت مع نفسي وسألت سؤال بسيط:
هو أنا أصلًا اديت التدريس حقه؟
والإجابة كانت: لا.
أنا كنت طول الوقت بحاول أهرب منه، لكن عمري ما حاولت أبقى مميز فيه.
ومن يومها قررت أجرب حاجة مختلفة.
أول مرة أعمل إعلان لنفسي... رغم إني كنت شايف إن ده عيب.
بدأت أعمل امتحانات بعد كل حصة.
دخلت جروبات المدرسين.
ولما لقيت ناس بتطلب الامتحانات، عملت صفحة مخصوص أنزل عليها كل حاجة.
بعدها جاتلي فكرة بنك الأسئلة، وبدأت أكتب الأسئلة وأصممها بنفسي. مش عشان كنت متوقع نجاح... لكن لأني أخيرًا بقيت بعمل حاجة بحبها.
وأول مراجعة نزلتها؟
كانت من غير غلاف، ومليانة أخطاء.
لكن سبحان الله... الناس حبتها بشكل أنا نفسي مكنتش متخيله.
بدأوا يطلبوا باقي المراحل، والإجابات، والمراجعات... وكل يوم كنت بحس إن ربنا بيفتح باب جديد.
وبعد أقل من شهرين، جالي عرض أشارك في تأليف كتب.
لحد النهارده، كل ما أفتكر اللحظة دي، أقول:
هو أنا فعلًا أستحق كل ده؟
يمكن الرسالة الوحيدة اللي حابب أوصلها...
مش لازم ربنا يحققلك اللي أنت رسمته لنفسك، عشان يبقى الخير.
أنا فضلت سنين بحارب عشان أوصل لطريق معين، لكن أول ما بطلت أحارب قدر ربنا، وبدأت أخلص في المكان اللي هو اختارهولي... حياتي اتغيرت.
اعمل اللي عليك بصدق...
واتعب...
وطور نفسك...
وسيب النتيجة على ربنا.
لأن أوقات كتير، الرزق اللي ربنا مخبيهولك بيكون في المكان اللي كنت بتحاول تهرب منه.
